1. Oinsá mak atleta ida hatudu katak nia la rende an atu halai-taru?

 HUSI tempu joven, Mary Decker iha naran-boot nuʼudar atleta neʼebé halai-taru. Tan neʼe, kuandu halaʼo Olimpíada iha tinan 1984, ema barak hein katak nia sei manán medalla osan-mean iha halai-taru ba metru 3.000. Maibé, durante iha halai-taru nia laran, nia sidi ema seluk nia ain no monu, tan neʼe nia la konsege halai toʼo rohan. Maski nuneʼe, nia la rende an atu halai-taru nafatin. La toʼo tinan ida, kuandu nia halai-taru fali ba metru 1.600, nia manán hodi halai lalais liu fali feto hotu iha mundu tomak.

2. Esplika toʼok kona-ba ita-nia halai-taru nuʼudar ema kristaun.

² Nuʼudar ema kristaun, ita mós halai-taru iha dalan espirituál, no ita labele husik buat ida hapara ita atu halai toʼo rohan hodi bele manán moris rohan-laek. Maibé, ita-nia halai-taru laʼós atu halai lalais ba tempu uitoan deʼit, no mós laʼós atu halai halimar hodi para beibeik. Ita-nia halai-taru mak hanesan maratona, neʼebé presiza halai nafatin toʼo rohan ho laran-metin. Apóstolu Paulo hatete ba ema kristaun iha Korinto, hodi dehan: “Imi la hatene katak sira neʼebé halai iha estádiu halai atu manán, maibé ida deʼit mak manán nia kolen? Imi halai bá atu manán.”—1 Kor 9:24.

3. Sé mak bele manán moris rohan-laek iha ita-nia halai-taru?

³ Bíblia hatete atu ita halai nafatin iha ita-nia halai-taru neʼe. (Lee 1 Korinto 9:25-27.) Kolen ba halai-taru neʼe mak moris rohan-laek. La hanesan ho halai-taru baibain, ema hotu neʼebé halai toʼo rohan bele manán kolen neʼe. (Mt 24:13) Ida-neʼe katak ema neʼebé la halo tuir lei ka matadalan iha halai-taru neʼe ka ema neʼebé  para antes halai toʼo rohan, sira deʼit mak lakon. Liután neʼe, ita-nia halai-taru deʼit mak fó moris rohan-laek nuʼudar kolen.

4. Tanbasá mak la fasil ba ita atu halai toʼo rohan?

⁴ Maibé la fasil ba ita atu halai toʼo rohan. Tuir loloos, ema ida deʼit mak halai toʼo rohan hodi nunka sidi, neʼe mak Jesus Kristu. Dixípulu Tiago mós hatete katak “ita hotu halo sala dala barak”. (Tgo 3:2) Loos duni, tanba ita rasik nia sala ka ema seluk nia sala, ida-neʼe bele halo ita sidi no dala ruma monu. Maibé, ita presiza hamriik fali no kontinua halai toʼo rohan maski dala ruma ita presiza simu ema seluk nia ajuda.—1 Reis 8:46.

5, 6. (a) Tanbasá mak ‘la iha buat neʼebé halo ita sidi’? Saida mak bele ajuda ita atu “hamriik fali”? (b) Tanbasá mak ema balu la “hamriik fali” kuandu sira sidi?

⁵ Buat neʼebé ita halo kuandu ita “sidi” ka “monu” iha dalan espirituál, ida-neʼe hatudu sai ita ema oinsá loos. Ema kristaun balu neʼebé sidi ka monu, sira arrepende an no kontinua fali atu serbí Maromak. Maibé balu la halo hanesan neʼe. Provérbios 24:16 hatete: “Ema laran loos ida karik monu ba dala hitu, maski nuneʼe nia sei hamriik fali; maibé ema aat sei sidi tanba hasoru susar.”

⁶ Eskritura neʼe hatudu katak maski ita sidi ka monu, maibé ita bele hamriik fali no kontinua halai. Se ita nafatin tau fiar ba Jeová, nia prontu atu ajuda ita kuandu ita iha problema ka halo sala. Nia sei ajuda ita atu “hamriik fali” tanba nia hatene katak ita hadomi nia. Maibé, ema aat lakohi “hamriik fali” no lakohi simu ajuda husi Maromak nia espíritu santu no ninia atan sira. Maibé ba ema neʼebé ‘hadomi Jeová nia ukun-fuan’, “la iha buat neʼebé halo sira sidi” hodi la husik buat ida hapara sira halai nafatin atu hetan moris rohan-laek.—Lee Salmo 119:165. a

7, 8. Oinsá mak Jeová simu nafatin ita maski ita “monu”?

