‘Halo ida-neʼe hodi hanoin haʼuʼ
“Depois fó tiha agradese, nia silu [paun] hodi dehan: ‘Neʼe reprezenta haʼu-nia isin neʼebé haʼu fó tanba imi. Kontinua halo ida-neʼe hodi hanoin haʼu.’”—1 KORINTO 11:24, MF.
1, 2. Karik Jesus nia apóstolu sira hanoin kona-ba saida antes Jesus nia viajen ikus ba Jerusalém?
HANOIN toʼok, ema neʼebé guarda sidade Jerusalém hateke ba lalehan no haree fulan lotuk. Neʼe hatudu katak fulan Nisan foin hahú. Kuandu Sinédriu hatene kona-ba ida-neʼe, sira fó sai ba povu hodi haruka sinál ka manu-ain atu habelar avizu neʼe. Apóstolu sira hatene katak Festa Salvasaun nian besik ona. Karik sira hanoin katak Jesus sei hakarak bá Jerusalém hodi nia bele toʼo antes Festa Salvasaun nian.
2 Iha tempu neʼe Jesus no ninia apóstolu sira iha área Peréia, iha mota Jordaun nia sorin bá. Jesus atu halo ninia viajen ikus ba Jerusalém. (Mateus 19:1; 20:17, 29; Marcos 10:1, 32, 46) Kuandu ema judeu sira hatene bainhira mak loron 1 Nisan, sira hein loron 13 tan hodi selebra Festa Salvasaun nian iha loron 14 Nisan.
3. Tanbasá mak ema kristaun sira hakarak hatene kona-ba loron ba Festa Salvasaun nian?
3 Iha tinan 2014, Naʼi nia Han-Kalan ka Memoriál sei halaʼo iha loron 14 fulan-Abríl no ida-neʼe mak loron neʼebé ema komemora Festa Salvasaun nian iha tempu antigu. Loron neʼe mak espesiál tebes ba ema kristaun sira neʼebé loos. Tanbasá? Tanba Bíblia hatete katak: “Iha kalan antes ema entrega Naʼi Jesus ba inimigu, nia foti paun ida no depois fó tiha agradese, nia silu hodi dehan: ‘Neʼe reprezenta haʼu-nia isin neʼebé haʼu fó tanba imi. Kontinua halo ida-neʼe hodi hanoin haʼu.’ Nia mós halo hanesan ho kopu neʼe.”—1 Korinto 11:23-25, MF.
4. (a) Pergunta saida deʼit mak ita sei husu Ita-nia an kona-ba Memoriál? (b) Oinsá mak ita hatene iha loron saida mak sei halaʼo Memoriál tinan-tinan? (Haree mós kaixa “ Memoriál 2014.”)
4 Memoriál mak selebrasaun ida deʼit neʼebé Jesus haruka ninia dixípulu sira atu komemora tinan-tinan, no ita hotu hakarak tebes atu asiste. Maibé antes tempu neʼe, husu ba Ita-nia an: ‘Oinsá mak haʼu prepara ba Memoriál? Saida mak ita uza iha Memoriál? Reuniaun neʼe sei halaʼo oinsá? Tanbasá mak Memoriál importante mai haʼu?’
PAUN NO TUA-UVAS
5. Hodi prepara ba Festa Salvasaun nian, Jesus haruka ninia apóstolu sira atu halo saida?
5 Kuandu Jesus haruka ninia apóstolu sira atu prepara sala ida hodi komemora Festa Salvasaun nian, nia la husu sira atu enfeita, ka hafurak fatin neʼe. Nia hakarak deʼit fatin neʼebé moos, simples no fatin neʼebé toʼo ba nia no ninia apóstolu sira. (Lee Marcos 14:12-16.) Apóstolu sira mós prepara buat hotu neʼebé presiza ba han kalan neʼe, hanesan paun neʼebé la iha fermentu no tua-uvas mean. Kuandu sira selebra ona Festa Salvasaun nian, Jesus koʼalia kona-ba paun no tua-uvas. Buat rua neʼe mak ema sei uza kuandu halaʼo Memoriál.
6. (a) Depois selebra ona Festa Salvasaun nian, Jesus hatete saida kona-ba paun? (b) Paun hanesan saida mak uza iha Memoriál?
