1. Organizasaun saida mak troka nasaun Izraél nuʼudar Maromak nia povu? (Haree dezeñu iha leten.)

 JEOVÁ nia povu ohin loron adora nia iha dalan neʼebé halo nia kontente. Iha tempu uluk, nasaun Izraél mak Maromak nia povu espesiál. Maibé tanba sira kontra hasoru Jeová, nia harii organizasaun foun ida hodi uza Kristu nia dixípulu sira atu reprezenta Ninia naran. Tanba Jeová kontente ho sira, maski sidade Jeruzalein naksobu iha tinan 70, maibé Ninia organizasaun neʼe la lakon. (Lucas 21:20, 21) Nuneʼe mós ho Maromak nia atan sira ohin loron. Maski lakleur tan Satanás nia mundu neʼe sei lakon ba nafatin, Maromak nia organizasaun sei hamriik ba nafatin. (2 Timóteo 3:1) Oinsá ita bele fiar?

2. Jesus hatete saida kona-ba “terus boot”? Oinsá mak ida-neʼe sei hahú?

² Jesus fó-hatene nanis saida mak sei akontese iha loron ikus sira, hodi dehan: “Iha tempu neʼe sei mosu terus boot. Husi mundu hahú toʼo agora seidauk mosu terus hanesan neʼe, no depois neʼe sei la mosu fali.” (Mateus 24:3, 21) Terus boot neʼe sei hahú kuandu Jeová halakon “Babilónia Boot”, katak relijiaun falsu hotu iha mundu neʼe. Nia halo ida-neʼe  liuhusi ulun-naʼin polítiku sira. (Apokalipse 17:3-5, 16) Tuirmai, saida mak sei akontese?

3. Kuandu relijiaun falsu hotu lakon tiha, saida mak akontese ba Jeová nia povu?

³ Kuandu relijiaun falsu hotu lakon tiha, Testemuña ba Jeová deʼit mak sei hela iha mundu aat neʼe nuʼudar organizasaun relijiaun ida, no Satanás ho ninia mundu sei ataka sira. Kona-ba “Gog husi rai-Magog”, Bíblia hatete: “Ó sei mai hasoru sira hanesan anin-fuik, no ó sei mai hanesan kalohan neʼebé taka rai, ó hamutuk ho ó-nia tropa hotu no ó-nia povu tomak.” Tuir inimigu sira-nia hanoin, Testemuña ba Jeová neʼebé la hatene funu sei haree hanesan la iha protesaun, maibé neʼe mak hanoin sala duni!—Ezequiel (Yehezkiel) 38:1, 2, 9-12.

4, 5. Kuandu Satanás ataka Jeová nia povu, Jeová sei halo saida?

⁴ Kuandu Satanás ho ninia liman-ain mak ataka Jeová nia povu, Jeová haree ida-neʼe hanesan sira ataka Nia an rasik. (Lee Zacarias [Zakharia] 2:8. a) Jeová sei halo saida? Nuʼudar Maromak Aas Liu Hotu iha lalehan no rai, nia sei salva kedas ninia povu. Nia sei la husik ninia atan atu lakon mohu. Tuirmai, Jeová sei lori funu Armajedón hodi halakon Satanás nia mundu.—Apokalipse 16:14, 16.

⁵ Kona-ba funu Armajedón, Bíblia fó-hatene nanis: “‘Nia rasik sei tesi lia ba ema hotu, no nia sei halakon ema aat sira ho surik’, Jeová hatete. Neʼe mak Jeová Naʼi funu-naʼin dehan: ‘Haree bá! Dezastre ida sei habelar husi nasaun ba nasaun, no anin boot ida sei akontese husi rai nia rohan. No ema sira neʼebé Jeová oho iha loron neʼebá sei sai barak husi mundu nia rohan ida toʼo mundu nia rohan ida seluk. Ema sei la tanis ba sira, no mós sei la halibur mate-isin sira ka hakoi sira. Sira sei sai hanesan adubu ba rai.’” (Jeremias [Yeremia] 25:31-33) Liuhusi funu Armajedón, Satanás nia mundu aat neʼe sei lakon ba nafatin. Maibé Jeová nia organizasaun sei la lakon.

