1. Ema halo sakrifísiu hanesan saida, no tanbasá?

 EMA baibain prontu atu halo sakrifísiu ba buat neʼebé sira sente mak importante ba sira. Porezemplu, inan-aman fó sira-nia tempu, osan no forsa ba sira-nia oan. Atleta sira neʼebé hakarak hola parte iha Olimpíada gasta tempu barak atu treinu, maski sira-nia kolega sira halimar no goza deʼit moris. Jesus mós halo sakrifísiu ba buat neʼebé importante ba nia. Nia la buka atu moris iha dalan neʼebé riku, ka atu iha oan. Nia hakarak uza ninia forsa tomak atu apoia Maromak nia Ukun. (Mateus 4:17; Lucas 9:58) Ninia dixípulu sira mós halo sakrifísiu barak tanba Maromak nia Ukun mak buat neʼebé importante liu ba sira. (Mateus 4:18-22; 19:27) Nuneʼe, diʼak se ita husu ba ita-nia an: ‘Saida mak importante iha haʼu-nia moris?’

2. (a) Ema kristaun sira presiza halo sakrifísiu saida? (b) Ema balu halo saida tan nuʼudar sakrifísiu?

² Ba ema kristaun sira, iha sakrifísiu balu neʼebé ita presiza halo atu ita bele iha nafatin relasaun diʼak ho Maromak. Ita uza ita-nia tempu no forsa atu halo orasaun, lee Bíblia, halaʼo adorasaun família nian, tuir reuniaun sira no haklaken nuʼudar sakrifísiu neʼebé ita halo. a (Haree nota iha kraik.) (Josué [Yosua] 1:8; Mateus 28:19, 20; Ebreu 10:24, 25) Tanba ita-nia hakaʼas an no tanba Jeová nia bensaun, serbisu haklaken laʼo ba oin no ema barak liután adora Maromak hodi bá “foho, uma Jeová nian”. (Isaías [Yesaya] 2:2) Atu apoia Maromak nia Ukun, ema barak halo sakrifísiu atu serbí iha Betel, ajuda harii Reuniaun-Fatin, organiza reuniaun boot ka ajuda ema neʼebé kona dezastre naturál. Maski Jeová la husu ita atu halo sakrifísiu sira-neʼe hodi bele hetan moris rohan-laek, maibé buat sira-neʼe mak importante atu apoia Maromak nia Ukun.

3. (a) Ita sei hetan buat diʼak saida kuandu ita halo sakrifísiu ba Maromak nia Ukun? (b) Pergunta saida deʼit mak ita presiza hanoin?

 ³ Ohin loron, importante tebes atu halo buat hotu neʼebé ita bele halo hodi apoia Maromak nia Ukun. Ita kontente tebes tanba ema barak halo sakrifísiu ba Jeová. (Lee Salmo [Mazmur] 54:6. b) Se ita mós halo nuneʼe, ita sei kontente nuʼudar ita hein ba Maromak nia Ukun atu mai. (Deuteronômio [Ulangan] 16:15; Apostolu 20:35) Importante tebes ba ita hotu atu hanoin didiʼak kona-ba ita-nia situasaun no husu ita-nia an: Haʼu bele halo buat barak liután atu apoia Maromak nia Ukun ka lae? Oinsá mak haʼu uza daudaun haʼu-nia osan, forsa no matenek? Kuandu haʼu halo sakrifísiu iha haʼu-nia moris, haʼu presiza kuidadu kona-ba saida? Mai ita koʼalia kona-ba saida mak ita bele aprende husi sakrifísiu balu neʼebé ema fó ho laran iha tempu uluk. Ida-neʼe sei ajuda ita atu kontente liután.

4. Ema Israel nia sakrifísiu lori rezultadu saida?

⁴ Atu ema Israel bele hetan perdua ba sira-nia sala, sira presiza hasaʼe sakrifísiu. Sira mós presiza fó sakrifísiu atu Jeová bele simu sira. Iha sakrifísiu balu neʼebé sira tenkesér fó, maibé sakrifísiu seluk sira bele fó ho hakarak rasik. (Levítico [Imamat] 23:37, 38) Porezemplu, sira bele hasaʼe sakrifísiu sunu nian ho hakarak rasik nuʼudar prezente ba Jeová. Ezemplu ida kona-ba sakrifísiu ba Jeová mak iha inaugurasaun ba Salomão nia templu.—2 Crônicas (Tawarikh) 7:4-6.

