“Imi sei simu bensaun ba imi-nia hahalok”

LIURAI ASA lori ninia tropa liuhusi foho-leet Judeia nian hodi tun ba rai-tetuk besik tasi-ibun. Kuandu sira toʼo tiha iha fatin luan neʼebé sira bele hateke dook, Asa para. Nia sai hakfodak ho buat neʼebé nia haree. Nia haree tropa rihun ba rihun neʼebé harii sira-nia tenda iha kraik! Tuir loloos, tropa Etiópia neʼe hamutuk ema naʼin-1.000.000. Maibé, Asa nia tropa fali maizumenus naʼin-580.000 deʼit.

Agora, Asa tenke halo funu. Entaun, iha situasaun hanesan neʼe, saida mak nia halo uluk? Nia fó kedas mandamentu ruma ba ninia komandante sira? Nia fó aten-brani ba ninia tropa? Nia haruka lia-menon ruma ba ninia família? Lae! Iha susar laran neʼe, buat neʼebé nia halo uluk mak orasaun.

Antes atu koʼalia kona-ba Asa nia orasaun no buat neʼebé akontese iha tempu neʼebá, mai ita haree uluk Asa mak ema oinsá. Tanbasá mak nia halo uluk orasaun? Nia iha razaun diʼak atu hein katak Maromak sei ajuda nia ka lae? Saida deʼit mak ita bele aprende husi Asa nia istória kona-ba oinsá Jeová fó bensaun ba ninia atan sira?

ASA MAK EMA OINSÁ?

Durante tinan ruanulu depois nasaun Israel fahe tiha ba parte rua, adorasaun falsu sai nakonu iha nasaun Judá. Kuandu Asa sai liurai iha tinan 977 molok Kristu, situasaun mak aat tebes toʼo ema-boot sira iha governu mós adora maromak falsu sira husi rai-Kanaan. Maibé, Bíblia hatete katak Asa “halo buat neʼebé diʼak no loos iha Jeová, ninia Maromak nia matan”. Asa “halakon altár husi maromak rai seluk nian no fatin aas sira no harahun fatuk-riin lulik sira no hatohar ai-riin lulik sira”. (2 Crôn 14:2, 3) Nia mós duni sai “mane sira neʼebé faʼan an iha templu laran”, neʼebé halo hahalok omoseksuál nuʼudar parte husi adorasaun, hodi hasai sira husi rai-Judá. Asa la halakon deʼit buat aat sira-neʼe, maibé nia mós haruka povu atu “buka Jeová, sira-nia beiʼala nia Maromak ho sira-nia laran tomak” no mós atu halo tuir Ninia “ukun-fuan no mandamentu”.—1 Reis 15:12, 13; 2 Crôn 14:4.

Tanba Asa hatudu laran-manas ba adorasaun neʼebé loos, Jeová haraik bensaun ba Asa hodi fó dame iha ninia ukun ba tinan barak. Kona-ba neʼe, Liurai Asa hatete: “Ita buka Jeová, ita-nia Maromak. Ita buka ona nia, no nia halo ita hetan dame iha fatin hotu husi inimigu sira.” Ida-neʼe fó oportunidade ba povu atu hametin moru iha sidade sira iha Judá atu sai seguru liu. Bíblia hatete katak “sira kontinua harii no hetan susesu”.—2 Crôn 14:1, 6, 7.

IHA FUNU LARAN

Asa hatene katak Jeová sempre haraik bensaun ba ema neʼebé hatudu fiar ba nia liuhusi hahalok. Tan neʼe, Asa halo kedas orasaun hodi husu Jeová nia ajuda kuandu nia hasoru tropa barak, sin, barak liu duké ema nia tropa sira seluk neʼebé temi iha Bíblia laran. Asa hatene katak se nia tau fiar ba Maromak, nia sei manán inimigu naran deʼit maski inimigu neʼe barak ka forsa tebes. Tanba funu neʼe mós envolve Jeová nia naran, Asa husu Jeová hodi dehan: “Ajuda ami, oh, Jeová, ami-nia Maromak, tanba ami sadere ba Ita, no hodi Ita-nia naran mak ami mai atu kontra hasoru ema-lubun neʼe. Oh, Jeová, Ita mak ami-nia Maromak. Labele husik ema sai forsa liu Ita.” (2 Crôn 14:11) Liafuan neʼe hanesan nia dehan: ‘Jeová, ema Etiópia sira mai ataka  Ita-Boot. Favór ida, labele husik ema sira neʼebé fraku atu hafoʼer Ita-nia naran hodi manán ami neʼebé lori Ita-nia naran.’ Ikusmai, “Jeová manán ema Etiópia sira iha Asa nia oin no iha Judá nia oin, no ema Etiópia sira halai”.—2 Crôn 14:12.

