1. Tanbasá mak importante atu ita tau fiar tomak ba Maromak nia Liafuan?

 ANTES estudante Bíblia bele komesa haklaken hamutuk ho kongregasaun, nia presiza hatudu katak nia fiar duni Bíblia nuʼudar Maromak nia Liafuan. a Tuir loloos, ita hotu presiza hatudu liuhusi buat neʼebé ita halo no koʼalia katak ita fiar Bíblia. Kuandu ita tau fiar tomak ba Bíblia no aprende atu uza Bíblia ho didiʼak iha serbisu haklaken, ita bele ajuda ema seluk atu hatene Maromak Jeová no atu bele hetan salvasaun.

2. Tanbasá mak ita tenke ‘laran-metin ba buat neʼebé ita hatene ona’?

² Kuandu apóstolu Paulo hakerek ba Timóteo, nia hatudu oinsá Maromak nia Liafuan mak importante duni, nia hatete: “Laran-metin ba buat neʼebé ó hatene ona.” “Buat neʼebé ó hatene ona” neʼebé Paulo temi iha neʼe mak kona-ba lia-loos husi Bíblia neʼebé book Timóteo atu tau fiar ba liafuan diʼak. Nuneʼe mós ohin loron, lia-loos sira-neʼe book ita-nia moris, no kontinua ajuda ita atu iha matenek hodi bele “hetan maksoin”. (2 Tim 3:14, 15) Paulo nia liafuan iha versíkulu tuirmai hatudu katak Bíblia mai husi Maromak. Maibé ita mós bele aprende buat seluk tan husi liafuan sira iha 2 Timoteo 3:16. (Lee.) Ita sei koʼalia kona-ba liafuan sira iha versíkulu neʼe hodi hametin liután ita-nia fiar katak hanorin hotu husi Jeová mak “loos”.—Sal 119:128.

3-5. (a) Rona tiha Pedro nia diskursu, saida mak mak ema-lubun halo? Tanbasá? (b) Tanbasá mak ema barak iha Tesalónika simu lia-loos? (c) Ohin loron, ema barak gosta saida kona-ba ita-nia serbisu haklaken?

³ Jesus hatete ba nasaun Israel: “Haʼu haruka ba imi profeta no ema matenek no mestre sira.” (Mt 23:34, MF) Iha neʼe Jesus koʼalia kona-ba ninia dixípulu sira neʼebé nia hanorin  atu uza Eskritura iha sira-nia serbisu haklaken. Iha Pentekostes 33, ema ida husi “mestre” sira-neʼe mak apóstolu Pedro. Nia hatoʼo diskursu iha ema-lubun nia oin iha Jerusalém no nia temi liafuan balu husi Eskritura Lia-Ebraiku. Rona tiha oinsá mak Pedro esplika liafuan sira-neʼe, ema barak “sira-nia laran taridu”, no sira arrepende sala neʼebé sira halo uluk. Maizumenus ema naʼin-3.000 husu perdua husi Maromak no sai ema kristaun.—Apos 2:37-41.

⁴ Mestre ida seluk tan mak apóstolu Paulo. Nia haklaken liafuan diʼak iha fatin sira neʼebé dook husi Jerusalém. Porezemplu, iha rai-Masedónia nia sidade ida naran Tesalonika, nia koʼalia ba ema judeu sira neʼebé halaʼo adorasaun iha sinagoga. Loron Sábadu tolu tuituir malu, Paulo hanorin “sira husi Eskritura, hodi hateten no hatudu katak Mesias tenke terus no moris hiʼas husi mate”. Rezultadu mak saida? “Sira balun fiar . . . nuneʼe mós ema gregu barak.”—Apos 17:1-4.

⁵ Ohin loron, dalan neʼebé Maromak nia atan sira uza Bíblia book duni ema barak. Porezemplu, kuandu uma-naʼin ida husi rai-Suisa rona tiha ita-nia irmán ida lee eskritura ba nia, uma-naʼin neʼe husu ba nia: “Imi mai husi neʼebé?” Irmán hatán: “Haʼu ho haʼu-nia kolega mak Testemuña ba Jeová.” Uma-naʼin neʼe hatete: “Tuir loloos, haʼu tenke hatene nanis ona, tanba se laʼós Testemuña ba Jeová, sé tan mak mai iha haʼu-nia uma atu lee Bíblia?”

