1, 2. Vizaun sira kona-ba Jeová nia organizasaun book ita atu halo saida?

 ITA haksolok tebes tanba ita sai parte ba Maromak Jeová nia organizasaun neʼebé boot. Vizaun sira neʼebé ita lee iha Ezequiel kapítulu 1 no Daniel kapítulu 7 hatudu oinsá mak Jeová kontinua serbisu atu halo ninia hakarak sai loos. Jesus mak tau matan ba Jeová nia organizasaun parte rai nian, no nia uza ida-neʼe atu dirije serbisu haklaken, atu hanorin no fó laran-manas ba sira neʼebé halaʼo serbisu neʼe, no atu ajuda ema seluk adora Jeová iha dalan neʼebé loos. Ida-neʼe book duni ita atu tau fiar ba Jeová nia organizasaun.—Mt 24:45.

² Ita halo tuir Jeová nia organizasaun nia ezemplu hodi badinas nafatin iha Maromak nia serbisu ka lae? Ka ita sente katak ita ladún badinas ona hanesan uluk? Ida-neʼe mós akontese ba ema kristaun sira iha apóstolu sira-nia tempu. Apóstolu Paulo presiza fó-hanoin ba sira kona-ba Jesus nia ezemplu hodi ajuda sira atu “la kole ka fuan namlele”. (Ebr 12:3) Iha lisaun uluk, ita estuda kona-ba serbisu importante neʼebé Jeová nia organizasaun halo ohin loron. Hanesan Jesus nia ezemplu fó laran-manas ba ema kristaun sira iha apóstolu sira-nia tempu, nuneʼe mós Jeová nia organizasaun nia ezemplu bele ajuda ita atu tahan no badinas nafatin iha Maromak nia serbisu.

3. Saida mak ita presiza halo hodi ita la lakon ita-nia laran-manas? Saida mak ita sei estuda iha lisaun neʼe?

³ Maibé hodi ita “keta kole”, ka la lakon ita-nia laran-manas ba Maromak nia serbisu, ita labele hanoin deʼit kona-ba Jeová nia organizasaun nia ezemplu. Saida tan mak ita presiza halo? Paulo hatete katak ita tenke kontinua “halo hahalok diʼak sira”. (Gal 6:9) Mai ita koʼalia kona-ba buat lima neʼebé ita tenke halo hodi badinas nafatin iha Maromak nia serbisu no laʼo ba oin nafatin hamutuk ho Jeová nia organizasaun. Tuirmai, ita sei haree se ita ka ita-nia família presiza halo buat sira-neʼe ho diʼak liután.

4. Tanbasá mak ita bele dehan katak reuniaun sira parte importante iha adorasaun loos?

⁴ Husi tempu uluk toʼo agora, reuniaun sira mak buat neʼebé importante ba Jeová nia atan sira. Porezemplu, iha lalehan Maromak Jeová halo reuniaun ho ninia anju sira. (1 Reis 22:19; Jó 1:6; 2:1; Dan 7:10) Iha ema Israel sira-nia tempu, Maromak haruka sira atu halibur hamutuk “atu sira bele rona no atu sira bele aprende”. (Deut 31:10-12) Iha apóstolu sira-nia tempu, ema judeu sira halibur hamutuk beibeik iha sinagoga sira atu lee husi Eskritura. (Lc 4:16; Apos 15:21) Kuandu kongregasaun kristaun harii, reuniaun sira kontinua sai importante, no ohin loron reuniaun sira mak parte importante nafatin iha ita-nia adorasaun. Ema kristaun loos “hakaʼas malu atu hadomi no halo hahalok diʼak”. Sin, ita presiza duni “fó laran-manas ba malu” liuliu tanba ita hatene katak ita moris iha loron ikus sira.—Ebr 10:24, 25.

5. Oinsá mak ita bele fó laran-manas ba malu iha reuniaun sira?

⁵ Dalan importante ida neʼebé ita bele fó laran-manas ba malu iha reuniaun sira mak hodi fó komentáriu. Porezemplu, ita bele hatán pergunta iha parágrafu, fó komentáriu kona-ba eskritura, ka hatoʼo esperiénsia badak neʼebé hatudu oinsá mak Bíblia nia matadalan ajuda ita. (Sal 22:22; 40:9) Komentáriu hotu neʼebé ita rona iha reuniaun, husi labarik sira toʼo ema idade, fó laran-manas duni mai ita. Sin, ita sente hanesan neʼe duni maski ita kleur ona iha lia-loos.