 ⁷ Dala ruma ema kristaun ida monu ba sala tanba ninia fraku ruma, no karik nia halo sala neʼe dala barak. Maibé, se nia “hamriik fali” hodi arrepende an no hakaʼas an atu kontinua serbí Jeová ho laran-metin, Jeová sei nafatin simu nia nuʼudar “ema laran loos”. Ita hatene ida-neʼe liuhusi dalan neʼebé Maromak hatudu laran-diʼak ba povu Israel iha tempu uluk. (Isa 41:9, 10) Iha Provérbios 24:16 hatudu katak maski ita halo sala, maibé Jeová sei ajuda ita atu “hamriik fali”. (Lee Isaías 55:7. b) Maromak Jeová no Jesus Kristu tau fiar ba ita katak ita sei halo buat hotu neʼebé ita bele, no sira fó laran-manas mai ita atu “hamriik fali”.—Sal 86:5; Joao 5:19.

⁸ Ema neʼebé sidi ka monu kuandu halai maratona, se nia hamriik kedas, nia sei iha tempu atu halai toʼo rohan. Iha ita-nia halai-taru atu hetan moris rohan-laek, ita la hatene “loron no oras” neʼebé ita sei ramata halai-taru neʼe. (Mt 24:36) Maibé, se ita hakaʼas an atu la sidi, ida-neʼe sei halo fasil ba ita atu kontinua halai toʼo rohan. Entaun, oinsá mak ita bele hadook an husi buat neʼebé halo ita sidi?

9. Saida deʼit mak bele halo ita sidi?

⁹ Mai ita koʼalia kona-ba buat lima neʼebé bele halo ita sidi. Neʼe mak ita rasik nia fraku, hakarak aat isin nian, maluk kristaun nia hahalok neʼebé la tuir justisa, susar no terus, no ema seluk nia sala. Maibé, ita labele haluha katak maski ita sidi, Jeová nafatin hatudu pasiénsia no sei la husik ita.

10, 11. David nia fraku mak saida?

¹⁰ Ita rasik nia fraku mak hanesan fatuk sira iha dalan. Mai ita haree oinsá mak Liurai David no apóstolu Pedro sidi ba sira rasik nia fraku. Liurai David nia fraku mak la kontrola an, no Pedro nia fraku mak taʼuk ba ema.

¹¹ Tanba Liurai David la kontrola an, ida-neʼe halo nia monu ba sala-foʼer ho Batseba. David mós besik atu halo hahalok aat kuandu Nabal koʼalia ladiʼak ba nia. Maski nuneʼe, David nunka rende an atu halo Jeová kontente. Hodi simu ajuda husi ema seluk, nia nafatin serbí Jeová ho laran-metin.—1 Sam 25:5-13, 32, 33; 2 Sam 12:1-13.

12. Oinsá mak Pedro halai nafatin maski dala ruma nia sidi?

¹² Pedro nia fraku mak taʼuk ba ema. Maski nia hatudu nafatin laran-metin ba Jesus no Jeová, maibé dala ruma ninia fraku neʼe halo nia sidi. Porezemplu, nia nega Jesus dala tolu. (Lc 22:54-62) Liutiha tempu balu, Pedro mós halo sala hodi hafolin liu maluk kristaun judeu sira duké ema kristaun jentiu sira. Kuandu Pedro nia hahalok sala neʼe besik atu estraga unidade iha kongregasaun, Paulo fó konsellu ba nia. (Gal 2:11-14) Ida-neʼe halo Pedro sai hirus no hapara nia atu halai toʼo rohan ka lae? Lae, nia simu Paulo nia konsellu no troka ninia hahalok, no nia kontinua halai nafatin atu manán moris rohan-laek.

