Hela nafatin iha Jeová nia fatin protesaun
“Jeová sei . . . halo funu hasoru nasaun sira-neʼe hanesan nia halo funu hasoru ninia inimigu sira iha tempu uluk.”—ZAC 14:3.
1, 2. Lakleur tan, funu tebes saida mak sei akontese? Iha funu neʼe, ita sei la presiza halo saida?
IHA loron 30 Outubru 1938, iha Estadus Unidus ema barak rona programa ida iha rádiu. Durante programa neʼe, atór sira finje sai aprezentadór notísia nian no fó sai katak kriatura husi planeta Marte komesa atu ataka Mundu. Maski rádiu fó sai katak programa neʼe drama deʼit, maibé ema barak neʼebé rona ida-neʼe sai taʼuk tebes hodi hanoin sala katak notísia neʼebé sira rona tebes duni. Tan neʼe sira barak halo buat oioin atu proteje sira-nia an.
2 Maibé, ema barak la prepara sira-nia an ba funu tebes ida neʼebé lakleur tan sei akontese duni. Neʼe mak Maromak nia funu hasoru mundu aat neʼe, naran funu Armagedon. Ida-neʼe laʼós istória neʼebé ema mak inventa deʼit. Ita hatene katak funu neʼe sei akontese duni tanba Maromak fó-hatene nanis kona-ba neʼe liuhusi ninia Liafuan, Bíblia. (Apok 16:14-16) Iha funu neʼe, ita sei la presiza halo funu hodi defende ita-nia an. Maibé, Maromak Jeová sei uza ninia forsa boot atu salva ita iha dalan neʼebé furak tebes.
3. Ita sei estuda kona-ba profesia saida? Tanbasá mak profesia neʼe importante ba ita ohin loron?
3 Profesia ida neʼebé hakerek iha livru Zacarias kapítulu 14 fó-hatene ita buat barak kona-ba funu Armagedon. Maski livru neʼe hakerek maizumenus tinan 2.500 liubá, maibé profesia neʼe importante tebes ba ita ohin loron. (Rom 15:4) Kapítulu neʼe koʼalia kona-ba buat neʼebé akontese ba Maromak nia povu husi tinan 1914 kuandu Kristu komesa ninia ukun iha lalehan, no kona-ba buat neʼebé lakleur tan sei akontese. Profesia neʼe mós koʼalia kona-ba “rai kleʼan iha foho rua nia klaran” no “bee moris nian”. (Zac 14:4, 8) Iha lisaun neʼe, ita sei aprende kona-ba fatin “rai kleʼan” neʼe katak sá, no oinsá mak Jeová nia atan sira sei hetan protesaun iha fatin neʼe. Ita mós sei aprende kona-ba “bee moris nian” katak sá, no oinsá mak bee neʼe bele ajuda ita. Hodi halo nuneʼe, ita sei haree katak ita presiza hemu bee neʼe, no ida-neʼe sei book ita atu hakarak hemu bee neʼe. Entaun, mai ita estuda didiʼak kona-ba profesia neʼe.—2 Ped 1:19, 20.
“JEOVÁ NIA LORON” HAHÚ
4. (a) Horibainhira mak “Jeová nia loron” hahú? (b) Durante tinan barak antes tinan 1914, ema kristaun kose-mina sira haklaken saida? Ulun-naʼin relijiaun no polítiku sira halo saida?
4 Profesia iha Zacarias kapítulu 14 komesa hodi dehan: “Jeová nia loron mai daudaun.” (Lee Zacarias 14:1, 2. a) Loron neʼe mak saida? Loron neʼe hanesan ho “loron Naʼi nian”, neʼebé hahú iha tinan 1914 kuandu Jesus sai Liurai ba Maromak nia Ukun iha lalehan. (Apok 1:10; 11:15) Durante tinan barak antes tinan 1914, ema kristaun kose-mina sira haklaken katak “jentiu sira-nia otas” sei ramata iha tinan neʼe, no husi tempu neʼebá mundu sei hetan susar barak. (Lc 21:24) “Jentiu sira” ka nasaun sira rona ba avizu neʼe ka lae? Lae. Duké rona, ulun-naʼin relijiaun no polítiku sira goza no fó-terus ba ema kristaun kose-mina sira. Hodi halo nuneʼe, tuir loloos sira goza Maromak Forsa Boot Liu Hotu tanba ema kristaun kose-mina sira reprezenta Maromak nia Ukun.—Ebr 12:21, 22, 28.
5, 6. (a) Maromak nia povu nia inimigu sira halo saida? (b) Sé mak “restu husi povu”?
