IDA-NEʼE akontese iha tinan 1949. Maibé, haʼu-nia istória hahú tinan balu antes neʼe. Haʼu-nia aman, naran Hendrik, nia serbisu nuʼudar badain-sapatu no tau matan ba jardín iha aldeia kiʼik ida iha parte norte husi sidade Drenthe, iha rai-Olanda. Haʼu moris iha tinan 1927 no oan númeru haat husi oan naʼin-hitu. Ami-nia uma iha foho. Ami-nia viziñu barak mak toʼos-naʼin, no haʼu kontente atu hela iha neʼebá. Iha tinan 1947, bainhira haʼu tinan 19, haʼu komesa aprende lia-loos husi viziñu ida naran Theunis Been. Foufoun, haʼu la gosta Theunis. Maibé depois Funu Mundiál Segundu ramata, nia sai Testemuña ba Jeová, no ninia hahalok troka. Ida-neʼe book haʼu atu rona ba buat neʼebé nia koʼalia kona-ba mundu foun neʼebé Maromak promete. Lakleur, haʼu mós simu lia-loos no ami naʼin-rua sai belun neʼebé diʼak toʼo ohin loron. a

Haʼu komesa haklaken iha Maiu 1948, no hetan batizmu iha 20 Juñu, iha reuniaun boot iha sidade Utrecht. Iha 1 Janeiru 1949, haʼu komesa foti pioneiru no hetan knaar atu haklaken iha parte leste iha rai-Olanda, iha sidade Boprculo, neʼebé iha kongregasaun kiʼik ida. Fatin neʼe dook maizumenus kilómetru 130, tan neʼe haʼu uza haʼu-nia bisikleta atu bá fatin neʼe. Haʼu hanoin katak haʼu bele uza oras 6 deʼit atu toʼo iha neʼebá, maibé tanba udan boot no anin makaʼas, haʼu gasta oras 12 maski haʼu uza komboiu ba kilómetru 90! Ikusmai,  iha kalan-boot, haʼu toʼo iha família Testemuña ida nia uma, no haʼu hela ho sira atu halo serbisu nuʼudar pioneiru iha sidade neʼe.

Tanba funu foin ramata, iha tempu neʼebá, ema la iha sasán barak. Haʼu mós iha deʼit kazaku ida neʼebé boot no kalsa neʼebé badak demais! Hanesan haʼu foin konta, haʼu hasoru susar iha fulan primeiru iha Borculo, maibé Jeová fó bensaun mai haʼu ho estudante Bíblia balu. Liutiha fulan sia, haʼu hetan fali knaar atu serbí iha sidade Amsterdaun, sidade boot liu iha rai-Olanda.

Tanba haʼu boot iha foho, moris iha sidade Amsterdaun mak oin-seluk. Haklaken iha Amsterdaun diʼak tebes. Iha fulan primeiru iha sidade neʼe, haʼu fahe livru barak liu fali buat neʼebé haʼu fahe iha fulan sia nia laran iha foho. Lakleur, haʼu iha estudu Bíblia ualu ka liu. Depois haʼu sai atan ba kongregasaun (neʼebé ohin loron bolu koordenadór ba grupu katuas nian), no haʼu hetan knaar atu hatoʼo diskursu públiku primeiru. Haʼu sai taʼuk tebes. Tan neʼe, bainhira haʼu hetan knaar foun atu muda ba kongregasaun seluk antes atu hatoʼo diskursu neʼe, haʼu sente kmaan fali. Maibé ikusmai, haʼu hatoʼo diskursu ba dala 5.000 liu iha haʼu-nia moris!

Iha Maiu 1950, haʼu hetan knaar atu serbí iha sidade Haarlem. Depois, haʼu hetan konvite atu serbí nuʼudar katuas área nian. Ida-neʼe halo haʼu la toba-dukur ba loron tolu. Haʼu hatete ba irmaun Robert Winkler, neʼebé serbí iha sukursál, katak haʼu-nia matenek latoʼo atu serbí nuʼudar katuas área nian. Maibé nia hatete: “Prenxe deʼit dokumentu neʼe. Ita sei aprende neineik-neineik.” Lakleur, haʼu simu treinu ba fulan ida no komesa serbí nuʼudar katuas área nian. Bainhira haʼu vizita kongregasaun ida, haʼu hasoru irmán joven pioneiru ida, naran Janny Taatgen. Nia hadomi tebes Jeová no badinas atu haklaken. Ikusmai iha tinan 1955, ami kaben. Agora, Janny sei esplika oinsá mak nia komesa pioneiru.

