Sira fó sira-nia an ho hakarak rasik​—iha rai-Ekuadór

IRMAUN joven ida iha rai-Itália, naran Bruno, nia presiza halo desizaun importante ida kuandu nia foin ramata eskola sekundária. Tanba nia mak alunu neʼebé matenek liu hotu, ninia família no mestre sira dehan katak nia tenke bá universidade. Maibé tinan balu antes neʼe, nia dedika tiha ona ninia an ba Jeová hodi promete katak nia sei tau uluk Jeová nia hakarak iha ninia moris. Entaun, desizaun saida mak Bruno halo? Nia dehan: “Haʼu hatete ba Jeová liuhusi orasaun katak haʼu sei moris tuir haʼu-nia dedikasaun no tau uluk Jeová iha haʼu-nia moris. Maibé, haʼu mós koʼalia nakloke ba Jeová katak haʼu lakohi haʼu-nia moris sai baruk, haʼu-nia hakarak mak atu iha moris neʼebé nakonu ho atividade oioin iha ninia serbisu.”

 Tinan balu liu tiha, Bruno muda ba rai-Ekuadór, iha Amérika Súl. Nia hatete: “Jeová hatán haʼu-nia orasaun iha dalan neʼebé diʼak liu fali buat neʼebé haʼu uluk hakarak.” Kuandu nia toʼo iha rai-Ekuadór, nia hakfodak tanba iha ona irmaun-irmán joven barak neʼebé muda ba rai neʼe atu aumenta sira-nia serbisu ba Jeová.

JOVEN SIRA NEʼEBÉ ‘KOKO JEOVÁ’

Bruno no mós joven barak iha mundu tomak simu Jeová nia konvite neʼebé dehan: “Favór ida, koko haʼu bá . . . se haʼu sei la loke ba imi odamatan bee nian iha lalehan no haʼu loloos sei fakar bensaun ba imi.” (Mal 3:10) Tanba sira-nia domin ba Maromak, sira foti desizaun atu ‘koko Jeová’ hodi fó sira-nia tempu, forsa no osan ho sira-nia hakarak rasik atu haklaken iha rai neʼebé presiza haklaken-naʼin barak liután.

Kuandu sira muda ba rai neʼebé presiza haklaken-naʼin, sira rasik haree kedas katak “toʼos boot duni, maibé serbisu-naʼin uitoan”. (Mt 9:37) Porezemplu, irmán Jaqueline husi rai-Alemaña hakerek surat ba sukursál Ekuadór, hodi dehan: “Haʼu serbí iha Ekuadór foin tinan rua, maibé haʼu iha ona estudu Bíblia 13, husi sira, naʼin-haat mak tuir reuniaun beibeik. Ida-neʼe diʼak tebes, loos ka lae?” Irmán Chantal husi rai-Kanadá hatete: “Iha tinan 2008, haʼu muda ba área besik tasi iha Ekuadór neʼebé iha kongregasaun ida deʼit. Maibé agora, iha área neʼe iha kongregasaun tolu no pioneiru naʼin-30 liu. Hodi haree ema foun barak neʼebé laʼo ba oin, ida-neʼe  halo haʼu kontente tebes!” Nia mós hatutan: “Foin lalais, haʼu muda ba sidade ida besik foho neʼebé aas toʼo metru 2.743 iha área Foho Andes. Maski sidade neʼe iha ema naʼin-75.000 liu, maibé iha kongregasaun ida deʼit. Iha área neʼe, ema barak gosta rona ba lia-loos! Haʼu kontente tebes atu haklaken.”

