EMA barak neʼebé haree filme “Drama kona-ba Kriasaun” hatete: “Haʼu la bele haluha buat neʼebé haʼu haree!” Filme neʼe hatudu iha tempu neʼebé loos no halo ema neʼebé haree hanoin-hetan nafatin. Tuir loloos, “Drama kona-ba Kriasaun” fó sasin ba ema barak hodi hahiʼi Jeová foin antes Hitler nia ukun fó-terus makaʼas ba Ninia povu iha Europa. Maibé, “Drama kona-ba Kriasaun” mak oinsá?

Iha tinan 1914, Jeová nia povu nia sede-jerál iha Brooklyn, Novaiorke, iha Estadus Unidus Amérika fó sai “Foto-Drama kona-ba Kriasaun”. Neʼe mak filme ba oras ualu neʼebé halo ho kór no lian, no ema rihun ba rihun haree filme neʼe iha mundu tomak. Iha tinan 1914, irmaun sira mós fó sai filme ida seluk ho naran “Drama Eureka”, neʼebé habadak husi “Foto-Drama”. Maibé liutiha tinan barak, filme sira no ekipamentu sira atu hatudu filme sira-neʼe sai tuan no aat ona. Maski nuneʼe, ema barak sei hakarak haree “Foto-Drama”. Porezemplu, ema ida husi Ludwigsburg, iha rai-Alemaña, husu: “Bainhira mak ami bele haree fali ‘Foto-Drama’?” Entaun, saida mak irmaun sira halo?

Atu bele hatudu filme neʼe ba ema neʼebé hakarak haree, maizumenus iha tinan 10 depois sira komesa hatudu filme “Foto-Drama”, irmaun sira iha Betel Alemaña iha Magdeburg, sira hola filme sira husi kompañia iha París, rai-Fransa, no hola filme ho foto balu husi Leipzig no Dresden. Depois, irmaun sira tau buat sira-neʼe hamutuk ho parte balu neʼebé sei diʼak husi “Foto-Drama” atu halo filme ida deʼit.

Irmaun Erich Frost, neʼebé matenek kona-ba múzika, nia halo múzika ba filme neʼe. No tanba filme neʼe la iha lian, irmaun sira mak konta tuir liafuan neʼebé foti husi ita-nia livru Creation. Tan neʼe, irmaun sira bolu filme neʼe ho naran foun “Drama kona-ba Kriasaun”.

Filme neʼe ba oras ualu hanesan ho “Foto-Drama”, no irmaun sira fahe ba parte balu hodi hatudu iha kalan balu tuituir malu. Filme neʼe hatudu kona-ba loron kriasaun nian, esplika istória husi Bíblia no mundu nian, no fó sai katak relijiaun falsu la konsege ajuda ema iha dalan oioin. “Drama kona-ba Kriasaun” hatudu iha rai-Áustria, Alemaña, Luxemburgu, no Suisa, no mós ba ema neʼebé koʼalia lia-alemaun iha rai seluseluk.

Irmaun Erich Frost hatete: “Kuandu ami hatudu filme neʼe, haʼu fó laran-manas ba haʼu-nia maluk sira, liuliu ba sira neʼebé toka  múzika iha orkestra, atu uza tempu deskansa durante filme hodi hakbesik ba ema sira iha tuur-fatin atu fahe ita-nia livru furak sira. Hodi halo nuneʼe, ami fahe livru barak liu fali haklaken husi uma ba uma.” Irmaun Johannes Rauthe, neʼebé halo arranju atu hatudu filme neʼe iha rai-Polónia no Repúblika Xeka, nia hanoin-hetan katak ema barak neʼebé haree filme neʼe fó-hatene sira-nia hela-fatin atu irmaun-irmán sira bele vizita sira.

Fatin oioin neʼebé hatudu filme “Drama kona-ba Kriasaun” sempre sai nakonu ho ema, no ema barak koʼalia ba malu kona-ba Testemuña ba Jeová. Toʼo tinan 1933, ema besik naʼin-1.000.000 mak haree filme neʼebé Betel Alemaña mak organiza atu hatudu. Irmán Käthe Krauss hatete: “Atu haree filme neʼe, ba loron lima tuituir malu, ami laʼo kilómetru sanulu atu bá no kilómetru sanulu tan atu fila ba uma, liuhusi ai-laran no tun-saʼe foho-oan no mota.” Irmán Else Billharz hatete: “‘Drama kona-ba Kriasaun’ ajuda haʼu atu haburas domin ba lia-loos.”

Irmaun Alfred Almendinger hatete katak bainhira ninia inan haree “Drama kona-ba Kriasaun”, nia sai “kontente tebes toʼo sosa Bíblia no buka liafuan ‘purgatóriu’.” Tanba ninia inan la hetan lia-fuan neʼe iha Bíblia laran, nia para atu la bá igreja no hetan batizmu. Irmaun Erich Frost hatete: “Liuhusi ‘Drama kona-ba Kriasaun’, ema barak tebes simu lia-loos.”—3 Joao 1-3.

Durante tempu neʼebé ema barak haree “Drama kona-ba Kriasaun”, Hitler ho ninia partidu Nazi aumenta sira-nia forsa iha Europa. Ikusmai, iha tinan 1933, governu bandu Testemuña nia atividade iha rai-Alemaña. Husi tempu neʼebá toʼo tinan 1945 neʼebé Funu Mundiál Segundu ramata, Jeová nia atan sira iha Europa hetan terus makaʼas husi ema neʼebé kontra sira. Irmaun Erich Frost mós tama iha prizaun maizumenus ba tinan ualu. Maibé nia tahan, no depois nia serbí iha Betel Alemaña, iha Wiesbaden. Loos duni, “Drama kona-ba Kriasaun” neʼebé halo ema la bele haluha, hatudu iha tempu neʼebé loos hodi fó aten-brani ba ema kristaun sira atu bele tahan hasoru susar oioin neʼebé koko sira-nia fiar durante Funu Mundiál Segundu!—Husi ita-nia arkivu iha Alemaña.