Janny: Iha tinan 1945 kuandu haʼu foin tinan 11, haʼu-nia inan sai Testemuña. Kuandu nia aprende lia-loos, nia hatene kedas katak nia presiza estuda Bíblia ho ninia oan naʼin-tolu. Maibé tanba ami-nia aman mak kontra lia-loos, ami-nia inan hanorin ami kuandu ami-nia aman la iha uma.

Reuniaun neʼebé haʼu tuir ba dala primeiru mak reuniaun boot ida iha sidade Haia iha tinan 1950. Liutiha semana ida, haʼu tuir reuniaun iha ami-nia rai Assen. Haʼu-nia aman hirus tebes toʼo haruka haʼu sai husi uma. Haʼu-nia inan hatete: “Ó hatene ó bele bá hela iha neʼebé.” Haʼu hatene katak haʼu-nia inan koʼalia kona-ba irmaun-irmán sira. Haʼu komesa hela iha família Testemuña nia uma neʼebé besik ami-nia uma, maibé haʼu-nia aman fó-susar nafatin mai haʼu. Tan neʼe, haʼu muda ba  kongregasaun iha sidade Deventer, neʼebé dook maizumenus kilómetru 95. Maibé, tanba haʼu-nia aman kontra estadu nia lei kona-ba labele husik joven neʼebé ho idade kiʼik sai husi uma, estadu haruka nia atu bolu fali haʼu. Maski haʼu-nia aman la simu lia-loos, maibé neineik-neineik nia husik haʼu atu tuir reuniaun sira no bá haklaken.

Lakleur depois haʼu fila ba uma, haʼu-nia inan sai moras todan no haʼu presiza halo serbisu hotu iha uma-laran. Maski nuneʼe, haʼu kontinua laʼo ba oin iha lia-loos no iha tinan 1951 kuandu haʼu tinan 17, haʼu hetan batizmu. Iha tinan 1952, depois haʼu-nia inan nia saúde sai diʼak fali, haʼu serbí nuʼudar pioneiru estra ba fulan rua hamutuk ho irmán pioneiru naʼin-tolu. Ami hela iha ró laran no bá haklaken iha aldeia rua iha área Drenthe. Haʼu komesa pioneiru regulár iha tinan 1953. Liutiha tinan ida, irmán joven ida vizita ami-nia kongregasaun nuʼudar katuas área nian. Irmaun neʼe mak Markus. Ami hakarak serbí Jeová diʼak liután, no ami hanoin ami bele halo nuneʼe nuʼudar kaben-naʼin. Iha Maiu 1955, ami kaben.—Ecle 4:9-12.

Markus: Depois ami kaben, ami hetan knaar atu serbí nuʼudar pioneiru iha sidade Veendam. Ami hela iha kuartu kiʼik neʼebé luan metru rua ho naruk metru tolu deʼit. Tan neʼe, kalan-kalan ami presiza muda meza no kadeira kiʼik rua atu bele tau fali kama. Maibé Janny halo fatin neʼe kabeer no furak.

Liutiha fulan neen, ami hetan knaar atu vizita kongregasaun sira iha área Flanders iha parte norte iha rai-Béljika. Maski ema koʼalia lian hanesan ho ami-nian, maibé dalan neʼebé sira koʼalia la hanesan, tan neʼe, ami presiza hakaʼas an atu komprende ba malu ho sira. Iha tinan 1955, haklaken-naʼin iha rai neʼe maizumenus naʼin-4.000 deʼit. Maibé ohin loron, sira sai barak toʼo naʼin-24.000 liu!