6. Ita-nia reuniaun sira ajuda ita iha dalan saida deʼit?

⁶ Ita-nia reuniaun kongregasaun nian no reuniaun boot sira mós ajuda ita iha dalan seluk tan. Porezemplu, reuniaun sira-neʼe fó aten-brani mai ita atu haklaken maski ema iha ita-nia haklaken-fatin kontra ita ka lakohi rona mai ita. (Apos 4:23, 31) Diskursu sira neʼebé hatoʼo husi Bíblia hametin ita-nia fiar. (Apos 15:32; Rom 1:11, 12) Hodi ransu hamutuk ho ita-nia irmaun-irmán sira, neʼe fó kmaan no halo ita haksolok. (Sal 94:12, 13) Komisaun Hanorin nian husi Grupu Administradór mak organiza no prepara programa ba reuniaun sira atu hanorin Jeová nia povu iha mundu tomak. Ita mós agradese ba hanorin kapás neʼebé ita simu iha ita-nia reuniaun semana-semana.

7, 8. (a) Saida mak razaun importante liu atu ita tuir reuniaun sira? (b) Oinsá mak reuniaun sira ajuda ita?

⁷ Maibé tuir loloos, ita la tuir reuniaun sira atu hetan deʼit buat diʼak. Razaun importante liu tansá ita tuir reuniaun sira mak atu adora Jeová. (Lee Salmo 95:6. a) Iha reuniaun sira ita iha oportunidade espesiál atu kanta hodi hahiʼi ita-nia Maromak! (Kol 3:16) Ita mós bele hahiʼi Jeová hodi hola parte iha reuniaun sira. Sin, Jeová merese duni atu simu adorasaun neʼebé ita fó ba nia iha dalan sira hanesan neʼe. (Apok 4:11) Ida-neʼe hatudu katak importante tebes atu tuir reuniaun beibeik.—Ebr 10:25.

⁸ Ita-nia reuniaun sira mak prezente husi Jeová atu ajuda ita tahan toʼo tempu neʼebé Nia sei halakon mundu aat neʼe. Ita sente duni hanesan neʼe ka lae? Se nuneʼe, maski ita okupadu tebes iha ita-nia moris, maibé mai ita hakaʼas an nafatin atu tuir reuniaun hotu. (Flp 1:10) Entaun, keta husik razaun neʼebé ladún importante atu halo ita falta reuniaun sira.

9. Saida deʼit mak hatudu katak serbisu haklaken importante tebes?

⁹ Atu laʼo ba oin hamutuk ho Jeová nia organizasaun, ita presiza haklaken ho badinas. Jesus hahú serbisu neʼe kuandu nia sei iha rai. (Mt 28:19, 20) Husi tempu neʼebá,  serbisu haklaken no hanorin mak sai nuʼudar buat neʼebé importante tebes iha Jeová nia organizasaun parte lalehan no rai nian. Esperiénsia barak hatudu katak anju sira apoia ita-nia serbisu no ajuda ita atu buka ema neʼebé hakarak simu lia-loos. (Apos 13:48; Apok 14:6, 7) No tuir loloos, Jeová harii ninia organizasaun parte rai nian atu organiza no apoia serbisu haklaken. Ita mós haree serbisu neʼe nuʼudar buat importante ida iha ita-nia moris ka lae?

10. (a) Oinsá mak irmaun ida halo ninia domin ba lia-loos metin nafatin? (b) Oinsá mak serbisu haklaken halo ita-nia domin ba lia-loos sai metin liu?

¹⁰ Kuandu ita haklaken ho badinas, ita-nia domin ba lia-loos sai metin liu. Ida-neʼe mak buat neʼebé irmaun Mitchel sente. Irmaun Mitchel mak katuas kongregasaun nian neʼebé iha esperiénsia barak ona no nia mós serbí nuʼudar pioneiru regulár. Nia hatete: “Haʼu gosta tebes fó-hatene ema kona-ba lia-loos. Haʼu hanoin kona-ba informasaun foun sira iha Livru Haklaken ka Matan-Moris bá!, no haʼu hakfodak tebes ho informasaun sira-neʼe tanba hakerek ho matenek. Haʼu hakarak bá haklaken hodi haree ema nia hanoin kona-ba neʼe, no oinsá haʼu bele book sira-nia laran atu hakarak hatene liután.” Irmaun Mitchel mós hatete katak serbisu haklaken ajuda nia atu tau uluk buat neʼebé importante liu iha ninia moris, no la husik buat naran deʼit hanetik nia atu halo ida-neʼe. Ita mós bele tahan iha loron ikus sira-neʼe hodi badinas nafatin iha Maromak nia serbisu.—Lee 1 Korinto 15:58.

