Loron ida, irmaun pioneiru naʼin-rua iha rai-Kénia haklaken no tama iha uma ida. Sira hakfodak hodi haree mane ida ho isin kiʼik tebes maibé ninia ulun baibain deʼit, toba iha kama leten. Kuandu sira lee ba nia kona-ba Maromak nia promete katak “ema kudeʼik sei laʼo hanesan bibi-rusa”, mane neʼe gosta tebes no hatudu oin-midar.—Isaías (Yesaya) 35:6.

Onesmus, neʼebé agora besik tinan 40 ona, moris mai ho moras ida neʼebé halo ninia ruin hotu fraku tebes no fasil atu tohar. Tanba la iha ai-moruk ba ninia moras neʼe, doutór sira dehan katak Onesmus tenke kontinua uza kadeira-roda no katak ninia ruin sei moras nafatin.

Onesmus komesa atu estuda Bíblia. Maibé ninia inan lakohi nia atu tuir reuniaun kristaun tanba nia hanoin ida-neʼe sei aumenta ninia oan nia moras. Tan neʼe, irmaun sira grava diskursu sira iha reuniaun hodi fó ba Onesmus atu nia bele rona iha ninia uma. Maibé kuandu Onesmus estuda Bíblia ba fulan lima ona, nia deside katak nia hakarak tuir reuniaun sira, maski nia hatene ida-neʼe bele perigu ba ninia saúde.

Kuandu Onesmus tuir reuniaun sira, neʼe halo nia moras liután ka lae? Lae. Nia hatete: “Moras neʼebé haʼu sente beibeik sai menus kuandu haʼu tuir reuniaun sira.” Nia hanoin katak esperansa neʼebé nia hetan husi Bíblia mak halo nia sente diʼak. Onesmus nia inan kontente atu haree katak ninia oan sente kmaan liután no ida-neʼe book ninia inan atu estuda Bíblia. Nia hatete: “Serbí Maromak mak hanesan ai-moruk ba haʼu-nia oan.”

Lakleur, Onesmus sai haklaken-naʼin, no ikusmai hetan batizmu. Agora nia serbí nuʼudar atan ba kongregasaun. Maski nia la bele uza ninia ain no liman sorin ida, maibé nia hakarak hakaʼas an atu halo buat barak liután iha Maromak nia serbisu. Nia hakarak atu foti pioneiru estra maibé dada an atu hatama ninia formuláriu. Tanbasá? Tanba nia hatene katak nia presiza sadere ba ema seluk atu ajuda dudu ninia kadeira-roda. Kuandu nia koʼalia ida-neʼe ba ninia maluk kristaun sira, sira promete katak sira sei apoia nia. Sira halo nuneʼe duni, hodi Onesmus bele foti pioneiru estra.

Onesmus hakarak atu foti pioneiru regulár maibé nia mós duvida kona-ba neʼe tanba razaun hanesan. Maibé liafuan neʼebé nia lee iha eskritura loron-loron nian fó laran-manas ba nia. Eskritura neʼe mak Salmo (Mazmur) 34:8, neʼebé hatete: “Koko no haree katak Jeová mak diʼak.” Kuandu Onesmus hanoin didiʼak kona-ba liafuan sira-neʼe, nia deside atu foti pioneiru regulár. Agora, nia haklaken semana ida loron haat no estuda Bíblia ho ema barak neʼebé laʼo ba oin. Iha tinan 2010, nia tuir Eskola Serbisu Pioneiru. Nia kontente tebes tanba husi irmaun naʼin-rua neʼebé dirije sira-nia eskola, ida mak irmaun neʼebé uluk haklaken ba nia ba dala primeiru.

Maski Onesmus nia inan-aman agora mate ona, maibé irmaun no irmán sira iha kongregasaun tau matan ba nia presiza loroloron nian. Nia agradese tebes ba bensaun hotu neʼebé nia simu no nia hein ba futuru kuandu “la iha ema neʼebé hela iha rai sei dehan: ‘Haʼu moras.’”—Isaías (Yesaya) 33:24.