Janny: Ema neʼebé halaʼo serbisu atu vizita kongregasaun oioin presiza sai prontu atu serbí Maromak no ajuda ema seluk. Ami saʼe bisikleta atu bá vizita kongregasaun sira no hela iha irmaun-irmán sira-nia uma. Tanba ami rasik la iha uma, semana-semana ami presiza hela iha irmaun sira-nia uma toʼo loron-segunda, no iha loron-tersa dadeer, ami muda ba kongregasaun tuirmai. Maibé ami sempre hanoin ami-nia serbisu nuʼudar bensaun husi Maromak Jeová.

Markus: Foufoun ami la koñese irmaun-irmán sira iha rai-Béljika, maibé sira hatudu laran-diʼak no laran-luak tebes mai ami. (Ebr 13:2) Ikusmai, ami vizita kongregasaun hotu neʼebé koʼalia lia-olandés, no neʼe lori bensaun barak mai ami. Porezemplu, ami koñese malu ho irmaun-irmán sira hotu, no ami sai belun neʼebé diʼak. Ami mós haree joven sira sai boot no dedika an ba Jeová, hodi tau uluk Ninia hakarak iha sira-nia moris. Bainhira ami haree sira barak halo serbisu tempu-tomak ba Jeová no foti pioneiru, ida-neʼe lori haksolok  mai ami. (3 Joao 4) Sin, sira fó laran-manas ba ami atu kontinua halaʼo ami-nia knaar ho laran tomak.—Rom 1:12.

Markus: Husi tempu neʼebé ami foin kaben, ami-nia hakarak mak atu tuir Eskola Gilead. Tan neʼe, ami estuda inglés loron-loron oras ida ka liu. Maibé, susar ba ami atu aprende inglés husi livru deʼit, entaun, ami mós bá viajen iha rai-Inglaterra hodi bele pratika inglés nuʼudar ami haklaken. Ikusmai, iha loron ida iha tinan 1963, ami hetan karta rua husi sede-jerál iha Brooklyn, karta ida ba haʼu no ida ba Janny. Iha haʼu-nia karta konvida haʼu atu tuir kursu espesiál ba fulan sanulu iha Eskola Gilead. Kursu ida-neʼe fó treinu liuliu ba irmaun sira kona-ba oinsá atu organiza serbisu haklaken. Tan neʼe, husi estudante naʼin-100 neʼebé hetan konvite, naʼin-82 mak irmaun sira.

Janny: Iha karta neʼebé haʼu simu, sira husu haʼu atu hanoin didiʼak hodi halo orasaun se haʼu prontu atu hela nafatin iha rai-Béljika hodi husik Markus tuir Eskola Gilead. Foufoun, haʼu sai laran-tun. Neʼe haree hanesan Jeová la fó bensaun ba haʼu-nia hakaʼas-an atu aumenta haʼu-nia serbisu ba Nia. Maski nuneʼe, haʼu hanoin fali katak Eskola Gilead fó treinu ba irmaun sira atu bele halaʼo serbisu haklaken iha mundu tomak. Tan neʼe, haʼu simu atu hela iha rai-Béljika no hetan knaar nuʼudar pioneiru tempu-tomak iha sidade Ghent. Iha neʼebá, haʼu serbisu hamutuk ho irmán Anna no Maria Colpaert, neʼebé serbí kleur ona nuʼudar pioneiru tempu-tomak.

Markus: Tanba haʼu presiza hatene didiʼak inglés, haʼu simu konvite atu bá Betel Brooklyn fulan lima antes eskola komesa, no iha neʼebá haʼu serbisu iha departamentu rua, ida kona-ba haruka sasán, no ida seluk kona-ba organiza serbisu haklaken. Hodi prepara livru sira atu haruka ba rai-Ásia, Europa no Amérika Súl, ida-neʼe ajuda haʼu atu hafolin ita-nia relasaun nuʼudar irmaun-irmán sira iha mundu tomak. Haʼu mós hasoru irmaun A. H. Macmillan, neʼebé uluk halaʼo knaar atu vizita kongregasaun sira iha irmaun Russell nia tempu. Maski irmaun neʼe katuas ona no ninia tilun atu besik diuk, maibé nia nunka falta reuniaun. Ida-neʼe hanorin haʼu katak ita-nia reuniaun kristaun mak laʼós buat neʼebé baibain deʼit.—Ebr 10:24, 25.