Ohin loron, ita nuʼudar Jeová nia atan luta hasoru inimigu barak neʼebé iha forsa boot. Klaru katak ita la halo funu hodi foti kilat ruma. Maibé, ita bele fiar katak Jeová sei ajuda ninia atan sira hotu atu manán funu iha dalan espirituál hodi lori ninia naran. Karik ita funu hasoru mundu nia hanoin neʼebé sala, ita rasik nia fraku, ka buat neʼebé bele estraga ita-nia família nia relasaun ho Maromak. Maski ita hasoru susar oioin hanesan neʼe, ita bele hetan laran-manas husi Asa nia orasaun. Asa rekoñese katak kuandu nia manán funu, Jeová mak manán. Ida-neʼe hatudu katak se ita tau fiar ba Jeová, nia mós sei ajuda ita. Sin, Jeová mak iha forsa boot liu hotu.

HETAN LARAN-MANAS NO AVIZU IDA

Kuandu Asa fila fali husi funu, nia hasoru profeta Azarias. Azarias fó laran-manas no mós fó avizu ida ba Asa no ninia povu, hodi dehan: “Rona haʼu, oh, Asa, no Judá no Benjamim hotu! Jeová hamutuk ho imi se imi hatudu katak imi hamutuk ho nia; no se imi buka nia, nia sei halo imi hetan nia, maibé se imi husik nia, nia sei husik imi. . . . Sai aten-brani bá no keta husik imi-nia liman sai kbiit-laek, tanba imi sei simu bensaun ba imi-nia hahalok.”—2 Crôn 15:1, 2, 7.

Liuhusi liafuan sira-neʼe, ita bele hametin ita-nia fiar katak Jeová sei hamutuk ho ita se ita serbí nia ho laran-metin. No kuandu ita husu Jeová nia ajuda, nia rona ita. Azarias mós hatete: “Sai aten-brani bá.” Dala barak ita presiza aten-brani atu halo buat neʼebé loos, maibé ita bele halo nuneʼe ho Jeová nia ajuda.

Asa nia avó-feto naran Maaca halo estátua ba ai-riin lulik, tan neʼe Asa tenke hatún Maaca husi ninia pozisaun aas iha liurai nia uma-laran, maski la fasil atu halo ida-neʼe. Asa mós sunu Maaca nia estátua. (1 Reis 15:13) Jeová haraik bensaun ba Asa tanba ninia hahalok neʼebé hatudu laran-metin no aten-brani. Nuneʼe mós ho ita, maski ita-nia família halo tuir Jeová ka la halo tuir, ita presiza kaer metin ba Jeová no ninia matadalan. Se ita halo nuneʼe, Jeová sei fó bensaun ba ita-nia hahalok neʼebé hatudu laran-metin.

Bensaun ida neʼebé Asa simu mak nia rasik haree ema Israel barak husi nasaun parte norte muda ba rai-Judá. Ema sira-neʼe haree katak Jeová hamutuk ho Asa. Maski sira-nia nasaun husik ona Jeová, maibé sira hafolin tebes adorasaun neʼebé loos no prontu atu husik sira-nia hela-fatin rasik atu bele hela hamutuk ho Jeová nia atan sira. Ho ida-neʼe, Asa no povu Judá haksolok hodi halo aliansa atu “buka Jeová, sira-nia beiʼala nia Maromak ho sira-nia laran tomak”. Ida-neʼe lori rezultadu saida? Maromak “husik sira hetan nia; no Jeová kontinua halo sira hetan dame iha fatin hotu husi inimigu sira”. (2 Crôn 15:9-15) Ohin loron, ita mós sente kontente tebes kuandu haree ema laran-moos sira hili atu adora Jeová.

Maski nuneʼe, profeta Azarias nia liafuan mós iha avizu ida. Nia dehan: “Se imi husik [Jeová], nia sei husik imi.” Avizu neʼe kona mós ba ita hotu. Ita lakohi duni atu Jeová husik ita tanba ida-neʼe bele  lori rezultadu neʼebé aat tebes! (2 Ped 2:20-22) Bíblia la esplika tanbasá mak Jeová fó avizu neʼe ba Asa, maibé Asa la halo tuir.

