DADEER-SAAN hela, irmán ida loke ninia odamatan no haree kaixa ida iha odamatan oin. Nia foti kaixa no hateke bá-mai atu haree sé mak tau, maibé ema la iha. Karik ema mai iha kalan no husik iha ninia odamatan. Nia komesa atu loke kaixa no depois hakiduk lalais hodi tama fali ninia uma no taka odamatan. Iha fatin! Kaixa laran neʼe mak iha livru sira neʼebé estadu bandu kona-ba Bíblia! Ho liman rua nia kaer metin kaixa neʼe no halo orasaun ba Jeová hodi hatoʼo agradese ba ai-han espirituál neʼebé nia foin simu.

Situasaun sira hanesan neʼe uluk akontese dala barak iha rai-Alemaña durante tempu neʼebé Nazi mak ukun. Iha tinan 1933, durante tempu Nazi nian, governu bandu Testemuña ba Jeová iha rai neʼe atu la bele haklaken iha fatin barak. Richard Rudolph, neʼebé agora tinan 100 liu a hatete: “Iha tempu neʼebá, ami fiar metin katak estadu nia lei neʼe la bele hanetik atu fó sai Jeová nia naran.” Nia hatutan tan: “Ami presiza duni livru Bíblia nian hodi bele estuda no bá haklaken. Maibé kuandu estadu bandu ami-nia serbisu, susar atu hetan livru sira-neʼe. Ami la hatene oinsá mak serbisu neʼe bele halaʼo.” Maibé lakleur tan, Richard hanoin katak nia bele ajuda serbisu neʼe iha dalan espesiál. Dalan neʼe mak uza foho hodi halo serbisu segredu.—Juízes (Hakim-Hakim) 9:36.

Se ita saʼe foho liuhusi Mota Elbe (ka Labe) ita sei toʼo foho boot sira naran Krkonoše, no foho sira-neʼe mak fronteira entre Repúblika Xeka ho rai-Polónia. Maski foho sira-neʼe ladún aas, metru 1.600 deʼit, maibé foho sira-neʼe fatin malirin tebes iha Europa nia klaran. Tinan-tinan durante fulan neen nia laran, jelu taka fatin neʼebé ita tun-saʼe foho no ema neʼebé la iha esperiénsia kona-ba saʼe foho bele hetan perigu tanba abuabu bele derrepente deʼit mosu no taka.

Durante tinan atus ba atus foho sira-neʼe sai fronteira entre estadu, rai no distritu sira oioin. Tanba foho sira-neʼe mak perigu tebes, susar ba  polísia atu kontrola ema nia atividade iha foho. Tan neʼe, ema uza dalan kiʼik iha foho sira atu lori sasán bá rai oioin hodi faʼan maski estadu bandu. Iha tinan 1930, foho boot sira-neʼe sai fronteira ba rai-Xekoslovákia no rai-Alemaña. Husi tempu neʼe, Testemuña sira neʼebé aten-brani komesa uza dalan kiʼik sira-neʼe hodi lori ita-nia livru sira ba fatin neʼebé presiza. Irmaun Richard mak Testemuña ida neʼebé halo nuneʼe.

Richard koʼalia kona-ba tempu uluk hodi dehan: “Kada findesemana ami irmaun joven sira laʼo ba foho no halo grupu ho ema-naʼin hitu iha grupu ida-idak. Ami hatais hanesan ema baibain neʼebé laʼo pasiar.” Husi fronteira Alemaña nia sorin, irmaun sira laʼo oras tolu hodi liuhusi foho sira toʼo sidade naran Špindlerův Mlýn, neʼebé iha Xekoslovákia nia sorin, dook kilómetru 16,5. Iha tempu neʼebá ema Alemaña barak mak hela iha Špindlerův Mlýn. Ida mak mane toʼos-naʼin neʼebé hakarak ajuda ita-nia irmaun sira. Nia iha kuda karreta neʼebé baibain nia uza atu tula ema hodi pasiar deʼit. Maibé nia uza ida-neʼe atu lori kaixa sira neʼebé nakonu ho ita-nia livru. Nia hein kaixa sira atu mai iha komboiu husi sidade Praga. Nia foti kaixa sira-neʼe husi suku ida hodi lori fali ba ninia toʼos no subar livru sira iha nia uma nia kakuluk. Depois nia hein ema atu mai hodi lori fali ba sorin Alemaña nian.

