1. Kuandu ema rona liafuan “atan”, sira hanoin kona-ba saida?

MAIZUMENUS tinan 2.500 liubá, ema ida husi rai-Grésia hakerek: “La iha ema ida neʼebé prontu atu moris nuʼudar atan.” Ema barak ohin loron mós hanoin hanesan neʼe. Kuandu sira rona liafuan “atan”, sira hanoin kona-ba ema neʼebé moris la livre no hetan terus husi sira-nia naʼi, no sira-nia serbisu lori diʼak deʼit ba sira-nia naʼi neʼebé domina sira.

2, 3. (a) Kristu nia atan sira-nia situasaun oinsá? (b) Iha lisaun neʼe, ita sei koʼalia kona-ba pergunta saida deʼit?

² Jesus hatete katak ninia dixípulu sira sei serbí nuʼudar atan. Maski nuneʼe, ema kristaun loos nia situasaun nuʼudar atan laʼós buat neʼebé hamoe ka hatodan sira, maibé sira mós atan neʼebé bele tau fiar no fó respeitu. Porezemplu, hanoin toʼok Jesus nia liafuan kona-ba “atan” ida. Lakleur antes Jesus mate, nia fó-hatene nanis katak nia sei fó knaar oioin ba atan ida neʼebé “laran-metin no matenek”.—Mt 24:45-47.

³ Iha livru Lucas mós koʼalia kona-ba Jesus nia dixípulu sira neʼebé hetan kose-mina nuʼudar “atan”. (Lee Lucas 12:42-44.) Maski ema kristaun barak neʼebé moris ohin loron laʼós parte husi grupu atan laran-metin no matenek, maibé Bíblia hatudu katak ita hotu serbí Maromak nuʼudar ninia atan. Entaun, iha Maromak nia serbisu, ita iha responsabilidade saida deʼit? Ita presiza haree oinsá kona-ba responsabilidade sira-neʼe? Atu hetan resposta, mai ita haree kona-ba atan sira-nia serbisu iha tempu antigu.

4, 5. Iha tempu antigu, atan balu iha responsabilidade saida deʼit? Fó toʼok ezemplu.

⁴ Iha tempu antigu, naʼi neʼebé iha atan barak, nia hili atan ida neʼebé nia bele tau fiar hodi fó responsabilidade ba atan neʼe atu toma konta ba buat hotu iha uma laran. Atan hanesan neʼe iha kbiit no responsabilidade boot atu  tau matan ba ninia naʼi nia rikusoin, inklui osan no atan sira seluk. Porezemplu, Eliezer hetan knaar atu tau matan ba Abraão nia rikusoin neʼebé barak. No karik Eliezer mak atan neʼebé Abraão haruka atu bá rai-Mesopotámia hodi hili ninia oan Isaac nia feen. Eliezer hetan duni responsabilidade neʼebé boot tebes!—Gên 13:2; 15:2; 24:2-4.

⁵ Abraão nia bei-oan José mós serbí nuʼudar atan neʼebé toma konta ba buat hotu iha Potifar nia uma laran. (Gên 39:1, 2) Depois neʼe, José rasik mós iha atan neʼebé toma konta kona-ba buat oioin iha “José nia uma”. José nia atan neʼe halo arranju oioin atu simu José nia maun naʼin-sanulu, no nia mós halo tuir José nia planu atu koko ninia maun sira hodi uza kopu osan-mutin. Ezemplu sira-neʼe hatudu katak atan balu hetan pozisaun boot hanesan neʼe tanba sira-nia naʼi tau fiar ba sira.—Gên 43:19-25; 44:1-12.

