IHA tinan 1923, salaun boot ida iha São Paulo sai nakonu ho ema. Irmaun George Young mak hatoʼo diskursu no ema seluk tradús ba lia-portugés, no ema hamutuk naʼin-585 mak rona didiʼak diskursu neʼe. Irmaun sira uza kámera filme hodi leno sai Eskritura sira iha didin lolon. Ikusmai, rona-naʼin sira simu tratu ho tema Ema Rihun ba Rihun neʼebé Moris Agora sei La Mate! iha lia-portugés, inglés, alemaun, no italianu. Reuniaun neʼe hetan duni susesu, no ema neʼebé tuir konta fali ba ema seluk. Liutiha kalan rua, salaun neʼe sai nakonu fali ho ema neʼebé rona diskursu ida seluk. Maibé, oinsá mak ida-neʼe akontese iha rai-Brazíl?

Iha tinan 1867, feto ida naran Sarah Bellona Ferguson ho ninia família muda ba Brazíl husi rai-Estadus Unidus. Iha tinan 1899, Sarah nia alin bá vizita Sarah, no lori husi Estadus Unidus livru balu neʼebé esplika kona-ba Bíblia. Lee tiha livru sira-neʼe, Sarah hatene katak nia hetan lia-loos. Sarah husu atu simu Livru Haklaken iha lia-inglés fulan-fulan liuhusi korreiu. Tanba nia kontente ho lia-loos husi Bíblia, nia hakerek ba irmaun C. T. Russell katak ninia esperiénsia neʼe “prova katak lia-loos bele toʼo ba ema neʼebé hela iha fatin dook liu”.

Sarah Ferguson hakaʼas an tebes atu haklaken lia-loos ba ema seluk, maibé nia la hatene sé mak bele ajuda nia, ninia família, no mós ema diʼak neʼebé hela iha Brazíl. Iha tinan 1912, Betel Brooklyn fó-hatene nia katak lakleur ema ruma sei bá vizita São Paulo ho tratu barak iha lia-portugés ho títulu Ema neʼebé Mate Ona Iha Neʼebé? Iha tinan 1915, Sarah hatete katak nia sempre hakfodak kona-ba Estudante Bíblia barak neʼebé hanoin lakleur sira sei saʼe ba lalehan, hodi hakerek: “Oinsá ho rai-Brazíl no Amérika Súl tomak? . . . Kuandu ita hanoin Amérika Súl mak rai neʼebé boot tebes, la susar atu haree  katak serbisu koʼa nian seidauk hotu.” Loos duni, serbisu koʼa nian tenke kontinua!

Maizumenus iha tinan 1920 iha sidade Novaiorke, ró-naʼin sira husi Brazíl presiza hadiʼa sira-nia ró funu nian, no nuʼudar hein ida-neʼe sira naʼin-ualu tuir reuniaun sira. Kuandu sira fila fali ba Rio de Janeiro, sira haklaken ba ema seluk kona-ba sira-nia esperansa foun neʼe husi Bíblia. Liutiha tempu uitoan iha Marsu tinan 1923, George Young neʼebé iha knaar atu vizita kongregasaun sira, bá Rio de Janeiro no hetan ema balu neʼebé hakarak rona. Nia arranja hodi tradús ita-nia livru balu iha lia-portugés. Depois neʼe, irmaun Young bá sidade São Paulo neʼebé iha ema naʼin-600.000. Iha neʼe, nia hatoʼo diskursu no fahe tratu foun, neʼebé temi ona iha leten. Irmaun Young hakerek ba sede-jerál: “Tanba haʼu mesak, haʼu presiza konvida ema liuhusi jornál atu mai rona diskursu. Ida-neʼe mak tempu primeiru neʼebé Estudante Bíblia Internasionál uza jornál iha rai-Brazíl hodi fó sai kona-ba diskursu públiku.”

Livru Haklaken 15 Dezembru 1923 koʼalia kona-ba Brazíl: “Kuandu ita hanoin filafali katak serbisu haklaken neʼe foin komesa iha 1 Juñu no foufoun la iha livru ida atu fahe, ita hatene duni katak Naʼi mak haraik bensaun ba serbisu neʼe.” Informasaun hatutan tan katak husi 1 Juñu toʼo 30 Setembru, irmaun Young hatoʼo diskursu públiku 21 no ema naʼin-3.600 mak asiste, rua husi diskursu neʼe hatoʼo iha São Paulo hanesan temi iha leten. Ikusmai, mensajen kona-ba Maromak nia Ukun habelar iha Rio de Janeiro. Iha fulan balu deʼit sira fahe ita-nia livru sira maizumenus 7.000 iha lia-portugés. No mós sira komesa tradús Livru Haklaken edisaun Novembru toʼo Dezembru 1923 iha lia-portugés.

George Young mós konsege hetan Sarah Ferguson. Livru Haklaken konta kona-ba neʼe: “Kuandu irmán neʼe tama sala-vizita, nia la bele koʼalia tanba hakfodak loos. Sarah kaer irmaun Young nia liman no hateke didiʼak ninia oin, ikusmai nia dehan: ‘Eipá! Tebes ka? Ita mak irmaun neʼebé mai vizita kongregasaun ka?’” Lakleur, irmán Sarah no ninia oan naʼin-haat hetan batizmu. Tuir loloos, nia hein kleur atu hetan batizmu toʼo tinan 25! Livru Haklaken 1 Agusto 1924 temi katak ema naʼin-50 hetan batizmu iha Brazíl, no barak mak husi Rio de Janeiro.

Tinan 90 liu tiha ona, no agora ema ida lalika husu: “Oinsá ho rai-Brazíl no Amérika Súl tomak?” tanba Testemuña ba Jeová naʼin-760.000 liu mak haklaken liafuan diʼak iha Brazíl. No iha Amérika Súl tomak, ema bele rona mensajen kona-ba Maromak nia Ukun iha lia-portugés, españól, no lian distritu barak. Iha tinan 1915, Sarah Ferguson koʼalia loos hodi hatete: ‘Serbisu koʼa nian seidauk hotu!’—Husi ita-nia arkivu iha Brazíl.