IDA-NEʼE akontese iha tinan 1957. Maski ema seluk la mai tuir haʼu-nia diskursu, maibé neʼe la halo haʼu triste tanba haʼu mak ema moedór. Bainhira haʼu sei kiʼik kuandu ema ruma mai ami-nia uma, haʼu sempre subar an maski ema neʼe mak haʼu koñese ona.

Karik ita sei hakfodak se ita hatene kona-ba knaar sira neʼebé haʼu simu iha Jeová nia organizasaun, tanba nuʼudar haʼu halaʼo knaar sira-neʼe, haʼu tenke hakaʼas an atu koʼalia ho ema barak, hanesan kolega no mós ema foun. Haʼu sempre luta hasoru haʼu-nia fraku nuʼudar ema moedór no la fiar an. Tan neʼe, haʼu hatene katak buat hotu neʼebé haʼu halo laʼós ho haʼu-nia kbiit rasik. Haʼu haree ona Jeová nia promesa tuirmai neʼe mak sai loos duni. Nia dehan: “Haʼu sei hametin ó. Sin haʼu sei ajuda ó. Haʼu sei kaer metin ó ho haʼu-nia liman-loos justisa nian.” (Isaías [Yesaya] 41:10) Sin, Jeová ajuda duni haʼu liuhusi maluk kristaun sira. Haʼu sei konta haʼu-nia istória husi tempu neʼebé haʼu sei kiʼik.

Iha tinan 70 liubá iha loron-domingu ida, Elsie Huntingford mai haklaken ba ami iha Ontário. Haʼu-nia amá loke odamatan, no haʼu ho haʼu-nia apá neʼebé  mós moedór tuur hela iha laran no rona sira koʼalia ba malu. Apá hanoin katak irmán Huntingford mak ema neʼebé mai faʼan sasán ruma, tan neʼe nia bá odamatan hodi hatete katak ami la interese ida. Irmán Huntingford husu ba apá: “Ita lakohi estuda Bíblia?” Apá hatán: “Lae, ida-neʼe ami hakarak.”

Irmán Huntingford mai haklaken ba ami iha tempu neʼebé loos. Uluk haʼu-nia inan-aman badinas tebes tuir igreja protestante ida, maibé agora sira deside atu sai husi igreja neʼe. Tanbasá? Tanba iha igreja, pastór sempre taka lista kona-ba ema neʼebé fó kontribuisaun. Iha lista neʼe, haʼu-nia inan-aman nia naran sempre iha okos tanba sira mak ema kiak, no ulun-naʼin igreja obriga sira atu fó osan barak tan. No mós pastór ida dehan katak, nia hanorin deʼit igreja nia doutrina tanba nia taʼuk lakon serbisu maski buat neʼebé nia fiar mak la hanesan. Tan neʼe, ami husik tiha igreja maibé nafatin buka dalan atu hakbesik ba Maromak.

Iha tempu neʼebá, governu Kanadá bandu Testemuña ba Jeová, tan neʼe irmán Huntigford halaʼo estudu ba ami-nia família hodi uza deʼit Bíblia ho nota badak neʼebé rai iha ninia livru kiʼik metan ida. Ikusmai bainhira nia haree katak ami sei la entrega nia ba polísia, nia fahe livru balu mai ami. Kuandu ami ramata estuda, ami sempre subar didiʼak livru sira-neʼe. a

Maski irmán Huntingford hasoru susar oioin no ema barak kontra lia-loos, nia badinas haklaken liafuan diʼak. Ida-neʼe fó laran-manas mai haʼu no book haʼu atu kaer metin ba lia-loos. Liutiha tinan ida depois haʼu-nia inan-aman hetan batizmu nuʼudar Testemuña ba Jeová, haʼu mós dedika an ona ba Jeová. No iha 27 Fevereiru 1949, kuandu haʼu tinan 17, haʼu hetan batizmu iha tanke animál sira-nia hemu-fatin. Husi tempu neʼe, haʼu hakarak tebes atu serbí Jeová tempu-tomak.

Tuir loloos, haʼu taʼuk uitoan atu foti pioneiru kedas, tan neʼe mak haʼu serbisu iha banku no kantor ida tanba haʼu hanoin haʼu tenke rai osan atu serbí nuʼudar pioneiru. Maibé nuʼudar joven, haʼu gasta osan hotu neʼebé haʼu manán. Tan neʼe,  irmaun ida naran Ted Sargent ho laran-diʼak fó laran-manas mai haʼu atu sai brani no tau fiar ba Jeová. (1 Crônicas [Tawarikh] 28:10) Hodi simu ida-neʼe, haʼu hahú pioneiru iha Novembru 1951. Iha tempu neʼebá, haʼu-nia rikusoin mak dolar 40 deʼit ho bisikleta no pasta foun ida. Maibé Jeová sempre tau matan ba buat neʼebé haʼu presiza. Haʼu agradese tebes kona-ba irmaun Ted neʼebé fó laran-manas ba haʼu atu foti pioneiru, tanba ida-neʼe lori bensaun barak mai haʼu!