“Ó HALO BUAT NEʼEBÉ BEIK”

Kuandu Asa ukun besik tinan 36 ona, Liurai Baasa husi nasaun Israel iha parte norte komesa halo buat neʼebé kontra hasoru Asa. Baasa halo seguru liu sidade Ramá neʼebé besik fronteira, dook kilómetru 8 husi Jerusalém. Nia halo ida-neʼe karik tanba nia lakohi ninia povu atu bá serbí Jeová no apoia Asa. Kuandu Asa hasoru situasaun ida-neʼe, duké buka Maromak nia ajuda hanesan nia halo iha tempu uluk kuandu hasoru tropa Etiópia, nia buka ema nia ajuda. Asa haruka prezente ba liurai iha rai-Síria hodi husu atu ataka parte norte iha nasaun Israel. Kuandu ema Síria ataka Israel, Baasa husik sidade Ramá.—2 Crôn 16:1-5.

Jeová la kontente ho Asa no nia haruka profeta Hanani atu fó sai kona-ba neʼe. Tuir loloos, Asa labele haluha oinsá mak Jeová ajuda nia iha tempu uluk kuandu nia hasoru ema Etiópia sira, no katak Jeová nia “matan hateke bá-mai iha rai hotu atu hatudu ninia forsa hodi ajuda sira neʼebé fó sira-nia laran tomak ba nia”. Karik Asa halo tuir ema nia konsellu neʼebé la diʼak, ka nia sente katak nia bele rezolve problema neʼe ho ninia forsa rasik tanba Baasa no ninia tropa ladún lori ameasa boot. Maski ita la hatene ho loloos razaun saida mak Asa halo hanesan neʼe, maibé nia tuir ema nia hanoin no la sadere ba Jeová. Tan neʼe, profeta Hanani hatete: “Ó halo buat neʼebé beik kona-ba neʼe, nuneʼe husi ohin ba oin sei iha funu hasoru ó.”—2 Crôn 16:7-9.

Rona tiha neʼe, Asa sai hirus tebes no hatama profeta Hanani iha dadur laran. (2 Crôn 16:10) Karik Asa halo nuneʼe tanba nia hanoin: ‘Haʼu laran-metin ba Jeová kleur ona, tansá mak haʼu tenke simu dixiplina neʼe?’ Karik ninia hanoin mós sai menus tanba nia sai katuas. Bíblia la fó-hatene kona-ba neʼe.

Kuandu Asa ukun besik tinan 39 ona, nia hetan moras boot iha ain. Maibé, Bíblia hatete katak “nia la buka Jeová maibé buka ema kuradór sira”. Karik iha tempu neʼebá, Asa nia relasaun ho Jeová la metin ona hanesan uluk. No karik ida-neʼe kontinua toʼo nia mate. Asa mate kuandu nia ukun besik tinan 41.—2 Crôn 16:12-14.

Maski Asa halo sala balu, nia hatudu hahalok diʼak barak hodi defende adorasaun neʼebé loos. Nia nunka para atu serbí Jeová. (1 Reis 15:14) Entaun, saida deʼit mak ita bele aprende husi ninia istória? Istória neʼe hanorin ita katak ita tenke hanoin-hetan kona-ba oinsá mak Jeová ajuda ona ita iha tempu uluk, tanba hodi halo nuneʼe bele book ita atu husu Jeová nia ajuda kuandu ita hasoru susar seluk tan. Ita mós labele hanoin katak ita la presiza atu simu konsellu husi Bíblia tanba ita serbí Jeová ho laran-metin kleur ona. Maski ita iha esperiénsia barak ka uitoan, maibé se ita halo sala, Jeová sei fó dixiplina mai ita. No ita presiza simu ida-neʼe ho haraik-an atu bele hetan rezultadu diʼak. Liután neʼe, ita mós aprende katak ita-nia Aman iha lalehan sei hamutuk ho ita se ita hamutuk ho nia. Jeová nia matan hateke bá-mai iha mundu tomak hodi buka ema neʼebé laran-metin ba nia, no nia uza ninia forsa atu proteje sira. Jeová halo nuneʼe ba Asa, no Nia mós bele halo hanesan neʼe mai ita.

[Liafuan neʼebé foti husi pájina 9]

Jeová sei ajuda ninia atan sira atu manán funu iha dalan espirituál

[Liafuan neʼebé foti husi pájina 10]

Ita presiza aten-brani atu halo buat neʼebé loos iha Jeová nia matan