6, 7. (a) “Ema-lubun boot” neʼe mai husi neʼebé? (b) Saida mak hatudu katak Jeová nia organizasaun sai boot ba beibeik?

⁶ Ohin loron, Maromak nia organizasaun parte rai nian sai boot ba beibeik tanba Jeová fó bensaun ba ninia povu neʼebé laran-loos no halo Nia kontente. Bíblia hatete: “Maromak tau matan ba sira neʼebé loos; Nia see tilun ba sira-nia orasaun.” (1 Pedro 3:12) Ema loos sira-neʼe inklui “ema-lubun boot”, neʼebé sei moris liu “terus boot”. (Apokalipse 7:9, 14) Hanoin toʼok ita sente oinsá kuandu ita mós hetan salvasaun hamutuk ho ema-lubun boot neʼe!

⁷ Liuhusi serbisu haklaken, ema-lubun boot sei halibur hamutuk husi nasaun oioin nuʼudar povu ida, hanesan Jesus hatete nanis: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.” (Mateus 24:14) Tan neʼe, serbisu neʼebé importante liu ba Maromak nia povu ohin loron mak  serbisu haklaken. Liuhusi serbisu neʼe, ema rihun ba rihun aprende atu adora Jeová “ho espíritu no lia-loos”. (João 4:23, 24) Porezemplu, husi tinan 2003 toʼo 2012, ema naʼin-2.700.000 liu mak dedika sira-nia an ba Jeová no hetan batizmu. Ohin loron, ita-nia organizasaun iha Testemuña hamutuk ema naʼin-7.900.000 liu no tinan-tinan ema barak tebetebes mak tuir Memoriál ba Kristu nia mate. Klaru katak ema-lubun boot neʼe aumenta lalais tanba Jeová mak haburas ninia organizasaun.—1 Korinto 3:5-7.

8. Tanbasá mak Testemuña ba Jeová aumenta ba beibeik?

⁸ Testemuña sira neʼebé reprezenta Jeová sai barak liután ba beibeik tanba nia mak apoia sira. (Lee Isaías [Yesaya] 43:10-12. b) Livru Isaías fó-hatene nanis kona-ba loron ikus sira, hodi dehan: “Buat neʼebé uitoan sei sai rihun ida, no buat neʼebé kiʼik sei sai nasaun neʼebé forte. Haʼu Jeová rasik mak sei halo ida-neʼe ho lalais tuir ninia tempu.” (Isaías [Yesaya] 60:22) Foufoun, “Izraél Maromak nian” ka ema neʼebé iha esperansa atu bá lalehan mak “buat neʼebé kiʼik”, maibé Jeová fó bensaun ba sira-nia serbisu haklaken, no sira sai barak iha Ninia organizasaun. (Galásia 6:16) Liután neʼe, ema rihun ba rihun neʼebé iha esperansa atu moris ba nafatin iha rai mós tama lia-loos.

9. Atu bele hetan bensaun husi Jeová nia promesa, ita tenke halo saida?

⁹ Maski ita mak ema kristaun kose-mina ka ema-lubun boot, Jeová fó esperansa kapás ba ita hotu. Maibé atu hetan Jeová nia bensaun, ita tenke halo tuir ninia ukun-fuan sira. (Isaías [Yesaya] 48:17, 18) Porezemplu, iha tempu uluk, Jeová haruka ema Izraél atu halo tuir ninia Ukun-Fuan. Ukun-Fuan neʼe proteje no hanorin sira hodi sira bele moris kontente ho família no belun sira, fila liman ho laran-moos, no hatudu laran-diʼak ba malu. (Êxodo [Keluaran] 20:14; Levítico [Imamat] 19:18, 35-37; Deuteronômio [Ulangan] 6:6-9) Nuneʼe mós ohin loron. Maromak nia ukun-fuan lori diʼak ba ita no la todan ba ita atu halo tuir. (Lee 1 João 5:3.) Kuandu ita kumpre ukun-fuan sira-neʼe, ida-neʼe halo ita kontente no ajuda ita atu sai “metin iha fiar”.—Tito 1:13.

