1, 2. (a) Tanbasá mak dala ruma ita-nia neon sai bilán? (b) Saida mak ita hatene ona kona-ba Maromak nia Ukun?

 DALA ruma ita haree katak, kuandu ema balu sai sasin ba buat ruma, buat neʼebé ida-idak hanoin-hetan mak la hanesan. No mós, se kuandu doutór foin fó-hatene ba pasiente kona-ba ninia moras, pasiente neʼe bele haluha lalais buat neʼebé doutór hatete. Ezemplu ida tan mak, ema ida hanoin katak ninia sasán ruma lakon maski sasán neʼe iha ninia oin hela. Tanbasá mak buat sira-neʼe akontese? Matenek-naʼin sira hatete katak ita-nia neon bele sai bilán kuandu ita-nia hanoin sai okupadu demais. Sin, susar ba ema nia kakutak atu hanoin ho klaru kona-ba buat barak iha tempu hanesan.

² Nuneʼe mós ho ema barak ohin loron, sira la matan-moris ba buat sira neʼebé akontese iha mundu agora daudaun. Sira hatene katak buat barak iha mundu neʼe troka husi tinan 1914, maibé sira la komprende neʼe katak sá. Tanba ita estuda Bíblia, ita hatene katak Maromak nia Ukun hahú iha tinan 1914 kuandu Jesus sai liurai iha lalehan. Maibé orasaun neʼebé dehan: “Halo Ita-nia reinu [“Ukun”, MF] toʼo mai ami; halo tuir Ita-nia hakarak bá iha rai nuʼudar iha lalehan”, seidauk sai loos iha dalan kompletu. (Mateus 6:10)  Sin, orasaun neʼe sei sai loos hotu kuandu mundu aat neʼe ramata. Bainhira ida-neʼe akontese, Maromak nia hakarak sei halaʼo iha rai nuʼudar iha lalehan.

3. Tanba ita estuda Bíblia, ita bele haree saida?

³ Tanba ita estuda Maromak nia Liafuan beibeik, ita bele haree katak profesia sira, ka buat neʼebé Bíblia fó-hatene nanis sai loos agora daudaun. Neʼe la hanesan duni ho ema barak iha mundu. Sira okupadu tebes ho sira-nia moris hodi la haree buat neʼebé hatudu katak Kristu ukun ona husi tinan 1914, no katak lakleur tan nia sei halakon mundu aat neʼe. Husu ba ita-nia an: ‘Haʼu nafatin fiar katak mundu nia rohan besik ona ka lae? Haʼu fiar katak buat neʼebé akontese iha mundu hatudu ho klaru ida-neʼe ka lae?’ Se ita foin tama lia-loos, ita mós presiza husu ba ita-nia an: ‘Haʼu tau fokus ba saida?’ Mai ita koʼalia kona-ba razaun importante tolu tanbasá mak ita fiar katak lakleur tan Maromak nia hakarak ba mundu sei sai loos.

4, 5. (a) Husi tinan 1914, Jesus halo saida? (Haree dezeñu iha pájina 27.) (b) Ema naʼin-tolu neʼebé saʼe kuda hodi tuir Jesus reprezenta saida? Oinsá mak profesia neʼe sai loos?

⁴ Iha tinan 1914, Jesus sai Liurai iha Maromak nia Ukun. Profesia iha Apokalipse kapítulu 6 dehan katak Jesus saʼe kuda mutin ida. Kuandu nia sai liurai, nia hahú kedas atu halai kuda hodi lakleur tan halakon Satanás nia mundu aat. (Lee Apokalipse 6:1, 2.) Profesia neʼe hatete nanis katak kuandu Jesus komesa ukun, lalais deʼit mundu neʼe sai aat liu. Funu, rai-hamlaha, moras no buat seluk neʼebé halo ema mate sei akontese barak liu fali uluk. Iha livru Apokalipse, kuda tolu neʼebé halai tuir Jesus mak reprezenta buat aat tolu neʼe.—Apokalipse 6:3-8.