11. Tanbasá mak ita tenke lee ita-nia livru sira no hanoin kleʼan buat neʼebé ita lee?

¹¹ Dalan ida neʼebé Jeová hametin ita mak liuhusi livru sira neʼebé ita simu. Karik ita mós hanoin-hetan tempu neʼebé ita lee ita-nia livru ida no halo ita hanoin: ‘Haʼu presiza duni ida-neʼe! Neʼe hanesan Jeová hakerek ida-neʼe liuliu ba haʼu!’ Ita iha razaun diʼak duni atu sente hanesan neʼe. Tanbasá? Tanba Jeová uza ita-nia livru sira atu hanorin ita no dirije ita. Maromak hatete: “Haʼu sei halo ó sai matenek no hanorin ó kona-ba dalan neʼebé ó tenke tuir.” (Sal 32:8) Ita hakaʼas an atu lee livru hotu neʼebé ita simu no hanoin kleʼan buat neʼebé ita lee ka lae? Ida-neʼe sei ajuda ita atu tahan no badinas nafatin iha Maromak nia serbisu iha loron ikus sira-neʼe neʼebé iha susar barak.—Lee Salmo 1:2, 3. b

12. Oinsá mak ita bele hafolin liután ita-nia livru sira?

¹² Ita sei hafolin liután ita-nia livru sira se ita hanoin kona-ba serbisu boot neʼebé envolve atu halo buat hirak-neʼe. Porezemplu, presiza buka informasaun, hakerek, halo dezeñu sira, no tradús livru ida-idak neʼebé ita halo ka hatama iha ita-nia sítiu iha internét. Komisaun Hakerek nian husi Grupu Administradór mak iha responsabilidade atu halo serbisu neʼe. Ikusmai, sukursál sira neʼebé print ita-nia livru haruka livru sira ba kongregasaun barak neʼebé sira tau matan. Tanbasá mak presiza halo serbisu hotu neʼe? Hodi Jeová nia povu bele simu hanorin no matadalan neʼebé sira presiza atu laran-metin nafatin. (Isa 65:13) Entaun, mai ita aproveita ho didiʼak livru sira hotu neʼebé ita simu husi Jeová nia organizasaun.—Sal 119:27.

13, 14. Iha lalehan, sé mak apoia Jeová nia organizasaun? Oinsá mak ita bele hatudu katak ita mós apoia Jeová nia organizasaun?

¹³ Iha apóstolu João nia vizaun, nia haree Jesus saʼe kuda mutin hodi manán funu hasoru sira neʼebé kontra hasoru Jeová. (Apok 19:11-15) Nia mós haree ema kose-mina sira neʼebé moris hiʼas fali ona iha lalehan no anju sira neʼebé saʼe kuda hodi tuir Jesus. Ida-neʼe hatudu katak sira apoia Jesus nuʼudar sira-nia Ulun-Naʼin. (Apok 2:26, 27) Sira-nia ezemplu diʼak neʼe hanorin ita katak ita mós tenke apoia sira neʼebé hetan knaar iha Jeová nia organizasaun atu tau matan mai ita.

¹⁴ Iha dalan neʼebé hanesan, ema-lubun boot apoia serbisu neʼebé Kristu nia alin kose-mina sira halo iha rai. (Lee Zacarias 8:23. c) Oinsá mak ita bele hatudu katak ita apoia Jeová nia organizasaun? Dalan ida mak hodi halo tuir sira neʼebé iha knaar atu tau matan mai ita. (Ebr 13:7, 17) Ita-nia liafuan kona-ba katuas sira iha kongregasaun hatudu katak ita respeitu sira no hafolin serbisu neʼebé sira halo ka lae? Ita hanorin ita-nia oan sira atu halo tuir irmaun laran-metin sira-neʼe no atu rona ba sira-nia konsellu ka lae? Iha mós dalan seluk tan neʼebé ita bele hatudu katak ita apoia Jeová nia organizasaun. Porezemplu, nuʼudar família ita halo planu atu fó osan nuʼudar kontribuisaun ba serbisu haklaken iha mundu tomak ka lae? (Prov 3:9; 1 Kor 16:2; 2 Kor 8:12) No mós, ita ajuda atu tau matan no hamoos ita-nia Reuniaun-Fatin ka lae? Kuandu Jeová haree  ita apoia ninia organizasaun iha dalan sira hanesan neʼe, nia sei haraik ninia espíritu santu mai ita hodi bele fó forsa neʼebé ita presiza atu tahan iha loron ikus sira-neʼe.—Isa 40:29-31.

