1, 2. (a) Kuandu Moisés tinan 40, desizaun saida mak nia halo? (Haree dezeñu iha leten.) (b) Tanbasá mak Moisés hili atu hetan terus hamutuk ho ema Izraél?

 MOISÉS hatene kona-ba saida mak nia bele simu iha futuru iha rai-Ejitu. Nia haree ona ema riku nia uma neʼebé kapás no boot. Nuʼudar oan-hakiak ba liurai nia família, nia “simu hanorin kona-ba Ejitu nia matenek hotu”, karik neʼe inklui kona-ba fitun no planeta sira, matemátika, no siénsia seluk tan. (Apóstolu 7:22) Fasil liu ba Moisés atu hetan osan, kbiit, no knaar neʼebé ema Ejitu baibain la bele hetan.

² Maski Moisés bele hetan buat sira-neʼe hotu, maibé kuandu nia tinan 40, nia halo desizaun neʼebé karik halo Liurai ho ninia família sai bilán. Nia hili atu husik futuru diʼak iha rai-Ejitu. Neʼe katak nia hakarak atu sai hanesan ema Ejitu baibain deʼit ka lae? Lae, nia mós lakohi ida-neʼe! Tuir loloos, Moisés hili atu hetan terus hamutuk ho ema Ejitu nia atan sira. Tanbasá? Tanba fiar. (Lee Ebreu 11:24-26.) Sin, Moisés nia fiar ajuda nia atu moris hanesan ema neʼebé bele haree “Ida neʼebé matan la haree”, no fiar katak Maromak Jeová sei kumpre Ninia promesa sira.—Ebreu 11:27.

3. Pergunta saida deʼit mak ita sei haree hamutuk iha lisaun neʼe?

³ Hanesan Moisés, ita presiza iha fiar hodi la haree deʼit ba buat neʼebé ita-nia matan haree. Ita tenke sai nuʼudar “ema neʼebé iha fiar”. (Ebreu 10:38, 39) Entaun, atu hametin ita-nia fiar, mai ita  lee Ebreu 11:24-26 kona-ba Moisés. Kuandu ita halo ida-neʼe, koko atu husu pergunta sira tuirmai neʼe ba ita-nia an: Oinsá mak fiar ajuda Moisés atu la simu hakarak isin nian? Kuandu ema kontra nia, oinsá mak fiar ajuda nia atu hafolin ninia serbisu ba Jeová? No tansá mak Moisés “hateke loloos ba kolen neʼebé nia atu simu”?

4. Moisés hatene saida kona-ba ‘ksolok iha sala laran’?

⁴ Tanba Moisés iha fiar, nia hatene katak ‘ksolok iha sala laran’ mak buat neʼebé hela ba tempu uitoan deʼit. Maibé ema seluk la hanoin hanesan Moisés. Tanbasá? Tanba sira haree Ejitu nuʼudar nasaun neʼebé ema adora estátua no iha matan-dook nia atividade barak, maibé nasaun neʼe sei iha kbiit boot, no iha neʼebá Jeová nia povu hetan terus nuʼudar atan. Maski nuneʼe, Moisés hatene katak Maromak bele troka situasaun neʼe. Karik ema neʼebé buka deʼit sira-nia hakarak rasik haree hanesan hetan susesu, maibé Moisés iha fiar katak ema aat sei lakon. Tan neʼe, nia la monu ba tentasaun atu buka “ksolok ba tempu uitoan iha sala laran”.

5. Saida mak sei ajuda ita atu la monu ba “ksolok ba tempu uitoan iha sala laran”?

⁵ Saida deʼit mak bele ajuda ita hodi la monu ba “ksolok ba tempu uitoan iha sala laran”? Keta haluha katak ksolok neʼebé ita hetan kuandu halo sala mak liu lalais deʼit. Ita-nia fiar bele ajuda ita atu haree katak “mundu neʼe no ninia hakarak liu daudaun”. (1 João 2:15-17) Hanoin kleʼan kona-ba ema aat sira-nia futuru. Sira sai hanesan ema neʼebé hamriik iha “rai neʼebé namdoras . . . nuʼudar sira toʼo ba rohan neʼebé aat tebes”! (Salmo [Mazmur] 73:18, 19) Kuandu ita hetan tentasaun atu halo sala, husu ba ita-nia an: ‘Ha’u hakarak haʼu-nia futuru atu sai oinsá?’

