1, 2. Ema hanoin oinsá kona-ba halo desizaun? Oinsá ho Ita?

 LORON-LORON, ita tenke halo desizaun barak. Ita sente oinsá kona-ba halo desizaun sira? Ema balu prontu atu halo desizaun rasik kona-ba buat hotu. Sira hanoin katak sira iha direitu atu halo sira-nia desizaun no lakohi ema seluk atu halo ba sira. Maibé iha mós ema neʼebé taʼuk atu halo desizaun. No iha rai balu, ema barak selu osan ba matenek-naʼin sira ka sosa livru sira atu hetan ajuda hodi bele halo desizaun.

² Ita barak hatene katak maski ita la iha direitu atu halo desizaun balu, ita bele halo desizaun barak tuir ita rasik nia hakarak. (Galasia 6:5) Maski nuneʼe, laʼós desizaun hotu neʼebé ita halo mak diʼak no matenek.

3. Matadalan saida mak ajuda ita atu halo desizaun sira? Tanbasá mak desizaun balu mak susar atu halo?

³ Nuʼudar Jeová nia atan, ita kontente tanba nia fó matadalan mai ita kona-ba buat oioin neʼebé importante iha ita-nia moris. Ita bele fiar katak se ita halo tuir ninia matadalan ita sei halo desizaun sira neʼebé halo Jeová kontente no lori rezultadu diʼak. Maibé, dala ruma ita mós sei hasoru problema ka situasaun neʼebé Bíblia la koʼalia. Kuandu ida-neʼe akontese, desizaun saida mak ita sei halo? Porezemplu, Bíblia hatete katak ita labele naʼok. (Efeso 4:28) Maibé ema balu dehan katak se sasán ruma nia folin kiʼik no nia naʼin ladún presiza, la sala atu foti deʼit sasán neʼe. Oinsá mak ita bele halo desizaun kuandu ema balu hatete katak Bíblia la fó lei? Saida mak bele ajuda ita?

4. Dala ruma ita hetan konsellu saida kuandu ita atu halo desizaun ida?

⁴ Kuandu ita fó-hatene ita-nia maluk kristaun ida katak ita atu halo desizaun neʼebé importante, karik nia sei hatete ba ita atu hanoin didiʼak. Sin, ita presiza halo  desizaun ho hanoin neʼebé loos. Bíblia fó konsellu atu la ansi atu foti desizaun, hodi dehan: “Ema sira neʼebé ansi sei kuran buat neʼebé sira presiza.” (Provérbios [Amsal] 21:5) Maibé atu foti desizaun ida ho hanoin neʼebé loos katak sá? Karik ita hatete katak ita presiza hanoin didiʼak kona-ba situasaun neʼe hodi uza ita-nia matenek no hakaʼas an atu hatene informasaun hotu antes ita foti desizaun. Maibé neʼe toʼo ona ka lae? Maski buat hirak-neʼe importante, maibé hanoin neʼebé loos envolve buat balu tan.—Roma 12:3; 1 Pedro 4:7.

5. Tanbasá mak ita la iha hanoin neʼebé perfeitu?

⁵ Tanba ita hotu moris nuʼudar ema sala-naʼin, ita la iha isin no hanoin neʼebé perfeitu. (Salmo [Mazmur] 51:5; Roma 3:23) Liután neʼe, antes ita aprende kona-ba Jeová no ninia matadalan sira, ita moris iha nakukun laran tanba Satanás mak “taka” ita-nia hanoin. (2 Korinto 4:4; Tito 3:3) Tan neʼe, maski ema ida bele hanoin kleur no halo desizaun neʼebé diʼak tuir ninia hanoin, neʼe la dehan katak nia halo desizaun neʼebé loos.—Provérbios (Amsal) 14:12.

6. Saida mak bele ajuda ita atu iha hanoin neʼebé loos?

⁶ Maski ita-nia hanoin la perfeitu, maibé ita-nia Aman Jeová mak perfeitu iha buat hotu. (Deuteronômio [Ulangan] 32:4) Nia mós fó mai ita buat neʼebé ita presiza atu troka ita-nia hanoin no haburas hanoin neʼebé loos. (Lee Efeso 4:23.) Nuʼudar ema kristaun, ita hakarak hanoin iha dalan neʼebé loos no halaʼo ita-nia moris ho matenek. Tan neʼe, ita presiza aprende oinsá atu kontrola ita-nia hanoin no sentimentu hodi tuir dalan neʼebé Jeová hanoin no sente.