⁵ Hanesan profesia hatete nanis, funu “hasai dame husi rai”. Ida-neʼe akontese maski nasaun barak promete atu serbisu hamutuk hodi harii dame. Komesa ho Funu Mundiál Primeiru, funu barak “hasai dame husi rai”. Maski siénsia no sistema ekonomia laʼo ba oin husi tinan 1914, maibé sei iha rai-hamlaha barak neʼebé halo povu sente la hakmatek. Klaru katak tinan-tinan, moras oioin, dezastre naturál no buat seluk tan hamate ema rihun ba rihun. Akontesimentu sira-neʼe sai aat liu no barak liu, se kompara ho tempu uluk. Ita komprende ka lae, ida-neʼe katak sá mai ita?

6. Sé mak matan-moris kona-ba Bíblia nia profesia? Sira halo saida kuandu Bíblia nia profesia sai loos?

⁶ Uluk, ema barak hanoin resin kona-ba Funu Mundiál Primeiru no moras gripe españól neʼebé kona rai barak, maibé iha tempu neʼebá, ema kristaun kose-mina sira matan-moris hodi hein namanas ba “jentiu sira-nia otas” neʼebé atu ramata iha tinan 1914. (Lucas 21:24) Maski ema kose-mina sira seidauk komprende oinsá mak profesia iha Bíblia sei sai loos, maibé sira hatene katak iha tinan 1914, buat neʼebé importante tebes sei akontese iha Maromak nia Ukun. Kuandu ema kose-mina sira hatene kona-ba oinsá mak profesia neʼe sai loos, sira komesa haklaken ho aten-brani ba ema seluk katak Maromak nia Ukun hahú ona. Ema barak neʼebé haklaken mensajen neʼe hetan terus, maibé ida-neʼe mós kumpre Bíblia nia profesia. Ba tinan barak depois neʼe, inimigu sira ba Maromak nia Ukun koko atu hapara serbisu haklaken hodi uza violénsia, halo lei atu bandu serbisu haklaken,  hatama irmaun sira iha komarka no mós oho sira.—Salmo (Mazmur) 94:20; Apokalipse 12:15.

7. Tanbasá mak ema barak la haree akontesimentu sira iha mundu nuʼudar buat neʼebé importante?

⁷ Maski iha buat barak neʼebé hatudu katak Maromak nia Ukun hahú ona, maibé tanbasá mak ema la hatene ida-neʼe? Tanbasá mak sira la haree katak buat neʼebé akontese iha mundu kumpre daudauk Bíblia nia profesia neʼebé Maromak nia povu haklaken kleur ona? Dala ruma, sira haree deʼit ba buat neʼebé sira hakarak. (2 Korinto 5:7) Karik sira sai okupadu demais ho sira-nia moris no la haree buat neʼebé Maromak halo daudaun. (Mateus 24:37-39) Ka, karik Satanás nia mundu mak dada sira-nia atensaun. (2 Korinto 4:4) Ita presiza fiar no komprende buat espirituál nian atu haree buat neʼebé Maromak nia Ukun neʼe halo daudaun iha lalehan. Sin, ita kontente tebes tanba ita haree ho momoos saida mak akontese daudaun, loos ka lae?

8-10. (a) Oinsá mak 2 Timoteo 3:1-5 sai loos? (b) Tanbasá mak ita bele dehan katak situasaun iha mundu sai aat ba beibeik?

⁸ Iha razaun segundu tanbasá mak ita hatene katak lakleur tan Maromak nia Ukun sei mai toʼo rai. Neʼe mak ema nia hahalok iha rai sai aat liután. Besik tinan 100 ona, ita haree liafuan iha 2 Timoteo 3:1-5 sai loos. Ema nia hahalok neʼebé eskritura neʼe koʼalia, habelar iha mundu tomak. Ita mós haree ida-neʼe ka lae? Mai ita koʼalia kona-ba ezemplu balu.—Lee 2 Timoteo 3:1, 13.

⁹ Hanoin toʼok, ema nia hahalok maizumenus tinan 60 liubá la hanesan duni ho hahalok ohin loron. Dalan neʼebé ema hatais no sira-nia hahalok sai aat ba beibeik iha serbisu-fatin, filme, no desportu. Iha fatin hotu-hotu, ita haree violénsia barak no buat neʼebé la morál. Ema hatudu hahalok siʼak hodi halo ema taʼuk. Programa sira iha televizaun neʼebé uluk ema hanoin mak la diʼak, agora ema simu deʼit nuʼudar buat neʼebé diʼak ba família atu nonton. No  ema neʼebé halo hahalok omoseksuál, sira sai iha televizaun hodi hatudu katak sira-nia hahalok mak baibain deʼit. Ita kontente tanba ita hatene Maromak nia haree kona-ba buat sira-neʼe.—Lee Judas 14, 15.