5. Saida mak Jeová halo hodi ema kiak mós bele fó sakrifísiu ba Jeová?

⁵ Jeová komprende katak ema ida-idak la bele fó buat neʼebé hanesan. Nia husu ema Israel atu fó deʼit buat neʼebé sira bele fó. Jeová nia ukun-fuan dehan katak kuandu ema hasaʼe animál nuʼudar sakrifísiu, sira presiza fakar animál neʼe nia raan. Sakrifísiu sira-neʼe mak “buat sira neʼebé atu mai nia ilas” liuhusi Jesus Kristu. (Ebreu 10:1-4) Maibé kona-ba ukun-fuan neʼe, Jeová mós hanoin ema neʼebé kiak. Se ema la iha kbiit atu fó bibi, Maromak kontente se ema neʼe fó manu-falur. Nuneʼe, ema kiak sira mós bele sente kontente hodi fó sakrifísiu ba Jeová. (Levítico [Imamat] 1:3, 10, 14; 5:7) Maski Jeová bele simu animál oioin  nuʼudar sakrifísiu, maibé se ema hakarak fó sakrifísiu ho laran, Jeová hakarak buat rua husi nia.

6. Buat rua saida mak importante kuandu ema Israel fó sakrifísiu? Tanbasá mak importante atu halo ida-neʼe?

⁶ Primeiru, ema neʼebé fó sakrifísiu ba Jeová, tenke fó buat neʼebé diʼak liu hotu. Se animál ida mak moras ka kanek, Jeová la simu ida-neʼe. (Levítico [Imamat] 22:18-20) Segundu, ema neʼebé fó sakrifísiu tenkesér moos tuir Maromak nia Ukun-Fuan. Se ema neʼe la moos, nia presiza hasaʼe sakrifísiu sala nian hodi Jeová bele haree nia nuʼudar ema neʼebé moos. Kuandu nia halo ida-neʼe mak Jeová foin bele simu sakrifísiu neʼebé nia fó ho laran. (Levítico [Imamat] 5:5, 6, 15) Ida-neʼe importante tebes tanba Jeová dehan katak, se ema neʼebé la moos han husi sakrifísiu, ema neʼe sei mate. (Levítico [Imamat] 7:20, 21) Maibé, se ema neʼe moos no animál neʼebé nia fó la moras ka kanek, ema neʼe bele iha laran kmaan no sente kontente tebes.—Lee 1 Crônicas (Tawarikh) 29:9. c

7, 8. (a) Sira neʼebé halo sakrifísiu ba Maromak bele sente oinsá? (b) Saida deʼit mak ita bele fó nuʼudar sakrifísiu ba Jeová?

⁷ Ohin loron, ita-nia irmaun-irmán barak serbisu makaʼas ba Jeová no ida-neʼe halo Jeová kontente. No kuandu ita serbisu ba ita-nia maluk kristaun sira, neʼe mós lori haksolok. Irmaun ida neʼebé ajuda atu harii Reuniaun-Fatin, no mós fó ajuda kuandu dezastre akontese, hatete katak nia liafuan latoʼo hodi esplika haksolok neʼebé nia sente kuandu nia ajuda ninia maluk sira. Nia hatete: “Irmaun-irmán sira kontente no hafolin tebes kuandu sira bele uza sira-nia Reuniaun-Fatin foun, ka kuandu sira foin hasoru dezastre naturál no simu ajuda. Kuandu haʼu haree neʼe haʼu sente katak haʼu-nia hakaʼas-an la saugati deʼit.”

⁸ Jeová nia organizasaun sempre buka oportunidade atu apoia Jeová nia serbisu. Iha tinan 1904, irmaun C. T. Russell esplika katak ita hotu presiza hakaʼas an atu uza ita-nia tempu, kbiit, osan no buat hanesan neʼe atu fó glória ba Jeová. Maski ita presiza fó buat ruma atu halo sakrifísiu ba Jeová, maibé ita bele simu bensaun barak. (2 Samuel 24:21-24) Ho buat neʼebé  ita fó ba Jeová nuʼudar sakrifísiu, ita bele ka lae, halo neʼe iha dalan neʼebé diʼak liután?

