1. Tanba Maromak kria ita tuir ninia ilas, ita iha kbiit atu halo saida deʼit?

 SE LABARIK ida hanesan ho ninia aman, baibain ema dehan: “Nia lori tomak ninia aman.” Tuir loloos, labarik hotu lori inan-aman nia hahalok ruma. Jeová, ita-nia Aman iha lalehan, mak fó moris ba buat hotu. (Salmo [Mazmur] 36:9) Nuʼudar ninia oan sira iha rai, ita mós hanesan ho nia iha dalan oioin. Maromak kria ita tuir ninia “ilas”, tan neʼe ita iha kbiit atu hanoin rasik, atu foti desizaun no atu haburas relasaun ho ema seluk nuʼudar ita-nia belun.—Gênesis (Kejadian) 1:26.

2. Tanbasá mak Jeová bele sai ita-nia Belun diʼak liu hotu?

² Jeová bele sai ita-nia Belun diʼak liu hotu. Ita bele iha relasaun hanesan neʼe ho nia tanba Maromak hatudu domin ba ita no mós tanba ita tau fiar ba nia no ninia Oan. Jesus hatete: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (João 3:16) Agora, mai ita aprende kona-ba ema naʼin-rua neʼebé iha relasaun besik ho Jeová.

3, 4. Tanbasá mak Jeová nia relasaun ho Abraão besik liu fali ninia relasaun ho nasaun Izraél?

³ Jeová bolu nasaun Izraél nia beiʼala Abraão nuʼudar “haʼu-nia belun”. (Isaías [Yesaya] 41:8) Iha 2 Crônicas (Tawarikh) 20:7 mós dehan katak Abraão mak Maromak nia belun. Oinsá mak  Abraão bele iha relasaun besik ho ninia Kriadór? Neʼe tanba Abraão nia fiar neʼebé metin.—Gênesis (Kejadian) 15:6; lee Tiago 2:21-23.

⁴ Jeová mós sai Aman no Belun ba Abraão nia bei-oan sira, neʼebé sai nasaun Izraél. Maibé triste tebes katak ikusmai sira lakon sira-nia relasaun ho Maromak. Tanbasá? Tanba sira lakon sira-nia fiar ba Jeová nia promesa sira.

5, 6. (a) Hodi halo saida deʼit mak Ita sai Jeová nia belun? (b)  Pergunta saida deʼit mak Ita presiza husu ba ita-nia an?

⁵ Nuʼudar Ita aprende kona-ba Jeová, Ita-nia fiar sai metin liután no ida-neʼe haburas Ita-nia domin ba nia. Hanoin fali kona-ba tempu neʼebé Ita foin komesa fiar katak Maromak iha duni no Ita bele sai ninia belun. Ita mós aprende katak ita moris mai nuʼudar ema sala-naʼin tanba Adão la halo tuir Maromak. Ita komprende katak ema hotu iha mundu dook husi Maromak. (Koloso 1:21) Maibé depois neʼe, Ita haree katak tuir loloos, ita-nia Aman iha lalehan hakarak hakbesik ba Ita no nia interese ba Ita. Kuandu Ita aprende kona-ba oinsá Jeová fó ninia Oan nuʼudar sakrifísiu no Ita tau fiar ba ida-neʼe, Ita komesa atu iha relasaun diʼak ho Maromak.

⁶ Kuandu ita hanoin fali kona-ba oinsá ita komesa atu koñese Jeová, diʼak atu husu ba ita-nia an: ‘Haʼu-nia relasaun ho Maromak sai metin ba beibeik ka lae? Haʼu-nia fiar ba Jeová metin no haʼu-nia domin ba nia sai buras liu loroloron ka lae?’ Maromak nia belun seluk neʼebé diʼak mak mane ida naran Jideaun. Mai ita aprende kona-ba nia hodi ita bele halo tuir ninia ezemplu.

7-9. (a) Saida mak akontese kuandu anju mosu ba Jideaun, no hafoin neʼe nia sente oinsá? (Haree dezeñu iha pájina 21.) (b) Oinsá mak ita bele sai Maromak nia Belun?

