Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Bainhira mak Jesus “haklaken ba anju aat sira iha dadur laran”? (1 Pedro 3:19, MF)

Liutiha tempu balu depois Jesus moris hiʼas fali, nia fó avizu kona-ba kastigu neʼebé anju aat sira sei hetan.—15/6, pájina 23.

Tanbasá mak Maromak nia tesi-lia la hatudu katak nia laran-aat?

Jeová la haksolok kuandu ema aat mate. (Ezequiel [Yehezkiel] 33:11) Buat neʼebé Maromak halo uluk hatudu katak nia ho domin fó avizu ba ema antes nia fó kastigu. Ida-neʼe hametin ita-nia fiar katak ita bele moris liu Maromak nia tesi-lia iha futuru.—1/7 pájina 5, 6.

Bainhira mak Jesus sei tesi lia ba povu hotu nuʼudar bibi-malae ka bibi-timur? (Mateus 25:32)

Bainhira Jesus sei mai durante terus boot no depois Babilónia Boot mohu lakon, nia sei halaʼo tesi-lia ba povu hotu nuʼudar bibi-malae ka bibi-timur.—15/7, pájina 6.

Iha Jesus nia ai-knanoik kona-ba trigu ho duʼut aat, bainhira loos mak ema kristaun falsu sei tanis no ruun nehan? (Mateus 13:36, 41, 42)

Sira sei halo neʼe durante terus boot kuandu sira haree katak sira sei mohu lakon.—15/7, pájina 13.

Bainhira mak Jesus nia liafuan kona-ba atan laran-metin no matenek sei sai loos? (Mateus 24:45-47)

Liafuan sira-neʼe komesa sai loos laʼós iha loron Pentekostes tinan 33, maibé depois tinan 1914. Iha tinan 1919, Jesus fó knaar ba “atan laran-metin no matenek” hodi tau matan ba “atan sira”, neʼe inklui ema kristaun hotu neʼebé presiza ai-han espirituál.—15/7, pájina 21-23.

Bainhira mak “atan laran-metin” simu knaar segundu hodi tau matan ba Jesus nia “rikusoi tomak”?

Ida-neʼe sei akontese durante terus boot kuandu sira saʼe ba lalehan hodi ukun hamutuk ho Kristu.—15/7, pájina 25.

Maski Maromak fó kbiit ba Testemuña ba Jeová naʼin-230 atu moris liu “marxa mate nian” husi komarka Sachsenhausen maibé saida tan mak ajuda sira?

Maski sira sente fraku tebes tanba hamlaha no moras maibé sira fó laran-manas ba malu no ajuda malu atu kontinua laʼo ba oin.—15/8, pájina 18.

Tanbasá mak istória kona-ba povu Israel hakur mota Jordaun hodi tama iha rai neʼebé Maromak promete ona hametin liután ita-nia fiar?

Maski mota boot neʼe tun makaʼas tanba tempu udan, Jeová hapara kedas mota neʼe hodi ninia povu bele hakur. Ida-neʼe halo ema Israel nia fiar metin liután ba Jeová no mós fó laran-manas mai ita.—15/9, pájina 16.

Saida mak bele ajuda ita atu hatene kona-ba mudansa sira neʼebé ita presiza halo?

Hodi estuda Bíblia, ita aprende kona-ba ema hanesan saida mak monu loos ba Jeová nia laran. Dalan neʼebé ita simu matadalan husi Bíblia ajuda ita hatene ho loloos ita mak ema oinsá iha laran, no ita bele haree mudansa saida deʼit mak ita presiza halo.—15/9, pájina 20.

Tanbasá mak Adão han ai-fuan husi ai-hun neʼebé Maromak bandu?

Tanba Adão nia domin ba Eva mak boot liu fali nia domin ba Jeová. Nia hili rasik hodi halo Eva kontente duké Maromak.—1/10, pájina 13.

Oinsá mak profesia iha Miquéias (Mikha) 5:5 kona-ba bibi-atan hitu no ulun-naʼin ualu sai loos ohin loron?

Ita komprende katak ‘bibi-atan hitu no ulun-naʼin ualu’ husi Miquéias (Mikha) 5:5 mak katuas sira iha kongregasaun neʼebé hametin Maromak nia povu hodi sira bele hasoru inimigu neʼebé sei ataka iha futuru hanesan Bíblia hatete nanis.—15/11, pájina 20.