9. Matadalan husi Lucas 10:2-4 hanorin saida kona-ba ita-nia tempu?

⁹ Ita-nia tempu. Presiza tempu barak atu tradús no print ita-nia livru sira, atu harii Reuniaun-Fatin, organiza reuniaun boot sira, fó ajuda ba sira neʼebé hasoru dezastre naturál, no atu halo buat seluk tan. Iha loron ida nia laran, ita iha deʼit oras 24, maibé Jesus fó ba ita matadalan neʼebé bele ajuda ita atu uza ita-nia tempu ho didiʼak. Kuandu Jesus haruka nia dixípulu sira atu bá haklaken, nia dehan ba sira atu “keta kumprimenta ema ida iha dalan”. (Lucas 10:2-4) Tanbasá mak Jesus haruka sira atu la halo nuneʼe? Iha Jesus nia tempu, kuandu ema kumprimenta malu, sira la kaer liman deʼit. Sira hakoʼak malu ba dala barak no sira mós hakruʼuk ba rai. Atu halo ida-neʼe gasta tempu barak. Jesus la dehan katak ninia dixípulu sira la bele hatudu respeitu ba ema, maibé nia ajuda sira atu komprende katak sira ladún iha tempu barak, tan neʼe sira presiza uza tempu ho didiʼak atu halo buat neʼebé importante liu. (Efeso 5:16) Ita mós bele uza matadalan neʼe hodi ita iha tempu barak liután atu apoia serbisu ba Maromak nia Ukun ka lae?

10, 11. (a) Iha dalan saida deʼit mak ita-nia organizasaun uza osan neʼebé ita fó? (b) Matadalan saida iha 1 Korinto 16:1, 2 bele ajuda ita?

¹⁰ Ita-nia osan. Presiza osan barak atu apoia serbisu haklaken iha mundu tomak. Tinan-tinan, ita-nia organizasaun uza dolar rihun ba rihun atu apoia katuas sira neʼebé vizita kongregasaun, pioneiru tempu-tomak sira no misionáriu sira. Husi tinan 1999, ita-nia organizasaun harii Reuniaun-Fatin hamutuk 24.000 liu iha rai sira neʼebé kiak. Maibé sei presiza Reuniaun-Fatin 6.400 tan. Fulan-fulan ita-nia organizasaun halo Livru Haklaken no Matan-moris bá! kópia 100.000.000. Serbisu hotu neʼe hetan apoiu husi osan neʼebé ita fó ho laran.

¹¹ Maromak haleno apóstolu Paulo atu hakerek matadalan neʼebé ita bele tuir kona-ba fó kontribuisaun. (Lee 1 Korinto 16:1, 2.) Nia dehan ba ninia maluk sira iha Korinto atu la hein toʼo findesemana atu haree sira iha osan resin ka lae, maibé atu rai osan neʼebé sira bele fó kuandu semana foin hahú. Hanesan ho tempu antigu, ohin loron mós, irmaun-irmán sira halo planu nanis atu fó ho laran-luak buat neʼebé sira bele fó tuir sira-nia kbiit. (Lucas 21:1-4; Apostolu 4:32-35) Sin, Jeová hafolin tebes kuandu ninia povu fó ho hakarak rasik.

12, 13. Tanbasá mak ema balu hanoin katak sira la bele fó sira-nia forsa no matenek, maibé oinsá mak Jeová bele ajuda sira?

¹² Ita-nia forsa no matenek. Jeová ajuda ita kuandu uza ita-nia forsa no matenek atu apoia Maromak nia Ukun. Nia promete katak nia sei ajuda kuandu ita sente katak ita-nia forsa la toʼo. (Isaías [Yesaya] 40:29-31) Ita sente ka lae, katak ita la iha matenek atu apoia serbisu ba Maromak nia Ukun, ka sente katak ema seluk bele halo ida-neʼe diʼak liu fali ita? Maibé la haluha katak Jeová bele halo ita sai matenek liu, hanesan nia halo ba Bezalel no Oholiab.—Êxodo (Keluaran) 31:1-6; haree dezeñu iha pájina 11.

¹³ Jeová hakarak ita atu fó ho laran tomak buat hotu neʼebé ita bele. (Provérbios [Amsal] 3:27) Kuandu ema judeu sira iha Jerusalém hadiʼa templu, Jeová dehan ba sira atu hanoin didiʼak buat neʼebé sira halo daudaun atu apoia serbisu neʼe. Tanbasá? Tanba sira sai okupadu ho buat seluk duké tau uluk Maromak nia serbisu iha sira-nia moris. (Ageu [Hagai] 1:2-5) Ita tenke husu ba ita-nia an: Halo Maromak  nia serbisu mak importante liu ba haʼu duké buat seluk ka lae? Ita bele hanoin didiʼak kona-ba ita-nia moris hodi halo planu atu apoia liután Maromak nia Ukun iha loron ikus sira-neʼe?

