Nasaun barak iha tempu uluk fó kastigu-mate ba ema neʼebé halo krime hodi tara sira iha ai-riin ka ai-lolon. Porezemplu, ema Roma sira kesi ka prega ema neʼebé halo krime iha ai-riin no husik sira ba loron balu toʼo mate. Karik sira tahan moras, hamrook, hamlaha, no loro-manas ka anin mós kona sira. Ema Roma fó kastigu neʼe ba deʼit ema neʼebé halo krime boot hodi hamoe sira.

Oinsá kona-ba nasaun Israel iha tempu uluk? Sira mós fó kastigu-mate ba ema neʼebé halo krime hodi tara sira iha ai-riin ka lae? Moisés nia Ukun-Fuan hatete: “Se mane ida merese atu hetan kastigu-mate tanba sala neʼebé nia halo, no nia mate duni, no ó tara nia iha ai-riin, labele husik ninia mate-isin iha ai-riin ba kalan tomak; maibé ó tenke hakoi nia iha loron neʼe duni.” (Deut 21:22, 23) Ida-neʼe hatudu katak iha tempu Eskritura Lia-Ebraiku nian, ema neʼebé hetan kastigu-mate, nia tenke mate uluk no depois mak tara iha ai-riin ka iha ai-hun.

Kona-ba ida-neʼe, Levítico 20:2 hatete: “Ema naran deʼit husi Israel nia oan sira, no ema estranjeiru naran deʼit neʼebé hela iha Israel, neʼebé fó ninia oan ba maromak Moloc, ema neʼe tenke mate. Ema husi nasaun neʼe tenke tuda nia ho fatuk toʼo mate.” Nuneʼe mós ho ‘matan-dook sira ka sira neʼebé siʼik futuru’, sira tenke hetan kastigu-mate hodi ‘tuda ho fatuk toʼo mate’.—Lev 20:27.

Deuteronômio 22:23, 24 hatete: “Se feto-raan ida neʼebé promete ona atu kaben ho mane ida, no mane seluk hetan nia iha sidade laran no toba hamutuk ho nia, imi tenke lori sira naʼin-rua ba portaun nia liʼur iha sidade neʼe no tuda mate sira ho fatuk, tanba feto neʼe la hakilar iha sidade no mane neʼe estraga ninia maluk nia feen. Imi tenke halakon buat neʼebé aat husi imi-nia leet.” Eskritura hirak-neʼe hatudu oinsá mak ema Israel iha tempu neʼebá fó kastigu-mate ba ema neʼebé halo krime, neʼe mak hodi tuda ho fatuk. a

Deuteronômio 21:23 hatete katak “ema neʼebé tara tiha iha ai-riin hetan malisan husi Maromak”. Entaun, hodi tara ema neʼebé halo krime nia mate-isin iha ai-riin ka ai-hun, ida-neʼe sai duni nuʼudar avizu ba ema Israel sira.