1, 2. Tanbasá mak susar ba ema neʼebé serbisu iha rai seluk atu fila fali ba ninia rai? (Haree foto iha leten.)

 “EDUARDO iha serbisu diʼak iha rai seluk neʼebé dook husi ninia feen no oan sira, no nia manán osan barak. a (Haree nota iha kraik.) Maibé, kuandu nia aprende lia-loos, nia haree katak ninia responsabilidade ba ninia família mak laʼós deʼit atu fó osan, maibé mós atu ajuda sira serbí Jeová. Tan neʼe, nia fila fali ba ninia rai.—Éfeso 6:4.

² Eduardo hatene katak Maromak Jeová hakarak nia atu fila fali ba ninia feen no oan sira, maibé ida-neʼe laʼós buat neʼebé fasil. Nia presiza hadiʼa fali ninia relasaun ho nia feen no oan sira, no nia mós tenke tau matan ba sira iha rai neʼebé susar atu hetan serbisu. Oinsá mak nia bele halo nuneʼe? Nuʼudar kongregasaun, ita bele halo saida hodi ajuda ema hanesan neʼe?

3. Se inan ka aman hela dook, oinsá mak ida-neʼe kona sira-nia oan?

³ Eduardo dehan: “Haʼu husik hela haʼu-nia oan sira iha tempu neʼebé sira presiza liu haʼu-nia matadalan no domin. Haʼu la hamutuk ho sira hodi lee istória Bíblia, halo orasaun, hakoʼak, no halimar ho sira.” (Deuteronômio [Ulangan] 6:7) Ninia oan-feto  boot, Anna, hanoin-hetan: “Haʼu la sente seguru tanba apá la iha. Bainhira nia fila fali, ami hatene nia oin no lian deʼit. Kuandu nia hakoʼak haʼu, haʼu sente la toman.”

4. Tanbasá mak susar ba aman ida atu sai família nia ulun se nia hela dook husi família?

⁴ Kuandu aman ida hela dook husi ninia família, ida-neʼe halo susar ba nia atu halaʼo ninia knaar nuʼudar ulun. Eduardo nia feen, Ruby, dehan: “Haʼu tenke halaʼo knaar rua, ida nuʼudar inan no ida tan nuʼudar aman. Haʼu sai toman atu halo desizaun barak iha família laran. Tan neʼe, kuandu Eduardo fila fali, haʼu tenke aprende oinsá atu hakruʼuk an ba nia nuʼudar haʼu-nia ulun. Toʼo agora, dala ruma haʼu haluha katak haʼu-nia laʼen iha uma ona.” (Éfeso 5:22, 23) Eduardo dehan: “Kuandu haʼu-nia oan-feto sira hakarak halo buat ruma, sira toman atu husu lisensa ba sira-nia inan deʼit duké haʼu. Tan neʼe, ami naʼin-rua presiza iha hanoin ida deʼit hodi halo desizaun hamutuk, no haʼu mós presiza aprende oinsá atu halaʼo haʼu-nia knaar kristaun nian nuʼudar sira-nia ulun.”

5. Eduardo halo saida hodi hadiʼa ninia relasaun ho família? Ida-neʼe lori rezultadu saida?

⁵ Eduardo hakaʼas an duni atu hadiʼa ninia relasaun ho família no ajuda sira haburas relasaun ho Jeová. Nia hakarak hanorin ninia oan sira kona-ba lia-loos liuhusi liafuan no ezemplu, laʼós deʼit dehan katak nia hadomi Jeová maibé hatudu sai ida-neʼe. (1 João 3:18) Jeová haraik bensaun ba Eduardo nia hakaʼas-an ka lae? Ninia oan-feto Anna hatán: “Hodi haree ninia hakaʼas-an atu sai aman neʼebé diʼak no atu hakbesik ba ami, ida-neʼe book tebes ami. Kuandu ami haree ninia hakaʼas-an atu hetan knaar iha kongregasaun, ami sente kontente. Maski mundu neʼe dada ami atu sees husi Jeová, maibé tanba ami haree ami-nia inan-aman tau uluk lia-loos, ami mós hakaʼas an atu halo hanesan neʼe. Apá promete katak nia sei nunka husik ami tan, no nia kumpre duni. Se nia husik ami, karik agora haʼu la hamutuk ona ho Jeová nia organizasaun.”