Janny: Haʼu ho Markus haruka karta ba malu semana ida dala balu. Ami hanoin tebes ba malu! Maski nuneʼe, Markus hetan haksolok hodi simu treinu iha Eskola Gilead, no haʼu mós haksolok ho serbisu haklaken, no bainhira Markus mai fali husi Estadus Unidus, haʼu iha estudu Bíblia 17! Maski ami hetan susar hodi dook malu durante fulan 15, maibé ami haree katak Jeová fó bensaun ba ami-nia sakrifísiu neʼe. Ikusmai, iha loron neʼebé Markus mai fali, ninia aviaun demora ba oras balu. Tan neʼe, kuandu ami hasoru malu fali, ami hakoʼak malu no tanis. Husi tempu neʼebá toʼo agora, ami nunka dook malu.

Markus: Iha Dezembru 1964 bainhira haʼu fila fali husi Eskola Gilead, ami hetan knaar atu serbí iha Betel. Maibé liutiha fulan tolu deʼit, haʼu hetan fali knaar atu serbí nuʼudar katuas vizitante iha área Flanders. Maibé lakleur, irmaun Aalzen  no irmán Els Wiegersma mai toʼo rai-Béljika nuʼudar misionáriu no sira hetan knaar atu serbí nuʼudar katuas vizitante, tan neʼe ami fila fali ba Betel no haʼu komesa serbí iha Departamentu Serbisu nian. Husi tinan 1968 toʼo 1980, ami-nia knaar troka beibeik entre serbisu iha Betel no serbisu vizita kongregasaun sira. Ikusmai, husi tinan 1980 toʼo 2005, haʼu serbí fali nuʼudar katuas vizitante.

Maski ami-nia knaar troka beibeik, maibé ami nunka haluha katak ami dedika ami-nia an ba Jeová atu serbí nia ho laran tomak. Ami haksolok ho knaar hotu neʼebé ami hetan hodi fiar katak ami-nia knaar oioin sei apoia serbisu haklaken iha mundu tomak atu laʼo ba oin.

Janny: Haʼu mós hetan haksolok hodi tuir Markus kuandu nia hetan treinu iha Brooklyn iha tinan 1977 no iha Patterson iha tinan 1997 atu serbí nuʼudar membru husi Grupu Koordenadór.

Markus: Iha tinan 1982, Janny hetan operasaun no nia saúde sai diʼak fali. Liutiha tinan tolu, kongregasaun iha sidade Louvain konvida ami atu hela iha Reuniaun-Fatin nia leten. Neʼe mak primeiravés iha tinan 30 nia laran, neʼebé ami iha hela-fatin rasik. Bainhira ami atu bá vizita kongregasaun, haʼu presiza tun-saʼe eskada ho hakat barak hodi lalin ami-nia sasán. Maibé iha tinan 2002, irmaun sira halo arranju atu ami bele hela iha kraik, no ida-neʼe halo ami kontente. Ikusmai, kuandu haʼu halo tinan 78, ami simu knaar nuʼudar pioneiru tempu-tomak iha sidade Lokeren. Ami kontente tebes ho serbisu neʼe no ami bá haklaken loron-loron.

Janny: Kuandu sura hamutuk tinan neʼebé ami serbí Jeová tempu-tomak, ida-neʼe sai tinan 120! Liuhusi ami-nia esperiénsia rasik, ami hatene katak Jeová sei kumpre duni ninia promesa katak ‘nia sei la husik ita’ no se ita serbí nia ho laran tomak, ita sei “la kuran buat ida”.—Ebr 13:5; Deut 2:7.

Markus: Bainhira ami sei joven, ami dedika ami-nia an ba Jeová. Ami nunka buka buat neʼebé boot ba ami-nia an rasik. Ami prontu nafatin atu halo knaar naran deʼit neʼebé ami hetan tanba ami fiar katak fatin neʼebé ita serbí no knaar saida mak ita halo, neʼe la importante, maibé importante liu mak Maromak Jeová neʼebé ita serbí.