1. “Ema-lubun boot” iha esperansa atu hetan saida?

HANOIN toʼok kona-ba buat diʼak hotu neʼebé ema bele hetan husi liurai diʼak nia ukun durante tinan rihun ida nia laran. Ida-neʼe mak buat furak neʼebé “ema-lubun boot” sei hetan depois sira liu “terus makaʼas”, ka terus boot, neʼebé sei halakon mundu aat neʼe.—Apok 7:9, 14.

2. Durante tinan 6.000 nia laran, susar saida deʼit mak ema hasoru?

² Durante tinan 6.000 nia laran, ema koko atu ukun an rasik, maibé ida-neʼe lori susar no terus barak ba ema hotu. Husi tempu uluk, Bíblia hatete: “Ema ukun ema toʼo nia hetan susar.” (Ecle 8:9) Saida deʼit mak akontese daudauk? Iha funu, ema kiak, moras oioin, ema estraga ambiente, tempu udan no bailoro sai runguranga, no iha mós problema seluk tan. Ukun-naʼin sira ohin loron fó avizu katak se ema la halo mudansa boot kona-ba sira-nia toman aat, lakleur, rezultadu mak situasaun iha mundu neʼe sei sai aat liután.

3. Saida mak Kristu nia Ukun ba Tinan Rihun Ida sei halo?

³ Iha Maromak nia Ukun nia okos, Liurai Jesus Kristu ho ninia maluk naʼin-144.000 neʼebé ukun hamutuk ho nia sei hadiʼa buat aat hotu neʼebé kona ema no mundu neʼe. Kristu nia Ukun ba Tinan Rihun Ida neʼe sei kumpre buat neʼebé Maromak Jeová promete nanis ona hodi dehan: “Haʼu halo lalehan foun no rai foun, no buat uluk nian sei la hanoin-hetan fali, no sei la mosu tan iha ema nia laran.” (Isa 65:17) Iha tempu neʼebá, saida deʼit mak sei akontese? Entaun, mai ita koʼalia kona-ba buat furak balu neʼebé Bíblia promete nanis ona, neʼebé ita seidauk “bele haree”, ka sei akontese iha futuru.—2 Kor 4:18.

4. Ohin loron iha problema saida deʼit kona-ba hela-fatin?

⁴ Ita hotu hakarak iha uma rasik hodi hela hakmatek no sente seguru hamutuk ho ita-nia família. Maibé, ohin loron iha problema oioin kona-ba hela-fatin. Ema barak hela iha uma neʼebé rabat malu no iha mós ema neʼebé hela iha uma neʼebé halo deʼit ho sasán neʼebé ema seluk soe. Ba ema barak, iha uma rasik mak mehi deʼit.

5, 6. (a) Oinsá mak liafuan iha Isaías 65:21 no Miquéias 4:4 sei sai loos? (b) Atu bele hetan bensaun furak neʼe, ita presiza halo saida?

⁵ Iha Maromak nia Ukun nia okos, ema hotu sei iha uma rasik. Profeta Isaías hatete: “Sira sei harii duni uma no hela, sira sei kuda toʼos-uvas no han nia fuan.” (Isa 65:21) Maibé, ita-nia esperansa laʼós deʼit atu iha uma rasik. Tuir loloos, ema barak iha ona sira-nia uma rasik, no balu iha uma-mutin. Maski nuneʼe, sira laran-susar katak aban bainrua ekonomia sei sai aat derrepente no lakon uma, ka naʼok-teen sei tama. Sin, situasaun iha mundu foun sei sai oin-seluk duni! Profeta Miquéias hatete: “Sira sei tuur duni iha sira ida-idak nia ai-uvas nia okos, no ninia ai-figeira nia okos, no sei la iha ema ida neʼebé halo sira taʼuk.”—Miq 4:4.

⁶ Atu bele hetan bensaun furak neʼe, ita presiza halo saida? Klaru katak ita hotu presiza hela-fatin. Maski nuneʼe, duké hakaʼas an atu iha uma neʼebé diʼak ka debe osan barak atu halo nuneʼe, diʼak liu atu ita tau ita-nia esperansa ba buat neʼebé Jeová promete. Hanoin toʼok kona-ba Jesus nia liafuan, neʼebé dehan: “Asu-fuik iha luhan, manu sira iha lalehan iha knuuk; maibé Oan-Mane la iha fatin atu sadere nia ulun bá.” (Lc 9:58) Jesus bele deʼit harii uma neʼebé diʼak tebes. Maibé, tanbasá mak nia la halo nuneʼe? Tanba nia lakohi buat ida atu hanetik nia atu tau Jeová nia hakarak uluk iha ninia moris. Ita mós bele halo tuir Jesus nia ezemplu no hakaʼas an atu tau ita-nia atensaun ba buat neʼebé importante liu hodi la hanoin demais ka laran-susar kona-ba rikusoin mundu neʼe nian.—Mt 6:33, 34.