6. Nuʼudar Maromak nia atan, katuas kristaun sira halaʼo knaar oioin saida deʼit?

⁶ Liutiha maizumenus tinan 1.800, apóstolu Paulo hatete katak katuas kristaun sira serbí nuʼudar “Maromak nia saseluk” ka atan. (Tito 1:7) Sira hetan knaar atu tau matan ba Maromak nia bibi hodi hatudu ezemplu diʼak no fó matadalan ba kongregasaun. (1 Ped 5:1, 2) Klaru katak iha Maromak nia organizasaun, katuas sira kaer responsabilidade neʼebé la hanesan. Porezemplu, katuas kristaun barak iha knaar atu serbí iha sira rasik nia kongregasaun. Katuas área nian no katuas vizitante sira iha knaar atu tau matan ba kongregasaun barak. Sira neʼebé serbí iha Grupu Koordenadór ba Sukursál tau matan ba kongregasaun hotu iha sira-nia rai. Maski sira-nia knaar la hanesan, maibé sira hotu presiza halaʼo sira-nia knaar ho laran-metin, no sira hotu “sei hatán ba Maromak”.—Ebr 13:17.

7. Saida mak hatudu katak ema kristaun hotu serbí nuʼudar Maromak nia atan neʼebé nia tau fiar?

⁷ Entaun, oinsá ho ema kristaun seluk neʼebé la kaer responsabilidade nuʼudar katuas? Sira mós Maromak nia atan neʼebé iha responsabilidade ruma ka lae? Apóstolu Pedro hakerek ba ema kristaun hotu, hodi dehan: “Imi ida-ida simu kmanek ruma, uza kmanek neʼe ba maluk sira, nuʼudar atan diʼak Maromak nia grasa oioin nian.” (1 Ped 1:1; 4:10) Maromak hatudu ninia “grasa” ka laran-diʼak ba ita hotu hodi fó mai ita “kmanek ruma”, hanesan matenek ka kapasidade, atu ita bele ajuda maluk kristaun sira. Ida-neʼe hatudu katak ita hotu serbí nuʼudar Maromak nia atan neʼebé nia tau fiar, respeitu, no fó responsabilidade.

8. Nuʼudar Maromak nia atan, buat ida saida mak ita presiza hanoin-hetan?

⁸ Nuʼudar Maromak nia atan, ita presiza hanoin-hetan kona-ba buat tolu. Primeiru mak ita hotu Maromak ninian no ita tenke hatán ba nia. Paulo hatete: “Imi laʼós imi an nian, basá Naʼi sosa ona imi ho folin boot”, katak Jesus nia moris nuʼudar sakrifísiu. (1 Kor 6:19, 20) Tanba ita Jeová ninian ona, ita tenke halo tuir ninia mandamentu, neʼebé la susar atu halo tuir. (Rom 14:8; 1 Joao 5:3) Ita mós sai nuʼudar Kristu nia atan. Hanesan ho atan balu iha tempu antigu, ita iha liberdade barak, maibé neʼe la dehan katak ita bele halo buat naran deʼit tuir ita-nia hakarak. Ita presiza halaʼo ita-nia responsabilidade tuir matadalan neʼebé ita simu. Maski ita hetan responsabilidade barak husi Maromak nia organizasaun, ita hotu nafatin Maromak no Kristu nia atan.

9. Oinsá mak Jesus ajuda ita atu komprende kona-ba relasaun entre naʼi no ninia atan?

⁹ Jesus ajuda ita atu komprende kona-ba relasaun entre naʼi no ninia atan. Loron ida, Jesus konta ai-knanoik kona-ba atan ida neʼebé halo serbisu iha loron tomak no fila fali ba ninia naʼi nia uma. Ninia naʼi sei hatete saida ba atan neʼe? Nia sei la dehan: “Ó mai lalais tuur iha meza.” Duké koʼalia hanesan neʼe, naʼi sei dehan: “Ó bá teʼin”, ka “Ó bá hatais lalais atu haʼu han no  hemu; neʼe liu tiha mak ó sei tuur han no hemu.” Liuhusi ai-knanoik neʼe, Jesus hakarak hanorin saida? Nia esplika: “Nuneʼe mós imi, wainhira imi halo tiha imi-nia knaar tomak, dehan bá: ‘Ami atan folin-laek, ami halo deʼit ami-nia obrigasaun.’”—Lc 17:7-10.