14, 15. (a) Ita-nia maluk sira neʼebé la iha sasán barak hatudu ezemplu saida ba ita? (b) Ita-nia hakarak mak atu halo saida?

¹⁴ Ema barak hela iha fatin neʼebé moris susar no hasoru problema barak hanesan kiak. Ita-nia organizasaun ajuda ita-nia maluk sira iha rai hanesan neʼe. (2 Korinto 8:14) Maski ita iha maluk sira neʼebé la iha sasán barak, maibé sira mós hafolin oportunidade atu fó. Jeová sente kontente tebes kuandu nia haree sira fó ho laran buat neʼebé sira bele.—2 Korinto 9:7.

¹⁵ Iha rai kiak ida iha Áfrika, irmaun-irmán balu uza parte iha sira-nia jardín atu kuda modo hodi faʼan. Depois, osan neʼebé sira hetan sira fó nuʼudar kontribuisaun atu apoia serbisu haklaken. Iha rai neʼe mós, irmaun-irmán sira hakarak ajuda atu harii Reuniaun-Fatin. Maski projetu neʼe monu iha tempu neʼebé baibain sira halo toʼos, maibé sira hakarak tebes atu ajuda. Tan neʼe, sira serbisu atu harii Reuniaun-Fatin iha loron, no iha kalan sira serbisu atu halo toʼos. Sira hatudu laran-luak tebes, loos ka lae? Sira hanesan irmaun-irmán sira iha rai-Masedónia iha tempu antigu neʼebé maski kiak tebes, maibé sira husu makaʼas ba Paulo atu sira bele fó osan ba sira-nia maluk sira. (2 Korinto 8:1-4) Mai ita mós fó buat neʼebé ita bele hodi hatudu katak ita agradese ba Jeová tanba bensaun sira neʼebé nia haraik ba ita.—Lee Deuteronômio (Ulangan) 16:17. d

16. Saida mak ita presiza kuidadu hodi Jeová bele simu ita-nia sakrifísiu sira?

¹⁶ Kuandu ita halo sakrifísiu, ita presiza kuidadu katak ita la haluha atu tau matan ba buat neʼebé importante, hanesan ita-nia família. Ita mós hakarak Maromak atu simu sakrifísiu neʼebé ita fó, hanesan ema Israel sira. Ita la bele haluha katak ita-nia família no ita rasik nia adorasaun ba Jeová mak responsabilidade neʼebé importante liu. Kuandu ita fó ita-nia tempu no forsa ba ema seluk, ita presiza hakaʼas an nafatin atu tau matan ita-nia família nia presiza kona-ba adorasaun família nian no sira-nia presiza loroloron nian. Ita la bele fó tempu, forsa no buat seluk tan ba Jeová se ita la iha buat hirak-neʼe atu fó. (Lee 2 Korinto 8:12.) Ita mós presiza hametin nafatin ita-nia relasaun ho Jeová. (1 Korinto 9:26, 27) Ita bele fiar katak, se ita moris tuir Bíblia nia matadalan, sakrifísiu neʼebé ita fó sei sai buat neʼebé Maromak Jeová bele simu.

17, 18. Ita sente oinsá kona-ba sira neʼebé halo sakrifísiu ba Maromak nia Ukun, no diʼak se ita hotu hanoin kona-ba saida?

¹⁷ Ita-nia irmaun-irmán barak fó ho laran sira-nia tempu, forsa no osan atu apoia serbisu ba Maromak nia Ukun. (Filipe 2:17) Ita hafolin tebes ita-nia maluk sira neʼebé halo ida-neʼe. Ita mós hafolin feen no oan husi irmaun sira neʼebé halo sakrifísiu barak hodi dirije serbisu ba Maromak nia Ukun.

¹⁸ Loos duni, presiza serbisu barak tebes atu apoia Maromak nia Ukun. Tan neʼe, diʼak atu halo orasaun hodi hanoin didiʼak kona-ba oinsá mak ita bele fó buat neʼebé ita iha ba Jeová. Se ita halo nuneʼe, ita sei hetan bensaun agora, no barak liután iha futuru.—Marcos 10:28-30.