7. Jeová nia hakarak ba ema no animál mak saida?

⁷ Kuandu Jeová kria buat hotu-hotu, nia kria ema ikus. Iha tempu neʼebá, Jeová hatete ba ninia Oan neʼebé serbí nuʼudar Badain: “Mai ita halo ema tuir ita-nia ilas, hanesan ita, no husik sira domina ikan iha tasi no manu sira iha lalehan no animál maus sira no mundu tomak no animál hotu neʼebé dolar iha rai leten.” (Gên 1:26) Sin, Jeová nia hakarak mak atu Adão ho Eva no ema hotu atu tau matan ba animál no domina sira.

8. Ohin loron, animál sira bele hatudu hahalok saida deʼit?

⁸ Maibé, ema bele domina duni animál hotu no iha relasaun diʼak ho sira ka lae? Ema barak gosta atu hakiak animál hanesan asu no busa. Maibé, oinsá ho animál fuik sira? Sientista sira neʼebé estuda kona-ba animál fuik hatete katak animál mamíferu sira, neʼebé hahoris oan no fó-susu oan, sira iha sentimentu. Klaru katak,  kuandu sira hetan perigu ruma, sira sai taʼuk ka siʼak. Maibé sira mós bele iha domin ka lae? Sientista sira-neʼe mós hatete katak animál sira-neʼe hatudu duni domin ba sira-nia oan.

9. Ita bele hein mudansa saida kona-ba animál sira iha futuru?

⁹ Kuandu ita lee iha Bíblia katak ema ho animál sei iha dame, ita la presiza hakfodak. (Lee Isaías 65:25. *) Tanbasá? Hanoin toʼok, kuandu Noé ho ninia família sai husi arka depois Rai-Nabeen, Jeová hatete ba sira: “Kriatura hotu iha mundu . . . sei nafatin taʼuk ba imi.” Ohin loron, animál barak taʼuk no halai-sees husi ema atu proteje sira-nia moris. (Gên 9:2, 3) Maibé, Jeová bele hasai taʼuk neʼe husi animál sira hodi kumpre ninia hakarak uluk nian ba ema no animál. (Os 2:18) Sin, iha mundu foun, ema ho animál hotu sei moris haksolok!

10. Tanbasá mak ita-nia matabeen tun?

¹⁰ Kuandu Salomão haree “hahalok hotu neʼebé hanehan ema, neʼebé akontese iha loro-matan okos”, nia dehan: “Haree! matabeen husi ema neʼebé hetan terus, maibé sira la iha ema ida neʼebé fó kmaan ba sira.” (Ecle 4:1) Ohin loron mós ita iha situasaun hanesan ka aat liu. Dala ruma ita hotu matabeen tun. Maski ida-neʼe bele akontese tanba ita kontente, maibé baibain ita-nia matabeen tun tanba ita sente triste no laran-susar.

11. Istória husi Bíblia saida deʼit mak book ita-nia laran?

¹¹ Mai ita hanoin fali istória balu husi Bíblia kona-ba ema neʼebé tanis. Porezemplu, kuandu Sara mate ho tinan 127, “Abraão hakbesik hodi hakilar no tanis tanba Sara”. (Gên 23:1, 2) No mós, kuandu Noemi fó adeus ba ninia feto-foun naʼin-rua neʼebé sai faluk ona, sira “tanis ho lian makaʼas”. (Rute 1:9, 14) Kuandu Liurai Ezequias hetan moras boot besik atu mate, nia halo orasaun ba Maromak no “komesa tanis makaʼas”, no ida-neʼe book Jeová atu kura nia. (2 Reis 20:1-5) No mós, istória kona-ba apóstolu Pedro neʼebé nega Jesus book ita hotu nia laran. Kuandu Pedro rona manu kokoreek, nia ‘sai ba liʼur no tanis ho neon-sala’.—Mt 26:75.