6, 7. (a) Oinsá mak sira neʼebé hatoʼo diskursu iha kongregasaun bele uza Bíblia iha dalan diʼak liután? (b) Tanbasá mak importante atu uza eskritura sira ho didiʼak kuandu ita estuda Bíblia ho ema?

⁶ Oinsá mak ita bele uza Bíblia iha dalan diʼak liután kuandu ita hanorin? Se ita hetan knaar atu hatoʼo diskursu iha kongregasaun, diʼak atu uza eskritura husi Bíblia. Duké esplika deʼit liafuan importante ka lee eskritura husi ita-nia nota, diʼak liu atu loke Bíblia no lee eskritura, no husu rona-naʼin sira mós atu halo nuneʼe. No mós, uza tempu atu esplika ho didiʼak eskritura iha dalan neʼebé ajuda rona-naʼin atu hakbesik liután ba Jeová. Duké gasta tempu hodi uza ilustrasaun neʼebé susar atu komprende ka konta deʼit esperiénsia sira neʼebé halo rona-naʼin hamnasa, diʼak liu uza tempu neʼe atu esplika ho klaru Maromak nia Liafuan.

⁷ Kuandu ita estuda Bíblia ho ema seluk, saida mak ita presiza hanoin-hetan? Ita lakohi atu husik deʼit eskritura sira neʼebé temi iha livru neʼebé ita uza atu estuda. Husu ita-nia estudante Bíblia atu lee eskritura sira, no kuandu ita esplika eskritura sira ajuda nia atu komprende. Oinsá mak ita bele halo ida-neʼe? Ita la presiza koʼalia naruk atu esplika, maibé ita bele fó laran-manas ba nia atu fó sai ninia hanoin. Duké fó-hatene ba nia saida mak nia tenke fiar ka saida mak nia tenke halo, diʼak liu husu pergunta sira neʼebé sei ajuda nia atu hatene rasik saida mak nia tenke halo. b

8. Paulo luta hasoru saida iha ninia laran?

⁸ Iha kongregasaun, katuas kristaun sira mak iha responsabilidade “atu halakon hanorin neʼebé la loos”, ka korrije ema neʼebé “metin ba sala”. (1 Tim 5:20; Tito 1:13) Maibé importante mós ba ita atu korrije ita-nia an rasik. Paulo mak ema kristaun ida neʼebé iha laran moos. (2 Tim 1:3) Maski nuneʼe, nia hakerek: “Haʼu haree iha haʼu-nia liman ain buat seluk tan neʼebé halo funu hasoru ukun-fuan iha haʼu-nia laran, hodi kesi haʼu metin ba ukun-fuan sala nian.” Ita sei koʼalia kona-ba saida mak Paulo halo atu bele luta hasoru ninia fraku ka sala.—Lee Roma 7:21-25.

9, 10. (a) Paulo hakaʼas an atu luta hasoru fraku saida deʼit? (b) Saida mak ajuda Paulo atu luta hasoru ninia fraku?

⁹ Maski Paulo la fó-hatene kona-ba fraku saida mak nia luta hasoru, maibé nia hakerek ba Timóteo katak uluk nia mós ema neʼebé “hateten liafuan aat”. (1 Tim 1:13) Antes Paulo  sai ema kristaun, nia kontra makaʼas ema kristaun sira, no nia fó sai ninia sentimentu ba sira hodi hatete: “Haʼu laran-nakali tebetebes hasoru sira.” (Apos 26:11) Maski ikusmai Paulo aprende atu kontrola ninia hirus, maibé dala ruma nia nafatin sente susar atu kontrola ninia sentimentu no ninia liafuan. (Apos 15:36-39) Saida mak ajuda Paulo atu bele halo ida-neʼe?

