BA TINAN barak ona, ema barak iha mundu tomak hetan buat diʼak husi informasaun neʼebé sira lee husi Livru Haklaken. Iha fulan-Jullu 2011, ami komesa hasai edisaun Livru Haklaken iha lia-inglés neʼebé fasil atu komprende. Edisaun neʼe esplika: “Ami sei koko ida-neʼe ba tinan ida, no se ida-neʼe ajuda ema, ami sei kontinua atu halo nafatin.”

Agora, ami kontente hodi fó sai katak ami deside ona atu kontinua halo edisaun neʼe. No lakleur tan, ita mós bele hetan Livru Haklaken neʼebé fasil atu komprende iha lia-fransés, portugés, no españól.

Kuandu irmaun-irmán balu husi illa sira iha Tasi Pasífiku parte súl simu Livru Haklaken iha lia-inglés neʼebé fasil atu komprende, sira dehan: “Agora irmaun-irmán sira bele komprende ho didiʼak Livru Haklaken.” Karta seluk husi irmán ida dehan katak uluk nia ho ninia família uza tempu barak atu buka-hatene liafuan sira-nia arti, maibé agora sira uza tempu neʼe atu komprende didiʼak eskritura sira no oinsá eskritura sira liga ho informasaun.

Irmán ida neʼebé ramata ona universidade iha rai-Estadus Unidus hatete katak ba tinan  18, nia koʼalia no hakerek hodi uza liafuan sira neʼebé ema-boot sira deʼit mak bele komprende. Nia dehan: “Haʼu haburas toman atu hanoin no koʼalia hodi uza liafuan neʼebé aas. Haʼu rekoñese katak haʼu presiza troka dalan neʼebé haʼu koʼalia no hanoin.” Nia hatutan tan: “Edisaun Livru Haklaken neʼe ajuda tebes haʼu. Ida-neʼe fó ezemplu diʼak mai haʼu oinsá atu koʼalia no esplika buat ruma iha dalan  neʼebé simples.” Agora irmán neʼe hetan rezultadu diʼak liután iha serbisu haklaken.

Irmán ida husi rai-Inglaterra, neʼebé hetan batizmu iha tinan 1972 hatete: “Kuandu haʼu lee edisaun primeiru husi Livru Haklaken neʼe, haʼu sente hanesan Maromak Jeová tuur iha haʼu-nia sorin, hakoʼak haʼu no ami naʼin-rua lee hamutuk. Haʼu sente hanesan haʼu-nia aman rasik lee istória ba haʼu antes atu toba.”

Irmán ida neʼebé hetan batizmu maizumenus tinan 40 liubá no serbí iha Betel iha rai-Estadus Unidus, nia hatete katak dala ruma edisaun Livru Haklaken neʼe ajuda nia atu komprende Bíblia diʼak liután. Porezemplu, iha kaixa ho títulu ‘Liafuan balu nia arti’ (Some Expressions Explained) iha edisaun 15 Setembru 2011, neʼe esplika liafuan “sasin lubuk” neʼebé temi iha Ebreu 12:1. Kaixa neʼe esplika katak Maromak nia atan sira, barak tebetebes toʼo la bele sura. Irmán neʼe hatete: “Ida-neʼe ajuda haʼu atu komprende liután eskritura neʼe.” Kona-ba reuniaun semana-semana nian, irmán neʼe dehan: “Maski labarik ida fó resposta hodi lee deʼit husi parágrafu, maibé liafuan sira-neʼe la hanesan ho liafuan sira husi edisaun Livru Haklaken baibain nian neʼebé ema barak liu uza. Tan neʼe, labarik nia resposta mak buat foun ba rona-naʼin sira.”

Irmán seluk neʼebé serbí iha Betel hatete: “Haʼu hein namanas atu rona labarik sira fó komentáriu iha reuniaun. Edisaun Livru Haklaken neʼe ajuda sira atu fó resposta husi laran. Sira-nia resposta fó laran-manas mai haʼu.”

Irmán ida neʼebé hetan batizmu iha tinan 1984 esplika tanbasá nia gosta edisaun neʼe, nia hatete: “Haʼu sente informasaun neʼe  hakerek liuliu ba haʼu. Fasil tebes atu komprende buat neʼebé haʼu lee. Agora haʼu sente katak haʼu bele fó komentáriu kuandu estuda Livru Haklaken iha reuniaun.”

Inan ida neʼebé iha oan-mane ho tinan 7 hatete: “Uluk, kuandu ami prepara Livru Haklaken, haʼu tenke uza tempu barak atu esplika fraze sira, no ida-neʼe halo ami kole.” Oinsá mak edisaun neʼe ajuda sira? Irmán neʼe hatete: “Haʼu hakfodak tanba agora nia bele hola parte atu lee parágrafu sira no komprende buat neʼebé nia lee. Tanba edisaun neʼe uza liafuan sira neʼebé fasil atu komprende, no fraze sira badak deʼit, nia la sente susar tan atu komprende informasaun. Agora nia bele prepara mesak ninia komentáriu sira, no nia fó atensaun liu durante Estudu Livru Haklaken.”

Inan ida neʼebé iha oan-feto ho tinan 9 hatete: “Uluk ami presiza ajuda nia atu prepara ninia komentáriu sira. Maibé agora nia prepara mesak. Ami ladún presiza gasta tempu atu esplika informasaun. Tanba nia bele komprende informasaun, agora nia sente katak nia bele envolve an duni iha Estudu Livru Haklaken.”

Labarik barak sente katak edisaun Livru Haklaken iha lia-inglés neʼebé fasil atu komprende, halo liuliu ba sira. Labarik-feto ida ho tinan 12, naran Rebecca hatete: “Halo favór halo beibeik edisaun neʼe.” Nia dehan tan: “Haʼu gosta tebes informasaun sira iha kaixa ho títulu ‘Liafuan balu nia arti’. Informasaun sira iha kaixa neʼe fasil tebes ba labarik sira atu komprende.”

Labarik-feto seluk ho tinan 7 naran Nicolette mós sente hanesan. Nia hatete: “Uluk susar ba haʼu atu komprende informasaun iha Livru Haklaken. Agora haʼu bele prepara rasik komentáriu sira no hiʼit liman dala barak.” Labarik-feto seluk tan ho tinan 9 naran Emma hatete: “Edisaun Livru Haklaken neʼe ajuda duni haʼu no haʼu-nia alin-mane neʼebé tinan neen. Ami komprende diʼak liu. Obrigada!”

Loos duni, ema barak hetan buat diʼak husi edisaun Livru Haklaken neʼe tanba uza liafuan no fraze sira neʼebé fasil atu komprende. Edisaun Livru Haklaken neʼe ajuda duni ema barak, nuneʼe ami sei kontinua atu halo nafatin ida-neʼe hamutuk ho edisaun Livru Haklaken baibain nian neʼebé komesa halo husi tinan 1879.