5 Profeta Zacarias fó-hatene nanis kona-ba buat neʼebé nasaun sira sei halo, hodi dehan: “Sira sei manán duni sidade neʼe [ka Jerusalém].” “Sidade neʼe” katak Maromak nia Ukun, no ema kristaun kose-mina sira neʼebé sei hela iha mundu mak reprezenta Ukun neʼe. (Flp 3:20) Nasaun sira, ka Maromak nia povu nia inimigu sira “manán duni sidade neʼe” durante Funu Mundiál Primeiru bainhira sira kaer irmaun sira neʼebé iha responsabilidade boot iha Jeová nia organizasaun no hatama sira ba prizaun iha sidade Atlanta, Georgia, iha Estadus Unidus. Inimigu sira-neʼe halo hahalok neʼebé la tuir justisa no fó-terus ba ema kristaun kose-mina sira, bandu livru sira, no koko atu hapara serbisu haklaken. Ida-neʼe hanesan inimigu sira mak “hadau sasán” husi sidade nia uma sira.
6 Maski inimigu sira fó-terus ba Maromak nia povu no fó sai lia-bosok kona-ba sira, maibé sira la konsege halakon adorasaun neʼebé loos. Sin, sei nafatin iha ema kristaun kose-mina sira neʼebé hatudu nafatin laran-metin ba Maromak. Hanesan Zacarias fó-hatene nanis ona, sira mak “restu husi povu” neʼebé “la lakon husi sidade neʼe”.
7. Ema kristaun kose-mina sira hatudu ezemplu diʼak saida ba ita ohin loron?
7 Kuandu Funu Mundiál Primeiru ramata, inimigu sira para atu fó-terus ba Maromak nia povu ka lae? Lae. Sira kontinua fó-terus nafatin. (Apok 12:17) Porezemplu, durante Funu Mundiál Segundu, ema fó-terus makaʼas ba ita-nia irmaun-irmán sira. Maibé, ema kristaun kose-mina sira-nia ezemplu diʼak kona-ba laran-metin nafatin fó laran-manas ba ita ohin loron atu tahan hasoru susar naran deʼit, inklui mós susar husi família neʼebé fiar la hanesan, ka husi maluk serbisu ka eskola neʼebé goza ita tanba ita-nia fiar. (1 Ped 1:6, 7) Maski ita hela iha fatin naran deʼit, ita “laran-metin iha espíritu ida deʼit” no ‘la taʼuk sira neʼebé hasoru ita’. (Flp 1:27, 28) Maibé, oinsá mak ita bele hetan protesaun iha mundu aat neʼebé odi ita?—Joao 15:17-19.
JEOVÁ HALO “RAI KLEʼAN IHA FOHO RUA NIA KLARAN”
8. (a) Iha Bíblia, dala ruma foho sira reprezenta saida? (b) “Foho ai-oliveira nian” reprezenta saida?
8 Ita hatene ona katak “sidade” neʼebé temi iha livru Zacarias kapítulu 14 mak kona-ba Jerusalém, neʼebé reprezenta Maromak nia Ukun. Entaun, “foho ai-oliveira nian, neʼebé iha Jerusalém nia oin”, neʼe reprezenta saida? Oinsá mak foho neʼe “fahe iha klaran” no sai foho rua? No tanbasá mak Jeová bolu foho sira-neʼe nuʼudar “haʼu-nia foho sira”? (Zac 14:3-5) Iha Bíblia, dala ruma foho sira reprezenta ukun, ka governu sira. No Bíblia mós dala barak hatete katak Maromak nia bensaun no protesaun mai husi ninia foho. (Sal 72:3; Isa 25:6, 7) Tan neʼe, “foho ai-oliveira nian” reprezenta Jeová nia ukun ba ninia kriasaun hotu.
9. Foho ai-oliveira nian fahe ba rua “iha klaran”, ida-neʼe katak sá?
9 Zacarias hatete katak foho ai-oliveira nian fahe ba rua “iha klaran”. Ida-neʼe katak sá? Neʼe katak Jeová kria ukun ida seluk atu kumpre ninia hakarak. Ukun ida-neʼe, Jesus Kristu mak kaer nuʼudar liurai. Tanba ukun rua neʼe hotu Jeová ninian, Jeová bolu foho rua neʼe nuʼudar “haʼu-nia foho sira”.
10. “Rai kleʼan” iha foho rua neʼe nia klaran reprezenta saida?