¹⁰ Kuandu Paulo hakerek karta ba ema kristaun sira iha Korinto, nia fó-hatene buat neʼebé nia halo atu korrije ninia an. (Lee 1 Korinto 9:26, 27.) Nia halo duni buat ruma atu manán hasoru ninia fraku sira. Ita bele fiar katak Paulo buka konsellu iha Maromak nia Liafuan, husu Jeová atu ajuda nia halo tuir konsellu sira-neʼe, no hakaʼas an atu hadiʼa ninia hahalok. c Ita bele aprende husi Paulo nia ezemplu neʼe tanba ita mós iha fraku sira neʼebé ita tenke luta hasoru.

11. Oinsá mak ita bele “koko” nafatin ita-nia an atu hatene se ita loloos laʼo iha dalan lia-loos nian ka lae?

¹¹ Ita labele para atu luta hasoru ita-nia fraku sira. Tan neʼe, ita presiza “koko” nafatin ita-nia an atu hatene se ita loloos laʼo iha dalan lia-loos nian ka lae. (2 Kor 13:5) Kuandu ita lee eskritura ruma, hanesan Koloso 3:5-10, ita bele husu ba ita-nia an: ‘Haʼu hakaʼas an duni atu oho hakarak aat isin nian ka haʼu sai fraku ona iha dalan morál? Kuandu haʼu uza internét no sítiu aat ruma mosu, haʼu lalais atu taka kedas sítiu neʼe ka haʼu uza tempu atu buka sítiu sira neʼebé ladiʼak?’ Hodi halo tuir konsellu husi Maromak nia Liafuan, neʼe sei ajuda ita atu nafatin “matan-moris no oin-moos”.—1 Tes 5:6-8.

12, 13. (a) Halo loos buat ruma katak sá? Oinsá mak ita bele halo tuir Jesus nia ezemplu kona-ba halo loos buat ruma? (b) Se ita presiza halo loos buat ruma ho ema seluk, liafuan hanesan saida mak ita labele koʼalia?

¹² Liafuan gregu neʼebé tradús nuʼudar “sai matadalan ba ema nia moris” mós katak halo loos buat ruma, korrije ka hadiʼa buat ruma. Dala ruma ita presiza halo loos buat ruma kuandu ema komprende sala buat neʼebé ita halo ka hatete. Porezemplu, kuandu ulun-naʼin sira husi relijiaun judeu kesar katak Jesus hatudu laran-diʼak ba ema “publikanu no maksalak sira”, Jesus hatán ba sira: “Laʼós sira neʼebé isin-diʼak mak kuran doutór, maibé sira neʼebé moras. Imi buka-hatene liafuan neʼe katak sá: ‘Haʼu hakarak laran-luak, laʼós sakrifísiu.’” (Mt 9:11-13) Ho laran-diʼak no pasiénsia Jesus esplika Maromak nia liafuan ba ema hotu. Tan neʼe, ema sira neʼebé haraik-an hatene Jeová nuʼudar “Maromak neʼebé laran-sadiʼa no laran-luak, neineik atu hirus no nakonu ho laran-diʼak no lia-loos”. (Êx 34:6) Tanba Maromak nia Oan hakaʼas an atu “halo loos” ema nia hanoin, ema barak tau fiar ba liafuan diʼak.

¹³ Jesus nia ezemplu hanorin ita oinsá atu ajuda ema seluk. Matadalan iha 2 Timoteo 3:16 la dehan katak ita tenke koʼalia makaʼas ka ho hirus ba ema seluk hodi halo loos sira-nia hanoin. Bíblia nunka fó direitu ba ita atu koʼalia ba ema seluk hodi la hanoin sira-nia sentimentu. Se ita kritika ka koʼalia makaʼas ba ema seluk, ita-nia liafuan sei sai hanesan “sona ho surik”. Ita sei halo sira-nia laran kanek no karik ita-nia liafuan sei la lori buat diʼak ba sira.—Prov 12:18.

