Haburas hahalok haraik-an
“Ida neʼebé kiʼik liu iha imi-nia leet, nia mak boot liu.”—LC 9:48.
1, 2. Konsellu saida mak Jesus fó ba apóstolu sira? Tanbasá mak nia halo nuneʼe?
IHA tinan 32, bainhira Jesus iha Galileia, problema ida mosu entre apóstolu sira. Livru Lucas hatete: “Sira hahú haksesuk malu kona-ba sé mak boot liu iha sira leet. Hatene tiha sira-nia hanoin, Jesus kaer labarik ida, tau nia iha nia sorin, hodi dehan ba sira: ‘Ema neʼebé simu labarik neʼe iha haʼu-nia naran, simu haʼu; no ema neʼebé simu haʼu, nia simu Ida neʼebé haruka haʼu mai. Basá ida neʼebé kiʼik liu iha imi-nia leet, nia mak boot liu.’” (Lc 9:46-48) Nuneʼe, ho pasiénsia, Jesus hanorin ho klaru ba ninia apóstolu sira katak importante duni atu sira haraik an ba malu.
2 Jesus nia konsellu atu sai ema neʼebé kiʼik liu, ida-neʼe hanesan ho ema judeu sira-nia hanoin kona-ba neʼe iha tempu neʼebá ka lae? Lae. Livru ida (Theological Dictionary of the New Testament) hatete katak importante ba ema judeu sira iha tempu uluk atu hatene sé mak iha pozisaun neʼebé boot liu, no sira hanoin beibeik kona-ba hatudu respeitu ba ema tuir ema ida-idak nia pozisaun. Tan neʼe, Jesus fó konsellu ba ninia apóstolu sira atu hadook an husi hahalok neʼebé ema baibain hatudu.
3. (a) Sai “ida neʼebé kiʼik liu” katak sá? Tanbasá mak dala ruma susar atu halo ida-neʼe? (b) Iha lisaun neʼe, ita sei buka-hatene resposta ba pergunta saida deʼit kona-ba haraik-an?
3 Liafuan gregu neʼebé tradús nuʼudar “ida neʼebé kiʼik liu” iha arti ema neʼebé haraik-an, la importante, ka la iha pozisaun boot. Hodi uza labarik kiʼik ida nuʼudar ezemplu, Jesus hanorin apóstolu sira katak sira presiza hatudu haraik-an. Ita ema kristaun neʼebé loos ohin loron mós presiza halo tuir konsellu neʼe hanesan apóstolu sira iha tempu uluk. Maibé, iha situasaun balu, karik susar ba ita atu haraik an hodi sai ema neʼebé kiʼik liu fali ema seluk. Tanba ita ema sala-naʼin, fasil deʼit atu sai foti-an no buka oin. Liután neʼe, ita moris iha mundu neʼebé nakonu ho ema neʼebé hanoin an deʼit no buka atu kontrola ema seluk. Entaun, saida deʼit mak bele ajuda ita atu haburas hahalok haraik-an? Oinsá mak “ida neʼebé kiʼik liu” bele sai “boot liu”? Iha situasaun saida deʼit mak ita presiza hakaʼas an atu haraik an ba malu?
“MATENEK WAʼIN MAROMAK NIAN KLEʼAN TEBETEBES!”
4, 5. Saida mak bele ajuda ita atu haburas hahalok haraik-an? Fó toʼok ezemplu.
4 Dalan ida atu ita haburas hahalok haraik-an mak hodi hanoin-hetan katak Maromak Jeová boot liu fali ita. Tuir loloos, “ema la bele hatene buat hotu neʼebé Maromak hatene”. (Isa 40:28) Apóstolu Paulo mós hakerek: “Rikusoi no hatene no matenek waʼin Maromak nian kleʼan tebetebes! Ita-nia hanoin la toʼo wainhira Nia tesi lia; Nia dalan ita la bele hatene!” (Rom 11:33) Husi maizumenus tinan rihun rua liubá neʼebé apóstolu Paulo hakerek liafuan neʼe, ema nia matenek kona-ba buat barak aumenta ba beibeik, maibé ninia liafuan neʼe loos duni toʼo agora. Sin, maski ita hatene ona buat barak, maibé ita iha buat barak tan neʼebé ita bele aprende kona-ba Jeová, ninia hahalok no dalan sira.