¹⁰ No mós, hanoin kona-ba joven sira-nia hahalok iha tempu uluk no kompara ho ohin loron. Maizumenus iha tinan 1950, inan-aman sira taʼuk katak sira-nia oan sei fuma, hemu tua no dansa iha dalan neʼebé la morál. Maibé ohin loron, ita rona iha notísias buat neʼebé aat liután. Porezemplu, iha rai ida, labarik ho tinan 15 tiru ninia kolega eskola sira, naʼin-rua mate no 13 kanek. Iha fatin seluk, grupu joven sira neʼebé lanu oho labarik-feto ho tinan sia no ataka mós ninia aman no família ida. Notísias mós hatudu katak iha rai ida iha Ásia, durante tinan 10 nia laran, joven sira mak halo krime barak liu duké ema boot sira. Ita la bele nega katak situasaun sai aat ba beibeik, loos ka lae?

11. Tanbasá mak ema barak la hatene katak mundu neʼe sai aat ba beibeik?

¹¹ Apóstolu Pedro mós hatete nanis: “Iha loron ikus ema sira neʼebé moris deʼit tuir sira-nia isin nia laran-aat sei mosu. Sira-neʼe sei dehan: ‘Naʼi neʼebé hakotu lia atu hiʼit an mai fali iha neʼebé? Hori tempu neʼebé ita-nia beiʼala sira mate ona, buat hotu hanesan deʼit wainhira mundu neʼe hahú.’” (2 Pedro 3:3, 4) Tanbasá mak ema balu hanoin hanesan neʼe? Tanba kuandu ita sempre haree buat ruma, ida-neʼe bele sai baibain deʼit. Hanoin toʼok, se ita-nia belun nia hahalok troka derrepente deʼit, neʼe halo ita hakfodak. Maibé kuandu ema iha mundu nia hahalok neineik-neineik sai aat, susar ba ita atu haree ida-neʼe. Maski nuneʼe, mudansa hanesan neʼe perigu tebes.

12, 13. (a) Tanbasá mak ita la presiza taʼuk kona-ba buat neʼebé akontese iha mundu? (b) Apóstolu Paulo nia liafuan saida mak sei ajuda ita atu tahan hasoru susar iha loron ikus sira-neʼe?

¹² Apóstolu Paulo fó avizu katak iha loron ikus sira, “susar barak sei mosu”. (2 Timoteo 3:1) Maski nuneʼe, ita la presiza taʼuk hodi subar husi mundu neʼe. Ita bele manán hasoru saida deʼit neʼebé halo ita taʼuk ka laran-tun tanba ita hetan ajuda husi Jeová, ninia espíritu no kongregasaun kristaun. Ita bele laran-metin ba nia nafatin. Maromak sei fó ba ita “kbiit makaʼas”.—2 Korinto 4:7-10.

¹³ Bainhira Paulo fó-hatene nanis kona-ba loron ikus sira, nia komesa ho liafuan neʼebé bele mós tradús nuʼudar “hatene ida-neʼe bá”. Liafuan sira-neʼe sai garantia katak profesia neʼe sei sai loos duni. Ita hatene katak mundu neʼe sei sai aat liu toʼo Maromak Jeová lori mundu foun mai. Kuandu haree ba mundu nia istória, povu no nasaun sira neʼebé morál sai aat tebes, ikusmai sira lakon mohu. Ohin loron, ema nia morál iha mundu neʼe mak aat liu fali tempu uluk. Maski ema barak la matan-moris kona-ba mundu nia situasaun agora, maibé husi tinan 1914, buat neʼebé akontese ona hatudu ba ita katak Maromak nia Ukun besik ona atu halakon buat aat.

14-16. Saida mak razaun terseiru tanbasá ita fiar katak lakleur tan Maromak nia Ukun sei “mai”?