6. (a) Tanbasá mak Moisés lakohi “atu ema bolu nia nuʼudar oan husi Liurai Ejitu nia oan-feto”? (b) Tuir ita-nia hanoin, tanbasá mak Moisés halo desizaun neʼebé loos?

⁶ Moisés nia fiar mós ajuda nia kuandu nia halo desizaun iha ninia moris. Bíblia dehan: “Liuhusi fiar mak Moisés la simu atu ema bolu nia nuʼudar oan husi Liurai Ejitu nia oan-feto.” (Ebreu 11:24) Moisés la hanoin atu hetan pozisaun diʼak iha liurai nia palásiu no tuirmai mak bele serbí Maromak hodi uza rikusoin no kbiit atu ajuda maluk Izraél sira. Moisés hakarak hadomi Jeová ho ninia laran, moris, no kbiit tomak. (Deuteronômio [Ulangan] 6:5) Moisés nia desizaun neʼe proteje nia husi susar barak. Tuir loloos, Ejitu nia rikusoin neʼebé Moisés husik tiha, ikusmai ema Izraél mak foti. (Êxodo [Keluaran] 12:35, 36) Liurai Ejitu nian mós hetan moe no mate mout iha tasi laran. (Salmo [Mazmur] 136:15) Maibé oinsá ho Moisés? Maromak uza nia atu dirije nasaun Izraél tomak hodi bá fatin neʼebé seguru. Sin, Moisés hetan duni susesu iha ninia moris.

7. (a) Tuir Mateus 6:19-21, tanbasá mak ita presiza halo planu ba futuru neʼebé rohan-laek? (b) Konta toʼok esperiénsia neʼebé hatudu katak planu iha mundu la hanesan ho planu ba ita-nia moris rohan-laek?

⁷ Se ita mak Jeová nia atan neʼebé sei joven, oinsá mak fiar bele ajuda ita atu halo desizaun kona-ba ita-nia moris? Diʼak atu halo planu kona-ba futuru. Fiar ba Maromak nia promete no halo planu ba ita-nia moris neʼebé rohan-laek, laʼós ba moris neʼebé liu lalais deʼit. (Lee Mateus 6:19-21.) Ezemplu ida mak irmán ida naran Sofia neʼebé matenek tebes dansa ballet. Kompañia dansa nian barak iha rai-Estadus Unidus hakarak atu fó bolsa-estudu ba nia, no baibain ema barak gosta oportunidade hanesan neʼe. Nia dehan: “Haʼu gosta kuandu ema gaba haʼu.” Nia mós sente katak nia dansa diʼak liu fali ema seluk. Maibé nia la kontente. Loron ida, Sofia haree ita-nia vídeo Kaum Muda Bertanya—Apa yang Akan Kukejar dalam Hidupku? Nia dehan: “Haʼu haree katak mundu fó susesu ba haʼu no ema barak gosta haʼu, maibé ida-neʼe halo haʼu la bele serbí Jeová ho laran tomak.” Entaun, nia halo orasaun ba Jeová husi laran no tuirmai nia deside atu husik ninia oportunidade atu sai naran-boot hodi dansa. Agora nia sente oinsá? Nia dehan: “Haʼu la hanoin ba haʼu-nia moris uluk nian. Haʼu kontente tebetebes. Haʼu foti  pioneiru hamutuk ho haʼu-nia laʼen. Maski ami la iha naran-boot no la riku, maibé ami iha Jeová, estudante Bíblia, no planu espirituál nian. Haʼu la triste ida kona-ba haʼu-nia desizaun.”

8. Bíblia nia konsellu saida mak bele ajuda joven sira atu halo desizaun kona-ba oinsá uza sira-nia moris?

⁸ Maromak Jeová hatene saida mak diʼak liu ba ita. Moisés dehan: “Saida mak Jeová ó-nia Maromak husu ba ó? Nia husu buat ida deʼit, neʼe mak: atu taʼuk ba Jeová ó-nia Maromak, atu laʼo iha nia dalan sira, atu hadomi nia, atu serbí Jeová ó-nia Maromak ho ó-nia laran tomak no moris tomak, no atu halo tuir Jeová nia mandamentu no lei sira neʼebé haʼu fó ba ó ohin, no ida-neʼe ba ó rasik nia diʼak.” (Deuteronômio [Ulangan] 10:12, 13) Kuandu ita sei joven hela, hili serbisu neʼebé ajuda ita atu serbí no hadomi Jeová ho ita-nia “laran tomak no moris tomak”. No ita bele fiar katak desizaun neʼe ba ‘ita rasik nia diʼak’.