6. Testemuña sira iha rai-Europa nia ezemplu hanorin saida?

⁶ Oan sira hakarak inan-aman hamutuk ho sira. Porezemplu, kuandu funu mosu iha fatin ida iha rai-Europa, inan-aman barak neʼebé Testemuña la bele bá serbisu. Tan neʼe, sira uza tempu barak liu hamutuk ho sira-nia oan iha uma, hodi halimar, koʼalia, no estuda hamutuk ho sira. Sira-nia oan gosta tebes ida-neʼe, no maski sira moris iha funu laran, oan sira kontente nafatin. Ezemplu neʼe hanorin ita saida? Oan sira hakarak liu atu inan-aman hamutuk ho sira duké hetan osan ka sasán. Hanesan Bíblia dehan, kuandu inan-aman uza tempu ho sira-nia oan no treinu sira, ida-neʼe sei lori diʼak ba oan.—Provérbios (Amsal) 22:6.

7, 8. (a) Inan-aman balu neʼebé fila fali husi rai seluk sai triste kona-ba saida? (b) Oinsá mak inan-aman bele hadiʼa sira-nia relasaun ho sira-nia oan?

⁷ Inan-aman balu neʼebé fila fali husi rai seluk sai triste tanba sira-nia oan hirus, sente baruk atu haree sira, ka lakohi tau fiar ba sira. Kuandu oan hatudu hahalok hanesan neʼe, inan ka aman karik dehan: “Tansá mak ó la agradese ba buat neʼebé haʼu halo ona ba ó?” Maibé tuir loloos, oan sente laran-kanek tanba sira-nia inan ka aman husik sira kleur. Oinsá mak inan-aman bele hadiʼa situasaun neʼe?

⁸ Ita tenke halo orasaun ba Jeová hodi hatene tanbasá mak sira sente hanesan neʼe no husu Ninia ajuda atu hatudu domin ba sira. Ita mós presiza husu deskulpa ho laran ba sira katak problema neʼe mosu tanba ita. Kuandu ita-nia kaben no oan sira  haree katak ita hakaʼas an atu hadiʼa situasaun, sira sei tau fiar ba ita. Se ita hatudu pasiénsia no la rende an, neineik-neineik ita-nia família sei hadomi no respeitu fali ita.

9. Tanbasá mak ita la presiza sai riku hodi tau matan ba ita-nia família?

⁹ Apóstolu Paulo hakerek katak kuandu ema kristaun neʼebé idade ona la bele tau matan ba sira-nia presiza, sira-nia oan no bei-oan mak tenke ajuda sira. Maibé Paulo mós dehan katak se ita iha ai-han, hatais no hela-fatin, ita kontente ona ho buat sira-neʼe. (Lee 1 Timóteo 5:4, 8; 6:6-10.) Entaun, hodi tau matan ba família nia presiza, ita la presiza sai riku iha mundu neʼe neʼebé “liu daudaun”. (1 João 2:15-17) Ita labele tau fiar ba osan hodi hadiʼa ita-nia problema sira hotu. Ita mós lakohi “hanoin resin kona-ba moris iha mundu neʼe” hodi halo ita la “kaer metin ba moris neʼebé loloos” iha Maromak nia mundu foun!—Marcos 4:19; Lucas 21:34-36; 1 Timóteo 6:19.

10. Tanbasá mak matenek atu la debe?

¹⁰ Jeová hatene katak ita presiza osan. Maibé matenek husi Jeová bele ajuda no proteje ita iha dalan neʼebé diʼak liután. (Eclesiastes [Pengkhotbah] 7:12; Lucas 12:15) Dala barak, ema la hatene osan hira mak sira presiza selu hodi muda ba rai seluk. No bá rai seluk la dehan katak sira sei manán osan. Tuir loloos, muda ba rai seluk bele lori perigu boot. Ema barak neʼebé husik sira-nia família fila fali ho debe neʼebé boot liután. Duké sai livre atu serbí Maromak, sira sai atan ba ema neʼebé sira debe osan. (Lee Provérbios [Amsal] 22:7. b) Tan neʼe, matenek liu atu la debe ida.

11. Oinsá mak halo lista kona-ba gasta osan bele ajuda família?

¹¹ Eduardo hatene katak atu tau matan ba ninia família no la muda tan ba rai liʼur, nia tenke kuidadu kona-ba osan. Nia ho ninia feen halo lista kona-ba buat neʼebé sira presiza duni. c (Haree nota iha kraik.) Hodi tuir lista neʼe, sira labele gasta osan barak hanesan uluk. Maibé ema hotu iha família laran apoia malu no la sosa buat neʼebé la presiza. Eduardo dehan: “Porezemplu, haʼu muda haʼu-nia oan husi eskola privadu no hatama fali iha eskola governu nian neʼebé diʼak.” Nia ho ninia família halo orasaun atu nia bele hetan serbisu neʼebé la hanetik sira-nia adorasaun. Oinsá mak Jeová hatán sira-nia orasaun?