15. Tanbasá mak ita tenke hakaʼas an atu kontinua halo buat neʼebé loos?

¹⁵ Se ita hakarak atu tahan nafatin no laʼo ba oin hamutuk ho Jeová nia organizasaun, ita tenke moris iha dalan neʼebé halo Jeová kontente. (Ef 5:10, 11) Satanás, mundu aat neʼe, no ita-nia hakarak isin nian neʼebé sala, buat hirak-neʼe halo susar mai ita atu halo buat neʼebé loos. Karik ita balu loroloron tenke hakaʼas an makaʼas atu bele laran-metin nafatin ba Jeová. Maibé, la haluha katak Jeová hadomi ita no hafolin duni ita-nia hakaʼas-an. Tan neʼe, keta rende an! Se ita halaʼo ita-nia moris iha dalan neʼebé halo Jeová kontente, ita-nia moris sei kontente liu no iha folin, no ita mós bele fiar katak Jeová simu ita.—1 Kor 9:24-27.

16, 17. (a) Saida mak ita presiza halo se ita halo sala neʼebé boot? (b) Saida mak ita aprende husi irmán Anne nia ezemplu?

¹⁶ Maibé, oinsá se ita halo sala neʼebé boot? Se nuneʼe, ita labele subar ida-neʼe. Duké halo nuneʼe, diʼak liu atu husu ajuda lalais. Hanoin-hetan oinsá David sente kuandu nia koko atu subar ninia sala. Nia hatete: “Haʼu-nia ruin kole tanba haʼu halerik loron tomak.” (Sal 32:3) Se ita koko atu subar sala neʼebé boot, ita sei lakon ita-nia haksolok no ita mós bele estraga ita-nia relasaun ho Jeová. Maibé se ita fó sai ita-nia sala, ita sei “simu laran-sadiʼa”.—Prov 28:13.

¹⁷ Hanoin toʼok ezemplu husi irmán Anne. d Kuandu nia sei joven no serbí nuʼudar pioneiru regulár, nia komesa halo hahalok sira neʼebé aat. Rezultadu mak saida? Ninia laran komesa fó-sala ba nia. Nia hatete: “Haʼu la kontente no haʼu laran-tun beibeik.” Loron ida iha reuniaun, irmaun neʼebé hatoʼo diskursu esplika eskritura iha Tiago 5:14, 15. Ida-neʼe halo irmán Anne rekoñese katak nia presiza ajuda. Entaun, saida mak nia halo? Nia halo tuir matadalan iha eskritura neʼe no koʼalia ba katuas kristaun sira. Maski la fasil, maibé nia hatete katak nia hanesan ema moras ida no Jeová fó nia ai-moruk neʼebé nia presiza. Nia dehan: “Ai-moruk neʼe susar atu tolan, maibé bele kura duni.” Agora, irmán Anne iha laran neʼebé moos no nia badinas fali atu serbí Jeová.

18. Ita tenke hakaʼas an atu halo saida deʼit?

¹⁸ Ita presiza hanoin-hetan katak iha loron ikus sira-neʼe, ita iha oportunidade espesiál duni atu sai parte iha Jeová nia organizasaun! Tan neʼe, hamutuk ho ita-nia família, mai ita hakaʼas an atu tuir reuniaun beibeik, atu haklaken ho badinas, no atu aproveita ho didiʼak ita-nia livru sira hotu. Mai ita mós apoia sira neʼebé iha knaar atu tau matan mai ita, no halaʼo ita-nia moris iha dalan neʼebé halo Jeová kontente. Hodi halo buat hirak-neʼe, ita sei laʼo ba oin nafatin hamutuk ho Jeová nia organizasaun no ita sei la kole atu halo buat neʼebé loos.