HASORU SUSAR OIOIN

Klaru katak irmaun-irmán sira neʼebé serbí iha rai seluk hasoru susar oioin. Tuir loloos, sira balu hasoru susar antes sira atu bá rai seluk. Porezemplu, irmán Kayla husi rai-Estadus Unidus hatete: “Irmaun-irmán balu iha haʼu-nia rai fó-hatene katak haʼu labele muda ba rai seluk. Sira la komprende tansá mak haʼu hakarak halo serbisu pioneiru iha rai seluk.” Nia hatene katak sira hadomi nia, maibé buat neʼebé sira hatete halo nia laran-tun. Dala ruma, nia hanoin: ‘Desizaun neʼebé haʼu sei halo loos ka laloos?’ Maski nuneʼe, Kayla halo desizaun atu muda ba rai seluk. Nia hatete: “Hodi halo orasaun beibeik ba Jeová no koʼalia ho irmaun-irmán sira neʼebé iha esperiénsia, ida-neʼe ajuda haʼu atu hatene katak Jeová sei ajuda ema neʼebé prontu atu serbí nia ho laran.”

Ema barak mós hasoru susar atu aprende língua foun. Irmán Siobhan husi rai-Irlanda hatete: “Foufoun, susar ba haʼu atu hatete sai haʼu-nia hanoin. Haʼu tenke iha pasiénsia, badinas estuda língua foun, no hamnasa kuandu haʼu koʼalia sala.” Irmán Anna husi rai-Estónia mós hatete: “Haʼu presiza sai toman ho rai-manas, rai-rahun barak, no la iha bee-manas atu hariis, maibé susar liu ba haʼu mak aprende língua españól. Dala ruma, haʼu sente atu rende an deʼit. Haʼu aprende atu la hanoin kona-ba koʼalia sala, maibé kona-ba oinsá haʼu laʼo ba oin.”

Buat ida seluk neʼebé halo susar ba irmaun-irmán sira mak hanoin demais kona-ba família no kolega neʼebé sira husik iha sira-nia rai. Irmaun Jonathan husi rai-Estadus Unidus hatete: “Lakleur depois haʼu muda tiha, haʼu sente triste tanba haʼu dook husi haʼu-nia kolega no família. Maibé, buat neʼebé ajuda haʼu atu la sai triste demais mak hodi tau haʼu-nia atensaun ba estuda Bíblia mesak no haklaken. Iha serbisu haklaken haʼu hasoru ema diʼak no haʼu mós hetan kolega foun iha kongregasaun, ida-neʼe halo haʼu sente kontente fali.”

Susar seluk ida tan ba irmaun-irmán sira mak kona-ba moris iha situasaun neʼebé la hanesan ho sira rasik nia rai. Irmaun Beau husi rai-Kanadá hatete:  “Iha haʼu-nia rai, eletrisidade lakan hela deʼit no bee husi torneira mós sai hela, buat sira-neʼe hanesan baibain deʼit. Maibé iha neʼe fali, buat sira-neʼe dala ruma iha no dala ruma la iha.” Iha rai barak, ema kiak, la hatene lee, no iha mós problema kona-ba transporte. Irmán Ines husi rai-Áustria nia tahan situasaun susar hanesan neʼe hodi tau ninia atensaun ba ema nia hahalok diʼak. Nia dehan: “Sira ema neʼebé laran-diʼak, laran-maus, prontu atu ajuda malu no haraik-an. Buat neʼebé haʼu gosta liu kona-ba sira mak sira hakarak tebes atu aprende kona-ba Maromak.”

BENSAUN TOʼO “LA KURAN BUAT IDA”

Maski irmaun-irmán joven sira-neʼe hasoru susar oioin no halo sakrifísiu barak iha rai-Ekuadór, sira sente katak Jeová fó sira “barak liu fali” buat neʼebé sira hein atu simu. (Ef 3:20) Tuir loloos, sira sente katak sira simu bensaun toʼo “la kuran buat ida”. (Mal 3:10) Mai ita haree oinsá mak sira sente kona-ba serbisu haklaken:

Bruno: “Kuandu haʼu mai toʼo Ekuadór, haʼu haklaken iha área Amazona. Depois neʼe, haʼu halo serbisu atu haluan uma sukursál Ekuadór. Agora, haʼu serbí iha Betel. Uluk iha rai-Itália, haʼu foti desizaun atu tau uluk Jeová iha haʼu-nia moris, no nia ajuda duni haʼu atu iha moris neʼebé nakonu ho atividade oioin iha ninia serbisu.”