10 Kuandu foho ai-oliveira nian fahe ba rua no sorin balu ba norte no sorin seluk ba súl, Jeová hamriik nafatin hodi tau ninia ain ba foho rua neʼe. Kuandu ida-neʼe akontese, foho rua neʼebé fahe tiha sei kria “rai kleʼan” iha Jeová nia ain okos. “Rai kleʼan” neʼe reprezenta saida? Ida-neʼe reprezenta Maromak nia protesaun. Hanesan ema hetan protesaun iha foho rua nia klaran, Jeová nia povu mós hetan protesaun iha ninia ukun no ninia Oan nia ukun okos. Jeová sei nunka husik buat ida atu halakon adorasaun neʼebé loos. Entaun, horibainhira mak foho ai-oliveira nian fahe ba rua? Ida-neʼe akontese iha tinan 1914 kuandu Jesus komesa ninia ukun iha lalehan. Profesia neʼe mós hatete katak Jeová nia povu sei halai ba “rai kleʼan” neʼe. Horibainhira mak Jeová nia povu komesa halo nuneʼe?
MAROMAK NIA POVU KOMESA HALAI BA RAI KLEʼAN!
11, 12. (a) Horibainhira mak Maromak nia povu komesa halai ba “rai kleʼan” iha Jeová nia foho sira-nia klaran? (b) Saida mak hatudu katak Jeová proteje ninia povu?
11 Jesus fó avizu ba ninia dixípulu sira, hodi dehan: “Povu hotu sei odi imi tan haʼu-nia naran.” (Mt 24:9) Husi tempu neʼebé loron ikus sira hahú iha tinan 1914, ema odi makaʼas liután ba Jesus nia dixípulu sira. Durante Funu Mundiál Primeiru, Maromak nia povu nia inimigu sira fó-terus makaʼas ba ema kristaun kose-mina sira, maibé sira la konsege halakon adorasaun neʼebé loos. Liután neʼe, iha tinan 1919, Maromak nia povu sai livre husi Babilónia Boot, ka relijiaun falsu hotu iha mundu neʼe. (Apok 11:11, 12) b Iha tinan neʼe mak Maromak nia povu komesa halai ba “rai kleʼan” iha Jeová nia foho sira-nia klaran nuʼudar fatin protesaun.
12 Husi tinan 1919, Jeová kontinua proteje ninia atan sira iha mundu tomak. Durante tinan ba tinan, governu barak koko atu hapara Testemuña ba Jeová atu labele haklaken no bandu livru sira, no toʼo ohin loron mós governu balu halo hanesan neʼe. Maibé, Jeová la husik governu sira-neʼe atu halakon adorasaun neʼebé loos. Sin, maski nasaun sira halo buat naran deʼit hodi hasoru Jeová nia povu, maibé Jeová kontinua uza ninia forsa atu proteje sira.—Deut 11:2.
13. Hodi halo saida mak ita bele hela nafatin iha Jeová nia fatin protesaun? Tanbasá mak importante duni atu ita halo nuneʼe?
13 Hodi halo tuir Jeová no hamriik metin iha lia-loos, ita hela nafatin iha Jeová nia fatin protesaun. Jeová no ninia Oan sei la husik ema ida ka buat ida atu hasai ita husi fatin neʼe. (Joao 10:28, 29) Jeová sempre prontu atu ajuda ita hodi bele laran-metin nafatin ba ninia ukun no ninia Oan nia ukun. Tanba terus boot besik atu mai ona, importante duni atu ita hela nafatin iha Jeová nia fatin protesaun.
MAROMAK NIA LORON FUNU NIAN
14, 15. Iha Jeová nia loron funu nian, saida mak sei akontese ba ema neʼebé la hela iha Maromak nia fatin protesaun?
14 Nuʼudar mundu aat neʼe nia rohan besik daudaun, Satanás sei koko makaʼas liután atu ataka Maromak nia povu. Maibé lakleur tan, Jeová sei hapara Satanás atu halo ida-neʼe tanba Nia sei halo funu hasoru inimigu hotu neʼebé fó-terus ba Ninia povu. Iha loron neʼebá, Maromak Jeová sei hatudu ninia forsa nuʼudar Funu-Naʼin iha dalan neʼebé makaʼas liu fali “iha tempu uluk”.—Zac 14:3.
15 Iha Jeová nia loron funu neʼe, saida mak sei akontese ba ema neʼebé la hela iha Maromak nia fatin protesaun? Profeta Zacarias fó-hatene nanis katak sira sei la iha “naroman neʼebé folin-boot”, neʼe katak sira sei la hetan Jeová nia laran-diʼak. Iha loron funu neʼe, “kuda, kuda-burru inan, kuda-kamelu, kuda-burru aman, no animál hakiak hotu” sei sai “hanesan jelu-fatuk”. Ida-neʼe katak kilat no armas funu nian oioin sei sai buat neʼebé la iha folin. Zacarias hatete katak Jeová sei fó kastigu ba ninia inimigu sira ho “moras”. Sira-nia matan no nanál “sei sai dodok”. Ita la hatene se moras neʼe tebes ka reprezenta buat ruma, maibé ita hatene ho klaru katak Maromak nia inimigu sira sei la bele ona atu halo aat mai ita ka koʼalia hasoru Maromak. (Zac 14:6, 7, 12, 15) Iha tempu neʼebá, “liurai sira hotu raiklaran nian no sira-nia soldadu sira” sei apoia Satanás. Maibé Jeová sei halakon sira hotu maski sira iha fatin naran deʼit iha mundu neʼe. (Apok 19:19-21) “Ema sira neʼebé Jeová oho iha loron neʼebá sei sai barak husi mundu nia rohan ida toʼo mundu nia rohan ida seluk.”—Jer 25:32, 33.