10. Tanbasá mak ita presiza duni estuda Bíblia beibeik no halo Adorasaun Família nian?

¹⁰ Maromak nia organizasaun parte rai nian laʼo ba oin daudauk iha dalan oioin. Liuhusi organizasaun neʼe, ita komprende lia-loos husi Bíblia ho klaru liután. Bíblia fó-hatene nanis: “Ema loos sira-nia dalan mak hanesan loro-matan nia naroman neʼebé sai nabilan liu toʼo loron fahe-rua.” (Provérbios [Amsal] 4:18) Maibé ita ida-idak presiza husu ba ita-nia an: ‘Haʼu komprende mudansa foun kona-ba eskritura balu ka lae? Haʼu lee Bíblia loroloron no badinas lee ita-nia livru foun sira ka lae? Haʼu semana-semana halo Adorasaun Família nian ka lae?’ Maski ladún susar atu halo buat hirak-neʼe, maibé ita tenke fahe tempu. Sin, importante  tebes ba ita atu kontinua estuda Maromak nia Liafuan, halo tuir, no laʼo ba oin hamutuk ho Maromak nia organizasaun, liuliu ohin loron neʼebé terus boot besik ona atu mai!

11. Tanbasá mak ita tuir reuniaun no reuniaun boot sira?

¹¹ Jeová nia organizasaun fó laran-manas ba ita atu halo tuir Paulo nia konsellu neʼebé dehan: “Mai ita hanoin malu hodi ajuda malu atu hatudu domin no hahalok diʼak, no maski ema balu sai toman atu la halibur hamutuk, maibé imi keta haluha atu halibur an hamutuk, no fó laran-manas ba malu, liuliu nuʼudar imi haree loron neʼe besik ona mai.” (Ebreu 10:24, 25) Iha tempu uluk, ema Izraél tinan-tinan halibur beibeik hamutuk hodi tuir selebrasaun sira atu adora Jeová no aprende kona-ba Nia. Porezemplu iha Neemias nia tempu, Selebrasaun Tenda nian lori haksolok tebes ba sira. (Êxodo [Keluaran] 23:15, 16; Neemias 8:9-18) Ohin loron, ita mós iha reuniaun no reuniaun boot sira. Ita tenke hakaʼas an atu tuir reuniaun hotu tanba arranju sira-neʼe ajuda ita atu hakbesik liután ba Jeová no serbí nia ho laran-haksolok.—Tito 2:2.

12. Ita sente oinsá kona-ba serbisu haklaken?

¹² Ita neʼebé hola parte iha Maromak nia organizasaun presiza mós halo serbisu haklaken. Bíblia bolu knaar neʼe nuʼudar “serbisu santu”. (Roma 15:16) Kuandu ita hola parte, neʼe katak ita halo serbisu hamutuk ho “Ida neʼebé Santu”, Maromak Jeová. (1 Pedro 1:15; 1 Korinto 3:9) Haklaken mós lori hahiʼi ba Jeová nia naran santu. No kuandu ita haklaken ‘liafuan diʼak kmanek husi Maromak neʼebé kontente’, ita mós sei sai kontente tebes.—1 Timóteo 1:11.

13. Ita-nia moris no relasaun diʼak ho Jeová depende ba saida?

¹³ Jeová hakarak ita atu moris haksolok hodi hakbesik nafatin ba nia no ninia organizasaun. Moisés hatete ba ema Izraél: “Haʼu tau moris no mate iha ó-nia oin, bensaun no malisan; no ó tenke hili moris atu ó bele moris nafatin, ó no ó-nia oan sira, hodi hadomi Jeová ó-nia Maromak, hodi rona ba ninia liafuan no hodi laran-metin ba nia; tanba nia mak fó moris ba ó.” (Deuteronômio [Ulangan] 30:19, 20) Ita-nia moris depende ba ita-nia domin ba Jeová no ita-nia laran-metin ba nia no ninia organizasaun.