13. Oinsá mak dala ruma problema kona-ba saúde bele halo ita sidi?

¹³ Dala ruma, ita-nia fraku mak kona-ba saúde. Ida-neʼe mós bele halo ita sidi, no halo ita sai kole atu laʼo ba oin iha dalan espirituál. Porezemplu, irmán ida husi rai-Japaun, liutiha tinan 17 depois nia hetan batizmu, nia sai moras. Ida-neʼe halo nia hanoin barak toʼo ninia relasaun ho Jeová sai fraku. Ikusmai, nia la bá haklaken no la  tuir reuniaun. Maibé katuas kristaun naʼin-rua bá vizita nia hodi fó laran-manas, no nia komesa fali tuir reuniaun. Irmán neʼe hatete: “Tanba irmaun sira-neʼe simu haʼu ho laran-diʼak, ida-neʼe book haʼu-nia laran toʼo haʼu tanis.” Agora, irmán neʼe halai fali hodi bele hetan moris rohan-laek.

14, 15. Kuandu ita iha hakarak aat isin nian, ita presiza halo saida deʼit? Fó toʼok ezemplu.

¹⁴ Buat ida seluk neʼebé halo ema barak sidi mak hakarak aat isin nian. Kuandu hakarak aat isin nian mak intenta ita, ita presiza hakaʼas an atu halo ita-nia hanoin no hahalok moos nafatin tuir Maromak nia matadalan. Jesus fó konsellu mai ita atu “soe tiha” buat naran deʼit neʼebé dada ita ba sala, inklui ita-nia matan ka liman rasik. Ida-neʼe katak ita presiza hasai hakarak no hahalok naran deʼit neʼebé imorál neʼebé bele hapara ita atu halai toʼo rohan.—Lee Mateus 18:8.

¹⁵ Irmaun ida neʼebé boot iha família kristaun hatete katak ba tinan barak, nia luta hasoru ninia hakarak omoseksuál nian. Nia dehan: “Haʼu sempre sente ladiʼak no laran la hakmatek.” Kuandu nia seidauk tinan 20, nia serbí ona nuʼudar pioneiru regulár no atan ba kongregasaun. Maibé, irmaun neʼe monu ba sala, hetan dixiplina tuir Bíblia, no simu ajuda husi katuas kristaun sira. Hodi halo orasaun, estuda Bíblia, no hakaʼas an atu ajuda ema seluk, ida-neʼe ajuda nia hamriik fali no kontinua halai iha dalan espirituál. Liutiha tinan barak, irmaun neʼe hatete: “Toʼo ohin loron, dala ruma haʼu sente hakarak isin nian makaʼas, maibé haʼu la husik ida-neʼe atu domina fali haʼu. Haʼu aprende katak Jeová la husik ita atu hetan tentasaun makaʼas toʼo ita la bele tahan. Tan neʼe, haʼu fiar katak Maromak hatene haʼu bele tahan duni.” Nia mós dehan: “Haʼu-nia hakaʼas-an sei la sai saugati deʼit bainhira haʼu tama iha mundu foun.” Nia hatutan tan: “Toʼo tempu neʼebá, haʼu sei luta nafatin.”

16, 17. (a) Kuandu irmaun ida hasoru situasaun neʼebé la tuir justisa, saida mak ajuda nia? (b) Atu ita labele sidi, ita presiza hanoin-hetan saida?

¹⁶ Dala ruma, ita-nia maluk kristaun nia hahalok neʼebé la tuir justisa mós bele halo ita sidi. Irmaun ida iha rai-Fransa, neʼebé uluk serbí nuʼudar katuas kristaun, nia hanoin katak irmaun sira seluk la hatudu hahalok neʼebé tuir justisa ba nia, no ida-neʼe halo nia sai laran-kanek. Ikusmai, nia para tuir reuniaun no la bá haklaken. Maibé katuas kristaun naʼin-rua bá vizita nia no rona buat neʼebé nia fó sai hodi la hapara nia atu koʼalia. Depois, katuas sira-neʼe fó laran-manas ba nia atu tau fiar ba Jeová no hatete katak buat neʼebé importante liu mak atu halo Jeová kontente. Irmaun neʼe simu konsellu neʼe, no lakleur nia komesa fali atu kontinua halai toʼo rohan iha dalan espirituál.

