Ita hanoin-hetan ka lae?
Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:
Oinsá mak Testemuña ba Jeová sai sidadaun neʼebé diʼak iha komunidade?
Sira hatudu respeitu ba governu no ba sira neʼebé iha pozisaun boot. Liuhusi sira-nia livru sira no sira-nia serbisu haklaken, sira fó laran-manas ba ema hotu iha sira-nia komunidade atu halo tuir lei sira husi governu. Rezultadu ba ida-neʼe mak ema rihun ba rihun troka ona sira-nia laran. Tinan-tinan, ema barak manán hasoru toman aat hanesan fuma, hemu tua demais, uza droga, joga osan, no halo sala-foʼer.—1/7, pájina 10-11.
Oinsá mak Ita bele hetan moris susesu?
Ita presiza hanoin didiʼak rezultadu husi desizaun sira neʼebé Ita foti agora, hodi tuir hakat haat tuirmai neʼe: (1) Hanoin rezultadu husi Ita-nia desizaun. (2) Ita rasik mak tenke foti desizaun. (3) Hanoin kona-ba oinsá Ita-nia desizaun sei kona Ita-nia futuru. (4) Hakaʼas an atu kumpre Ita-nia planu sira.—1/7, pájina 12-13.
Saida deʼit mak ita presiza halo atu labele koʼalia arbiru deʼit?
Ita presiza buka-hatene ita-nia laran. Porezemplu, kuandu ita hakarak koʼalia ladiʼak kona-ba irmaun ida, ita bele buka-hatene tanbasá mak ita hakarak halo nuneʼe. Ita koko atu hatudu sai katak ita mak diʼak liu nia ka lae? Diʼak mós atu hanoin-hetan katak hodi koʼalia ladiʼak kona-ba ema seluk bele halo situasaun sai aat liután.—15/8, pájina 21.
Foin antes no durante Jeová nia loron, saida deʼit mak sei akontese?
Ema sei hatete: ‘Hakmatek no dame!’ Ukun-naʼin sira sei halakon Babilónia Boot. Nasaun sira sei ataka Maromak nia povu. Funu Armagedon sei mosu, no ikusmai Satanás ho anju aat sira sei soe tun ba rai-kuak neʼebé la iha rohan.—15/9, pájina 4.
Tanbasá mak diʼak ba ita atu la hatene bainhira loos mak mundu neʼe nia rohan sei toʼo mai?
Hodi la hatene bainhira loos mak mundu neʼe nia rohan sei toʼo mai, ida-neʼe hatudu sai buat neʼebé loloos iha ita-nia laran. Ida-neʼe fó oportunidade mai ita atu halo Jeová nia laran kontente, no mós halo fasil liu ba ita atu la buka uluk ita rasik nia diʼak no ajuda mós ita atu tau ita-nia fiar tomak ba Jeová no ninia Liafuan. Liután neʼe, susar neʼebé ita hasoru durante loron ikus sira ajuda ita atu aprende husi ita-nia susar no hametin liután ita-nia fiar.—15/9, pájina 24-25.
Oinsá mak Maromak nia Ukun-Fuan hatudu sai ninia hanoin kona-ba feto sira?
Feto Israel sira iha liberdade no mós direitu atu hetan edukasaun. Sira mós iha direitu atu ema respeita sira no atu hetan protesaun.—1/10, pájina 5-7.
Apokalipse 1:16, 20 hatete katak Jesus ‘kaer fitun hitu iha ninia liman kuana’. “Fitun” neʼe reprezenta saida?
“Fitun” neʼe reprezenta katuas sira neʼebé hetan kose-mina, maibé ida-neʼe mós kona-ba katuas kristaun hotu iha kongregasaun.—15/10, pájina 13-14.
Oinsá mak Jesus hatudu haraik-an hodi tuir Isaías 50:4, 5?
Eskritura neʼe hatete katak ida neʼebé iha “nanál hanesan ema matenek nian” sei ‘la fila ninia oin ba kotuk’. Jesus hatudu haraik-an hodi hakarak tebes atu aprende husi Maromak no rona didiʼak ba buat neʼebé Jeová hanorin nia. Ita bele fiar katak Jesus haree Jeová nia ezemplu kona-ba haraik-an no oinsá Nia hatudu laran-sadiʼa ba ema sala-naʼin.—15/11, pájina 11.