5 Porezemplu, hodi rekoñese katak ema la bele hatene buat hotu kona-ba Maromak nia kriasaun, ida-neʼe ajuda mane ida naran Leo * atu haraik an. Kuandu nia sei joven, nia gosta tebes siénsia. Tanba nia hakarak hatene buat hotu-hotu kona-ba universu, nia estuda kona-ba neʼe iha universidade. Maibé ikusmai, nia hatene katak siénsia la bele esplika buat hotu-hotu kona-ba universu iha dalan neʼebé kompletu. Tan neʼe, nia troka atu estuda fali kona-ba lei, no komesa serbisu nuʼudar advogadu no tuirmai serbisu nuʼudar juis iha tribunál. Liutiha tempu balu, nia ho ninia feen estuda Bíblia ho Testemuña ba Jeová, no depois simu tiha lia-loos, sira dedika sira-nia an ba Maromak. Maski irmaun Leo iha matenek kona-ba buat barak, saida mak ajuda nia atu hatudu haraik-an? Nia rasik hatete: “Maski ita aprende buat barak ona kona-ba Jeová no kona-ba universu, maibé sei iha buat barak neʼebé ita seidauk hatene.”
6, 7. (a) Jeová hatudu ezemplu diʼak saida kona-ba haraik-an? (b) Oinsá mak Maromak nia haraik-an halo ema sai “boot”?
6 Buat ida tan neʼebé ajuda ita atu hatudu haraik-an mak hanoin-hetan oinsá Jeová rasik hatudu haraik-an. Porezemplu, Bíblia hatete: “[Ita] mak Maromak nia maluk serbisu-naʼin.” (1 Kor 3:9, MF) Ida-neʼe hatudu katak maski Jeová mak Maromak neʼebé Boot Liu Hotu, maibé nia hafolin ita hodi fó oportunidade ba ita atu haklaken hodi uza ninia Liafuan, Bíblia. No maski Jeová mak halo fini lia-loos nian moris iha ema nia laran, maibé nia fó knaar espesiál mai ita atu serbisu hamutuk ho nia hodi “kuda” no “rega”. (1 Kor 3:6, 7) Kuandu ita hanoin didiʼak oinsá Maromak hatudu haraik-an, ida-neʼe halo ita hakfodak, loos ka lae? Jeová nia ezemplu diʼak neʼe fó laran-manas duni ba ita ida-idak atu hatudu haraik-an hanesan ema neʼebé kiʼik liu.
7 Maromak nia ezemplu kona-ba haraik-an book makaʼas David nia laran. Tan neʼe, nia kanta ba Jeová, hodi dehan: “Ita sei fó mai haʼu Ita-nia eskudu salvasaun nian, no Ita-nia haraik-an mak halo haʼu boot.” (2 Sam 22:36) David hatene katak nia bele halo buat oioin neʼebé diʼak iha rai-Israel tan deʼit Jeová mak haraik an hodi tau atensaun ba nia no ajuda nia. (Sal 113:5-7) Ita-nia situasaun mós hanesan ho David nian. Buat hotu neʼebé ita iha, hanesan hahalok diʼak, matenek ka knaar espesiál ruma, ita simu husi Jeová. (1 Kor 4:7) Razaun ida tansá ema kiʼik liu bele sai “boot” mak tanba ema hanesan neʼe bele sai Jeová nia atan neʼebé folin liután. (Lc 9:48) Entaun, mai ita haree oinsá.
‘IDA NEʼEBÉ KIʼIK LIU IHA IMI-NIA LEET MAK BOOT LIU’
8. Haraik-an bele ajuda ita atu sente oinsá kona-ba Jeová nia organizasaun?
8 Atu haksolok iha Maromak nia organizasaun no prontu atu apoia arranju sira iha kongregasaun, ita presiza duni hatudu hahalok haraik-an. Porezemplu, hanoin toʼok kona-ba feto joven ida naran Petra, neʼebé boot iha família Testemuña ida. Uluk, nia buka atu halo tuir deʼit ninia hakarak rasik, no ida-neʼe halo nia hadook an husi kongregasaun. Maibé, liutiha tinan balu, Petra komesa fali ransu ho irmaun-irmán sira iha kongregasaun. Agora, nia kontente atu hola parte iha Jeová nia organizasaun no laran-manas atu apoia kongregasaun nia arranju oioin. Saida mak ajuda nia atu troka ninia hanoin kona-ba Maromak nia organizasaun? Irmán Petra hatete katak hahalok neʼebé importante liu ba nia atu komprende no haburas mak haraik-an.
9. Ema neʼebé haraik-an halo saida kona-ba ita-nia livru sira? Tanbasá mak hodi halo ida-neʼe bele halo ita sai Jeová nia atan neʼebé folin liután?
