Esperiénsia balu husi rai-Bretaña sei ajuda ita atu haree tansá mak ita labele lakon esperansa. Ita mós sei haree saida deʼit mak ita presiza halo hodi ‘tau ita-nia paun iha bee leten’ atu bele ajuda ema neʼebé seidauk simu lia-loos.—Ecle 11:1.

Buat ida neʼebé importante ita bele halo mak ita labele para atu serbí Jeová. Ita presiza kaer metin nafatin ba lia-loos no laran-metin ba Jeová. (Deut 10:20) Ida-neʼe mak buat neʼebé irmán Georgina halo. Kuandu Testemuña ba Jeová komesa estuda Bíblia ho nia iha tinan 1970, ninia laʼen, naran Kyriacos, sai hirus tebes. Kyriacos koko hapara Georgina atu labele estuda tan, la husik Testemuña sira atu tama iha ninia uma, no soe livru hotu.

Kuandu Georgina komesa tuir reuniaun, Kyriacos sai hirus liután. Loron ida, Kyriacos bá Reuniaun-Fatin atu halo problema. Maibé irmán ida haree katak Kyriacos koʼalia lia-gregu diʼak liu fali lia-inglés, tan neʼe nia bolu irmaun ida husi rai-Grésia iha kongregasaun seluk atu ajuda. Tanba irmaun neʼe koʼalia ho Kyriacos iha dalan neʼebé hatudu laran-diʼak, ida-neʼe book Kyriacos simu atu estuda Bíblia ho nia. Maibé liutiha fulan balu, Kyriacos para atu estuda.

Ba tinan tolu tan, Kyriacos fó susar beibeik ba ninia feen. Kyriacos hatete katak se Georgina hetan batizmu nia sei soe malu ho Georgina. Iha loron neʼebé Georgina atu hetan batizmu, nia halo orasaun ho laran ba Jeová hodi ninia laʼen labele soe malu ho nia. Kuandu Testemuña balu bá Georgina nia uma atu tula nia ba reuniaun boot, Kyriacos hatete ba sira: “Imi bele bá uluk. Ami sei tuir imi ho ami-nia karreta.” Kyriacos tuir programa dadeer nian no haree ninia feen hetan batizmu!

Depois neʼe, Kyriacos ladún fó susar tan ba Georgina no neineik-neineik nia halo mudansa oioin. Besik tinan 40 depois Georgina hasoru Testemuña, ikusmai nia haree ninia laʼen hetan batizmu! Saida mak ajuda Kyriacos? Nia hatete: “Haʼu kontente tebes ho Georgina tanba nia la para atu serbí Jeová.” Georgina hatete: “Maski haʼu-nia laʼen fó susar mai haʼu, maibé haʼu la para atu adora Maromak. Durante tempu neʼe, haʼu sempre halo orasaun ba Jeová no haʼu la lakon esperansa.”

Buat ida tan neʼebé ita bele halo atu ajuda ita-nia kaben mak hodi haburas hahalok diʼak nuʼudar ema kristaun. Apóstolu Pedro hatete ba feen kristaun sira: “Imi rona imi-nia kaben bá; atu imi bele lori sira balun mai neʼebé la halo tuir liafuan, laʼós tanba liafuan ruma, maibé ho sira feen nia hahalok.” (1 Ped 3:1) Irmán Christine halo tuir konsellu neʼe maski nia presiza tinan barak atu ajuda ninia laʼen simu lia-loos. Kuandu Christine sai Testemuña iha tinan 20 liubá, ninia laʼen naran John hanoin katak nia la presiza Maromak iha ninia moris, no nia mós la gosta atu envolve an iha relijiaun. Maibé, nia haree katak relijiaun foun neʼe importante tebes ba ninia feen. John hatete: “Haʼu haree katak relijiaun neʼe halo nia kontente, nia sai ema neʼebé iha forsa iha laran no iha konfiansa, no ida-neʼe ajuda haʼu atu tahan hasoru susar oioin.”

Christine nunka obriga ninia laʼen atu simu ninia fiar. John dehan: “Christine hatene katak diʼak liu la koʼalia ba haʼu kona-ba ninia relijiaun, no nia ho pasiénsia husik haʼu aprende lia-loos neineik-neineik tuir haʼu-nia hakarak.” Kuandu Christine haree katak Livru Haklaken ka Matan-moris bá! fó sai informasaun ruma neʼebé John gosta, hanesan kona-ba siénsia ka kriasaun, nia hatudu informasaun neʼe ba John, hodi hatete: “Haʼu hanoin karik ó sei gosta lee ida-neʼe.”

Ikusmai, John para ona serbisu tanba katuas, no nia komesa tau matan deʼit ba jardín. Tanba nia iha tempu barak liu atu hanoin pergunta oioin kona-ba moris, nia komesa hanoin: ‘Ita ema nia moris mosu mesak deʼit, ka Maromak mak kria ita tanba razaun ruma?’ Loron ida, kuandu John koʼalia halimar ho irmaun ida, irmaun neʼe husu: “Ita hakarak estuda Bíblia?” Iha tempu neʼebá, John hatete: “Tanba haʼu komesa ona atu fiar ba Maromak, haʼu simu atu estuda.”