14-16. (a) Oinsá mak katuas sira bele ajuda ema seluk atu rezolve sira-nia problema? (b) Tanbasá mak importante ba inan-aman sira atu uza Bíblia nia matadalan atu halo loos buat ruma kona-ba sira-nia oan?

¹⁴ Oinsá mak ita bele hatudu pasiénsia no laran-diʼak kuandu ita uza Bíblia atu halo loos buat ruma? Hanoin toʼok katak kaben-naʼin neʼebé haksesuk malu beibeik husu katuas kristaun ida atu ajuda sira. Saida mak katuas kristaun neʼe sei halo? Nia labele todan ba sorin, no nia labele fó ninia opiniaun rasik kona-ba sira-nia problema. Duké halo ida-neʼe, nia tenke uza Bíblia nia matadalan atu ajuda sira komprende saida mak sira bele halo atu hapara haksesuk  malu. Karik nia uza matadalan sira iha kapítulu 3 husi livru Halaʼo Moris neʼebé Kontente nuʼudar Família. Nuʼudar sira koʼalia hamutuk kona-ba matadalan sira-neʼe, karik laʼen no feen neʼe sei hatene katak sira presiza halo mudansa ruma. Liutiha tempu balu, katuas neʼe sei husu kaben-naʼin neʼe se sira-nia situasaun sai diʼak liu ka lae, no se presiza nia sei fó ajuda liután.

 ¹⁵ Oinsá mak inan-aman bele ajuda sira-nia oan atu halo loos buat ruma? Hanoin toʼok katak ita-nia oan-feto joven halo kolega ho ema neʼebé ladún diʼak. Primeiru, ita presiza hatene liután kona-ba ninia kolega neʼe. Depois, se ita nafatin sente katak ninia kolega neʼe ladún diʼak, entaun ita bele koʼalia ho ita-nia oan. Ita bele uza matadalan balu husi Bíblia neʼebé ita hetan iha livru Pertanyaan Kaum Muda—Jawaban yang Praktis, Jilid 2. Depois, durante loron balu ita presiza gasta tempu ho nia. Ita mós bele haree se nia nafatin sente kontente kuandu nia bá haklaken ka kuandu nia hamutuk ho ita-nia família. Se ita hatudu pasiénsia no laran-diʼak kuandu koʼalia ba ita-nia oan, nia sei sente katak ita hadomi nia no hanoin ninia diʼak. Ida-neʼe sei book nia atu halo tuir ita-nia konsellu kona-ba kolega sira no atu hadook an husi desizaun neʼebé sala.

¹⁶ Ita mós bele hatudu pasiénsia no laran-diʼak kuandu ita anima ema neʼebé sente laran-susar kona-ba sira-nia saúde, ka laran-tun tanba foin lakon serbisu, ka sente susar atu simu hanorin ruma husi Bíblia. Hodi uza matadalan sira husi Maromak nia Liafuan atu halo loos buat ruma, ida-neʼe sei lori buat diʼak barak ba ita hotu.

17. Tanbasá mak ita presiza simu dixiplina?

¹⁷ Bíblia hatete: “Loos duni, kastigu [ka “dixiplina”, MF] naran deʼit todan liu iha nia tempu, no halo ita la haksolok; maibé kastigu liu tiha, nia fó fuan dame no justisa ba sira neʼebé simu  tiha nia.” (Ebr 12:11) Ema kristaun barak neʼebé sai boot iha lia-loos, dehan katak dixiplina neʼebé sira hetan husi inan-aman ajuda duni sira. Nuneʼe mós, kuandu ita simu dixiplina husi Jeová liuhusi katuas sira iha kongregasaun, ida-neʼe ajuda ita atu laʼo nafatin iha dalan neʼebé lori ita ba moris.—Prov 4:13.

18, 19. (a) Tanbasá mak konsellu iha Provérbios 18:13 importante tebes ba katuas sira neʼebé presiza fó dixiplina? (b) Kuandu katuas sira fó konsellu ho domin no laran-maus, ida-neʼe bele lori rezultadu saida?