9 Ema kristaun neʼebé haraik-an hafolin tebes buat neʼebé sira simu husi Jeová, inklui ai-han espirituál. Tan neʼe, sira badinas atu estuda Bíblia no lee Livru Haklaken no Sedarlah!. Ema hanesan neʼe iha toman atu lee livru foun neʼebé sira simu antes atu rai iha armáriu. Se ita hatudu haraik-an no hafolin ita-nia livru sira hodi lee no estuda didiʼak, ida-neʼe sei hametin ita-nia relasaun ho Jeová, no nia bele uza ita atu halo buat barak liután iha ninia serbisu.—Ebr 5:13, 14.
10. Iha dalan saida deʼit mak ita bele hatudu haraik-an iha kongregasaun laran?
10 Ema neʼebé hatudu haraik-an bele sai “boot”, ka sai Jeová nia atan neʼebé folin liután iha dalan seluk. Iha kongregasaun ida-idak iha mane sira neʼebé simu knaar liuhusi Jeová nia espíritu santu atu serbí nuʼudar katuas kristaun. Sira halo arranju oioin kona-ba reuniaun, haklaken, no kona-ba tau matan ba Maromak nia bibi sira. Kuandu ita hatudu hahalok haraik-an hodi prontu atu apoia arranju sira-neʼe, ita bele haburas haksolok, dame no unidade iha kongregasaun. (Lee Ebreu 13:7, 17.) Se Ita mak irmaun ida neʼebé serbí nuʼudar katuas ka atan ba kongregasaun, Ita hatudu haraik-an hodi hafolin knaar espesiál neʼebé ita simu husi Jeová ka lae?
11, 12. Hahalok saida mak halo ita sai folin liután iha Jeová nia organizasaun? Tanbasá?
11 Ema neʼebé haraik-an bele sai “boot”, ka folin liután iha Jeová nia organizasaun tanba hahalok haraik-an neʼe halo sira sai Maromak nia atan neʼebé diʼak. Jesus presiza fó konsellu ba ninia dixípulu sira atu hatudu haraik-an tanba sira balu iha hanoin neʼebé hanesan ho ema neʼebé foti-an iha tempu neʼebá. Tan neʼe mak sira “haksesuk malu kona-ba sé mak boot liu iha sira leet”. (Lc 9:46) Ita mós dala ruma komesa atu hanoin ka lae, katak ita mak diʼak liu fali ita-nia maluk kristaun ka ema seluk? Ema barak iha mundu neʼe hatudu hahalok foti-an no hanoin sira-nia an deʼit. Tan neʼe, mai ita hadook an husi hahalok foti-an hodi hatudu haraik-an. Se ita halo ida-neʼe no tau uluk Jeová nia hakarak iha ita-nia moris, ita-nia irmaun-irmán sira bele sente kmaan kuandu sira hamutuk ho ita.
12 Kuandu ita komprende Jesus nia konsellu atu halo ita-nia an sai ema neʼebé kiʼik liu, ida-neʼe book ita atu hatudu haraik-an iha situasaun hotu iha ita-nia moris. Agora, mai ita koʼalia kona-ba situasaun tolu.
HAKAʼAS AN ATU HATUDU HARAIK-AN
13, 14. Oinsá mak laʼen no feen bele hatudu haraik-an ba malu? Oinsá mak ida-neʼe bele ajuda moris kaben nian?
13 Iha moris kaben nian. Ohin loron, ema barak hanoin liu kona-ba sira rasik nia direitu maski dala ruma ida-neʼe bele hanetik ema seluk nia direitu. Maibé, ema neʼebé haraik-an halo tuir apóstolu Paulo nia konsellu neʼebé hakerek iha ninia karta ba ema kristaun iha Roma, neʼebé dehan: “Neʼe duni, ita buka buat neʼebé lori ba dame.” (Rom 14:19) Ema neʼebé haraik-an buka atu moris iha dame laran ho ema hotu, liuliu ho sira-nia kaben.
14 Porezemplu, dala ruma atividade halimar nian neʼebé laʼen gosta atu halo la hanesan ho buat neʼebé ninia feen gosta. Karik laʼen gosta tuur hakmatek iha uma laran hodi lee livru, maibé feen gosta bá han iha liʼur ka vizita kolega sira. Se laʼen hatudu haraik-an hodi hanoin uluk buat neʼebé ninia feen hakarak duké buka deʼit atu halo buat neʼebé nia rasik hakarak, ida-neʼe halo fasil ba feen atu hatudu respeitu ba ninia laʼen, loos ka lae? Iha parte seluk, se feen la hanoin an deʼit maibé hanoin mós buat neʼebé ninia laʼen hakarak, ida-neʼe book nia laʼen atu hadomi no hafolin liután nia. Se feen no laʼen hatudu haraik-an ba malu, sira-nia relasaun nuʼudar kaben-naʼin sei sai metin liután.—Lee Filipe 2:1-4.