Iha kalan ida iha tinan 1952 kuandu fulan-Agostu atu ramata, haʼu simu telefone husi sidade Toronto. Sukursál Kanadá konvida haʼu atu serbí iha Betel husi fulan-Setembru. Maski haʼu moedór no seidauk bá sukursál, haʼu kontente tebes ho ida-neʼe tanba pioneiru sira seluk fó-hatene ona kona-ba buat diʼak barak iha Betel. Toʼo iha Betel, haʼu sai toman lalais ho haʼu-nia fatin foun neʼe.

Liutiha tinan rua, haʼu hetan knaar atu troka fali irmaun Bill Yacos neʼebé serbí nuʼudar katuas neʼebé tau matan ba kongregasaun ida iha Toronto (agora bolu koordenadór ba grupu katuas sira). Haʼu-nia tinan 23 deʼit, no haʼu sente laran-nakdedar hanesan labarik neʼebé foin mai husi foho. Maibé irmaun Yacos hatudu haraik-an no laran-diʼak hodi hanorin haʼu kona-ba buat neʼebé haʼu tenke halo. No Jeová ajuda duni haʼu.

Irmaun Yacos mak ema neʼebé isin-boot ho oin-midar, nia interese ba ema. Nia hadomi irmaun-irmán sira no sira mós hadomi nia. Nia toman bá vizita irmaun-irmán sira-nia uma laʼós deʼit kuandu sira iha problema. Irmaun Bill Yacos fó laran-manas mai haʼu atu halo hanesan neʼe no haklaken hamutuk ho sira, hodi dehan: “Ken, hatudu ba sira katak ó hadomi sira. Se ó halo nuneʼe, ida-neʼe sei ajuda sira atu la haree deʼit ba ó-nia fraku.”

Husi Janeiru 1957, Jeová ajuda haʼu iha dalan espesiál. Iha fulan neʼe, haʼu kaben ho Evelyn, irmán ida neʼebé tuir ona Eskola Gilead klase 14. Antes kaben, Evelyn serbí iha distritu Kebeke (Quebec), neʼebé koʼalia lia-fransés. Iha tempu neʼebá, Igreja Katólika mak domina Kebeke. Tan neʼe, Evelyn haklaken iha fatin neʼebé susar tebes, maibé nia laran-metin ba ninia knaar no mós ba Jeová.

Evelyn mós laran-metin ba haʼu. (Éfeso 5:31) Tuir lolos, nia tenke hatudu kedas laran-metin kuandu ami foin kaben! Ami halo ona planu katak depois kaben ami halo viajen ba Flórida, Estadus Unidus, maibé iha loron neʼebé ami kaben, sukursál husu haʼu atu tuir reuniaun ba semana ida iha Betel Kanadá. Reuniaun neʼe sei xoke malu ho loron neʼebé ami atu bá pasiar, maibé haʼu ho Evelyn hakarak tau uluk buat neʼebé Jeová husu. Tan neʼe, ami deside atu la bá Flórida, no durante semana ida-neʼe, Evelyn bá haklaken loroloron iha área besik sukursál. Maski haklaken-fatin neʼe la hanesan ho Kebeke, Evelyn la rende an.

Kuandu semana neʼe atu ramata, haʼu hakfodak tanba haʼu hetan knaar nuʼudar katuas área  nian iha distritu Ontário. Tanba haʼu foin tinan 25 deʼit no mós foin kaben, haʼu la iha esperiénsia, maibé ami tau fiar ba Jeová. Ikusmai, iha tempu neʼebé malirin tebes, ami hamutuk ho irmaun sira seluk neʼebé serbí kleur ona nuʼudar katuas área nian saʼe komboiu iha kalan ida tomak. Iha kalan neʼe, sira fó laran-manas mai ami! Sira ida haruka ami atu uza ninia toba-fatin iha komboiu duké tuur kalan tomak. Dadeer-saan tuirmai, katak liutiha loron 15 depois ami kaben, ami vizita grupu kiʼik ida iha Hornepayne, neʼebé haʼu foin temi iha leten.

Maibé tinan hirak tuirmai, ami mós hasoru tan mudansa oioin. Iha tinan 1960 kuandu ami serbí nuʼudar katuas vizitante, haʼu hetan konvite atu tuir Eskola Gilead klase 36. Neʼe mak kursu ba fulan sanulu iha Brooklyn, Novaiorke, hahú husi Fevereiru 1961. Haʼu sente kontente tebes maibé haʼu mós triste tanba Evelyn la hetan konvite. Entaun, Evelyn no mós irmán sira seluk neʼebé iha situasaun hanesan nia presiza hakerek karta hodi hatete katak nia prontu atu husik ninia laʼen atu tuir Eskola hodi hela ketak ba fulan sanulu ka liu. Evelyn tanis, maibé ami naʼin-rua konkorda atu haʼu tuir Eskola, no nia kontente tanba husi eskola neʼe haʼu bele hetan treinu neʼebé diʼak.