9. Esplika toʼok tanbasá Moisés nia knaar mak susar.

⁹ Moisés “haree katak moe neʼebé nia hetan nuʼudar Kristu iha folin boot liu fali rikusoin Ejitu nian”. (Ebreu 11:26) Eskritura neʼe bolu Moisés nuʼudar “Kristu” ka “Ida neʼebé Maromak hili”. Neʼe katak Jeová mak hili nia atu lori ema Izraél sai husi Ejitu. Moisés hatene katak ninia knaar mak susar. Nia sei hasoru ema neʼebé ‘hamoe nia’, ka kontra nia. Uluk, ema Izraél ida hamoe ona Moisés hodi dehan: “Sé mak foti ó nuʼudar naʼi-ulun no juis ba ami?” (Êxodo [Keluaran] 2:13, 14) No tinan barak liu tiha, Moisés rasik mós husu ba Jeová: “Oinsá ho liurai Ejitu nian, nia sei rona ba haʼu ka lae?” (Êxodo [Keluaran] 6:12) Hodi bele sai prontu atu tahan hasoru ema neʼebé kontra, Moisés halo orasaun ba Jeová kona-ba buat neʼebé halo nia taʼuk no estrese. Oinsá mak Jeová ajuda Moisés atu kumpre ninia knaar neʼebé susar?

10. Oinsá mak Jeová ajuda Moisés atu halaʼo ninia knaar?

¹⁰ Primeiru, Jeová hametin Moisés hodi dehan: “Haʼu sei hamutuk ho ó.” (Êxodo [Keluaran] 3:12) Segundu, Jeová fó ba nia esperansa no aten-brani hodi esplika arti husi Ninia naran, neʼe mak: “Haʼu sei sai saida deʼit neʼebé haʼu hakarak.” a (Haree nota iha kraik.) (Êxodo [Keluaran] 3:14) Terseiru, nia fó kbiit ba Moisés atu halo milagre, no ida-neʼe fó prova katak Maromak mak haruka nia. (Êxodo [Keluaran] 4:2-5) No haat, Jeová hili Aarão atu koʼalia hodi reprezenta Moisés no ajuda nia atu halaʼo ninia knaar. (Êxodo [Keluaran] 4:14-16) Tanba Moisés fiar metin duni katak Maromak ajuda Ninia atan sira atu kumpre knaar saida deʼit neʼebé Nia fó ba sira, kuandu Moisés besik atu mate, nia dehan ba Josué: “Jeová mak ida neʼebé laʼo iha ó-nia oin, no nia sei kontinua hamutuk ho ó. Nia sei la husik ó ka hadook an husi ó. Keta taʼuk no nakdedar.”—Deuteronômio (Ulangan) 31:8.

11. Tanbasá mak Moisés hafolin tebes ninia knaar?

¹¹ Ho Jeová nia ajuda, Moisés hafolin tebes ninia knaar neʼebé susar, no nia haree ida-neʼe nuʼudar buat neʼebé “folin boot liu fali rikusoin Ejitu nian”. Sin, hodi sai ulun-naʼin iha Ejitu la iha folin ida se kompara ho serbisu ba Maromak Jeová neʼebé aas liu hotu. Moisés hetan bensaun tanba nia halaʼo ninia knaar ho laran. Moisés iha relasaun neʼebé besik liu ho Jeová, no mós Jeová fó “kbiit waʼin” ba Moisés atu dirije povu Izraél ba rai neʼebé Nia promete.—Deuteronômio (Ulangan) 34:10-12.

12. Jeová fó ba ita knaar saida deʼit?

¹² Ita mós iha knaar ida. Jeová fó ita knaar atu haklaken, hanesan mós nia fó ba apóstolu Paulo no ema seluk. (Lee 1 Timóteo 1:12-14.) Ita hotu iha knaar espesiál neʼe. (Mateus 24:14; 28:19, 20) Ita balu serbí Maromak tempu-tomak. Irmaun sira neʼebé laʼo ba oin iha lia-loos serbí nuʼudar atan ba kongregasaun ka katuas  kristaun. Maibé, ita-nia família ka ema seluk neʼebé fiar la hanesan karik dehan katak ita-nia knaar la iha folin. Dala ruma sira koʼalia aat kona-ba buat neʼebé ita halo ba Jeová. (Mateus 10:34-37) Se sira halo ita laran-tun, karik ita komesa hanoin katak ita-nia sakrifísiu mak la iha folin, ka ita la bele ona kumpre ita-nia knaar. Se ida-neʼe akontese ba ita, oinsá mak fiar bele ajuda ita atu tahan?