15, 16. Iha Salmo 131, David fó laran-manas ba ninia maluk sira atu halo saida? Oinsá mak ita bele halo ida-neʼe iha kongregasaun?
15 Iha kongregasaun. Ema barak iha mundu neʼe buka buat neʼebé lori haksolok kedas ba sira-nia an. Ema hanesan neʼe la iha pasiénsia no lakohi hein kleur atu hetan buat neʼebé sira hakarak. Maibé kuandu ita haburas hahalok haraik-an, ida-neʼe ajuda ita atu hein ba Jeová no tau fiar ba nia. (Lee Salmo 131:1, 3. *) Hodi haraik an no hein ba Jeová, ida-neʼe lori bensaun barak mai ita no ajuda ita atu moris kontente no hakmatek. Tan neʼe mak David fó laran-manas ba ninia maluk Israel sira atu hein ho pasiénsia ba Maromak!
16 Kuandu ita ho haraik-an hein ba Jeová, ita mós bele sente hakmatek. (Sal 42:5) Porezemplu, karik Ita hakarak serbí nuʼudar katuas kristaun hodi bele halo serbisu barak liután iha kongregasaun. (1 Tim 3:1-7, MF) Klaru katak ho espíritu santu nia ajuda, Ita presiza hakaʼas an atu haburas hahalok neʼebé tuir kritériu atu sai katuas iha kongregasaun. Maibé, oinsá se Ita sente katak Ita hein kleur liu fali irmaun seluk atu hetan knaar neʼe? Ema kristaun neʼebé haraik-an hein ho pasiénsia no kontinua serbí Jeová ho laran-haksolok hodi prontu atu halaʼo knaar naran deʼit neʼebé sira simu.
17, 18. (a) Se ita prontu atu husu deskulpa no mós fó perdua ba ema seluk, ida-neʼe bele lori rezultadu saida? (b) Iha Provérbios 6:1, 3 fó konsellu mai ita atu halo saida?
17 Ita-nia relasaun ho ema seluk. Buat ida neʼebé susar ba ema barak mak atu husu deskulpa. Maibé, Maromak nia atan sira hakaʼas an atu hatudu haraik-an hodi prontu atu rekoñese sira-nia sala no husu deskulpa ba ema seluk. Sira mós prontu atu fó perdua ba ema seluk nia sala. Hahalok foti-an halo ema hadook malu no hirus malu, maibé hodi prontu atu fó perdua, ida-neʼe ajuda ita atu haburas dame iha kongregasaun laran.
18 Dala ruma ita mós presiza haraik an hodi husu deskulpa. Porezemplu, dala ruma ita la konsege kumpre ita-nia liafuan tanba situasaun ruma hanetik ita. Iha situasaun hanesan neʼe, ema kristaun neʼebé haraik-an hanoin uluk kona-ba nia rasik nia sala no prontu atu rekoñese ida-neʼe duké fó-sala ba ema seluk.—Lee Provérbios 6:1, 3. *
19. Tanbasá mak ita agradese ba konsellu husi Bíblia atu haburas hahalok haraik-an?
19 Ita agradese tebes ba konsellu diʼak husi Bíblia atu haburas hahalok haraik-an! Maski dala ruma ita sente susar atu hatudu haraik-an, maibé hodi hanoin kona-ba oinsá Maromak boot liu fali ita no hodi hanoin-hetan oinsá Jeová rasik hatudu haraik-an, ida-neʼe book ita atu hatudu haraik-an. Kuandu ita halo nuneʼe, ita bele sai Jeová nia atan neʼebé folin liután. Tan neʼe, mai ita hakaʼas an atu haburas hahalok haraik-an.
^ par. 5 Naran sira laʼós naran neʼebé loos.
^ par. 15 Salmo 131:1, 3: “1 Oh, Jeová, haʼu-nia laran la foti-an, haʼu-nia matan mós la foti-an . . . 3 Husik Israel hein ba Jeová . . .”
^ par. 18 Provérbios 6:1, 3: “1 Haʼu-nia oan, se ó promete ona atu kaer responsabilidade ba ó-nia maluk nia tusan, se ó kaer liman ona ho ema neʼebé ó la koñese, . . . 3 halo hanesan neʼe, haʼu-nia oan, no salva ó-nia an, tanba ó iha ó-nia maluk nia liman ona: Bá, haraik an, no husu makaʼas ba ó-nia maluk.”