12, 13. Saida mak Eduardo halo atu tau matan ba ninia família? Oinsá mak Jeová haraik bensaun ba ninia hakaʼas-an?

¹² Ba tinan rua, osan neʼebé Eduardo hetan husi ninia serbisu la toʼo atu taka ninia família nia presiza, no osan neʼebé sira rai sai menus ba beibeik. Eduardo dehan: “Haʼu sente kole loos. Maibé, ami bele tuir reuniaun hotu no bá haklaken hamutuk.” Nia deside katak nia sei nunka hanoin atu simu serbisu neʼebé dook husi ninia família. Nia dehan: “Haʼu aprende halo serbisu oioin. Tan neʼe, se serbisu ida la iha ona, haʼu bele halo fali seluk.”

¹³ Tanba presiza tempu barak ba Eduardo atu selu fali ninia debe, nia mós presiza selu osan-funan neʼebé boot. Maibé Eduardo la sente todan kona-ba neʼe, naran katak nia bele kontinua serbí Jeová hamutuk ho ninia família. Nia dehan: “Agora, osan neʼebé haʼu manán sai menus toʼo porsentu sanulu husi haʼu-nia saláriu uluk iha rai seluk, maibé ami nunka hamlaha. ‘Jeová nia liman la sai badak liu.’ Tuir loloos, ami halo desizaun atu serbí nuʼudar pioneiru.  No ikusmai, ami-nia rai nia situasaun ekonomia nian sai diʼak uitoan, no sai kmaan ba haʼu atu tau matan ba família nia presiza.”—Isaías (Yesaya) 59:1.

14, 15. Se ita-nia família hakarak ita atu buka osan duké serbí Jeová, ita bele halo saida? Ita-nia ezemplu diʼak bele lori rezultadu saida?

¹⁴ Iha rai balu, ema sente katak sira tenke fó osan no sasán ba família no belun sira. Eduardo dehan: “Neʼe mak ami-nia kultura, no ami gosta atu fó buat ruma ba malu. Maibé ida-neʼe la bele liu ami-nia kapasidade. Haʼu esplika ho respeitu ba haʼu-nia família katak haʼu sei fó ba sira tuir haʼu-nia kbiit, maibé importante liu mak tau matan ba haʼu-nia umakain rasik nia presiza no ami-nia adorasaun ba Jeová.”

¹⁵ Kuandu ita deside atu la bá serbisu iha rai seluk ka atu fila fali ba uma, dala ruma ita-nia parente sira sai hirus ba ita tanba desizaun neʼe. Karik sira dehan katak ita baruk-teen ka hanoin an deʼit. Tanbasá? Tanba sira mós hakarak osan. (Provérbios [Amsal] 19:6, 7) Eduardo nia oan-feto, Anna, dehan: “Kuandu ita tau uluk adorasaun ba Jeová duké osan, ikusmai ita-nia família bele komprende katak serbí Jeová mak importante tebes ba ita. Maibé, se ita la tau uluk Jeová iha ita-nia moris, sira sei nunka komprende ida-neʼe.”—Kompara ho 1 Pedro 3:1, 2.

16. (a) Ema bele lohi ninia an hodi iha hanoin sala saida? (Tiago 1:22) (b) Desizaun hanesan saida mak Jeová haraik bensaun?

¹⁶ Irmán ida neʼebé husik ninia laʼen ho oan sira hodi serbisu iha rai seluk dehan ba katuas sira iha ninia kongregasaun foun: “Atu haʼu muda mai iha neʼe, ami presiza halo sakrifísiu neʼebé boot. Haʼu-nia laʼen la bele ona serbí nuʼudar katuas ida. Entaun, haʼu hein duni katak Jeová sei haraik bensaun ba ami-nia desizaun neʼe.” Maibé, se ita-nia desizaun la tuir Jeová nia hakarak, nia sei la kontente ho ita. Liuliu se ida-neʼe katak ita lakon knaar iha kongregasaun tanba razaun neʼebé laloos, oinsá mak Jeová bele haraik bensaun ba ita? Nia sei haraik bensaun ba ita só deʼit ita halo desizaun neʼebé hatudu fiar ba nia.—Lee Ebreu 11:6; 1 João 5:13-15.