⁷ Juis Jideaun serbí Jeová durante tempu susar kuandu ema Izraél foin tama iha rai neʼebé Maromak promete. Iha tempu neʼebá, ema Midian tama beibeik iha ema Izraél nia rai atu ataka sira. Tan neʼe, Jideaun baku trigu laʼós iha toʼos, maibé iha fatin sama uvas nian, hodi nuneʼe, bainhira haree ema Midian, nia bele subar lalais ninia trigu. Juízes (Hakim-Hakim) kapítulu 6 hatete katak Jeová nia anju mosu ba Jideaun iha sidade Ofra. Jideaun hakfodak hodi haree anju neʼe mosu no bolu Jideaun nuʼudar “asu-waʼin neʼebé forte”. Maski Jeová salva ona ema Izraél husi rai-Ejitu, maibé Jideaun duvida katak Jeová sei ajuda sira iha tempu neʼe. Nuʼudar Jeová nia lia-naʼin, anju neʼe fó fiar ba Jideaun katak Maromak sei ajuda nia.

⁸ Jideaun la hatene oinsá nia bele “salva Izraél husi ema Midian nia liman”. Jeová fó ba nia resposta neʼebé klaru hodi dehan: “Tanba haʼu sei hamutuk ho ó, ó sei halakon ema Midian hanesan sira ema ida deʼit.” (Juízes [Hakim-Hakim] 6:11-16) Tanba Jideaun sei duvida hela kona-ba neʼe, nia husu atu Maromak bele fó sinál ruma. Kuandu ita lee istória neʼe, ita hatene katak Jideaun haree Jeová nuʼudar Maromak neʼebé tebes duni ba nia.

⁹ Buat neʼebé akontese tuirmai hametin Jideaun nia fiar no halo nia hakbesik liután ba Maromak. Jideaun prepara hahán ruma no fó ba anju neʼe. Depois, anju neʼe kona hahán ho ninia ai-tonka no derrepente deʼit ahi han hotu hahán neʼe. Ho ida-neʼe, Jideaun hatene katak loloos Maromak mak haruka anju neʼe, no Jideaun sai taʼuk. Jideaun hatete: “Aiá, Naʼi Jeová, Ukun-Naʼin Boot Liu Hotu, haʼu foin hateke ba Jeová nia anju nia oin!” (Juízes [Hakim-Hakim] 6:17-22) Buat neʼebé anju halo neʼe, halo Jideaun sente katak nia la bele habelun ho Jeová ka lae? Lae duni! Liuhusi esperiénsia neʼe, Jideaun sente dame ho Maromak. Ita hatene ida-neʼe tanba altár neʼebé Jideaun harii iha  fatin neʼe, nia bolu nuʼudar “Jeová-Salom”, neʼebé iha arti katak “Jeová mak Dame”. (Lee Juízes [Hakim-Hakim] 6:23, 24. a) Se ita hanoin kleʼan kona-ba buat neʼebé Jeová halo ba ita loroloron, ita hatene katak Jeová mak Belun ida neʼebé loos. Se ita koʼalia ba Jeová beibeik liuhusi orasaun, ita sei sente dame liután no ita-nia relasaun ho nia sai metin liu.

10. Tuir Salmo (Mazmur) 15:3, 5, ema neʼebé hakarak sai Maromak nia belun presiza halo saida?

¹⁰ Atu sai Jeová nia belun, ita presiza kumpre buat ruma. Iha Salmo (Mazmur) 15, David kanta kona-ba saida mak ita presiza halo hodi bele sai bainaka iha Jeová nia tenda, ka sai ninia belun. (Salmo [Mazmur] 15:1) Agora ita sei koʼalia kona-ba pontu rua, ida mak sees husi koʼalia bosok kona-ba ema seluk, no mós hatudu laran-moos nafatin. Kona-ba ema neʼebé Jeová simu nuʼudar ninia belun, David hatete: “Nia la koʼalia lia-bosok ho ninia nanál. . . . Nia la simu rikusoin neʼebé ema fó hodi kontra ema neʼebé la halo sala.”—Salmo (Mazmur) 15:3, 5.

11. Tanbasá mak ita tenke sees husi koʼalia bosok kona-ba ema seluk?

¹¹ Iha salmu seluk, David fó avizu neʼe: “Kuidadu ó-nia nanál husi buat neʼebé aat.” (Salmo [Mazmur] 34:13) Se ita la halo tuir matadalan neʼe, ita bele estraga ita-nia relasaun ho ita-nia Aman iha lalehan. Tuir loloos, koʼalia bosok mak hahalok neʼebé baibain Maromak nia inimigu boot Satanás mak hatudu. Liafuan “Diabu” mai husi lia-gregu neʼebé iha arti katak “bosok-teen”. Tan neʼe, ita tenke kuidadu kona-ba buat neʼebé ita hatete ba ema seluk no saida mak ita hatete kona-ba sira, hodi ita bele besik nafatin ba Jeová. Liuliu, ita tenke kuidadu kona-ba oinsá ita haree irmaun sira neʼebé tau matan ba kongregasaun.—Lee Ebreu 13:17; Judas 8.