12. Oinsá mak ema bele hetan kmaan iha Kristu nia Ukun?

¹² Ema hotu kona susar no dezastre maski kiʼik ka boot, tan neʼe ita hotu presiza hetan kmaan. Bíblia promete katak iha Kristu nia Ukun ba Tinan Rihun Ida, Maromak “sei hamaran [ema] nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona”. (Apok 21:4) Sin, iha mundu foun, ema sei la tanis tan ka laran-susar, maibé laʼós neʼe deʼit, Maromak promete katak nia mós sei halakon mate. Oinsá mak ida-neʼe sei akontese?

13. Husi tempu neʼebé Adão halo sala, ema nia situasaun sai oinsá?

¹³ Husi tempu neʼebé Adão halo sala, mate mak sai hanesan liurai neʼebé ukun ema hotu, no inimigu boot neʼebé ema sala-naʼin la bele sees. Mate neʼe lori susar no terus barak ba ita. (Rom 5:12, 14) Tanba “taʼuk mate”, ema rihun ba rihun sai “atan iha sira-nia moris tomak”.—Ebr 2:15.

14. Kuandu Maromak halakon mate, ida-neʼe sei lori rezultadu saida deʼit?

 ¹⁴ Bíblia hatete kona-ba tempu neʼebé Maromak sei halakon mate nuʼudar “funu-balun ikus”. (1 Kor 15:26) Ida-neʼe sei lori bensaun ba grupu rua. “Ema-lubun boot” neʼebé moris daudauk sei tama iha mundu foun hodi moris ba nafatin. Ema barak neʼebé mate ona sei moris hiʼas fali. Hanoin toʼok oinsá “ema-lubun boot” sei sente kuandu simu fali ema neʼebé moris hiʼas. Sira sei sente kontente tebes, loos ka lae? Kuandu ita lee istória husi Bíblia kona-ba moris-hiʼas, ida-neʼe ajuda ita atu hatene oinsá ita sei sente iha mundu foun.—Lee Marcos 5:38-42; Lucas 7:11-17.

15. Ita sei sente oinsá kuandu hasoru filafali ho ita-nia família ka belun neʼebé moris hiʼas fali?

¹⁵ Kuandu Jesus fó moris-hiʼas ba ema, sira hotu neʼebé haree ida-neʼe “hakfodak no bilán tebetebes” hodi sai kontente, no “hahiʼi Naʼi Maromak”. Se ita mós hamutuk ho sira iha tempu neʼebá, karik ita mós sente hanesan neʼe. Sin, kuandu ita hasoru filafali ho ita-nia família ka belun neʼebé foin moris hiʼas fali, ita sei hakfodak no haksolok tebetebes. Jesus dehan: “Oras toʼo daudaun wainhira sira hotu neʼebé iha rate laran sei rona nia lia, no . . . sei saʼe ba moris-hiʼas.” (Joao 5:28, 29) Maski ita seidauk haree buat hanesan neʼe akontese, maibé kuandu ita haree duni ho ita-nia matan, ida-neʼe sei sai buat neʼebé kapás tebes.

16. (a) Tanbasá mak ita presiza koʼalia ho laran-manas kona-ba bensaun sira neʼebé ita seidauk haree? (b) Oinsá mak apóstolu Paulo fó laran-manas ba ninia maluk kristaun sira?

¹⁶ Loos duni, ema neʼebé hatudu laran-metin nafatin ba Jeová iha tempu susar neʼe sei hetan futuru neʼebé kapás tebes! Maski ita seidauk hetan bensaun sira-neʼe, maibé hodi hanoin kona-ba buat sira-neʼe bele ajuda ita atu tau uluk buat neʼebé importante liu iha ita-nia moris no la husik buat ida iha mundu neʼe atu dada ita-nia atensaun husi ida-neʼe. (Lc 21:34; 1 Tim 6:17-19) Tan neʼe, diʼak atu ita koʼalia ho laran-manas kona-ba ita-nia esperansa kuandu ita estuda Bíblia ka halaʼo adorasaun nuʼudar família, kuandu ita hamutuk ho ita-nia maluk kristaun sira, no kuandu ita koʼalia  ba ita-nia estudante Bíblia no ba ema neʼebé hakarak hatene liután kona-ba Bíblia. Hodi halo nuneʼe ajuda ita atu hametin ita-nia esperansa iha ita-nia neon no laran. Ida-neʼe mak buat neʼebé apóstolu Paulo halo atu fó laran-manas ba ninia maluk kristaun sira. Ninia liafuan ajuda sira atu hanoin ho klaru kona-ba Kristu nia Ukun ba Tinan Rihun Ida nia rohan. Entaun, mai ita buka-hatene kona-ba Paulo nia liafuan iha 1 Korinto 15:24, 25, 28.—Lee.

