Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Armagedon mak dezastre neʼebé ema hamosu ka lae?

Lae. Bíblia hanorin katak Maromak sei la husik ema atu estraga mundu. Bíblia hatete katak Jeová la kria rai “ho saugati deʼit”. Tuir loloos, “nia halo mundu hodi ema hela iha mundu neʼe”. (Isa 45:18)—1/4, pájina 4.

Se ita-nia inan ka aman la adora Jeová, oinsá mak ita bele laran-metin nafatin ba Jeová?

Maromak haruka labarik sira atu halo tuir inan-aman, tan neʼe ita mós presiza halo tuir ita-nia inan-aman. Maibé, se ita-nia inan-aman haruka ita atu halo buat ruma neʼebé Maromak bandu, ita bele esplika ba sira tanbasá ita labele halo ida-neʼe. Ita labele bosok, naʼok, ka halo buat naran deʼit neʼebé Maromak hatete katak sala, maski ema sé deʼit hatete ba ita atu halo ida-neʼe. Se ita halo tuir Maromak, ita halo buat neʼebé loos.—1/4, pájina 23.

Sansão nia fuuk mak fó forsa ba nia ka lae?

Sansão nia fuuk laʼós buat neʼebé fó forsa ba nia. Ninia fuuk reprezenta ninia relasaun espesiál ho Maromak nuʼudar ema nazireu. Kuandu Dalila tesi tiha Sansão nia fuuk, nia lakon relasaun espesiál neʼe.—15/4, pájina 9.

Atu serbí Jeová ho laran tomak, buat tolu saida mak ita presiza halo?

(1) Han ai-han diʼak. Ita presiza han ai-han neʼebé diʼak atu bele iha saúde neʼebé diʼak. Hanesan neʼe mós, ita presiza iha toman neʼebé diʼak atu han ai-han espirituál. (2) Halo treinu. Hodi hola parte beibeik iha serbisu haklaken ho laran-manas, ita bele iha saúde neʼebé diʼak iha dalan espirituál. (3) Ransu ho ema neʼebé diʼak. Atu hamenus ita-nia estrese, ita presiza ransu ho ita-nia maluk kristaun sira neʼebé hanoin ita.—15/4, pájina 16.

Kuandu hatoʼo diskursu kona-ba ema kristaun ida neʼebé mate, tanbasá mak eskritura iha Salmo 116:15 labele uza ba ema mate neʼe?

Eskritura neʼe dehan: “Se ema sira neʼebé laran-metin ba Jeová mak mate, ida-neʼe folin-boot iha ninia matan.” Liafuan neʼe nia arti mak Maromak hafolin tebes ninia atan sira hotu neʼebé laran-metin nia moris, no tan neʼe nia sei la husik ninia atan sira nuʼudar grupu ida atu lakon mohu iha mundu neʼe.—15/5, pájina 22.

Kolportór mak ema hanesan saida?

Antes tinan 1931, liafuan “kolportór” uza ba ema neʼebé ohin loron bolu nuʼudar pioneiru.—15/5, pájina 31.

“Ukun sira-neʼe hotu” neʼebé temi iha Daniel 2:44 mak kona-ba saida?

Neʼe mak kona-ba ukun ka governu sira neʼebé reprezenta parte oioin husi estátua boot neʼebé Daniel esplika.—15/6, pájina 17.

Bainhira mak Bretaña ho Estadus Unidus Amérika sai ukun boot númeru hitu hanesan Bíblia fó-hatene nanis?

Ukun boot númeru hitu neʼe mosu kuandu Bretaña no Estadus Unidus serbisu hamutuk iha dalan neʼebé espesiál durante Funu Mundiál Primeiru.—15/6, pájina 19.