¹⁴ Razaun terseiru tanbasá ita bele fiar katak mundu nia rohan besik ona mak kona-ba istória husi Maromak nia povu. Porezemplu, antes Maromak nia Ukun hahú iha lalehan, grupu ida husi ema kristaun kose-mina mak serbí  Maromak ho badinas. Ikusmai iha tinan 1914 kuandu profesia la sai loos tuir dalan neʼebé sira hakarak, sira halo saida? Sira barak kontinua atu serbí Jeová ho laran-metin maski sira hasoru terus no susar. No ema kose-mina sira-neʼe barak hatudu laran-metin toʼo mate.

¹⁵ Iha Jesus nia profesia kona-ba loron ikus sira, nia hatete: “Jerasaun neʼe sei la liu molok buat sira-neʼe hotu sei mosu mai.” (Lee Mateus 24:33-35.) Kuandu Jesus koʼalia kona-ba “jerasaun neʼe”, ita hatene katak nia koʼalia kona-ba ema kose-mina grupu rua. Grupu primeiru mak sira neʼebé sei matan-moris iha tinan 1914 hodi komprende katak Kristu komesa ninia ukun iha tinan neʼe, maibé laʼós neʼe deʼit, sira mós hetan ona kose-mina ho espíritu santu iha tinan 1914 ka antes tinan neʼe.—Roma 8:14-17.

¹⁶ Grupu segundu husi “jerasaun neʼe” mak sira neʼebé hetan kose-mina durante tempu neʼebé ema balu husi grupu primeiru sei moris iha rai. Nuneʼe, ohin loron, laʼós ema kose-mina hotu mak parte husi “jerasaun neʼe” neʼebé Jesus koʼalia tanba sira neʼebé husi grupu segundu neʼe agora idade ona. Maibé Jesus nia liafuan iha Mateus 24:34 fó fiar mai ita katak sira balu husi jerasaun neʼe sei moris iha rai kuandu terus boot hahú. Neʼe halo ita fiar-metin katak lakleur tan, Liurai ba Maromak nia Ukun sei halakon ema aat no lori mundu foun neʼebé iha justisa.—2 Pedro 3:13.

17. Husi buat neʼebé ita estuda, ita komprende saida?

¹⁷ Razaun tolu neʼebé ita foin estuda ajuda ita atu komprende saida? Hanesan Jesus hatete, ita la hatene loron no oras ba mundu neʼe nia rohan. (Mateus 24:36; 25:13) Maski nuneʼe, Paulo hatete katak ita hatene kona-ba “tempu”, katak agora ita moris daudauk iha loron ikus sira. (Lee Roma 13:11.) Se ita matan-moris ba Bíblia nia profesia no kona-ba saida mak Maromak Jeová no Jesus Kristu sei halo daudaun, ita bele haree ho klaru katak mundu aat neʼe besik ona atu ramata.

18. Saida mak sei akontese ba ema neʼebé la simu Jesus Kristu nuʼudar sira-nia Liurai?

¹⁸ Lakleur tan, ema neʼebé la simu Jesus Kristu nia pozisaun aas nuʼudar Ida neʼebé saʼe kuda mutin, sira tenke rekoñese katak sira mak sala. Sira la bele halai-sees husi kastigu neʼebé sira sei hetan. Kuandu ida-neʼe akontese, ema barak sei hakilar hodi taʼuk: ‘Ema sé mak bele tahan?’ (Apokalipse 6:15-17) Apokalipse kapítulu 7 fó resposta ba pergunta neʼe. Ema kose-mina sira no “ema-lubun boot” sei hamriik nafatin iha Maromak nia oin no simu bensaun husi nia. Depois liutiha terus boot, “ema-lubun boot” sei tama ba Maromak nia mundu foun.—Apokalipse 7:9, 13-15.

19. Tanba Ita fiar-metin katak mundu nia rohan besik ona, Ita rasik hein namanas ba saida?

¹⁹ Se ita matan-moris ba Bíblia nia profesia sira neʼebé sai loos iha ita-nia tempu, ita sei la husik Satanás nia mundu dada ita-nia atensaun. Ita sei haree ho klaru akontesimentu sira iha mundu katak sá. Lakleur tan, Kristu sei manán hodi halakon mundu aat neʼe durante funu Armagedon. (Apokalipse 19:11, 19-21) Hanoin toʼok, ita sei kontente tebes kuandu ida-neʼe akontese, loos ka lae?—Apokalipse 20:1-3, 6; 21:3, 4.