17, 18. (a) Iha tempu uluk liu, oinsá mak Jeová sai “buat hotu” ba ninia kriasaun hotu? (b) Saida deʼit mak Jesus sei halo atu Jeová nia kriasaun hotu bele hetan fali dame no unidade?

¹⁷ Ikusliu, buat neʼebé furak liu sei akontese. Maromak mak sei sai “buat hotu ba ema hotu”. Ida-neʼe katak sá? Hanoin toʼok kona-ba tempu uluk liu kuandu Adão ho Eva sei iha jardín Eden nuʼudar ema neʼebé perfeitu. Iha tempu neʼebá, sira parte husi Jeová nia família neʼebé iha dame ho unidade iha rai no lalehan, no Jeová nuʼudar Ukun-Naʼin neʼebé Boot Liu Hotu mak ukun ninia kriasaun tomak, inklui anju no ema. Sira bele koʼalia rasik ho Jeová, adora nia, no simu bensaun husi nia. Sin, iha tempu uluk liu, Jeová mak “buat hotu” ba ninia kriasaun hotu.

¹⁸ Maibé, kuandu Satanás book ema atu kontra hasoru Jeová, rezultadu mak ida-neʼe estraga ema hotu nia relasaun diʼak ho Nia. Maibé husi tinan 1914, Jesus nia Ukun halo daudauk buat oioin hodi Jeová nia kriasaun hotu bele hetan fali dame no unidade. (Ef 1:9, 10) Durante Kristu nia Ukun ba Tinan Rihun Ida, buat furak barak neʼebé ita seidauk haree sei sai realidade. Depois, “rohan sei mosu mai”. Neʼe katak Kristu nia Ukun ba Tinan Rihun Ida sei toʼo rohan. Saida mak sei akontese iha tempu neʼebá? Maski Jesus simu “kbiit tomak iha lalehan no rai”, nia la foti an hodi hanoin atu hadau Jeová nia pozisaun. Duké halo nuneʼe, Jesus ho haraik-an sei “saran reinu ba Aman Maromak”. Sin, Jesus sempre uza ninia pozisaun espesiál no kbiit ba “Maromak nia glória”.—Mt 28:18; Flp 2:9-11.

19, 20. (a) Oinsá mak ema neʼebé iha Maromak nia Ukun nia okos sei hatudu katak sira simu Jeová nia direitu atu ukun? (b) Iha futuru, ita sei haksolok ho saida deʼit?

¹⁹ Iha tempu neʼebá, ema hotu neʼebé iha Maromak nia Ukun nia okos sei sai ona ema neʼebé perfeitu. Hodi halo tuir Jesus nia ezemplu, sira mós ho haraik-an simu Jeová nia direitu atu ukun, no sei hatudu hakarak neʼe hodi tahan hasoru Satanás nia babeur ba dala ikus. (Apok 20:7-10) Liutiha neʼe, ema ho anju sira neʼebé kontra hasoru Jeová sei la iha tan ba nafatin. Neʼe mak tempu neʼebé ita hotu sei haksolok tebes! Sin, Jeová nia família hotu iha lalehan no rai sei kontente atu fó hahiʼi ba Jeová, neʼebé sai “buat hotu” ba ninia kriasaun hotu.—Lee Salmo 99:1. *

²⁰ Kuandu ita hanoin kona-ba bensaun sira neʼebé ita sei simu iha Maromak nia Ukun nia okos, ida-neʼe ajuda ita atu hakaʼas an hodi halo tuir Maromak nia hakarak. Ida-neʼe mós book ita atu la husik buat ida iha Satanás nia mundu neʼe dada ita-nia atensaun hodi hanetik ita atu kontinua serbí Jeová. Hodi hanoin kona-ba bensaun sira neʼebé ita sei hetan iha futuru, ida-neʼe hametin ita-nia hakarak atu apoia Jeová nia direitu atu ukun, loos ka lae? Entaun, liuhusi ita-nia hahalok, mai ita hatudu katak ita hakarak duni atu halo nuneʼe ba nafatin. Hodi nuneʼe, ita sei bele moris haksolok ho dame laʼós ba tinan rihun ida deʼit, maibé ba nafatin!