IHA loron 7 Setembru 1950, haʼu sai parte ba família Betel iha Brooklyn. Iha tempu neʼe, família Betel iha irmaun-irmán sira hamutuk ema naʼin-355, neʼebé mai husi rai oioin, rasa oioin, ho idade entre tinan 19 toʼo tinan 80. Sira barak mak ema kristaun neʼebé Maromak kose mina ho espíritu santu.

Haʼu-nia inan mak ajuda haʼu atu serbí “Maromak neʼebé kontente”. (1 Timóteo 1:11) Nia hahú serbí Jeová kuandu haʼu sei kiʼik hela. Iha loron 1 Jullu 1939, haʼu hetan batizmu iha reuniaun boot iha sidade Columbus, Nebraska, iha Estadus Unidus. Iha tempu neʼe haʼu foin tinan sanulu. No maizumenus ami naʼin-100 halibur hamutuk iha fatin neʼebé ami aluga hodi rona ba gravasaun ba diskursu ho tema “Fascism or Freedom (Ukun neʼebé makaʼas ka liberdade)”, neʼebé irmaun Joseph Rutherford mak hatoʼo. Iha diskursu neʼe nia klaran, ema-lubun halibur iha liʼur. Sira obriga an hodi tama ba fatin kiʼik neʼe, no haruka ami para ami-nia reuniaun, no duni ami sai husi sidade neʼe. Tuirmai, ami halibur hamutuk iha irmaun ida nia toʼos neʼebé besik sidade hodi kontinua rona ba programa. Tanba buat sira-neʼe hotu, haʼu sei nunka haluha haʼu-nia loron batizmu nian neʼe!

Haʼu-nia inan badinas atu haboot haʼu iha lia-loos. Maski haʼu-nia aman mak ema neʼebé diʼak, maibé nia ladún interese ba relijiaun no la ajuda haʼu atu adora Maromak. Haʼu-nia inan no mós ema seluk iha kongregasaun Omaha sempre fó laran-manas no fó ajuda neʼebé haʼu presiza.

Kuandu haʼu besik ona atu ramata haʼu-nia eskola sekundária, haʼu tenke halo desizaun kona-ba saida mak haʼu sei halo iha haʼu-nia moris. Antes neʼe, durante feriadu iha tempu bailoro, haʼu serbí nuʼudar pioneiru estra hamutuk ho ema seluk neʼebé idade hanesan ho haʼu.

Irmaun klosan naʼin-rua neʼebé foin ramata Eskola Gilead klase hitu, simu knaar atu vizita kongregasaun sira iha ami-nia área. Sira mak irmaun John Chimiklis no Ted Jaracz. Haʼu hakfodak bainhira hatene katak sira-nia idade mak foin 20 liu. Iha tempu neʼebá haʼu nia tinan foin 18 no lakleur tan sei ramata eskola sekundária. Haʼu sei hanoin-hetan tempu neʼebé irmaun Chimiklis husu haʼu kona-ba saida mak haʼu sei halo iha haʼu-nia moris.  Kuandu haʼu fó-hatene nia, nia dehan: “Sin, foti kedas desizaun atu serbí Maromak tempu-tomak. No iha futuru ida-neʼe sei lori ó ba moris neʼebé karik ó seidauk hanoin.” Konsellu neʼe, no mós sira-nia ezemplu book duni haʼu. Entaun depois haʼu ramata tiha eskola, haʼu hahú serbí nuʼudar pioneiru iha tinan 1948.

Iha fulan-Jullu 1950, haʼu no haʼu-nia inan-aman tuir reuniaun boot internasionál iha Yankee Stadium iha sidade Novaiorke. Kuandu ami tuir reuniaun neʼe, haʼu mós tuir reuniaun ba sira neʼebé hakarak atu serbí iha Betel. Haʼu hatama haʼu-nia formuláriu, no dehan katak haʼu hakarak tebes atu serbí iha neʼebá.