12, 13. (a) Tanbasá mak ita tenke hatudu laran-moos iha buat hotu? (b) Se ita hatudu laran-moos, saida mak rezultadu?

¹² Ema koñese Testemuña ba Jeová nuʼudar ema neʼebé hatudu laran-moos. Apóstolu Paulo hakerek: “Ami hatene loloos katak ami rasik nia laran moos, no ami hakarak duni atu moris ho laran-moos iha buat hotu neʼebé ami halo.” (Ebreu 13:18) Tanba ita “hakarak duni atu moris ho laran-moos iha buat hotu”, ita sei la aproveita ita-nia maluk kristaun sira. Porezemplu, se ita fó serbisu ba sira, ita sei selu tuir buat neʼebé ita promete. Nuʼudar ema kristaun, ita hatudu laran-moos ba ema neʼebé serbisu ba ita, no mós ba ema seluk. No se ita mak serbisu ba ita-nia maluk kristaun ida, ita mós lakohi aproveita ida-neʼe hodi sente katak ita merese simu kolen neʼebé boot liu fali serbisu-naʼin seluk.

¹³ Dala barak, ema iha mundu gaba Testemuña ba Jeová tanba hatudu laran-moos. Porezemplu, diretór ba kompañia boot ida haree katak Testemuña sira sempre kumpre buat neʼebé sira promete. Nia hatete: “Imi sempre laran-metin ba buat neʼebé imi promete.” (Salmo [Mazmur] 15:4) Kuandu ita hatudu laran-moos hanesan neʼe, neʼe ajuda ita atu iha nafatin relasaun diʼak ho Jeová no fó glória ba nia.

14, 15. Kuandu ita bá haklaken, oinsá mak ita bele ajuda ema seluk atu sai Jeová nia belun?

¹⁴ Kuandu ita bá haklaken, ema barak neʼebé ita hasoru fiar katak Maromak iha, maibé sira la haree Maromak nuʼudar  sira-nia Belun neʼebé diʼak liu hotu. Oinsá mak ita bele ajuda sira? Hanoin toʼok kona-ba buat neʼebé Jesus hatete ba ninia dixípulu naʼin-70 kuandu nia haruka sira atu bá haklaken. Nia hatete: “Imi tama karik iha uma ida, uluknanain dehan: ‘Dame ba uma neʼe!’ Iha karik ema dame-naʼin ida iha neʼebá, imi-nia dame sei horik ho nia; lae karik, sei fila fali ba imi.” (Lucas 10:5, 6) Karik ema sei hakarak hatene liután kona-ba lia-loos se ita hatudu laran-diʼak ba sira. Se ita hatudu hahalok diʼak ba ema neʼebé hirus no kontra ita, karik ida-neʼe sei ajuda hamenus sira-nia hirus, no book sira atu rona ba ita iha tempu seluk.

¹⁵ Kuandu ita hasoru ema neʼebé kaer metin ba relijiaun falsu nia hanorin, ita hatudu laran-diʼak no dame nafatin. Ita fó benvindu ba ema hotu neʼebé tuir ita-nia reuniaun sira, liuliu ema neʼebé sai laran-tun tanba mundu aat neʼe no hakarak aprende tan kona-ba Maromak neʼebé ita adora. Ita bele hetan esperiénsia sira kona-ba neʼe iha informasaun iha Livru Haklaken ho títulu “Bíblia troka ema nia moris”.

16. Oinsá mak ita bele sai Maromak nia belun no mós ninia “maluk serbisu-naʼin”?

¹⁶ Baibain, ema neʼebé serbisu hamutuk sai belun neʼebé diʼak. Ema hotu neʼebé dedika ona sira-nia an ba Maromak Jeová, sira laʼós deʼit sai ninia belun, maibé mós sai ninia “maluk serbisu-naʼin”. (Lee 1 Korinto 3:9, MF. b) Kuandu ita haklaken no halo dixípulu, ita aprende liután kona-ba ita-nia Aman nia hahalok sira neʼebé furak. Ita mós bele haree oinsá ninia espíritu santu ajuda ita atu haklaken liafuan diʼak.

