FETO-FALUK kiak ida hakoʼak daudauk ninia oan-mane mesak neʼebé foin moris hiʼas. Nia hakfodak tebes ho buat neʼebé akontese. Tanba foin antes neʼe, nia koʼus ninia oan-mane nia mate-isin. Agora nia haree nia oan-mane neʼebé moris hiʼas fali no hatudu oin-midar. Ninia bainaka hatete ba nia: “Haree, ó-nia oan-mane moris fali ona.”

Ida-neʼe akontese besik tinan 3.000 liubá. Ita bele lee istória neʼe iha 1 Reis (Raja-Raja) kapítulu 17. Bainaka iha istória neʼe mak Maromak nia profeta naran Elias. Entaun feto-faluk neʼe nia naran saida? Bíblia la fó-hatene, maibé nia mak feto-faluk ida neʼebé hela iha sidade naran Sarepta. Ninia oan nia moris-hiʼas hametin liután ninia fiar. Nuʼudar ita lee istória kona-ba feto-faluk neʼe, ita sei aprende buat barak neʼebé importante.

Iha tempu neʼebé liurai aat Acab mak ukun rai-Izraél, Maromak Jeová dehan katak udan sei la tun ba tempu kleur iha rai neʼe. Kuandu Elias hatoʼo tiha Maromak nia liafuan, Maromak subar Elias husi Acab no tau matan ba nia hodi uza manu-metan atu fó paun no naʼan ba nia. Tuirmai Jeová hatete ba Elias: “Hamriik bá, bá Sarepta, fatin ida iha Sidon, no hela iha neʼebá. Haree! Iha neʼebá haʼu sei haruka feto-faluk ida atu fó hahán ba ó.”—1 Reis (Raja-Raja) 17:1-9.

Kuandu Elias toʼo iha Sarepta, nia haree feto-faluk kiak ida hili daudauk ai. Karik Elias hanoin: ‘Nia mak feto-faluk neʼebé sei fó hahán ba haʼu ka lae? Maibé oinsá mak ema kiak tebes hanesan neʼe bele halo ida-neʼe?’ Maski Elias dúvida kona-ba neʼe, maibé nia komesa koʼalia ho feto neʼe. Nia hatete: “Favór ida, fó mai haʼu bee uitoan husi ó-nia kusi atu haʼu bele hemu.” Kuandu nia fila mai no fó bee ba Elias, Elias husu tan: “Favór ida, fó mai haʼu paun  rohan ida.” (1 Reis [Raja-Raja] 17:10, 11) Maski la susar ba feto-faluk neʼe atu fó bee ba ema estranjeiru neʼe, maibé agora problema boot ba nia atu fó paun ba ema foun neʼe.

Feto-faluk neʼe hatán, hodi dehan: “Nuʼudar Jeová ó-nia Maromak mak Maromak neʼebé moris, haʼu la iha paun, haʼu iha deʼit trigu liman isin ida iha sanan-rai boot no iha mina uitoan iha botir kiʼik. No haʼu hili daudauk ai pedasuk balu, no haʼu sei bá no halo hahán ruma ba haʼu no haʼu-nia oan-mane. No ami sei han no depois sei mate.” (1 Reis [Raja-Raja] 17:12) Liafuan neʼe hatudu saida kona-ba feto-faluk neʼe?

Feto-faluk neʼe hatene katak Elias mak ema Izraél neʼebé serbí Maromak. Ita hatene nuneʼe tanba nia hatete: “Nuʼudar Jeová ó-nia Maromak mak Maromak neʼebé moris.” Maibé ita hatene katak feto neʼe rasik la serbí Maromak Jeová tanba nia la hatete “haʼu-nia Maromak”. Feto neʼe hela iha Sarepta, fatin ida neʼebé besik ema Fenísia nia sidade Sidon. Tan neʼe ita bele fiar katak iha Sarepta ema barak mak adora maromak Baal. Maski nuneʼe, Jeová haree buat diʼak iha feto neʼe nia laran.

Maski feto-faluk kiak neʼe hela hamutuk ho ema barak neʼebé adora maromak falsu, maibé nia hatudu fiar ba ema Izraél nia Maromak. Tan neʼe, Jeová deside atu haruka Elias ba nia, hodi bele ajuda Elias no mós feto-faluk neʼe. Ita bele aprende buat importante husi ida-neʼe.