10. Saida mak hatudu katak Jeová hafolin ita-nia hakaʼas-an atu serbí nia?

¹⁰ Klaru katak Jeová hafolin ita-nia hakaʼas-an atu serbí nia. Bíblia fó fiar mai ita hodi dehan: “Maromak la laran-aat atu haluha imi-nia hahalok sira no imi domin neʼebé imi hatudu ba Nia.” (Ebr 6:10) Jeová nunka haruka ita atu halo buat neʼebé ita la bele halo. Liután neʼe, buat hotu neʼebé nia hakarak ita atu halo sempre lori diʼak mai ita no nunka hatodan ita. Maski nuneʼe, hanesan Jesus hatete, atan ida la hanoin atu buka uluk ninia haksolok no hakarak rasik, maibé nia tau uluk mak ninia naʼi nia hakarak. Nuneʼe mós ho ita. Kuandu ita dedika ita-nia an ba Maromak, ita deside atu tau uluk Maromak nia hakarak iha ita-nia moris, loos ka lae?

11, 12. Nuʼudar Maromak nia atan, ita tenke hatudu hahalok saida? Ita tenke hadook an husi saida?

¹¹ Buat segundu neʼebé ita presiza hanoin-hetan mak ita nuʼudar Maromak nia atan, ita halo tuir matadalan sira neʼebé hanesan ba ita hotu. Maski iha Maromak nia organizasaun ema balu deʼit mak kaer knaar espesiál ruma, maibé Jeová fó responsabilidade neʼebé hanesan ba ita hotu. Porezemplu, nuʼudar Jeová nia atan, ita hotu tenke hadomi malu. Jesus hatete katak liuhusi domin neʼebé ita hatudu ba malu mak ema sei hatene katak ita ema kristaun neʼebé loos. (Joao 13:35) Maibé, ita hatudu domin laʼós deʼit ba ita-nia maluk kristaun. Ita mós presiza hakaʼas an atu hatudu domin ba ema neʼebé fiar la hanesan. Ida-neʼe mak buat neʼebé ita hotu tenke halo.

¹² Maromak mós hakarak ita atu halo buat neʼebé loos no hadook an husi hahalok neʼebé Bíblia bandu. Paulo hatete: “Sira neʼebé halo sala-foʼer ho feto-raan, ka adora lulik, ka halo sala-foʼer ho kaben-naʼin, ka halo sala-foʼer ho maluk mane ka maluk feto, ka naʼok-teen, ka karak-teen, ka lanu-teen, ka sira neʼebé konta ema nia vida, ka tama uma atu naʼok sei la simu Maromak nia reinu nuʼudar liman-rohan.” (1 Kor 6:9, 10) Maski ita presiza hakaʼas an atu halo tuir Maromak nia matadalan, maibé hodi halo ida-neʼe lori buat diʼak barak mai ita, hanesan saúde diʼak, relasaun diʼak ho ema seluk, no ita-nia relasaun ho Maromak sai metin liután.—Lee Isaías 48:17, 18. *

13, 14. Ema kristaun hotu iha responsabilidade atu halo serbisu saida? Ita tenke sente oinsá kona-ba responsabilidade neʼe?

¹³ Hanoin-hetan mós katak atan sira iha serbisu neʼebé sira tenke halo. Nuneʼe mós ho ita. Maromak fó mai ita prezente neʼebé furak, neʼe mak lia-loos. Tan neʼe, nia hakarak ita atu hanorin fali lia-loos neʼe ba ema seluk. (Mt 28:19, 20) Paulo hatete katak ita serbí “nuʼudar Kristu nia atan no ema neʼebé tau matan ba Maromak nia mistériu [“segredu sagradu”, MF]”. (1 Kor 4:1) Paulo hatudu katak ita iha responsabilidade atu tau matan ba Maromak nia “segredu sagradu”, ka lia-loos husi Bíblia, no atu hanorin lia-loos neʼe ba ema seluk. Ida-neʼe mak buat neʼebé ita-nia Naʼi Jesus Kristu hakarak ita atu halo.—1 Kor 9:16.