Durante haʼu tuir eskola, Evelyn serbí iha sukursál Kanadá hodi fahe kuartu ho irmán Margaret Lovell neʼebé iha esperansa atu bá lalehan, no neʼe mak espesiál tebes ba Evelyn. Maski nuneʼe, tuir loloos, haʼu ho Evelyn hanoin malu, maibé Jeová ajuda ami atu kumpre ami-nia knaar. Tanba Evelyn prontu atu tahan tempu neʼebé ami dook ba malu hodi bele serbí Jeová diʼak liután, ninia sakrifísiu neʼe kona loos haʼu-nia laran.

Maibé kuandu haʼu tuir Eskola Gilead fulan tolu ona, irmaun Nathan Knorr neʼebé tau matan ba ita-nia serbisu haklaken, husu haʼu buat ida neʼebé la hanesan baibain. Nia husu haʼu se haʼu bele para Gilead no fila ba rai-Kanadá hodi hanorin eskola ida neʼebé sei halaʼo iha sukursál. Irmaun Knorr hatete katak simu ka la simu knaar neʼe konforme haʼu. Se haʼu kontinua Eskola Gilead toʼo ramata, karik haʼu sei sai misionáriu hodi bá rai seluk. Irmaun Knorr mós dehan katak se haʼu husik Gilead no bá fali Kanadá, karik haʼu sei la hetan tan konvite atu tuir Gilead, no haʼu sei serbí nafatin iha Kanadá. Nia hatete ba haʼu atu koʼalia ho haʼu-nia feen no halo desizaun hamutuk.

Tanba Evelyn fó-hatene ona ninia hanoin mai haʼu kona-ba serbisu ba Jeová, haʼu hatán kedas ba irmaun Knorr: “Buat naran deʼit neʼebé Jeová nia organizasaun husu ami, ami simu ho kontente.” Ami sempre sente katak ami tenke prontu atu halo knaar saida deʼit neʼebé Jeová nia organizasaun fó mai ami.

Tan neʼe, iha Abríl 1961, haʼu husik Brooklyn no fila fali ba Kanadá hodi hanorin eskola ba katuas sira. Tuirmai, ami komesa serbí nuʼudar  família Betel. Liutiha tinan balu, haʼu hakfodak hodi simu konvite atu tuir Eskola Gilead ba klase 40, neʼebé sei hahú iha tinan 1965. Dala ida tan Evelyn tenke hakerek karta neʼebé hatete katak nia simu atu hela ketak ba tempu uitoan. Maibé semana balu liu tiha, Evelyn mós simu konvite atu tuir eskola hamutuk ho haʼu, no ida-neʼe halo ami kontente tebetebes.

Durante eskola, irmaun Knorr hatete katak karik ami ho estudante sira seluk neʼebé aprende daudauk lia-fransés sei serbí iha rai-Áfrika. Maibé iha graduasaun, ami simu knaar atu fila fali ba Kanadá! Haʼu hetan knaar atu serbí nuʼudar koordenadór ba sukursál Kanadá. Haʼu-nia tinan 34 deʼit, tan neʼe haʼu hatete ba irmaun Knorr: “Haʼu-nia idade seidauk toʼo.” Maibé nia fó laran-manas ba haʼu. No husi tempu neʼebá, haʼu sempre husu uluk konsellu husi irmaun sira neʼebé iha esperiénsia ona antes halo desizaun importante oioin.

Serbí iha Betel fó oportunidade kapás mai haʼu atu aprende husi ema seluk. Haʼu hafolin tebes haʼu-nia maluk sira neʼebé serbí iha Grupu Koordenadór ba Sukursál. Haʼu mós aprende buat barak husi irmaun-irmán sira neʼebé hatudu ezemplu diʼak, balu joven no balu tan idade, nuʼudar ami ransu ho maluk barak iha sukursál no mós iha kongregasaun sira neʼebé ami serbí.

Serbisu iha Betel mós fó oportunidade mai haʼu atu hanorin ema seluk no hametin sira-nia fiar. Apóstolu Paulo hatete ba Timóteo: “Kontinua halo tuir buat neʼebé ó aprende ona”. Nia mós dehan: “Buat neʼebé ó rona husi haʼu, neʼebé ema barak mós sai nuʼudar sasin, ó tenke fó sai buat sira-neʼe ba ema neʼebé laran-metin atu nuneʼe sira mós bele kumpre kritériu atu hanorin ema seluk.” (2 Timóteo 2:2; 3:14) Dala ruma maluk kristaun sira husu haʼu kona-ba buat saida mak haʼu aprende husi haʼu-nia serbisu iha Betel durante tinan 57. Haʼu-nia resposta mak simples: “Sai prontu atu halo buat neʼebé Jeová nia organizasaun husu, hodi tau fiar katak Jeová sei ajuda Ita.”

Haʼu sente katak loron neʼebé haʼu foin toʼo Betel nuʼudar joven moedór ida mak foin horisehik. Husi tempu neʼebá toʼo ohin, Jeová sei nafatin ‘kaer haʼu-nia liman-loos’. Sin, liuhusi maluk kristaun neʼebé ajuda haʼu ho laran-diʼak iha tempu neʼebé loos, Jeová hatete ba haʼu: “Keta taʼuk. Haʼu rasik sei ajuda ó.”—Isaías (Yesaya) 41:13.