Maski ema iha sidade Sarepta adora maromak falsu, maibé laʼós ema hotu mak aat. Kuandu Jeová haruka Elias ba feto-faluk neʼe, Jeová hatudu katak Nia hanoin ema diʼak sira neʼebé seidauk adora Nia. Sin, “iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos”.—Apóstolu 10:35.

Iha ka lae, ema neʼebé hela iha ita-nia haklaken-fatin neʼebé hanesan ho feto-faluk husi Sarepta? Maski sira hela iha ema neʼebé tuir relijiaun falsu nia leet, maibé karik iha ema balu neʼebé hakarak tebes situasaun iha mundu neʼe sai diʼak liu. No sira la hatene buat ida kona-ba Maromak Jeová, tan neʼe sira presiza ajuda atu bele adora Maromak neʼebé loos. Ita hakaʼas an atu buka no ajuda ema sira-neʼe ka lae?

Hanoin kona-ba buat neʼebé Elias husu ba feto-faluk neʼe atu halo. Feto-faluk neʼe foin hatete katak nia sei halo hahán ba dala ikus ba nia ho ninia oan, no depois han tiha, sira sei mate. Maibé Elias hatete saida? Nia hatete: “Keta taʼuk. Tama no halo tuir ó-nia liafuan bá. Maibé husi buat neʼebé ó iha, halo uluklai paun kiʼikoan ba haʼu, no lori neʼe mai haʼu. Depois neʼe ó bele halo hahán ruma ba ó no ba ó-nia oan-mane. Tanba Jeová, Maromak Izraél nian, hatete: ‘Sanan-rai boot trigu nian sei la sai mamuk, no botir kiʼik mina nian sei la sai mamuk toʼo loron neʼebé Jeová halo udan tun ba rai.’”—1 Reis (Raja-Raja) 17:11-14.

Ida-neʼe koko duni feto-faluk nia fiar. Karik ema balu sei nunka fó sira-nia hahán ikus ba ema seluk. Maibé feto neʼe halo saida? Maski nia hatene uitoan deʼit kona-ba Jeová, maibé nia fiar Elias nia liafuan no halo tuir buat neʼebé nia hatete. Desizaun neʼebé nia halo mak matenek duni.

Maromak la husik feto-faluk neʼe. Hanesan Elias promete, Jeová halo milagre hodi feto neʼe nia trigu no mina la hotu toʼo tempu neʼebé udan tun fali. Loos duni, “sanan-rai boot trigu nian la sai mamuk, no botir kiʼik mina nian la sai mamuk, hodi tuir liafuan  neʼebé Jeová hatete ona liuhusi Elias”. (1 Reis [Raja-Raja] 17:16; 18:1) Se karik feto-faluk neʼe foti desizaun seluk, entaun hahán neʼebé nia prepara ba nia ho ninia oan mak sira-nia hahán ba dala ikus. Maibé feto neʼe hatudu fiar neʼebé boot ba Jeová hodi fó han uluk ba Elias.

Saida mak ita bele aprende husi istória neʼe? Istória neʼe hatudu katak Jeová fó bensaun ba ema neʼebé hatudu fiar ba nia. Kuandu ita hasoru susar neʼebé koko ita-nia laran-metin, Jeová sei ajuda ita se ita hatudu fiar. Nia sei fó buat neʼebé ita presiza, proteje ita, no sei sai ita-nia belun hodi ita bele tahan susar.—Êxodo (Keluaran) 3:13-15.

Iha tinan 1898, livru Zion’s Watch Tower konta kona-ba feto-faluk neʼe nia istória no hatete: “Se feto-faluk neʼe iha fiar hodi halo tuir, nia sei hetan ajuda husi Maromak liuhusi profeta Elias. Maibé se lae, karik Maromak sei hili fali feto-faluk seluk. Hanesan neʼe mós ho ita, dala ruma Maromak sei husik buat ruma atu koko ita-nia fiar hodi bele haree ita-nia fiar toʼo iha neʼebé. Se ita hatudu ita-nia fiar ba nia, ita sei simu bensaun, maibé se lae, ita sei lakon bensaun neʼe.”