13. Oinsá mak Jeová ajuda ita atu kumpre knaar neʼebé nia fó ba ita?

¹³ Husu ajuda ba Jeová ho fiar metin. Fó-hatene nia kona-ba buat neʼebé halo ita taʼuk no estrese. Tuir loloos, Jeová rasik mak fó ita knaar neʼe, no nia sei ajuda ita atu hetan susesu. Oinsá? Nia ajuda ita iha dalan neʼebé nia ajuda Moisés. Primeiru, Jeová promete hodi dehan: “Haʼu sei hametin ó, sin, haʼu sei ajuda ó. Haʼu sei kaer metin ó ho haʼu-nia liman-loos justisa nian.” (Isaías [Yesaya] 41:10) Segundu, nia fó-hanoin ita katak ita bele tau fiar ba ninia promesa sira hodi dehan: “Haʼu rasik koʼalia ona, haʼu sei halo ida-neʼe. Haʼu-nia hakarak mak nuneʼe, haʼu sei halo nuneʼe duni.” (Isaías [Yesaya] 46:11) Terseiru, Jeová fó ba ita “kbiit neʼebé la hanesan baibain” atu bele halaʼo ita-nia knaar. (2 Korinto 4:7) No haat, atu ita bele kumpre ita-nia knaar, Aman Jeová sei ajuda ita liuhusi maluk kristaun sira iha mundu tomak neʼebé “kontinua fó aten-brani ba malu no hametin malu”. (1 Tesalónika 5:11) Kuandu Jeová ajuda ita atu kumpre ita-nia knaar, ita-nia fiar sei sai metin liután no ita sei hafolin ita-nia knaar sira liu fali buat neʼebé mundu bele fó ba ita.

14. Saida mak halo Moisés la duvida katak nia sei simu kolen?

¹⁴ Moisés “hateke loloos ba kolen neʼebé nia atu simu”. (Ebreu 11:26) Maski Moisés la hatene buat hotu neʼebé sei mosu iha futuru, maibé buat neʼebé nia hatene ona book nia atu halo desizaun sira iha ninia moris. Hanesan ninia beiʼala Abraão, Moisés mós fiar metin katak Jeová bele halo ema mate sira moris fali. (Lucas 20:37, 38; Ebreu 11:17-19) Nia fiar metin ba Maromak nia promesa no ida-neʼe ajuda nia atu la sente katak tinan 40 neʼebé nia halai husi rai-Ejitu no tinan 40 tan neʼebé nia laʼo iha rai-maran mak buat neʼebé saugati deʼit. No maski Moisés la hatene ho loloos oinsá mak Jeová sei kumpre Ninia promesa hotu, maibé nia fiar metin ba Jeová hanesan nia haree ona kolen neʼebé nia sei simu iha futuru.

15, 16. (a) Tanbasá mak ita presiza hanoin kona-ba kolen neʼebé ita sei simu? (b) Bensaun saida deʼit mak ita rasik hein namanas atu simu iha Maromak nia Ukun okos?

 ¹⁵ Ita “hateke loloos ba kolen” neʼebé ita sei simu ka lae? Hanesan Moisés, ita mós la hatene buat barak kona-ba oinsá mak Maromak sei kumpre ninia promesa sira. Porezemplu, ita la hatene kona-ba “tempu neʼebé Maromak hili tiha ona” atu terus boot hahú. (Marcos 13:32, 33) Maski nuneʼe, ita hatene barak liu fali buat neʼebé uluk Moisés hatene kona-ba paraízu iha futuru. Jeová promete ona buat barak kona-ba moris iha Maromak nia Ukun nia okos hodi ita bele hateke “loloos” ba mundu foun no imajina kona-ba ita-nia moris iha neʼebá. Se ita halo nuneʼe, ita sei hakarak duni atu buka uluk Maromak nia Ukun. Tanbasá? Hanoin toʼok: Se ita buka rai atu sosa maibé ita seidauk hatene didiʼak rai neʼe, ita hakarak sosa ka lae? Lae duni! Hanesan neʼe mós, se ita-nia esperansa kona-ba mundu foun mak ladún klaru ba ita, ita sei la uza ita-nia moris atu buka uluk Maromak nia Ukun. Sin, ita-nia fiar sei ajuda ita atu haree ho momoos ita-nia moris iha mundu foun.

