Iha tinan 1985 kuandu haʼu tinan 10, labarik sira husi rai-Kamboja komesa tuir haʼu-nia eskola iha Colombus, Ohio, Estadus Unidus. Sira ida neʼebé hatene lia-inglés uitoan, nia uza dezeñu atu konta istória kona-ba ninia rai. Nia hatete kona-ba oinsá mak ema oho malu, fó-terus ba malu no oinsá sira halai. Iha kalan haʼu tanis beibeik tanba hanoin tebes labarik sira-neʼe. Haʼu hakarak atu fó-hatene ba sira kona-ba mundu foun no esperansa moris-hiʼas, maibé sira la komprende inglés. Maski haʼu sei kiʼik, haʼu deside atu aprende lia-kambojanu hodi bele esplika ba sira kona-ba Jeová. Iha tempu neʼebá, haʼu la hatene katak desizaun neʼebé haʼu halo sei kona haʼu-nia futuru.

Atu aprende lia-kambojanu mak susar tebes. Tan neʼe, dala rua haʼu besik atu rende an. Maibé liuhusi haʼu-nia inan-aman, Jeová fó laran-manas mai haʼu. Liutiha tempu balu, mestre-mestra no kolega eskola sira komesa koʼalia ba haʼu atu buka serbisu neʼebé manán osan boot. Maibé haʼu-nia planu mak atu sai pioneiru. Tan neʼe, iha eskola haʼu hili matéria neʼebé ajuda atu hetan serbisu hodi kumpre planu neʼe. Haʼu mós haklaken hamutuk ho pioneiru sira kuandu haʼu sai husi eskola. Liután neʼe, haʼu hanorin lia-inglés ba alunu balu husi rai seluk. Desizaun sira-neʼe ajuda duni haʼu iha futuru.

Kuandu haʼu tinan 16, haʼu rona kona-ba grupu lia-kambojanu nian iha Long Beach, Kalifórnia. Haʼu bá vizita grupu neʼe no aprende lee lia-kambojanu. Kuandu haʼu ramata eskola, haʼu foti pioneiru no kontinua haklaken ba ema kambojanu sira neʼebé hela iha haʼu-nia área. Kuandu haʼu-nia tinan 18, haʼu hanoin atu muda ba rai-Kamboja. Iha tempu neʼebá, rai-Kamboja sei iha perigu, maibé ema barak husi naʼin-10.000.000 seidauk rona liafuan diʼak kona-ba Maromak, no iha Kamboja tomak, kongregasaun iha ida deʼit ho haklaken-naʼin 13. Dala primeiru neʼebé haʼu vizita rai neʼe mak kuandu haʼu tinan 19. Liutiha tinan rua, haʼu halo desizaun atu muda bá neʼebá. Haʼu serbisu hodi tradús no hanorin inglés, no ida-neʼe ajuda haʼu iha serbisu haklaken. Liutiha tempu balu, haʼu kaben ho irmán ida neʼebé iha planu hanesan ho haʼu-nian. Nuʼudar kaben-naʼin, ami ajuda ema barak atu dedika sira-nia an ba Jeová.

Jeová fó mai haʼu ‘buat neʼebé haʼu husu iha haʼu-nia laran’. (Salmo [Mazmur] 37:4) Hodi ajuda ema sai dixípulu mak serbisu neʼebé diʼak liu hotu. Durante tinan 16 neʼebé haʼu serbí iha rai-Kamboja, haʼu haree kongregasaun ho haklaken-naʼin 13 sai fali kongregasaun 12 ho grupu 4!—Esperiénsia husi Jason Blackwell.