7, 8. Oinsá mak ita bele iha hanoin neʼebé loos maski ema seluk kontra ita? Konta toʼok esperiénsia ida.

⁷ Mai ita hanoin kona-ba ezemplu ida. Tuir ema balu nia kultura, ema neʼebé serbisu iha rai seluk iha toman atu lori bebé kiʼikoan ba sira-nia rai hodi avó sira mak bele haboot bebé neʼe. Ida-neʼe husik inan-aman atubele halo serbisu no manán osan. a (Haree nota iha kraik.) Entaun, feto ida iha oan-mane neʼebé bonitu. Iha tempu neʼebá, nia mós komesa estuda Bíblia no halo tuir buat neʼebé nia aprende. Ninia kolega no família balu komesa hakaʼas nia ho ninia laʼen atu haruka bebé ba sira-nia rai hodi avó sira mak bele haboot sira-nia oan. Maibé nuʼudar feen neʼe estuda Bíblia, nia aprende katak inan-aman mak iha responsabilidade iha Jeová nia oin atu tau matan ba sira-nia oan. (Salmo [Mazmur] 127:3; Efeso 6:4) Nia sei halo tuir deʼit ema nia toman, ka halo tuir buat neʼebé nia aprende husi Bíblia? Se nia halo tuir Bíblia, karik ida-neʼe sei lori susar ba nia kona-ba osan no ema seluk sei kritika ninia desizaun. Se Ita mak iha ninia situasaun, Ita sei halo saida?

⁸ Bebé nia inan sai laran-susar tanba ema seluk hakaʼas nia atu lori bebé ba nia rai. Tan neʼe, nia halo orasaun ba Jeová hodi fó sai ninia laran no husu matadalan. Nia mós koʼalia ba irmán neʼebé estuda ho nia no mós irmaun-irmán sira iha kongregasaun. Nuʼudar nia halo buat hirak-neʼe, nia komesa hatene Jeová nia hanoin kona-ba ninia situasaun. Nia mós komprende oinsá mak haketak malu ho inan-aman sei kona oan nia sentimentu. Nia hanoin didiʼak kona-ba buat neʼebé Bíblia hatete no ikusmai nia deside katak nia sei la husik bebé iha avó sira. Ninia laʼen haree oinsá mak irmaun-irmán sira iha kongregasaun prontu atu ajuda sira no oinsá mak bebé nia moris kontente ho isin-diʼak, nia mós komesa estuda Bíblia no tuir reuniaun sira hamutuk ho ninia feen.

9, 10. “Iha hanoin neʼebé loos” envolve saida? Oinsá mak ita bele iha hanoin neʼebé loos?

⁹ Neʼe mak ezemplu ida deʼit. Maibé  ida-neʼe hatudu katak hanoin neʼebé loos laʼós katak hanoin didiʼak ka hanoin tuir ema seluk nia hanoin. Ita-nia hanoin no laran neʼebé la perfeitu bele kompara ho relójiu nia oras neʼebé la halai ho loloos. Se ita tuir relójiu hanesan neʼe, ida-neʼe sei lori problema ba ita. (Jeremias [Yeremia] 17:9) Hanesan neʼe mós, ita hakarak ita-nia hanoin no sentimentu atu tuir Maromak nia matadalan neʼebé loos.—Lee Isaías (Yesaya) 55:8, 9. b

¹⁰ Bíblia hatete: “Tau fiar ba Jeová ho ó-nia laran tomak no labele sadere ba ó-nia matenek rasik. Iha ó-nia dalan hotu tau atensaun ba nia, no nia rasik sei halo ó-nia dalan sai loos.” (Provérbios [Amsal] 3:5, 6) Haree toʼok, eskritura neʼe hatete katak ita ‘labele sadere ba ita-nia matenek rasik’, no depois dehan katak ita tenke “tau atensaun” ba Jeová. Sin, Jeová deʼit mak iha hanoin neʼebé perfeitu. Tan neʼe, kuandu ita halo desizaun, ita presiza lee Bíblia hodi buka-hatene Maromak nia hanoin kona-ba ita-nia situasaun no foti desizaun neʼebé tuir ninia hakarak. Loos duni, “iha hanoin neʼebé loos” katak hanoin tuir Jeová nia hanoin.