Kuandu ita hasoru susar, ita presiza buka matadalan husi Bíblia no ita-nia livru sira kona-ba Bíblia. Depois, ita presiza halo tuir matadalan neʼe maski dala ruma susar atu halo nuneʼe. Ita sei hetan bensaun se ita halo tuir liafuan iha Provérbios (Amsal) 3:5, 6 neʼebé hatete: “Tau fiar ba Jeová ho ó-nia laran tomak no labele sadere ba ó-nia matenek rasik. Iha ó-nia dalan hotu tau atensaun ba nia, no nia rasik sei halo ó-nia dalan sai loos.”

Feto-faluk neʼe hetan koko dala ida tan kona-ba ninia fiar. Bíblia hatete: “Depois, feto-faluk neʼe nia oan-mane sai moras, no ninia moras sai aat liu toʼo hakotu ninia iis.” Inan neʼe hakarak tebes hatene razaun tanbasá ninia oan mate. Nia hatete ba Elias: “Ita hakarak saida husi haʼu, oh, ema husi Maromak loos? Ita mai atu halo haʼu hanoin-hetan haʼu-nia sala no halo haʼu-nia oan-mane mate ka?” (1 Reis [Raja-Raja] 17:17, 18) Liafuan triste sira-neʼe katak sá?

Karik feto-faluk koʼalia hanesan neʼe tanba nia hanoin-hetan fali sala neʼebé uluk nia halo. Ka karik nia hanoin katak ninia oan mate tanba Maromak fó kastigu ba nia no Elias mai hodi hatoʼo nia Maromak nia kastigu neʼe. Bíblia la fó-hatene. Maibé klaru katak feto-faluk neʼe la fó-sala ba Maromak katak Nia mak halo buat neʼebé la loos.

Ita bele fiar katak Elias hakfodak tebes haree feto neʼe nia oan mate. Elias mós hakfodak tanba feto neʼe hanoin katak Elias rasik mak lori susar ba ninia moris. Elias lori oan neʼe ba kuartu leten no hatete ho lian makaʼas: “Oh, Jeová haʼu-nia Maromak, Ita mós fó susar ba feto-faluk ida neʼebé fó hela-fatin mai haʼu hodi halo ninia oan-mane mate ka?” Elias sente laran-moras tebes tanba se Jeová husik feto laran-diʼak neʼe atu hasoru tan susar, ida-neʼe bele hafoʼer Jeová nia naran. Tan neʼe, Elias husu ba Maromak: “Oh, Jeová, haʼu-nia Maromak, favór ida, halo labarik neʼe nia moris fila fali ba nia.”—1 Reis (Raja-Raja) 17:20, 21.

Jeová rona ba Elias. Jeová hatene ona katak feto-faluk neʼe hatudu fiar hodi ajuda Ninia profeta. Karik Jeová husik labarik neʼe sai moras toʼo mate tanba Jeová hatene katak nia sei halo oan neʼe moris hiʼas fali. Ida-neʼe mak moris-hiʼas neʼebé Bíblia konta ba dala primeiru no ida-neʼe fó esperansa ba jerasaun sira neʼebé atu mai. Kuandu Elias husu Jeová atu fó moris-hiʼas ba labarik neʼe, Jeová halo duni. Elias hatete ba feto-faluk neʼe: “Haree, ó-nia oan-mane moris fali ona.” Ho haksolok, feto-faluk neʼe hatete ba Elias: “Agora haʼu hatene katak Ita mak loloos ema husi Maromak no Jeová nia liafuan neʼebé Ita koʼalia mak lia-loos.”—1 Reis (Raja-Raja) 17:22-24.

Ho feto-faluk nia liafuan neʼe mak istória iha 1 Reis (Raja-Raja) kapítulu 17 ramata. Maibé tanba Jesus temi fali kona-ba feto neʼe, karik ikusmai nia komesa adora Jeová. (Lucas 4:25, 26) Istória neʼe hanorin ita katak Maromak fó bensaun ba ema neʼebé hatudu laran-diʼak ba Ninia atan sira. (Mateus 25:34-40) Istória neʼe mós hatudu katak Maromak sei tau matan ba buat neʼebé ita presiza maski ita hasoru situasaun susar. (Mateus 6:25-34) Ita mós bele aprende katak Jeová hakarak tebes atu fó moris-hiʼas ba ema neʼebé mate ona, no nia iha duni kbiit atu halo nuneʼe. (Apóstolu 24:15) Buat sira-neʼe fó razaun ba ita atu hanoin-hetan feto-faluk husi Sarepta.