16. Pergunta saida deʼit mak ita presiza husu ba ita-nia an? Durante terus makaʼas, ita sei presiza halo saida deʼit?
16 Funu sempre lori susar ba ema hotu, inklui mós ba sira neʼebé ikusmai manán. Tan neʼe, iha tempu terus boot, karik ita sei kuran ai-han, ka ita-nia sasán sira sei lakon. Karik ita mós sei la iha liberdade hanesan agora. Se ita hasoru susar hanesan neʼe, ita sei halo saida? Ita sei laran-taridu? Ita sei laran-tun no lakon esperansa ka lae? Ita sei para atu serbí Jeová ka lae? Durante terus boot, ita sei presiza duni hela nafatin iha Jeová nia fatin protesaun hodi laran-metin ba nia no tau fiar ba ninia forsa atu proteje ita.—Lee Habacuque 3:17, 18. c
“BEE MORIS NIAN SEI SULI SAI”
17, 18. (a) “Bee moris nian” reprezenta saida? (b) “Tasi iha lorosaʼe” no “tasi iha loromonu” reprezenta saida? (c) Ita presiza hakaʼas an nafatin atu halo saida?
17 Liutiha funu Armagedon, “bee moris nian” sei suli sai husi Kristu nia Ukun. “Bee moris nian” neʼe reprezenta buat hotu neʼebé Maromak fó ba ema atu bele moris ba nafatin. Iha Zacarias nia profesia, “tasi iha lorosaʼe” mak kona-ba Tasi Mate, no ida-neʼe reprezenta ema neʼebé iha rate laran. “Tasi iha loromonu” mak Tasi Mediterráneu. Tanba tasi neʼe nakonu ho moris, neʼe reprezenta “ema-lubun boot” neʼebé moris liu Armagedon. (Lee Zacarias 14:8, 9; d Apok 7:9-15) Grupu rua neʼe sei hemu “bee moris nian” husi “mota bee moris nian”, no ikusmai sira sei sai livre husi sala no sei moris ba nafatin.—Apok 22:1-3.
Mai ita hela nafatin iha Jeová nia fatin protesaun
18 Kuandu Jeová halakon mundu aat neʼe, nia sei proteje ita no lori ita ba mundu foun. Entaun, maski nasaun hotu iha mundu neʼe odi ita, mai ita laran-metin nafatin ba Maromak nia Ukun no kontinua hela iha “rai kleʼan” iha Jeová nia foho sira-nia klaran nuʼudar fatin protesaun.
a Zacarias 14:1, 2: “1 Haree! Jeová nia loron mai daudaun, no sasán hadau husi ó, ema sei fahe iha ó-nia leet. 2 No haʼu sei halibur nasaun hotu atu halo funu hasoru Jerusalém; no ema sei manán duni sidade neʼe no sei hadau sasán husi uma sira, no estraga feto sira. No sorin balun husi ema iha sidade neʼe sei sai dadur; maibé kona-ba restu husi povu, sira sei la lakon husi sidade neʼe.”
b Haree livru Wahyu—Klimaksnya yang Menakjubkan Sudah Dekat!, pájina 169-170.
c Habacuque 3:17, 18: “17 Maski ai-figeira la fó fuan tan, no uvas hun la fó tan fuan, no ai-oliveira la fó tan rezultadu diʼak, no toʼos sira la fó tan ai-han; bibi sira la iha luhan, no la iha tan luhan ba animál sira; 18 Maibé ba haʼu, haʼu sei haksolok iha Jeová; haʼu sei haksolok iha Maromak haʼu-nia salvasaun nian.”
d Zacarias 14:8, 9: “8 No iha loron neʼebá bee moris nian sei suli sai husi Jerusalém, balun ba tasi iha lorosaʼe, balun ba tasi iha loromonu. Bee neʼe sei suli iha tempu manas no tempu malirin. 9 No Jeová sei sai liurai iha mundu tomak. Iha loron neʼebá Jeová sei sai ida deʼit, no ninia naran ida deʼit.”