11. Atu ema ida bele halo desizaun neʼebé diʼak, saida mak nia presiza halo?

¹¹ Halo desizaun neʼebé diʼak no halo tuir ita-nia desizaun, neʼe laʼós buat neʼebé fasil, liuliu ba ema neʼebé foin hetan batizmu ka ema foun iha lia-loos, neʼebé Bíblia bolu nuʼudar “bebé”. Maski nuneʼe, sira bele iha matenek. Hanoin toʼok, labarik kiʼikoan neʼebé aprende atu laʼo mesak, sira halo ida-neʼe hodi hakat ba hakat. Nuneʼe mós ho ema foun iha lia-loos, neʼebé aprende atu halo desizaun sira. Apóstolu Paulo hatete katak “ema neʼebé boot ona” mak ema neʼebé “uza beibeik sira-nia kbiit atu hanoin, no hodi halo nuneʼe sira treinu sira-nia kbiit atu hatene buat diʼak husi buat aat”. Liafuan “uza beibeik” no “treinu” hatudu katak ita presiza hakaʼas an atu nafatin  buka-hatene oinsá halo desizaun neʼebé diʼak.—Lee Ebreu 5:13, 14, MF. c

12. Oinsá mak ita bele aprende atu halo desizaun neʼebé diʼak?

¹² Loron-loron ita halo desizaun oioin, balu boot no balu kiʼik. Tuir relatóriu ida kona-ba oinsá mak ema halo desizaun, maizumenus porsentu 40 liu husi desizaun sira neʼebé ema halo mak hodi tuir sira-nia toman, laʼós hodi hanoin didiʼak antes atu halo desizaun. Porezemplu, dadeer-dadeer ita halo desizaun kona-ba buat neʼebé ita hatais. Karik desizaun neʼe kiʼik deʼit no ita la presiza gasta tempu barak. Maski nuneʼe, importante atu hanoin se ita-nia hatais neʼe tuir ita-nia moris nuʼudar Jeová nia atan ka lae. (2 Korinto 6:3, 4) Kuandu ita bá hola roupa, karik ita hanoin kona-ba roupa neʼe nia modelu. Maibé ita mós presiza husu ba ita-nia an: ‘Roupa neʼe hatudu respeitu ka lae? Haʼu iha osan toʼo hodi hola ida-neʼe ka lae?’ Halo desizaun diʼak iha buat neʼebé kiʼik sei ajuda ita atu treinu ita-nia “kbiit atu hanoin”, no hodi halo nuneʼe, ita bele iha matenek atu halo desizaun sira neʼebé importante liu iha ita-nia moris.—Lucas 16:10; 1 Korinto 10:31.

13. Saida mak bele ajuda ita atu halo tuir ita-nia desizaun sira?

¹³ Maski ita halo desizaun ida neʼebé loos, maibé dala ruma susar atu halo tuir desizaun neʼe. Porezemplu, ema balu hakarak husik toman fuma sigarru, maibé sira-nia hakarak deʼit latoʼo atu soe toman aat neʼe. Ita presiza iha hakarak neʼebé namanas atu halo tuir desizaun neʼebé ita halo. Balu dehan ita bele halo makaʼas ita-nia hakarak neʼe hanesan ita halo olahraga atu ita-nia isin sai forte. Se ita la halo buat ida, ita-nia isin sei sai fraku. Nuneʼe mós ho ita-nia hakarak hodi halo tuir ita-nia desizaun sira. Saida mak bele ajuda ita atu halo makaʼas ita-nia hakarak neʼe? Ita presiza sadere ba Jeová nia ajuda.—Lee Filipe 2:13.

14. Tanbasá mak Paulo iha forsa atu halo buat neʼebé nia tenke halo?

¹⁴ Liuhusi nia esperiénsia rasik, apóstolu Paulo hatene katak atu halo buat neʼebé diʼak mak susar. Nia dehan: “Maski haʼu hakarak atu halo buat neʼebé loos, maibé haʼu la iha kbiit atu halo ida-neʼe.” Nia mós hatete: “Basá iha haʼu-nia laran, haʼu haksolok iha Maromak nia ukun-fuan, maibé haʼu haree iha haʼu-nia liman ain buat seluk tan neʼebé halo funu hasoru ukun-fuan iha haʼu-nia laran, hodi kesi haʼu metin ba ukun-fuan sala nian neʼebé horik iha haʼu-nia liman ain.” Maibé nia mós iha esperansa. Nia hatete: “Obrigadu ba Maromak, husi Jesus Kristu, ita Naʼi.” (Roma 7:18, MF; Roma 7:22-25) Nia mós hakerek: “Haʼu bele halo buat hotu iha Nia neʼebé fó kbiit mai haʼu.”—Filipe 4:13.