Maski haʼu-nia aman husik haʼu serbí nuʼudar pioneiru no hela nafatin iha uma, maibé nia hakarak haʼu atu fó osan uitoan hodi ajuda família nia presiza. Entaun iha loron ida iha fulan-Agostu antes haʼu bá buka serbisu, haʼu hetan karta ida husi Brooklyn. Iha karta neʼe, irmaun Nathan H. Knorr hatete: “Haʼu simu ona ó-nia formuláriu atu serbí iha Betel. Haʼu komprende katak ó hakarak atu hela nafatin iha Betel toʼo Naʼi foti tiha ó. Tan neʼe, haʼu hakarak atu ó mai iha Betel iha loron 7 Setembru 1950, iha 124 Columbia Heights, Brooklyn, Novaiorke.”

Iha loron neʼe kuandu haʼu-nia aman fila husi serbisu, haʼu dehan ba nia katak haʼu hetan ona serbisu. Nia dehan: “Neʼe diʼak, ó sei serbisu iha neʼebé?” Haʼu hatán: “Iha Betel Brooklyn, no simu osan $10 fulan-fulan.” Ida-neʼe halo haʼu-nia aman hakfodak tanba neʼe mak osan kiʼik tebes, maibé nia dehan katak se neʼe mak haʼu-nia hakarak, haʼu tenke hakaʼas an atu kumpre ida-neʼe. Lakleur depois neʼe, iha reuniaun boot iha Yankee Stadium iha tinan 1953, haʼu-nia aman hetan batizmu!

Haʼu mós kontente tanba iha tempu hanesan haʼu-nia kolega pioneiru ida naran Alfred Nussrallah mós hetan konvite atu serbí iha Betel. Entaun ami halo viajen hamutuk atu bá Betel. Ikusmai Alfred kaben. Depois neʼe, nia no ninia feen Joan tuir Eskola Gilead, no serbí nuʼudar misionáriu iha rai-Líbanu. Tuirmai sira fila fali ba Estadus Unidus no serbí nuʼudar katuas neʼebé vizita kongregasaun sira.

Haʼu-nia knaar primeiru iha Betel mak atu suku livru sira. Livru primeiru neʼebé haʼu ajuda atu halo mak livru What Has Religion Done for Mandkind? (Saida mak relijiaun halo ba ema?) Maibé liutiha fulan ualu, haʼu hetan knaar atu serbí iha Departamentu Serbisu nian, no irmaun Thomas J. Sullivan mak tau matan ba ami. Haʼu kontente tebes atu serbisu hamutuk ho nia no aprende buat barak husi ninia matenek kona-ba Bíblia no mós ninia esperiénsia neʼebé nia hetan ona iha Jeová nia organizasaun durante tinan barak.

Depois haʼu serbí tiha iha Departamentu Serbisu nian besik tinan tolu, irmaun Max Larson neʼebé tau matan ba mákina halo livru nian, dehan ba haʼu katak irmaun Knorr hakarak hasoru haʼu. Haʼu-nia fuan tuku-tuku tanba haʼu hanoin katak haʼu halo ona sala ruma. Maibé tuirmai, haʼu sente kmaan kuandu irmaun Knorr dehan ba haʼu katak nia hakarak hatene se haʼu iha planu atu husik Betel ka lae. Nia husu ida-neʼe tanba nia presiza ema ida atu serbisu ho nia iha kantor ba tempu uitoan no nia hakarak haree se haʼu bele halo ida-neʼe. Haʼu hatete katak haʼu la iha planu atu husik Betel. Ikusmai, haʼu kontente atu serbisu iha ninia kantor ba tinan 20.

Haʼu hetan treinu barak hodi serbisu hamutuk ho irmaun Sullivan no Knorr, no mós irmaun sira seluk iha Betel, hanesan Milton Henschel, Klaus Jensen, Max Larson, Hugo Riemer, no Grant Suiter. a Haʼu-nia  liafuan latoʼo atu agradese ba treinu neʼebé haʼu hetan.

