Filme ida naran A Trip Down Market Street hatudu ema nia moris loroloron nian iha tinan 1906 iha sidade San Fransisco, Estadus Unidus. Diretór sira tau kámera iha karreta nia leten hodi bele haree dalan neʼebé rame. Iha filme neʼe hatudu kuda-karreta sira, karreta antigu nian, ema neʼebé sosa sasán no ema neʼebé laʼo bá-mai.

Buat neʼebé halo filme neʼe triste uitoan mak filme neʼe halo iha fulan-Abríl, tinan 1906. Neʼe mak loron balu deʼit antes rai-nakdoko no ahi neʼebé oho ema barak no halo rahun parte ida-neʼe iha sidade San Fransisco. Ema balu neʼebé ita bele haree iha filme neʼe, karik moris ba loron balu tan, depois mate. Mane ida naran Scott Miles, neʼebé diretór ida nia bei-oan, nia hatete: “Kuandu haʼu haree ema iha filme neʼe, haʼu hanoin loos sira, tanba sira la hatene saida mak atu akontese ba sira.”

Tuir loloos, ita-nia moris ohin loron bele kompara ho sira-nia situasaun. Ita mós hanoin tebetebes ema iha mundu neʼe. Tanbasá? Tanba ohin loron ema halaʼo sira-nia moris loroloron nian hodi la hatene saida mak besik ona atu akontese, neʼe mak tempu neʼebé Maromak sei halakon mundu aat neʼe. Maibé, la hanesan ho rai-nakdoko, ema sei iha oportunidade atu rona avizu kona-ba Jeová nia loron tesi-lia nian. Karik semana-semana ita fó tempu atu hola parte iha serbisu haklaken, maibé ita bele halo buat barak tan atu fó avizu ba ema ka lae?

Jesus hatudu ezemplu neʼebé diʼak tanba nia sempre prontu atu haklaken. Nia haklaken ba ema hotu neʼebé nia hasoru, maski kobradór neʼebé nia liu iha dalan, ka feto neʼebé nia hasoru besik bee-matan iha meiudia. (Lucas 19:1-5; Joao 4:5-10, 21-24) Iha tempu neʼebé nia deskansa mós, Jesus prontu atu husik ninia hakarak rasik hodi bele hanorin ema seluk. Tanba nia hanoin tebes ema seluk, neʼe book nia atu haklaken didiʼak ba sira. (Marcos 6:30-34) Ohin loron, oinsá mak ita-nia maluk sira halo tuir Jesus nia ezemplu diʼak kona-ba haklaken ho urjente?

Irmán ida naran Melika hela iha apartamentu andár. Ema barak neʼebé hela iha apartamentu neʼe mak estudante sira husi rai liʼur. Susar atu haklaken ba sira tanba apartamentu neʼe iha sekuriti  barak no sira-nia naran mós la bele hetan iha livru telefone. Maibé Melika kontente tanba nia iha oportunidade espesiál atu koʼalia ho ninia viziñu sira. Nia hatete: “Haʼu haree haʼu-nia apartamentu nuʼudar haʼu-nia haklaken-fatin rasik.” Melika toman atu lori ita-nia livru sira hamutuk ho nia iha língua oioin, no ema barak simu tratu no revista sira neʼebé nia fó. Nia mós hatudu ba sira ita-nia sítiu jw.org. Tanba nia halo ida-neʼe, nia komesa estuda ho ema barak.

Irmán seluk naran Sonia hakaʼas an atu haklaken ba ema hotu neʼebé nia hasoru. Nia serbisu iha klínika ida no nia halo planu atu haklaken ba ema ida-idak neʼebé serbisu hamutuk ho nia. Primeiru, nia uza tempu atu haree didiʼak sira-nia situasaun no buat neʼebé sira gosta. Depois, iha oras neʼebé nia deskansa, nia tuur hamutuk ho sira atu bele koʼalia kona-ba Bíblia. Tanba nia halo ida-neʼe, Sonia komesa estuda ho ema naʼin-rua. Nia mós planu atu uza nia tempu deskansa atu tuur iha fatin neʼebé ema hein, hodi bele koʼalia ba ema neʼebé atu konsulta.

Kuandu rai-nakdoko akontese iha San Fransisco iha tinan 1906, ema ida neʼebé la mate hatete katak dezastre neʼe mak aat liu hotu. Maibé, tuir loloos, dezastre neʼe kiʼik deʼit se kompara ho tempu neʼebé ema “hotu neʼebé la simu Maromak” sei hetan kastigu. (2 Tesalonika 1:8) Maromak Jeová hakarak tebes katak ema troka sira-nia hahalok hodi rona ba avizu neʼebé ninia Testemuña sira haklaken daudaun.—2 Pedro 3:9; Apokalipse 14:6, 7.

Ita iha oportunidade espesiál atu ajuda ema komprende katak ita moris iha tempu neʼebé importante duni, no katak sira presiza hatene Jeová. (Sofonias [Zefanya] 2:2, 3) Ita bele ka lae uza oportunidade hotu atu haklaken ba Ita-nia maluk serbisu nian, viziñu sira ka ema seluk neʼebé Ita hasoru nuʼudar Ita halaʼo Ita-nia atividade loroloron nian?