6 Iha tempu neʼe, apóstolu Mateus mós iha neʼebá. Nia hakerek: “Jesus kaer paun, haraik bensa, silu hodi fahe ba nia eskolante sira dehan: ‘Simu no han bá.’” (Mateus 26:26) “Paun” neʼebé sira uza la iha fermentu no sira mós uza atu halaʼo Festa Salvasaun nian. (Êxodo [Keluaran] 12:8; Deuteronômio [Ulangan] 16:3) Paun neʼe kahur ho trigu no bee, ida-neʼe mihis tanba la iha fermentu. Paun neʼe la aumenta ho buat seluk hanesan masin. Paun neʼe maran no baibain deʼit hanesan biskuit no fasil atu tohar. Ohin loron, antes loron Memoriál, karik katuas kongregasaun sira husu ema ida atu halo paun hanesan neʼe. Paun neʼe presiza halo husi trigu no bee no karik bele sona ho mina uitoan. Iha fatin neʼebé la iha trigu, kongregasaun mós bele uza foos uut, batar uut, sevada no buat seluk tan hanesan neʼe.
7. Iha Naʼi nia Han Kalan, saida mak iha Jesus nia kopu laran? Tua-uvas hanesan saida mak tenke uza iha Memoriál?
7 Mateus mós hakerek katak Jesus “kaer kalis, fó tiha agradese, fó ba sira dehan: ‘Imi hotu, hemu bá.’” (Mateus 26:27, 28) Iha Jesus nia kopu laran mak tua-uvas mean. Oinsá mak ita hatene katak Jesus la uza deʼit uvas been? Tanba tempu uvas nian ramata kleur ona. Kuandu ema Israel sira iha rai-Egiptu selebra Festa Salvasaun nian ba dala primeiru, sira la uza tua-uvas. Maski nuneʼe, Jesus la dehan katak sala atu hemu kuandu halaʼo Festa Salvasaun nian. Nia mós uza tua-uvas durante Naʼi nia Han Kalan. Tan neʼe mak ema kristaun sira ohin loron uza tua-uvas iha Memoriál. Tua-uvas hanesan saida mak ita tenke uza? Tua-uvas neʼe labele kahur ho buat ruma atu halo espesiál liu. Tanbasá? Tanba Jesus nia raan toʼo ona no la presiza buat seluk tan atu halo ninia raan folin-boot liu. Nuneʼe mós, tua-uvas mean ka vinho tinto (hanesan beaujolais, borgonha, ka clarete) neʼebé baibain no simples deʼit mak bele uza.
PAUN NO TUA-UVAS REPREZENTA SAIDA?
8. Tanbasá mak ema kristaun sira hakarak hatene paun no tua-uvas reprezenta saida?
8 Apóstolu Paulo hatete buat ruma neʼebé hatudu katak laʼós apóstolu sira deʼit mak tenke komemora Naʼi nia Han Kalan. Nia hakerek ba ema iha Korinto hodi hatete katak Jesus “kaer paun, no fó tiha agradese, nia silu nia hodi dehan: ‘Neʼe haʼu-nia isin neʼebé saran ba imi. Halo ida-neʼe hodi hanoin haʼu.’” (1 Korinto 11:23, 24) Tan neʼe, ohin loron ema kristaun sira mós presiza tuir mandamentu atu halaʼo Memoriál tinan-tinan, no sira hakarak hatene paun no tua-uvas neʼe reprezenta saida.
9. Ema balu fiar sala saida kona-ba paun neʼebé Jesus uza?
9 Kuandu Jesus hatete: “Neʼe reprezenta haʼu-nia isin”, ohin loron ema balu fiar katak nia loloos hatete ‘Ida-neʼe mak haʼu-nia isin.’ Sira fiar katak, liuhusi milagre ida, paun neʼe sai fali Jesus nia isin. Maibé ida-neʼe la akontese. a (Haree nota iha kraik.) Apóstolu sira haree Jesus no mós paun iha sira-nia oin, no haree katak paun neʼe la nakfila sai fali Jesus nia isin. Jesus hakarak hatete katak paun neʼe reprezenta ninia isin. Baibain kuandu Jesus hanorin, nia uza komparasaun sira hanesan neʼe.—Joao 2:19-21; 4:13, 14; 10:7; 15:1.
10. Paun neʼebé uza iha Memoriál reprezenta saida?
10 Paun neʼebé apóstolu sira bele haree no han mak reprezenta Jesus nia isin. Iha tempu uluk, ema kristaun sira neʼebé loos fiar katak paun reprezenta kongregasaun ema kose-mina sira, neʼebé Bíblia bolu nuʼudar “Kristu nia isin”. Ita uluk fiar ida-neʼe tanba Jesus silu paun sai pedasuk barak maibé kuandu nia mate, ninia ruin rasik la tohar ida. (Efeso 4:12; Roma 12:4, 5; 1 Korinto 10:16, 17; 12:27) Maibé kuandu sira estuda liután kona-ba neʼe, sira komprende katak paun reprezenta Jesus nia isin-lolon nuʼudar ema. Bíblia koʼalia beibeik kona-ba oinsá Jesus “terus iha isin” no mós mate iha ai-riin. Tan neʼe, paun neʼebé uza iha Memoriál reprezenta Jesus nia isin neʼebé nia fó nuʼudar sakrifísiu ba ita-nia sala.—1 Pedro 2:21-24; 4:1; Joao 19:33-36; Ebreu 10:5-7.