¹⁶ Hodi hametin ita-nia esperansa ba futuru, hateke “loloos” ka imajina toʼok kona-ba ita-nia moris iha mundu foun. Porezemplu, kuandu ita estuda kona-ba ema ruma iha Bíblia laran neʼebé moris antes Jesus, hanoin kona-ba saida mak ita bele husu ba sira kuandu sira moris hiʼas. Hanoin mós saida mak karik sira sei husu ba ita kona-ba ita-nia moris iha loron ikus sira. Hanoin toʼok kona-ba ksolok neʼebé ita hetan hodi hasoru ita-nia beiʼala sira husi tempu antigu no hanorin sira kona-ba buat hotu neʼebé Maromak halo ona ba sira. Hanoin mós ksolok neʼebé ita hetan nuʼudar ita aprende kona-ba animál fuik sira hodi haree sira iha rai neʼebé hakmatek ona. Hanoin kleʼan kona-ba oinsá ita-nia relasaun sai besik liután ba Jeová nuʼudar ita neineik-neineik sai ema perfeitu.

17. Oinsá mak hodi komprende ho didiʼak kona-ba ita-nia kolen bele ajuda ita ohin loron?

¹⁷ Kuandu ita komprende ho didiʼak kona-ba kolen neʼebé ita sei simu iha futuru, ida-neʼe sei ajuda ita atu tahan, atu iha ksolok, no atu halo desizaun neʼebé diʼak. Paulo hakerek ba ema kristaun kose-mina sira hodi dehan: “Se ita tau esperansa ba buat neʼebé ita la haree, ita hein namanas ba ida-neʼe ho pasiénsia.” (Roma 8:25) Eskritura neʼe mós ba ema kristaun hotu neʼebé iha esperansa atu moris ba nafatin. Maski ita seidauk simu ida-neʼe, ita-nia fiar metin sei ajuda ita atu kontinua hein ho pasiénsia ba tempu neʼebé ita sei simu ita-nia kolen. Hanesan Moisés, ita la sente katak tinan sira neʼebé ita uza atu serbí Jeová mak saugati deʼit. Ita fiar duni katak “buat neʼebé matan bele haree mak ba tempu uitoan deʼit, maibé buat neʼebé matan la bele haree mak ba nafatin”.—Lee 2 Korinto 4:16-18.

18, 19. (a) Tanbasá mak ita presiza luta atu hametin ita-nia fiar? (b) Saida mak ita sei koʼalia iha lisaun tuirmai?

¹⁸ Ita-nia fiar ajuda ita atu “la duvida katak buat neʼebé ita fiar mak loos, maski neʼe la bele haree”. (Ebreu 11:1) Ema neʼebé hanoin deʼit buat isin nian la iha fiar, entaun sira la komprende katak serbí Jeová mak iha folin duni. Ba ema sira hanesan neʼe, serbisu ba Jeová mak hanesan “buat neʼebé beik”. (1 Korinto 2:14) Maibé, ita iha esperansa atu moris ba nafatin no haree ema moris hiʼas. Hanesan ema balu iha tempu uluk neʼebé bolu apóstolu Paulo nuʼudar “manu-loriku”, ohin loron mós ema barak hanoin katak esperansa neʼebé ita fó sai mak buat beik.—Apóstolu 17:18.

¹⁹ Tanba ita moris iha mundu neʼebé la iha fiar, ita tenke luta makaʼas atu halo ita-nia fiar sai metin liután. Husu ba Jeová atu ita-nia “fiar labele sai fraku”. (Lucas 22:32) Hanesan Moisés, keta haluha katak hahalok sala sei lori rezultadu aat. Hafolin ita-nia serbisu ba Jeová no esperansa atu moris ba nafatin. Maibé, sei iha tan buat balu neʼebé ita bele aprende husi Moisés ka lae? Iha duni. Iha lisaun tuirmai, ita sei koʼalia kona-ba oinsá mak fiar ajuda Moisés atu “haree Ida neʼebé matan la haree”.—Ebreu 11:27.