¹⁷ Ita hotu presiza hanoin-hetan katak Jesus mak kongregasaun nia Ulun no ita lalika hanoin demais kona-ba buat neʼebé ema sala-naʼin halo. Ho “matan hanesan ahi-lakan”, Jesus haree buat hotu neʼebé akontese iha kongregasaun no nia hatene buat barak liu duké ita ema hatene. (Apok 1:13-16) Porezemplu, karik ita hanoin katak buat ruma neʼebé akontese iha kongregasaun laran la tuir justisa, maibé tuir loloos, ita mak hanoin sala ka la hatene tansá mak ida-neʼe akontese. Jesus sei hadiʼa buat hotu tuir kongregasaun nia presiza iha dalan neʼebé loos no iha tempu neʼebé loos. Tan neʼe, ita labele husik ita-nia maluk kristaun sira-nia hahalok atu halo ita sidi.

18. Oinsá mak ita bele tahan hasoru susar oioin?

¹⁸ Buat rua tan neʼebé bele halo ita sidi mak susar ka terus no mós maluk kristaun  nia sala. Iha Jesus nia ai-knanoik kona-ba ema neʼebé kari fini, nia hatete katak “susar eh terus” neʼebé mai husi ema neʼebé kontra lia-loos bele halo ema balu monu ka sidi. Kuandu ita-nia família, viziñu, ka governu fó-terus ita tanba lia-loos, ida-neʼe bele halo ita sidi, liuliu se ita “abut la iha”, ka ita-nia fiar fraku. (Mt 13:21) Maibé, se ita laran-metin nafatin ba Jeová, fini lia-loos nian sei sai abut iha ita-nia laran. Nuneʼe, kuandu ita hasoru susar, ita presiza hakaʼas an atu hanoin kleʼan kona-ba buat neʼebé moos no loos hodi halo orasaun. (Lee Filipe 4:6-9.) Ho Jeová nia ajuda, ita bele tahan hasoru susar oioin hodi labele husik buat sira-neʼe halo ita sidi.

19. Atu labele husik ita-nia maluk nia hahalok halo ita sidi, saida deʼit mak ita bele halo?

¹⁹ Ema kristaun balu fali, sira husik sira-nia maluk nia sala hapara sira hodi la serbí tan Jeová. Iha mós ema neʼebé sidi tanba ninia maluk ida halo buat ruma neʼebé ema neʼe nia konxiénsia la husik nia atu halo. (1 Kor 8:12, 13) Entaun, se ema ruma nia hahalok halo ita laran-kanek, ita sei husik ida-neʼe hapara ita hodi la halai tan toʼo rohan ka lae? Bíblia haruka ita atu labele tesi lia ba malu maibé fó perdua ba malu maski ita iha razaun atu sente laran-kanek. (Lc 6:37) Tan neʼe, kuandu ita-nia maluk nia hahalok halo ita sente laran-kanek, diʼak atu husu ba ita-nia an: ‘Haʼu tesi lia ba ema seluk tan deʼit sira halo buat neʼebé la tuir haʼu-nia hanoin ka lae? Haʼu sei husik lia-loos tan deʼit haʼu-nia maluk sala-naʼin nia hahalok ka lae?’ Ita-nia domin ba Jeová ajuda ita atu labele husik ema seluk nia hahalok atu hapara ita halai toʼo rohan.

20, 21. Ita presiza halo saida deʼit iha ita-nia halai-taru hodi bele hetan moris rohan-laek?

²⁰ Ita hakarak duni atu ‘halai toʼo rohan’ ka lae? (2 Tim 4:7, 8) Se nuneʼe, ita tenke estuda Bíblia no ita-nia livru sira, buka informasaun liután, no hanoin kleʼan. Hodi halo nuneʼe, ita sei hatene buat saida deʼit mak bele halo ita sidi. Husu Jeová atu fó forsa mai ita liuhusi ninia espíritu santu. Hanoin-hetan katak maski dala ruma ita sidi ka monu, maibé ita bele hamriik fali no kontinua halai toʼo rohan. Se ita aprende husi ita rasik nia sala, ida-neʼe sei ajuda ita atu bele halai diʼak liután.

²¹ Ita-nia halai-taru la hanesan ho saʼe bís no depois bís mak lori ita ba fatin neʼebé ita hakarak bá. Bíblia hatudu katak ita rasik mak presiza hakaʼas an atu halai toʼo rohan hodi bele hetan moris rohan-laek nuʼudar ita-nia kolen. Nuʼudar ita halai nafatin, Jeová sei fó “dame barak” mai ita. (Sal 119:165) Sin, ita bele fiar katak Jeová sei kontinua haraik bensaun mai ita agora, no sei haraik bensaun barak ba nafatin iha futuru se ita halai toʼo rohan.—Tgo 1:12.