17. Tanbasá ita tenke buka Jeová nia matadalan antes foti desizaun? Ita bele halo ida-neʼe oinsá?

 ¹⁷ Buka Jeová nia matadalan antes ita halo desizaun. Se lae, ita sei foti desizaun neʼebé ikusmai halo ita triste. Halo orasaun hodi husu Maromak nia espíritu santu, matenek no matadalan. (2 Timóteo 1:7) Husu ba ita-nia an: ‘Haʼu prontu atu halo tuir Jeová iha situasaun naran deʼit maski ema seluk fó susar ba haʼu ka lae? Maski haʼu sei hetan osan uitoan deʼit, haʼu sei hela nafatin ho família ka lae?’ (Lucas 14:33) Husu katuas sira-nia ajuda, no halo tuir konsellu husi Bíblia. Se ita halo ida-neʼe, ita hatudu katak ita tau fiar ba Jeová nia promesa atu ajuda ita. Katuas sira sei la haruka ita kona-ba saida mak ita tenke halo, maibé ajuda ita atu halo desizaun neʼebé lori ita ba moris neʼebé kontente.—2 Korinto 1:24.

18. Sé mak iha responsabilidade atu tau matan ba família? Ita bele halo saida deʼit atu ajuda sira?

¹⁸ Jeová hakarak família nia ulun atu tau matan ba ninia umakain rasik iha tempu hotu. Ita tenke halo orasaun no fó laran-manas ba ita-nia maluk sira neʼebé halaʼo responsabilidade neʼe maski sira iha oportunidade atu muda ka ema seluk obriga sira atu halo nuneʼe. No mós, ita bele hatudu ita-nia domin ba irmaun sira hanesan neʼe kuandu sira hasoru dezastre ka sai moras. (Galásia 6:2, 5; 1 Pedro 3:8) Ita bele ajuda sira atu buka serbisu neʼebé besik ba sira, ka fó osan ka ai-han. Hodi nuneʼe, sira sei la sente katak sira presiza husik família no bá serbisu iha rai seluk.—Provérbios (Amsal) 3:27, 28; 1 João 3:17.

19, 20. Tanbasá mak ita bele fiar katak Jeová sei ajuda ita?

¹⁹ Maromak nia Liafuan promete: “Imi-nia moris tenke livre husi domin ba osan, no haksolok bá ho buat neʼebé imi iha. Tanba [Maromak] dehan ona: ‘Haʼu sei nunka husik ó no haʼu sei nunka fila kotuk ba ó.’ Atu nuneʼe ita bele sai aten-brani liu no dehan: ‘Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?’” (Ebreu 13:5, 6) Ita bele fiar duni liafuan neʼe iha ita-nia moris ka lae?

²⁰ Katuas kristaun ida iha rai kiak, hatete: “Ema barak haree Testemuña ba Jeová sempre kontente. Maski balu kiak, maibé sira sempre hatais diʼak no nunka kuran buat ida.” Ida-neʼe mak buat neʼebé Jesus promete. (Mateus 6:28-30) Jeová hadomi ita no hakarak buat neʼebé diʼak ba ita. Nia hanoin ninia atan hotu no hakarak “hatudu ninia forsa” hodi ajuda ita. (2 Crônicas [Tawarikh] 16:9) Tan neʼe mak nia fó ita mandamentu kona-ba moris família nian no oinsá atu tau matan ba família nia presiza. Kuandu ita halo tuir, ita hatudu ba Jeová katak ita hadomi nia no tau fiar ba nia. Bíblia dehan: “Domin ba Maromak katak ita halo tuir ninia ukun-fuan sira; no ninia ukun-fuan sira la todan.”—1 João 5:3.

21, 22. Tanbasá mak ita halo desizaun atu tau fiar ba Jeová?

²¹ Eduardo dehan: “Haʼu la bele foti fali tempu neʼebé haʼu lakon tanba hela dook husi haʼu-nia feen no oan sira. Maibé haʼu lakohi hanoin demais kona-ba buat neʼebé liu ona. Haʼu-nia kolega neʼebé uluk serbisu hamutuk sai riku, maibé sira la kontente. Sira-nia família iha problema boot oioin. Maibé, haʼu-nia família kontente tebes! Haʼu mós kontente hodi haree irmaun seluk nia ezemplu. Maski kiak, sira buka uluk Jeová iha sira-nia moris. Ami hotu haree katak Jesus nia promesa mak loos duni.”—Lee Mateus 6:33.

²² Sai aten-brani bá! Keta taʼuk hodi foti desizaun atu halo tuir Jeová no tau fiar ba nia. Ita bele sai família nia ulun neʼebé diʼak se ita hadomi Jeová, hadomi ita-nia kaben no oan sira. Ita rasik sei haree katak Jeová mak ita-nia ajuda-naʼin.