Haʼu haree katak irmaun sira neʼebé haʼu serbisu hamutuk sempre organiza didiʼak serbisu neʼebé sira halo ba organizasaun. Irmaun Knorr mak serbisu-naʼin neʼebé badinas loos, no nia hakarak atu haree serbisu kona-ba Maromak nia Ukun atu laʼo ba oin. Maluk kristaun sira neʼebé serbisu iha ninia kantor sente la susar atu koʼalia ho irmaun Knorr. Maski iha situasaun balu ami iha hanoin neʼebé la hanesan ho nia, maibé ami bele fó sai ami-nia hanoin hodi la taʼuk no nia sei kontinua tau fiar ba ami.

Iha tempu ida, irmaun Knorr koʼalia ba haʼu kona-ba tansá ita tenke tau matan mós ba buat kiʼik deʼit. Porezemplu, nia dehan ba haʼu katak kuandu nia sei tau matan ba mákina halo livru nian, irmaun Rutherford dala ruma bolu nia iha telefone no dehan: “Irmaun Knorr, antes ó bá han-kalan, lori borraxa lapis nian ba haʼu. Haʼu presiza ida-neʼe iha haʼu-nia meza.” Irmaun Knorr bá kedas fatin rai sasán nian, foti borraxa, no tau neʼe iha ninia bolsu. Duké hein toʼo tempu han-kalan, nia lori neʼe ba irmaun Rutherford nia kantor iha meiudia. Neʼe mak buat kiʼik deʼit, maibé neʼe ajuda irmaun Rutherford. Tuirmai, irmaun Knorr dehan ba haʼu: “Haʼu hakarak atu uza lapis neʼebé kroʼat. Entaun favór ida halo ida-neʼe prontu ba haʼu dadeer-dadeer.” Ba tinan barak, haʼu sempre halo kroʼat ninia lapis sira.

Irmaun Knorr sempre koʼalia kona-ba tansá importante atu rona didiʼak kuandu ema husu ita atu halo knaar ruma. Dala ida, nia fó ba haʼu matadalan neʼebé klaru kona-ba oinsá atu halo serbisu ida, maibé haʼu ladún rona. No ikusmai, haʼu hamoe nia tebetebes. Haʼu sente triste loos, entaun haʼu hakerek karta badak ida hodi dehan katak haʼu arrepende an kona-ba neʼe no haʼu sente katak diʼak liu atu muda haʼu husi ninia kantor. Maibé iha dadeer-saan neʼe, irmaun Knorr mai iha haʼu-nia fatin serbisu nian. Nia dehan: “Robert, haʼu haree ona ó-nia karta. Sin, ó halo ona sala. Haʼu koʼalia tiha ona ba ó kona-ba neʼe, maibé haʼu fiar katak iha loron seluk ó sei kuidadu. Entaun agora, mai ita serbisu fali.” Haʼu hafolin tebes irmaun Knorr nia laran-diʼak neʼe.

Kuandu haʼu serbí iha Betel ba tinan ualu, haʼu kontente atu serbisu iha Betel ba nafatin. Maibé, haʼu-nia planu troka. Durante tempu neʼebé halaʼo reuniaun boot internasionál iha Yankee Stadium no Polo Grounds iha tinan 1958, haʼu hasoru fali irmán Lorraine Brookes, irmán ida neʼebé haʼu hasoru tiha ona iha tinan 1955 kuandu nia serbí iha Montreál, Kanadá. Haʼu gosta tebes ninia hanoin kona-ba serbí Maromak tempu-tomak no nia prontu atu bá fatin naran deʼit neʼebé Jeová nia organizasaun haruka. Lorraine iha planu atu tuir Eskola Gilead. No kuandu nia tinan 22, nia tuir eskola neʼe ba klase 27 iha tinan 1956, no kuandu eskola neʼe ramata, nia simu knaar atu serbí iha Brazíl nuʼudar misionáriu. Lorraine no haʼu namora iha tinan 1958, no kuandu haʼu husu nia atu kaben, nia simu. Ami halo planu atu kaben tinan tuirmai no serbí hamutuk nuʼudar misionáriu.