¹⁸ Oinsá mak inan-aman no katuas sira iha kongregasaun bele fó dixiplina iha dalan neʼebé diʼak? Jeová hatete katak ita presiza fó dixiplina “atu hanorin sira sai santu”. Iha lia orijinál, liafuan neʼe mós katak “fó dixiplina tuir justisa, ka buat neʼebé loos”. (2 Tim 3:16) Neʼe hatudu katak ita tenke uza matadalan husi Bíblia kuandu ita fó dixiplina ba ema seluk. Matadalan importante ida husi Bíblia mak iha Provérbios 18:13, neʼebé dehan: “Kuandu ema ruma fó resposta ba kazu ruma antes rona, ema neʼe beik-teen no hamoe ninia an.” Tan neʼe, se ema fó-hatene ba katuas sira katak ema ida iha kongregasaun halo sala boot ruma, katuas sira tenke buka-hatene didiʼak uluklai buat hotu kona-ba situasaun neʼe antes sira fó dixiplina. (Deut 13:14) Depois mak sira bele fó dixiplina tuir justisa, ka buat neʼebé loos.

¹⁹ Liután neʼe, Bíblia hatete ba katuas sira atu fó dixiplina ho “laran-kmaus”. (Lee 2 Timoteo 2:24-26.) Maski ema ida neʼebé halo sala bele hafoʼer Maromak nia naran ka hakanek ema seluk, maibé se katuas ida fó konsellu ba nia ho laran-hirus, ida-neʼe sei la ajuda ema neʼe. Katuas sira presiza banati-tuir Maromak hodi koʼalia ho laran-diʼak ba ema neʼebé halo sala, ida-neʼe bele book nia atu arrepende an.—Rom 2:4.

20. Kuandu inan-aman sira fó dixiplina ba sira-nia oan, sira presiza halo tuir matadalan saida deʼit?

²⁰ Inan-aman sira mós tenke halo tuir Bíblia nia matadalan kuandu sira fó dixiplina ba sira-nia oan. (Ef 6:4) Porezemplu, aman sei halo saida kuandu ema ruma hatete katak ninia oan halo sala ida? Antes aman neʼe fó kastigu ba ninia oan, ulukliu nia tenke buka-hatene saida mak loloos akontese. No mós, iha família kristaun nia uma-laran, labele iha ema ida neʼebé sai hirus makaʼas liu toʼo halo violénsia. Bíblia hatete katak Jeová mak “laran-luak no diʼak”, no inan-aman sira presiza banati-tuir Maromak kuandu sira fó dixiplina ba sira-nia oan.—Tgo 5:11.

21, 22. Kuandu ita lee Salmo 119:97-99, 101, 104, liafuan ida-neʼebé mak hatudu sai buat neʼebé ita sente kona-ba Jeová nia Liafuan?

²¹ Maromak nia atan ida husi tempu uluk fó-hatene tansá mak nia hadomi Jeová nia ukun-fuan. (Lee Salmo 119:97-99, 101, 104. d) Hodi estuda Bíblia, nia sai matenek atu komprende kona-ba situasaun sira neʼebé mosu. Kuandu nia halo tuir matadalan sira husi Maromak nia Liafuan, ida-neʼe ajuda nia atu hasees an husi sala neʼebé ema barak halo. Nia kontente tebes atu estuda Maromak nia Liafuan no hetan buat diʼak kuandu nia halo tuir konsellu sira. Nia hakarak duni atu halo tuir Jeová nia ukun-fuan iha ninia moris tomak.

²² Ita hafolin “Eskritura hotu” ka lae? Bíblia bele ajuda ita atu hametin ita-nia fiar katak Maromak sei kumpre ninia hakarak. Bíblia iha konsellu barak husi Maromak Jeová neʼebé bele ajuda ita atu hadook an husi hahalok sala neʼebé lori ba mate. Ita bele uza Bíblia atu ajuda ema seluk laʼo iha dalan neʼebé lori ba moris. Tan neʼe, mai ita kontinua uza Bíblia iha dalan sira hanesan neʼe nuʼudar ita serbí ita-nia Maromak Jeová, neʼebé matenek no hadomi tebes ita.