15. Tanbasá mak ita presiza laran-metin hodi halo tuir ita-nia desizaun neʼebé loos?

¹⁵ Atu halo Maromak kontente, ita presiza foti desizaun neʼebé loos no depois halo tuir desizaun neʼe ho laran-metin. Hanoin-hetan Elias nia liafuan iha foho Carmelo ba ema neʼebé adora Baal no ema Israel neʼebé husik adorasaun neʼebé loos. Nia dehan: “Toʼo bainhira mak imi laran-rua kona-ba imi-nia desizaun? Se Jeová mak Maromak neʼebé loos, halo tuir nia bá, maibé se Baal mak Maromak neʼebé loos, bá halo tuir nia.” (1 Reis [1 Raja-Raja] 18:21) Ema Israel sira hatene katak sira tenke adora Jeová mesak ida deʼit. Maibé sira “laran-rua” hodi hakarak adora Jeová ho Baal iha tempu neʼebé hanesan. Sira-nia hahalok neʼe la  hanesan ho Josué. Tinan barak antes Elias nia tempu, Josué hatete ba nasaun Israel: “Se serbí Jeová mak la diʼak iha imi-nia matan, agora hili ba imi-nia an rasik sé mak imi sei serbí. . . . Maibé, ba haʼu no haʼu-nia umakain, ami sei serbí Jeová.” (Josué [Yosua] 24:15) Josué ho sira neʼebé hamutuk ho nia ikusmai hetan bensaun saida? Jeová husik sira atu tama iha rai neʼebé nia promete nanis, sin, rai neʼebé “nakonu ho susubeen no bani-been”.—Josué (Yosua) 5:6.

16, 17. Se ita deside atu halo tuir Jeová nia hakarak, ida-neʼe bele lori rezultadu saida?

¹⁶ Hanoin toʼok kona-ba irmaun ida neʼebé foin hetan batizmu, nia iha feen ho oan kiʼik naʼin-tolu. Iha ninia serbisu, nia la hetan saláriu boot, maibé nia hili ida-neʼe tanba nia la presiza serbisu iha findesemana, no nia bele tuir reuniaun sira no bá haklaken hamutuk ho família. Loron ida, ninia kolega serbisu ida bolu nia atu muda ba serbisu seluk neʼebé bele manán osan barak. Irmaun neʼe hanoin no halo orasaun kona-ba ida-neʼe. Nia hatene katak se nia troka serbisu, nia tenkesér serbisu iha findesemana. Se Ita mak iha situasaun hanesan neʼe, Ita sei halo saida?

¹⁷ Irmaun neʼe hanoin didiʼak kona-ba oinsá mak nia desizaun sei kona ninia relasaun ho Jeová, no depois nia deside atu la troka serbisu. Ikusmai, nia sente laran-rua kona-ba ninia desizaun neʼe ka lae? Lae. Duké hanoin deʼit kona-ba osan, nia hanoin katak importante liu ba nia ho ninia família mak atu hakbesik ba Jeová. Ikusmai, irmaun neʼe ho ninia feen sai kontente tebes kuandu sira-nia oan-feto neʼebé tinan sanulu hatete katak nia hadomi inan-aman, maluk kristaun, no Maromak Jeová. Nia mós hatete katak nia hakarak dedika an ba Jeová no hetan batizmu. Nia halo tuir ninia aman nia ezemplu hodi tau uluk Jeová nia hakarak iha ninia moris.

18. Tanbasá mak importante atu halo desizaun ho matenek loroloron?

¹⁸ Hanesan iha tempu uluk Moisés lori ema Israel atu laʼo iha rai-fuik maran, ohin loron Jesus Kristu mak fó matadalan ba Maromak nia povu nuʼudar sira moris iha Satanás nia mundu neʼebé atu besik lakon ona. Hanesan mós ho Josué neʼebé lori povu Israel ba rai neʼebé Maromak promete nanis, Jesus sei lori ita ba mundu foun neʼebé nakonu ho justisa. (2 Pedro 3:13) Tanba loron neʼe hakbesik daudaun, ita labele fila fali ba ita-nia hanoin, toman, no hakarak uluk nian. Ita presiza komprende ho klaru liután kona-ba Maromak nia hakarak. (Roma 12:2; 2 Korinto 13:5) Sin, mai ita halo desizaun ho matenek, no hetan bensaun husi Jeová ba nafatin.—Lee Ebreu 10:38, 39.