14. Irmaun ida koʼalia saida kona-ba Maromak nia organizasaun?

¹⁴ Irmaun Pryce Hughes, neʼebé aprende lia-loos antes tinan 1914, laran-metin ba Jeová no Ninia organizasaun toʼo mate. Bainhira nia konta esperiénsia, nia hatete: ‘Haʼu aprende katak buat neʼebé importante liu mak atu hakbesik nafatin ba Jeová nia organizasaun no la sadere ba ema nia hanoin. Ida-neʼe ajuda haʼu atu tahan kuandu buat oioin koko haʼu-nia fiar. Atu hetan bensaun husi Jeová, ita tenkesér halo tuir nafatin matadalan husi ninia organizasaun.’

15. Bainhira Jeová nia organizasaun halo mudansa ba eskritura balu, ezemplu saida mak ajuda ita?

¹⁵ Jeová hakarak ita atu apoia ninia organizasaun no simu mudansa kona-ba dalan neʼebé ita komprende lia-loos husi Bíblia. Iha apóstolu nia tempu, ema kristaun judeu balu kaer metin nafatin ba Moisés nia Ukun-Fuan. (Apóstolu 21:17-20) Maibé Paulo hadiʼa  sira-nia hanoin no ajuda sira atu komprende katak Jesus nia sakrifísiu mak kasu sira-nia sala, laʼós hodi hasaʼe sakrifísiu animál nian. (Ebreu 10:5-10) Ema kristaun judeu barak simu Paulo nia konsellu no troka sira-nia hanoin. Sira-nia ezemplu neʼe hanorin ita oinsá atu laʼo ba oin iha lia-loos. Ita tenke estuda Bíblia no ita-nia livru sira, no kuandu Jeová nia organizasaun mak halo mudansa ruma, ita ho haraik-an presiza simu ida-neʼe.

16. (a) Bíblia promete bensaun saida deʼit iha mundu foun? (b) Iha mundu foun, Ita rasik hakarak atu simu bensaun saida?

¹⁶ Ita hotu neʼebé laran-metin ba Jeová no ninia organizasaun sei simu bensaun barak. Ema kose-mina sei ukun hamutuk ho Jesus Kristu nuʼudar liurai iha lalehan. (Roma 8:16, 17) Sira neʼebé iha esperansa atu moris iha mundu sei hetan moris rohan-laek iha paraízu. Jeová nia povu hotu iha mundu tomak iha knaar espesiál atu haklaken kona-ba esperansa neʼe. (2 Pedro 3:13) Salmo (Mazmur) 37:11 hatete: “Ema laran-maus sei simu rai, no sira sei haksolok tebes ho dame neʼebé la iha rohan.” Ema hotu sei iha serbisu neʼebé halo sira kontente. “Sira sei harii rasik uma no hela.” (Isaías [Yesaya] 65:21, 22) Iha mundu foun neʼe, ema sei la trata aat ba malu no la iha tan ema kiak no hamlaha. (Salmo [Mazmur] 72:13-16) Relijiaun falsu neʼebé bosok kona-ba Maromak sei lakon hotu. (Apokalipse 18:8, 21) Ema mate sei moris hiʼas fali no hetan oportunidade atu moris ba nafatin iha mundu neʼe. (Isaías [Yesaya] 25:8; Apóstolu 24:15) Se ita hametin nafatin ita-nia relasaun ho Jeová no laʼo ba oin hamutuk ho ninia organizasaun, promesa furak sira-neʼe hotu sei sai loos ba ita.

17. Ita-nia hanoin ba Jeová no ninia organizasaun tenkesér oinsá?

¹⁷ Lakleur tan, Satanás nia mundu aat neʼe sei ramata. Tan neʼe, ita presiza hametin nafatin ita-nia fiar no adora Jeová hodi hafolin ninia organizasaun. Ita sente hanesan ho David neʼebé kanta: “Haʼu husu ona buat ida ba Jeová, neʼe mak buat neʼebé haʼu hakarak duni, katak haʼu bele hela iha Jeová nia uma iha haʼu-nia moris tomak, atu haree Jeová nia laran-diʼak no atu hateke ba ninia templu ho laran-haksolok.” (Salmo [Mazmur] 27:4) Sin, mai ita hotu hakbesik nafatin ba Jeová no laʼo ba oin hamutuk ho ninia organizasaun.