 Kuandu haʼu fó-hatene irmaun Knorr kona-ba haʼu-nia planu, nia dehan ba haʼu atu hein tan ba tinan tolu, depois neʼe mak kaben no serbí iha Betel Brooklyn. Iha tempu neʼebá, atu feen-laʼen bele kontinua serbí iha Betel depois sira kaben, ida tenke serbí ona iha Betel ba tinan sanulu ka liu no mós ida seluk tenke serbí ona ba tinan tolu. Tan neʼe, Lorraine konkorda atu serbí iha Betel Brazíl ba tinan rua no tuirmai serbí tinan ida iha Betel Brooklyn antes ami kaben.

Hodi bele koʼalia ba malu durante tinan rua neʼebé ami troka prenda mak liuhusi karta deʼit. Tanba atu uza telefone mak karun tebes, no iha tempu neʼebá la iha e-mail. Kuandu ami kaben iha loron 16 Setembru 1961, ami kontente katak irmaun Knorr mak hatoʼo ami-nia diskursu kazamentu nian. Tuir loloos, hodi hein durante tinan tolu mak buat neʼebé kleur tebetebes. Maibé agora, nuʼudar ami hanoin fali ami-nia moris kaben nian ba tinan 50, ami sente katak iha folin duni atu hein ba tempu uitoan!

Iha tinan 1964, haʼu simu knaar atu vizita nasaun seluk nuʼudar katuas neʼebé vizita sukursál sira. Iha tempu neʼebá, feen sira la bele tuir sira-nia laʼen iha vizita sira-neʼe. Maibé neʼe troka iha tinan 1977, no feen sira bele ona atu bá hamutuk sira-nia laʼen. Iha tinan neʼe Lorraine no haʼu akompaña irmaun Grant Suiter no ninia feen irmán Edith atu vizita sukursál iha rai-Alemaña, Áustria, Grésia, Xipre, Turkia, no Izraél. No haʼu vizita ona rai hamutuk 70.

Iha ami-nia vizita ida ba rai-Brazíl iha tinan 1980, ami simu programa atu vizita sidade Belém neʼebé uluk Lorraine serbí nuʼudar misionáriu. Nuʼudar ami bá atu vizita sidade neʼe, ami mós para iha sidade Manaus hodi vizita irmaun-irmán sira. Iha estádiu laran, ami haree ema grupu ida neʼebé tuur ketak, no sira la halo tuir toman Brazíl nian, katak feto sira reʼi hasan no mane sira kaer liman. Tanbasá?

Ema sira-neʼe mak ita-nia maluk kristaun neʼebé hetan moras-lepra no hela ketak iha ai-laran Amazona nian. Sira hadook an husi ema seluk tanba sira lakohi atu hadaʼet moras neʼe. Maski nuneʼe, sira-nia hahalok book duni ami-nia laran, no ami sei nunka haluha sira-nia oin-midar tanba sente haksolok! Hanesan Jeová dehan: “Haʼu-nia atan sira sei hasaʼe lian ho haksolok tanba sente diʼak iha laran.”—Isaías (Yesaya) 65:14.

Lorraine no haʼu sempre hanoin fali kona-ba tinan 60 liu neʼebé ami serbí Jeová. Ami kontente tebes ho bensaun sira neʼebé ami simu tanba ami husik Jeová fó matadalan ba ami liuhusi ninia organizasaun. Maski haʼu la bele ona halo viajen haleʼu mundu hanesan uluk, maibé haʼu sei bele kumpre haʼu-nia knaar nuʼudar ajuda-naʼin ba Grupu Administradór, hodi serbí iha Komisaun Koordenadór nian no mós Komisaun Serbisu nian. Haʼu hafolin tebes haʼu-nia knaar hodi apoia irmaun-irmán hotu iha mundu tomak. Ami mós sente kontente hodi haree irmaun-irmán joven barak serbí Maromak tempu-tomak no iha hanoin hanesan Isaías nian neʼebé dehan: “Haʼu mak neʼe! Haruka haʼu bá.” (Isaías [Yesaya] 6:8) Joven barak neʼe hatudu katak liafuan husi katuas área nian neʼebé haʼu rona iha tempu uluk mak loos. Nia dehan: “Foti kedas desizaun atu serbí Maromak tempu-tomak. No iha futuru ida-neʼe sei lori ó ba moris neʼebé karik ó seidauk hanoin.”