APÓSTOLU Paulo hakerek: “Maromak nia liafuan moris no book makaʼas.” (Ebr 4:12) Ho liafuan sira-neʼe, Paulo hatudu katak Maromak nia liafuan iha forsa atu book ema nia laran no atu troka sira-nia moris.

Maibé neineik-neineik ema la haree tan Bíblia nia kbiit iha dalan hanesan neʼe. Bíblia fó-hatene nanis katak depois apóstolu sira mate, mestre bosok sira sei hatama sira-nia hanorin iha kongregasaun kristaun. (2 Ped 2:1-3) Ikusmai, ulun-naʼin relijiaun sira komesa halo ema hanoin katak Maromak nia Liafuan iha kbiit májiku nian. Profesór ida naran Harry Y. Gamble hakerek kona-ba “uza eskritura kristaun nian nuʼudar buat májiku”. Nia hatete katak maizumenus iha tinan 250, igreja nia ema-boot ida naran Origen hatete katak “rona deʼit liafuan neʼebé santu, neʼe bele fó kbiit. Se liafuan sira iha kbiit májiku nian ba ema jentiu, sá tan ho Maromak nia liafuan neʼebé hakerek iha eskritura sira”. Maizumenus husi tinan 380, mane ida naran John Chrysostom hakerek katak “se tau Evanjellu iha uma laran, diabu sei taʼuk atu hakbesik iha uma neʼe”. Nia mós hatete katak ema balu hili eskritura ruma husi Evanjellu no tara ida-neʼe iha sira-nia kakorok atu proteje sira. Profesór Gamble hatutan tan katak Igreja Katólika nia ema-boot ida naran Augustine dehan katak “kuandu ema ida ulun moras, nia bele tau Evanjellu João iha xumasu okos”. Nuneʼe, ema uza eskritura sira husi Bíblia nuʼudar buat májiku nian. Oinsá ho Ita? Ita mós haree Bíblia nuʼudar buat májiku neʼebé bele proteje Ita husi buat aat ka lae?

Ema barak mós uza sala Bíblia iha dalan seluk tan. Kuandu sira loke Bíblia no lee versíkulu neʼebé sira-nia matan haree ulukliu, sira fiar katak liafuan sira-neʼe fó matadalan neʼebé sira presiza. Porezemplu, Profesór Gamble hatete katak loron ida Augustine rona lian husi labarik ida iha ninia viziñu, no lian neʼe hatete: “Foti no lee, foti no lee.” Augustine komprende ida-neʼe katak Maromak mak haruka nia atu loke Bíblia no lee eskritura primeiru neʼebé nia haree.

Karik Ita mós koñese ema ruma neʼebé halo orasaun ba Maromak kuandu hasoru susar, no tuirmai loke Bíblia ba pájina naran deʼit, hodi fiar katak versíkulu primeiru neʼebé nia lee sei ajuda nia atu tahan hasoru ninia susar neʼe. Maski ema neʼe hakarak hetan matadalan husi Bíblia, maibé dalan hanesan neʼe mak laʼós dalan ba ema kristaun sira atu buka matadalan iha Maromak nia Liafuan. Tanbasá?

Klaru katak ema naran deʼit bele halo buat hanesan neʼe maski sira la hatene ho loloos buat neʼebé Bíblia hanorin. Maibé Jesus hanoin saida kona-ba neʼe? Jesus promete ba ninia dixípulu sira katak nia sei haruka “ksolok-naʼin, katak espíritu santu”. Nia hatutan tan katak espíritu santu neʼe ‘sei hanorin sira buat hotu-hotu, hodi halo sira hanoin fali buat tomak neʼebé nia hateten ona ba sira’. (Joao 14:26) Entaun, espíritu santu mak ajuda Jesus nia dixípulu sira atu hanoin-hetan buat neʼebé sira aprende ona husi Bíblia. Maibé oinsá mak espíritu santu bele ajuda ema sira neʼebé uza sala Bíblia?

Sin, ohin loron ema uza sala no iha fiar oioin kona-ba Bíblia. Maibé Maromak nia Liafuan bandu ema atu buka sinál. (Lev 19:26; Deut 18:9-12; Apos 19:19, MF) Loos, “Maromak nia liafuan moris no book makaʼas”, maibé ita presiza uza ida-neʼe ho matenek. Hodi hatene ho didiʼak kona-ba Bíblia, ida-neʼe mak bele ajuda ema nia moris sai diʼak liu, laʼós ema nia fiar oioin kona-ba Bíblia. Hodi aprende Bíblia, ema barak hetan ona ajuda atu haburas hahalok sira neʼebé diʼak, atu husik hahalok aat sira neʼebé bele estraga sira-nia moris, atu hametin liután sira-nia moris família nian, no atu iha relasaun diʼak ho Maromak, Ida neʼebé fó Bíblia.