¹⁴ Kuandu ita hanorin lia-loos ba ema seluk, ita hatudu katak ita hadomi sira. Klaru katak tanba ema kristaun ida-idak nia situasaun la hanesan, buat neʼebé ema kristaun ida bele halo iha serbisu haklaken, karik ema seluk la bele halo. Jeová komprende kona-ba neʼe. Maibé, importante liu mak ita halo buat hotu neʼebé ita  bele iha serbisu haklaken. Hodi halo nuneʼe, ita hatudu domin neʼebé loos ba Maromak no ba ema seluk.

15-17. (a) Nuʼudar Maromak nia atan, tanbasá mak ita tenke halo tuir nia ho laran-metin? (b) Jesus nia ai-knanoik saida deʼit mak hatudu kona-ba buat neʼebé bele akontese se ita la halo tuir?

¹⁵ Buat terseiru neʼebé ita presiza hanoin-hetan mak ita tenke halo tuir Maromak hodi hatudu katak ita ema neʼebé nia bele tau fiar. Maski atan ida iha hahalok diʼak barak no matenek oioin, maibé se nia la halo tuir ninia naʼi no la tau matan didiʼak ba ninia serbisu, hahalok sira-neʼe hotu sei sai saugati deʼit. Tan neʼe, atu hetan susesu nuʼudar atan neʼebé diʼak, ita tenke halo tuir Maromak ho laran-metin no sai ema neʼebé nia bele tau fiar. Paulo hatete katak ema neʼebé serbí nuʼudar atan “tenke sai ema neʼebé bele fiar”.—1 Kor 4:2.

¹⁶ Se ita halo tuir Maromak ho laran-metin, nia sei haraik bensaun mai ita. Maibé se ita la halo tuir, ita sei la hetan bensaun. Jesus hatudu ida-neʼe liuhusi ninia ai-knanoik kona-ba osan talenta sira. Atan sira neʼebé halo tuir sira-nia naʼi hodi “fila liman” ho naʼi nia osan, ikusmai naʼi gaba no fó kolen ba sira hodi tau fiar liután ba sira. Maibé, atan ida neʼebé la halo tuir, naʼi tesi lia ba nia nuʼudar atan neʼebé “aat”, “baruk-teen”, no “folin-laek”. Ikusmai, naʼi foti fali osan talenta husi atan neʼe no hasai nia.—Lee Mateus 25:14-18, 23, 26, 28-30.

¹⁷ Jesus nia ai-knanoik ida seluk mós hatudu kona-ba buat neʼebé bele akontese se ita la halo tuir Maromak ho laran-metin. Nia hatete: “Ema riku ida iha emar [ka atan] ida atu haree nia sasán. Loron ida, nia rona katak ema neʼe halo lakon nia rikusoi. Tan neʼe, nia bolu ema neʼe hodi husu ba nia: ‘Saida mak haʼu rona kona-ba ó? Hatán lai kona-ba ó-nia serbisu, basá hori ohin ba oin ó labele kaer tan serbisu neʼe.’” (Lc 16: 1, 2) Tanba atan neʼe halo lakon ninia naʼi nia rikusoi, naʼi hasai nia. Ai-knanoik sira-neʼe hanorin ita katak importante tebes atu ita sempre halo tuir ho laran-metin buat hotu neʼebé Jeová haruka ita atu halo.

18. Tanbasá mak ita labele kompara ita-nia an ho ema seluk?

¹⁸ Ita ida-idak bele husu ba ita-nia an: ‘Haʼu sente oinsá kona-ba haʼu-nia serbisu nuʼudar Maromak nia atan?’ Se ita kompara ita-nia an ho ema seluk, ida-neʼe bele hamosu problema oioin. Bíblia hatete: “Ema ida-ida haree nia hahalok bá. Nia hahalok diʼak karik, nia bele gaba an kona-ba buat neʼebé nia halo, maibé nia labele tanesan sira ho buat neʼebé ema seluk halo.” (Gal 6:4) Tan neʼe, duké kompara buat neʼebé ita halo ho buat neʼebé ema seluk halo, ita presiza hanoin oinsá ita bele halo ita-nia serbisu diʼak liután. Ida-neʼe sei ajuda ita atu la sai foti-an ka laran-tun. Ita mós presiza rekoñese katak ita-nia situasaun bele troka. Porezemplu, se agora ita idade ona, saúde fraku, ka ita-nia responsabilidade aumenta, karik ita la bele halo buat hotu hanesan uluk. Maibé, se ita-nia situasaun husik ita atu halo buat barak liu fali buat neʼebé ita halo daudauk, ita bele aumenta ita-nia serbisu ba Jeová ka lae?