Beau: “Iha Ekuadór haʼu uza haʼu-nia tempu hotu atu halo serbisu ba Jeová, ida-neʼe halo haʼu hakbesik liután ba Jeová. Liután neʼe, Jeová mós fó oportunidade diʼak ba haʼu atu halo buat ida neʼebé haʼu sempre hakarak atu halo, neʼe mak halo viajen ba fatin oioin neʼebé kapás tebes.”

Anna: “Uluk haʼu hanoin katak haʼu nuʼudar feto-klosan la bele halo serbisu hanesan misionáriu. Maibé agora haʼu hatene katak haʼu bele. Ho Jeová nia bensaun, haʼu kontente tebes atu hanorin lia-loos ba ema seluk, harii Reuniaun-Fatin, no hetan kolega foun barak.”

Elke: “Uluk iha rai-Áustria, dala barak haʼu husu Jeová nia ajuda atu iha estudante Bíblia maski ho ema ida deʼit. Maibé iha neʼe fali, haʼu iha estudu Bíblia 15! Kuandu haʼu haree estudante sira neʼebé laʼo ba oin iha lia-loos ho oin kontente, ida-neʼe halo haʼu haksolok tebes.”

Joel: “Muda ba fatin foun atu serbí Jeová, neʼe mak esperiénsia kapás tebes. Ita aprende atu tau fiar liután ba Jeová, no ita bele haree oinsá mak nia fó bensaun ba ita-nia hakaʼas-an! Husi tempu neʼebé haʼu foin mai husi rai-Estadus Unidus, iha tinan ida nia laran deʼit, haklaken-naʼin iha grupu neʼebé haʼu serbí aumenta husi naʼin-6 toʼo 21. No ema naʼin-110 mak mai tuir Memoriál.”

OINSÁ HO ITA?

Irmaun-irmán joven sira, se imi-nia situasaun diʼak, imi bele bá serbí iha rai seluk neʼebé presiza haklaken-naʼin barak liután ka lae? Klaru katak antes atu foti desizaun boot hanesan neʼe, imi presiza halo planu ho didiʼak. Imi mós presiza iha domin boot ba Jeová no ba ema seluk. Se imi iha domin boot hanesan neʼe no tuir kritériu atu bá serbí iha rai seluk, entaun, halo orasaun ba Jeová ho laran kona-ba neʼe. Liután neʼe, koʼalia kona-ba imi-nia hakarak ho inan-aman no katuas sira iha kongregasaun. Se imi halo nuneʼe, karik imi mós bele haksolok hodi serbí Jeová iha rai seluk.

[Liafuan neʼebé foti husi pájina 3]

“Hodi halo orasaun beibeik ba Jeová no koʼalia ho irmaun-irmán sira neʼebé iha esperiénsia, ida-neʼe ajuda haʼu atu hatene katak Jeová sei ajuda ema neʼebé prontu atu serbí nia ho laran.”​—Kayla husi rai-Estadus Unidus

[Kaixa/Dezeñu iha pájina 6]

Oinsá atu prepara an atu serbí iha rai seluk

• Sai toman atu estuda Bíblia mesak

• Haree fali Ita-nia Serbisu Kristaun, Agostu 2011, pájina 4-6

• Koʼalia ho sira neʼebé iha esperiénsia kona-ba serbí iha rai seluk

• Buka-hatene kultura no istória kona-ba rai neʼebé ita atu bá

• Tuir kursu kona-ba língua

[Kaixa/Dezeñu iha pájina 6]

Sira balu neʼebé serbí iha rai seluk moris ho osan neʼebé sira hetan hodi . . .

• fila ba sira-nia rai tinan-tinan hodi halo serbisu ba fulan balu

• fó aluga sira-nia uma

• entrega sira-nia negósiu ba ema seluk

• halo serbisu liuhusi internét

[Dezeñu iha pájina 4]

1 Jaqueline husi Alemaña

2 Bruno husi Itália

3 Beau husi Kanadá

4 Siobhan husi Irlanda

5 Joel husi Estadus Unidus

6 Jonathan husi Estadus Unidus

7 Anna husi Estónia

8 Elke husi Áustria

9 Chantal husi Kanadá

10 Ines husi Áustria