Situasaun neʼebé susar bele kona ita iha dalan oioin. Ida-neʼe halo ita estrese, halakon ita-nia kbiit, no kona dalan neʼebé ita sente ba aban-bainrua. Hanoin toʼok kona-ba Liurai David husi tempu uluk, neʼebé hasoru susar barak. Oinsá mak nia tahan hasoru susar sira-neʼe? Iha ninia salmu ida, nia hatete: “Ho haʼu-nia lian, haʼu bolu Jeová hodi husu ninia ajuda; ho haʼu-nia lian, haʼu bolu Jeová hodi husu ninia laran-sadiʼa. Iha ninia oin haʼu fakar haʼu-nia laran-susar. Iha ninia oin haʼu fó-hatene haʼu-nia terus kuandu haʼu lakon haʼu-nia kbiit. No Ita haree ba haʼu-nia dalan.” Sin, ho haraik-an David husu ajuda husi Maromak Jeová iha orasaun.—Salmo (Mazmur) 142:1-3.

Iha ninia salmu seluk, David kanta: “Haʼu husu ona buat ida ba Jeová, neʼe mak buat neʼebé haʼu hakarak duni, katak haʼu bele hela iha Jeová nia uma iha haʼu-nia moris tomak, atu haree Jeová nia laran-diʼak no atu hateke ba ninia templu ho laran-haksolok.” (Salmo [Mazmur] 27:4) Maski David laʼós ema levita, maibé ita bele fiar katak nia gosta tebes atu bá iha Maromak nia templu, fatin atu halaʼo adorasaun neʼebé loos iha tempu neʼebá. David nia laran kontente tebes no nakonu ho agradese toʼo nia hakarak hela deʼit iha Maromak nia uma durante ninia moris tomak hodi bele “haree Jeová nia laran-diʼak”.

Iha língua orijinál, liafuan neʼebé tradús nuʼudar “laran-diʼak” mak kona-ba buat neʼebé monu loos ba ita-nia laran, hanoin no sentimentu. David nia liafuan hatudu katak nia hafolin tebes Maromak nia arranju kona-ba adorasaun. Ita bele husu ba ita-nia an: ‘Haʼu hafolin Maromak nia arranju kona-ba adorasaun hanesan David ka lae?’

La hanesan ho tempu uluk, ita la presiza atu bá templu neʼebé ema halo hodi hakbesik ba Maromak Jeová. Maibé ohin loron, ita-nia adorasaun envolve Jeová nia templu espirituál, katak Maromak nia arranju espesiál kona-ba adorasaun neʼebé loos. a Se ita ‘hateke ho laran-haksolok’ ba Maromak nia arranju kona-ba adorasaun, ita mós bele “haree Jeová nia laran-diʼak”.

Hanoin toʼok kona-ba altár neʼebé halo husi riti neʼebé tau iha fatin atu tama ba tabernákulu. (Êxodo [Keluaran] 38:1, 2; 40:6) Altár neʼe reprezenta Maromak nia hakarak atu simu Jesus nia moris nuʼudar sakrifísiu. (Ebreu 10:5-10) Ida-neʼe kona ita oinsá? Apóstolu Paulo hatete: “Wainhira ita sei funu-balun ba malu, ita hadame malu ona karik ho Maromak husi nia Oan-Mane nia mate.” (Roma 5:10) Hodi hatudu fiar ba Jesus nia sakrifísiu, ita bele sente katak Maromak simu ita no ita bele sai Maromak nia belun no iha “relasaun neʼebé besik liu ho nia”.—Salmo (Mazmur) 25:14.

Tanba Maromak Jeová ‘hamoos tiha ita-nia sala’, ita bele sente kmaan. (Apóstolu 3:19) Ita bele kompara ita-nia situasaun ho kriminozu ida iha komarka laran neʼebé hein ba kastigu-mate. Nia hakribi buat aat neʼebé uluk nia halo hodi troka nia hahalok sai fali ema diʼak. Hodi haree ida-neʼe, juis neʼebé laran-diʼak deside atu la fó kastigu-mate ba nia. Ema neʼe sente kmaan duni, loos ka lae? Hanesan ho juis neʼe, Jeová hatudu laran-diʼak ba ema neʼebé arrepende an, no nia halakon ita-nia sala neʼebé lori ita ba mate.