19. Se ita la hetan knaar espesiál ruma, tanbasá mak ita labele sai laran-tun?

¹⁹ Ita mós labele kompara ita-nia an ho ema seluk neʼebé iha knaar ruma neʼebé ita hakarak hetan. Porezemplu, karik irmaun ida hakarak serbí nuʼudar katuas iha kongregasaun ka hakarak hetan knaar atu hatoʼo diskursu iha reuniaun boot sira. Diʼak atu ita hakaʼas an hodi kumpre kritériu atu hetan knaar espesiál hanesan neʼe, maibé se ita la hetan, ita keta laran-tun. Karik ho razaun neʼebé ita la hatene agora kedas, ita presiza hein tempu kleur liu fali ita-nia hanoin toʼo hetan knaar espesiál ruma neʼebé ita hakarak. Hanoin toʼok kona-ba Moisés, foufoun nia hanoin katak nia prontu atu lori ema Israel sai husi rai-Egiptu, maibé antes atu hetan knaar neʼe, nia presiza hein tinan 40. Ida-neʼe fó tempu ba Moisés atu haburas hahalok oioin neʼebé nia presiza hodi bele lori povu neʼebé ulun-toos no lakohi halo tuir Maromak.—Apos 7:22-25, 30-34.

20. Ita bele aprende saida husi Jónatas nia ezemplu?

²⁰ Ita mós presiza hanoin-hetan katak iha knaar espesiál ka responsabilidade balu neʼebé laʼós ema hotu mak hetan. Porezemplu, hanoin toʼok kona-ba Jónatas. Nuʼudar Saul nia oan, nia bele sai liurai atu ukun Israel tomak. Maibé atu sai liurai, Maromak hili deʼit mak David, neʼebé idade kiʼik liu Jónatas. Ho desizaun neʼe, Jónatas halo saida? Nia simu desizaun neʼe no apoia David maski ida-neʼe lori perigu ba Jónatas nia moris rasik. Nia hatete ba David: “Ó rasik mak sei sai liurai ba Israel, no haʼu sei sai ema segundu tuir ó.” (1 Sam 23:17) Ita bele aprende saida husi Jónatas nia ezemplu? Nia simu ninia situasaun, no la hanesan ho ninia aman, nia la sai laran-moras ba David. Nuneʼe mós ho ita. Duké sai laran-moras ba ema seluk neʼebé hetan knaar espesiál ruma, ita hotu presiza hakaʼas an atu tau matan ba responsabilidade sira neʼebé ita kaer daudauk. Ita bele fiar katak iha mundu foun, Jeová sei fó buat hotu ba ninia atan sira tuir sira-nia hakarak neʼebé loos.

21. Ita tenke sente oinsá kona-ba ita-nia serbisu ba Maromak?

²¹ Nuʼudar Maromak nia atan, ita-nia moris la hanesan ho atan sira neʼebé hetan terus no la livre. Tuir loloos, Maromak tau fiar ba ita hodi fó serbisu importante neʼebé sei nunka halo fali iha futuru, neʼe mak haklaken lia-foun diʼak durante loron ikus sira-neʼe. Maromak mós fó liberdade barak mai ita kona-ba oinsá atu kaer responsabilidade sira neʼebé nia fó ba ita. Tan neʼe, mai ita hotu sai atan neʼebé halo tuir ho laran-metin hodi hafolin ita-nia knaar espesiál atu serbí Maromak Jeová, Naʼi neʼebé boot liu hotu iha lalehan no rai.