Diʼak tebes katak Christine nunka lakon esperansa! Durante tinan 20 nia laran, Christine halo orasaun beibeik atu ninia laʼen bele simu lia-loos, no ikusmai hetan batizmu. Agora, sira naʼin-rua serbí Jeová hamutuk. Irmaun John hatete: “Iha buat rua neʼebé book haʼu-nia laran. Neʼe mak Testemuña sira hatudu laran-diʼak no sai kolega diʼak ho haʼu. No se Ita-nia kaben mak Testemuña ida, neʼe katak Ita iha kaben neʼebé laran-metin ba Ita, bele tau fiar, no la hanoin  an deʼit.” Loos duni, irmán Christine halo tuir liafuan iha 1 Pedro 3:1 no hetan rezultadu diʼak!

Oinsá kona-ba estudante Bíblia neʼebé para atu estuda tanba razaun ruma? Liurai Salomão hakerek: “Iha dadeer kari ó-nia fini bá, no keta husik ó-nia liman atu deskansa toʼo kalan, tanba ó la hatene ida-neʼebé mak sei moris, iha neʼe ka iha neʼebá, ka rua-rua sei fó rezultadu diʼak.” (Ecle 11:6) Dala ruma, presiza tinan barak atu fini lia-loos nian bele moris iha ema nia laran. Maski nuneʼe, neineik-neineik sira rekoñese katak importante duni atu hakbesik ba Maromak. (Tgo 4:8) Sin, loron ida karik ita sei hakfodak no kontente ho rezultadu diʼak.

Hanoin toʼok kona-ba Alice husi rai-Índia, neʼebé muda ba rai-Inglaterra. Iha tinan 1974, nia komesa estuda Bíblia. Nia koʼalia lia-hindi maibé nia hakarak aprende lia-inglés. Alice kontinua estuda ba tinan balu, no tuir reuniaun iha lia-inglés ba dala balu. Nia hatene katak buat neʼebé nia aprende mak lia-loos, maibé nia la hanoin katak ida-neʼe mak importante. Liután neʼe, nia hanoin liu mak atu buka osan no bá festa. Ikusmai, Alice para estuda Bíblia.

Besik tinan 30 liu tiha, irmán Stella, neʼebé uluk estuda ho Alice, nia simu karta husi Alice. Karta neʼe hatete: “Haʼu fiar katak Ita sei kontente atu hatene katak ema neʼebé Ita estuda Bíblia iha tinan 1974 mak foin hetan batizmu iha reuniaun boot. Ita-nia ajuda mak sai buat neʼebé importante tebes iha haʼu-nia moris. Ita kuda fini lia-loos nian iha haʼu-nia laran, no maski iha tempu neʼebá haʼu seidauk prontu atu dedika an ba Maromak, maibé haʼu sei rai hela fini neʼe iha haʼu-nia neon no laran.”

Saida mak book Alice atu buka fali lia-loos? Nia esplika katak kuandu ninia laʼen mate iha tinan 1997, ida-neʼe halo nia laran-tun tebes. Loron ida, nia halo orasaun ba Maromak. Latoʼo minutu sanulu, Testemuña naʼin-rua neʼebé koʼalia lia-punjabi haklaken ba nia iha ninia uma no fó tratu Apa Harapan Bagi Orang-Orang Tercinta yang Sudah Meninggal? Alice sente katak ida-neʼe mak resposta ba ninia orasaun no deside atu halibur hamutuk ho Testemuña ba Jeová. Maibé oinsá? Nia loke ninia kadernu tuan neʼebé hakerek kongregasaun lia-punjabi nia diresaun, neʼebé uluk irmán Stella mak fó hela ba nia. Alice bá vizita Reuniaun-Fatin, no irmaun-irmán sira neʼebé koʼalia lia-punjabi kontente atu simu nia. Alice hatete: “Maski haʼu fila fali ba uma, haʼu sente nafatin sira-nia domin no ida-neʼe ajuda duni haʼu atu la sai laran-tun demais.”

Alice komesa tuir reuniaun beibeik no hahú estuda fali, no aprende atu koʼalia no lee ho momoos lia-punjabi. Ikusmai, iha tinan 2003, nia hetan batizmu. Alice nia karta ba irmán Stella ramata hodi dehan: “Obrigada barak tanba tinan 29 liubá Ita kuda fini lia-loos nian iha haʼu-nia laran no hatudu ezemplu diʼak mai haʼu.”

“Obrigada barak tanba tinan 29 liubá Ita kuda fini lia-loos nian iha haʼu-nia laran no hatudu ezemplu diʼak mai haʼu.”—Alice

Ita bele aprende saida husi esperiénsia hirak-neʼe? Maski ita presiza hein tinan barak, maibé se ema ida hamrook ba lia-loos, laran-moos, no haraik-an, Jeová sei haburas lia-loos neʼe iha ema neʼe nia laran. Iha Jesus nia ai-knanoik kona-ba kari fini, nia dehan: “Musan neʼe moris no sai boot; oinsá loos, [ema neʼebé kari fini] la hatene. Husi nia kbiit rasik, rai lori nia atu fó fuan: Uluk dikin, hafoin fulin, no ikusmai trigu neʼebé tasak ona.” (Mc 4:27, 28) Fini neʼebé ema kari sei moris no sai boot neineik-neineik. Nuneʼe mós ho serbisu haklaken, ita la hatene oinsá mak fini lia-loos nian bele moris no sai boot iha ema nia laran. Tan neʼe, ita presiza kari nafatin fini barak hodi bele koʼa fuan barak iha futuru.

Ita mós labele haluha katak importante tebes atu halo orasaun. Irmán Georgina no Christine halo orasaun beibeik ba Jeová. Sin, se ita “la kole atu harohan” no nunka lakon esperansa, “liutiha loron barak” ita bele hetan fali “paun” neʼebé ita tau iha bee leten.—Rom 12:12; Ecle 11:1.