17. Oinsá mak ita-nia reuniaun boot sira hatudu katak Jeová mak ita-nia Belun?

¹⁷ Kuandu ita uza tempu barak iha serbisu haklaken, ita sente besik liu ba Jeová. No ita mós haree oinsá Jeová hanetik ema neʼebé hakarak hapara ita-nia serbisu. Klaru katak Jeová mak dirije ita, no ita hakfodak hodi haree oinsá nia nafatin hanorin ita liuhusi reuniaun sira no ita-nia livru sira kona-ba Bíblia. Kuandu ita tuir reuniaun boot sira, ita haree katak Jeová komprende ita-nia problema sira no buat neʼebé ita presiza. Família ida koʼalia kona-ba sira-nia sentimentu depois tuir reuniaun boot ida, sira hatete: “Programa neʼe book duni ami-nia laran. Ami sente katak Jeová hadomi ita ida-idak no nia hakarak tebes ita atu hetan susesu.” Kaben-naʼin ida husi rai-Alemaña tuir reuniaun boot espesiál iha rai-Irlanda no sira agradese tebes tanba sira-nia maluk sira hatudu laran-luak no tau matan ba sira. Sira mós hatete: “Ami agradese tebes ba Jeová no Jesus Kristu. Sira mak konvida  ita hotu atu sai povu ida deʼit. Ita la temi deʼit kona-ba unidade maibé ita moris tuir ida-neʼe. Kuandu ami hanoin fali kona-ba ami-nia esperiénsia iha reuniaun boot espesiál neʼe iha sidade Dublín, ami sei hanoin nafatin katak ami iha knaar espesiál tebes hodi serbí Maromak hamutuk ho imi hotu.”

18. Pergunta saida mak ita tenke husu ba ita-nia an kona-ba koʼalia ho Jeová?

¹⁸ Belun sira bele sai besik liu kuandu sira koʼalia beibeik ba malu. Ohin loron, ema barak uza internét atu koʼalia ba malu ho kolega no haruka sms ba malu. Maibé oinsá ho tempu neʼebé ita uza hodi koʼalia ba ita-nia Belun neʼebé diʼak liu hotu, Jeová? Nia mak Ida neʼebé “rona orasaun”. (Salmo [Mazmur] 65:2) Ita uza tempu beibeik atu koʼalia ho nia ka lae?

19. Se ita sente susar atu fó sai ita-nia sentimentu ba Jeová iha orasaun, saida mak bele ajuda ita?

¹⁹ Susar ba ema balu atu koʼalia sai sira-nia sentimentu. Maibé Jeová hakarak ita atu halo nuneʼe kuandu ita halo orasaun. (Salmo [Mazmur] 119:145; Lamentações [Ratapan] 3:41) Se ita sente susar atu hili liafuan hodi fó sai ita-nia sentimentu, ita bele hetan ajuda. Kona-ba neʼe, apóstolu Paulo hakerek ba ema kristaun sira iha Roma, hodi hatete: “Ita la hatene harohan loloos, maibé espíritu rasik harohan hodi tanis hakilar makaʼas hanesan liafuan la bele hatoʼo. No Ida neʼebé hatene momoos ema nia fuan hatene buat neʼebé iha espíritu nia laran, basá espíritu harohan ba ema santu sira tuir Maromak nia hakarak.” (Roma 8:26, 27) Kuandu ita lee livru sira iha Bíblia hanesan Jó, Salmos, no Provérbios, ida-neʼe bele ajuda ita hatene oinsá atu fó sai ita-nia sentimentu ba Jeová.

20, 21. Hodi lee Paulo nia liafuan iha Filipe 4:6, 7, ita bele hetan kmaan saida?

²⁰ Kuandu ita hasoru susar, diʼak atu la haluha kona-ba Paulo nia liafuan ba ema kristaun iha Filipe. Nia hatete: “Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Filipe 4:6, 7, MF) Mai ita hafolin nafatin Maromak nia dame neʼebé proteje ita-nia laran no neon.

²¹ Orasaun bele ajuda ita atu haburas nafatin ita-nia relasaun ho Jeová. Tan neʼe, mai ita “hamulak beibeik”. (1 Tesalónika 5:17) Ita presiza hakaʼas an atu hametin ita-nia relasaun ho Maromak no halo tuir ninia ukun-fuan sira. No mai ita hanoin kleʼan kona-ba bensaun sira neʼebé ita simu tanba Jeová mak ita-nia Aman, Maromak no Belun.