David bele haree ema sira neʼebé halaʼo adorasaun neʼebé loos iha templu. Nia haree ninia maluk Izraél halibur hamutuk, lee no esplika kona-ba Maromak nia Ukun-Fuan, sunu insensu, no haree mós amlulik no ema levita sira halo serbisu sagradu. (Êxodo [Keluaran] 30:34-38; Números [Bilangan] 3:5-8; Deuteronômio [Ulangan] 31:9-12) Buat hotu neʼe reprezenta buat ruma kona-ba ita-nia adorasaun ohin loron. Mai ita aprende kona-ba neʼe.

 Hanesan tempu uluk, ohin loron ita sente katak “diʼak no furak duni atu iha maun-alin sira-neʼebé hela hamutuk ho unidade!” (Salmo [Mazmur] 133:1) Ita-nia maluk fiar-naʼin iha mundu tomak sai barak tebetebes. (1 Pedro 2:17) Iha ita-nia reuniaun sira, ema lee no esplika Maromak nia Liafuan, no liuhusi Jeová nia organizasaun, nia fó ita matadalan no informasaun oioin neʼebé bele ajuda ita. Ita mós iha livru barak neʼebé ita bele uza atu estuda mesak ka estuda nuʼudar família. Irmaun ida husi Grupu Administradór hatete: “Hodi hanoin kleʼan Maromak nia Liafuan no buka matenek, neʼe ajuda haʼu atu hetan rikusoin espirituál nian no halo haʼu-nia moris kontente.” Loos duni, ‘koñesimentu bele sai buat furak iha ita-nia moris’.—Provérbios (Amsal) 2:10.

Ohin loron mós Maromak Jeová rona orasaun neʼebé ninia atan sira hatoʼo ho laran. Ba Jeová, orasaun sira-neʼe mak hanesan insensu neʼebé morin loos. (Salmo [Mazmur] 141:2) Ita kontente tebes atu hatene katak Maromak Jeová simu ita kuandu ita ho haraik-an hakbesik ba nia iha orasaun!

Moisés harohan hodi dehan: “Husik Jeová ami-nia Maromak nia ksolok toʼo mai ami. No fó bensaun ba serbisu neʼebé ami halo ho liman.” (Salmo [Mazmur] 90:17) Nuʼudar ita halaʼo serbisu haklaken ho laran-manas, Jeová fó bensaun ba ita-nia hakaʼas-an. (Provérbios [Amsal] 10:22) Porezemplu, karik ita ajuda ona ema balu atu tama lia-loos, ka karik ba tinan barak ita tahan hasoru susar oioin iha serbisu haklaken, hanesan ema lakohi simu ita, fó-terus mai ita, ka ita sai moras. (1 Tesalónika 2:2) Maski nuneʼe, ita hotu kontente nafatin tanba ita “haree Jeová nia laran-diʼak” no ita hatene katak ita-nia Aman iha lalehan hafolin ita-nia hakaʼas-an, loos ka lae?

David kanta: “Jeová mak haʼu-nia parte, neʼebé haketak tiha ona ba haʼu, no parte husi haʼu-nia kopu. Ita proteje haʼu-nia liman-rohan. Buat neʼebé Ita sukat atu fó ba haʼu nuʼudar liman-rohan mak diʼak.” (Salmo [Mazmur] 16:5, 6) David kontente ho ninia “parte”, neʼe mak relasaun diʼak ho Jeová no iha oportunidade espesiál atu serbí Maromak. Hanesan ho David, dala ruma ita mós hasoru susar oioin, maibé ita mós simu bensaun espirituál barak! Entaun, mai ita kontente nafatin ho adorasaun neʼebé loos no sempre ‘hateke ho laran-haksolok’ ba Maromak Jeová nia templu espirituál.