11, 12. (a) Jesus hatete saida kona-ba tua-uvas? (b) Tua-uvas neʼebé uza iha Memoriál reprezenta saida?
11 Hodi hatene paun reprezenta saida, ida-neʼe ajuda ita mós atu hatene saida mak Jesus hatete kona-ba tua-uvas. Bíblia hatete: “Nia mós halo hanesan ho kopu neʼe, depois han kalan tiha, nia dehan: ‘Kopu neʼe reprezenta aliansa foun liuhusi haʼu-nia raan.’” (1 Korinto 11:25, MF) Maibé Bíblia barak tradús hodi dehan katak kopu neʼe “mak aliansa foun iha haʼu-nia raan.” Kopu neʼebé Jesus kaer mak aliansa foun ka lae? Lae. Jesus koʼalia kona-ba tua-uvas neʼebé iha kopu laran. Jesus hatete katak tua-uvas neʼe reprezenta saida? Neʼe katak ninia raan neʼebé nia sei fó nuʼudar sakrifísiu.
12 Iha livru Marcos, ita lee Jesus nia liafuan: “Neʼe reprezenta haʼu-nia ‘raan aliansa nian’, neʼebé sei fakar tanba ema barak.” (Marcos 14:24, MF) No iha livru Mateus, hatete katak Jesus nia raan “nakfakar ba ema barak atu kasu sala”. (Mateus 26:28) Tan neʼe, tua-uvas mean reprezenta Jesus nia raan rasik neʼebé nia hasaʼe nuʼudar sakrifísiu hodi ita bele hetan perdua ba ita-nia sala.—Lee Efeso 1:7.
Apóstolu sira hemu tua-uvas neʼebé reprezenta Jesus nia raan aliansa nian (Haree parágrafu 11, 12)
MEMORIÁL KONA-BA JESUS NIA MATE SEI HALAʼO OINSÁ?
13. Memoriál kona-ba Jesus nia mate halaʼo oinsá?
13 Se Ita atu tuir Memoriál hamutuk ho Testemuña ba Jeová, karik Ita hakarak hatene oinsá reuniaun neʼe sei halaʼo. Memoriál sei halaʼo iha fatin neʼebé simples no moos, iha fatin neʼebé toʼo ba ema hotu. Karik Ita sei haree ai-funan balu maibé reuniaun neʼe sei la iha buat barak atu enfeita demais fatin neʼe. No ida-neʼe sei la halaʼo hanesan festa ida. Katuas kongregasaun ida sei hatoʼo diskursu neʼebé klaru husi Bíblia kona-ba Naʼi nia Han Kalan. Nia sei esplika katak Kristu mate hodi ita bele hetan moris. (Lee Roma 5:8-10.) Irmaun neʼebé hatoʼo diskursu sei esplika mós kona-ba esperansa rua neʼebé Bíblia fó sai.
14. Durante diskursu iha Memoriál, ita sei rona kona-ba esperansa rua saida?
14 Esperansa ida mak atu hela iha lalehan hodi ukun hamutuk ho Kristu. Ema kristaun uitoan deʼit mak iha esperansa neʼe, hanesan Jesus nia apóstolu sira. (Lucas 12:32; 22:19, 20; Apokalipse 14:1) Esperansa seluk neʼebé ema kristaun laran-metin hein daudaun mak atu hela ba nafatin iha rai neʼebé furak hanesan jardín. Iha tempu neʼe, ita-nia orasaun kona-ba Maromak nia hakarak ba rai sei sai loos. (Mateus 6:10) Bíblia koʼalia kona-ba moris furak neʼebé sira sei goza ba nafatin.—Isaías (Yesaya) 11:6-9; 35:5, 6; 65:21-23.
15, 16. Durante Memoriál, ita sei halo saida ho paun?