Richard hatutan tan: “Kuandu ami toʼo iha mane neʼe nia toʼos, ami tau livru barak iha ami-nia pasta laran. Ami halo pasta sira-neʼe hodi tahan todan neʼebé makaʼas. Ami ida-idak mak lori kilograma 50.” Atu ema la bele hetan sira, sira laʼo iha kalan, hodi komesa iha rai-nakaras no fila fali antes loro-matan saʼe. Ernst Wiesner, neʼebé katuas área nian iha rai-Alemaña iha tempu neʼebá, koʼalia kona-ba buat neʼebé sira halo hodi ema la hetan sira. Nia hatete: “Irmaun rua laʼo iha oin, no kuandu sira hasoru ema iha dalan, sira leno fali lampra ba irmaun sira neʼebé tuir husi kotuk, metru 100. Ida-neʼe mak hanesan sinál ba sira neʼebé lori livru sira atu subar iha ai-laran. Sira subar toʼo irmaun naʼin-rua neʼe fila fali no hatete liafuan kode, neʼebé sempre troka semana-semana.” Maibé perigu la mai deʼit husi Alemaña nia polísia sira.

 Richard hatete: “Iha kalan ida, haʼu presiza serbisu tarde, entaun haʼu-nia maluk sira komesa laʼo ulukliu haʼu. Kalan neʼe nakukun loos no iha abuabu. Haʼu isin nakdedar tanba laʼo iha udan neʼebé malirin. Haʼu laʼo lakon iha ai-laran no ba oras barak haʼu la bele hetan fali dalan. Neʼe perigu tanba ema barak mate tanba laʼo lakon hanesan neʼe. Loron tuirmai, kuandu haʼu-nia maluk sira laʼo atu fila mak ami foin hasoru malu fali.”

Durante tinan tolu, grupu irmaun sira-neʼe neʼebé brani, laʼo liuhusi foho semana-semana. Iha tempu malirin, sira uza ai-kabelak neʼebé baibain ema uza atu halimar iha jelu leten atu dada livru sira. Dala ruma, irmaun naʼin-20 laʼo liuhusi fronteira durante loron, hodi tuir dalan neʼebé ema baibain uza atu laʼo pasiar. Hodi la halo ema deskonfia katak sira la laʼo pasiar deʼit, irmán balu mós tuir. Sira balu laʼo iha oin, no kuandu sira hanoin perigu ruma atu mai, sira soe sira-nia xapeu ba leten nuʼudar sinál.

Kuandu irmaun sira fila fali ba uma, sira halo saida? Sira halo arranju hodi livru sira bele fahe kedas ba irmaun-irmán sira hotu. Oinsá mak sira bele halo neʼe hodi ema la hatene? Sira tau sabaun iha kaixa laran hamutuk ho livru sira hodi ema hanoin sabaun deʼit mak iha laran. Depois sira lori ba estasaun komboiu iha Hirschberg. Sira haruka kaixa sira ba parte oioin iha rai-Alemaña, depois, irmaun-irmán sira fó ba maluk sira iha dalan neʼebé subasubar, hanesan hatete ona iha leten. Tanba prosesu neʼe mak envolve ema barak, se ema ida deʼit mak fó sai kona-ba sira-nia segredu, problema boot bele mosu. No loron ida, ida-neʼe akontese duni.

Iha tinan 1936, polísia hetan ita-nia livru barak iha uma besik Berlín. Sira mós hetan kaixa tolu husi ema ida neʼebé haruka husi Hirschberg. Hodi haree letra neʼebé hakerek iha kaixa, polísia sira bele hatene sé mak hola parte atu haruka livru sira-neʼe, depois sira kaer nia. Lakleur depois neʼe, sira kaer ema rua tan, inklui Richard Rudolph. Maibé irmaun rua neʼe la hatete sai irmaun seluk nia naran, no neʼe ajuda irmaun sira seluk atu bele kontinua lori livru sira subasubar, maski knaar neʼe sai perigu liután.

Sin, Testemuña sira iha rai-Alemaña depende ba irmaun sira atu lori livru husi foho hodi hetan ai-han espirituál. Maibé irmaun sira la uza deʼit dalan kiʼik iha foho atu lori livru. Kuandu Alemaña ukun rai-Xekoslovákia, iha mós dalan seluk neʼebé irmaun balu uza iha rai neʼe nia fronteira. Iha rai sira seluk neʼebé besik Alemaña, hanesan rai-Fransa, rai-Olanda no rai-Suisa, Testemuña sira husi sorin-sorin tau sira-nia moris iha perigu laran atu fó ai-han espirituál ba maluk sira neʼebé iha terus nia laran.

Ohin loron, ita bele hetan livru no broxura sira lalais deʼit. Karik ita hetan ita-nia livru foun sira husi Reuniaun-Fatin ka ita download husi sítiu jw.org. Maibé diʼak atu hanoin kona-ba oinsá ita-nia irmaun no irmán barak halo livru sira-neʼe hodi ita bele hetan. Maski sira la presiza atu liu foho boot iha kalan, maibé klaru katak sira serbisu makaʼas hodi ajuda ita hotu simu ai-han espirituál neʼebé ita presiza.