15 Kuandu oradór esplika ona kona-ba esperansa rua neʼe, nia sei hatete katak tempu toʼo ona atu halo buat neʼebé Jesus halo iha Naʼi nia Han Kalan. Iha meza neʼebé iha ninia sorin, ita sei haree paun neʼebé la iha fermentu no tua-uvas. Oradór sei lee husi Bíblia kona-ba saida mak Jesus halo ho paun. Karik nia sei lee husi Mateus neʼebé dehan: “Jesus foti paun ida, no depois husu tiha bensaun, nia silu hodi fó ba ninia dixípulu sira no dehan: ‘Simu no han bá. Neʼe reprezenta haʼu-nia isin.’” (Mateus 26:26, MF) Jesus silu paun sai pedasuk hodi nia bele fó ba ninia apóstolu sira iha ninia sorin-sorin. Iha Memoriál iha loron 14 Abríl, ita mós sei haree bikan ho paun neʼebé la iha fermentu.
16 Antes ema pasa bikan neʼebé iha paun, irmaun ida sei hatoʼo orasaun badak. Iha reuniaun neʼe, ema hotu sei pasa bikan ba malu iha dalan neʼebé la runguranga no iha tempu neʼebé badak deʼit. Ita sei halo nuneʼe hodi la tuir kostume espesiál ruma maibé iha dalan neʼebé diʼak ba ita-nia kongregasaun rasik. Hanesan iha kongregasaun barak durante Memoriál ba tinan 2013, karik ema ida sei la han paun neʼe, ka ema uitoan deʼit mak sei han.
17. Durante Memoriál, oinsá mak ita halo tuir Jesus nia ezemplu?
17 Tuirmai, oradór sei lee kona-ba saida mak Jesus halo ho tua-uvas: “Nia foti kopu ida, no depois fó tiha agradese ba Maromak, nia fó ba sira no dehan: ‘Imi hotu, hemu bá. Tanba ida-neʼe reprezenta haʼu-nia ‘raan aliansa nian’, neʼebé sei fakar atu ema barak hetan perdua husi sala.’” (Mateus 26:27, 28, MF) Hodi halo tuir Jesus nia ezemplu, irmaun ida sei hatoʼo orasaun ida tan, depois tua-uvas sei pasa ba ema hotu neʼebé asiste.
18. Maski ita la han ka hemu iha Memoriál, tanbasá importante nafatin ba ita atu tuir?
18 Só deʼit ema neʼebé iha esperansa atu ukun hamutuk ho Kristu mak bele han paun no hemu tua-uvas. Tan neʼe, ema barak neʼebé tuir Memoriál sei pasa deʼit ba ema iha sira-nia sorin. (Lee Lucas 22:28-30; 2 Timoteo 4:18) Maski nuneʼe, importante ba sira atu nafatin tuir Memoriál. Tanbasá? Hodi asiste, sira hatudu katak sira hafolin duni Jesus nia sakrifísiu. Durante Memoriál, sira bele hanoin kona-ba bensaun hotu neʼebé sira bele simu tanba Jesus fó ninia moris. Porezemplu, sira iha esperansa atu sai parte husi “ema-lubun boot ida” neʼebé moris liu “terus boot” hodi sai Maromak nia atan sira neʼebé “fase mutin fali ona sira-nia hatais iha Bibi-Oan nia raan”.—Apokalipse 7:9, 14-17.
19. Saida mak ita bele halo hodi prepara no hetan buat diʼak husi Memoriál?
19 Oinsá mak Testemuña sira iha mundu tomak prepara ba Memoriál? Semana balu antes Memoriál, ita hakaʼas an hodi konvida ema barak atu asiste. Iha loron balu antes reuniaun espesiál neʼe, ita lee husi Bíblia kona-ba saida mak Jesus halo no saida mak akontese antes Naʼi nia Han Kalan iha tinan 33. Ita halo planu nanis atu bele asiste iha Memoriál. Ita mós hakarak toʼo reuniaun fatin sedu hodi ita bele fó benvindu ba bainaka sira, no hodi ita la falta parte ida husi programa. Ita hotu sei hetan buat diʼak se ita tuir iha ita rasik nia Bíblia kuandu oradór lee no esplika eskritura sira. No buat neʼebé importante liu mak, hodi tuir Memoriál, ita hatudu katak ita agradese tebes ba Jesus nia sakrifísiu no ita halo tuir mandamentu neʼe: “Kontinua halo ida-neʼe hodi hanoin haʼu.”—1 Korinto 11:24.
a Matenek-naʼin ida husi rai-Alemaña naran Heinrich Meyer hatete katak apóstolu sira la hanoin katak sira loloos han Jesus nia isin no hemu ninia raan, tanba “Jesus nia isin seidauk tohar (katak, nia sei moris).” Nia mós hatete katak Jesus uza “liafuan simples” atu esplika paun no tua-uvas reprezenta saida no katak Jesus lakohi ninia apóstolu sira atu komprende sala.
