1, 2. Tanbasá mak apóstolu Paulo komprende ema nia fraku?

 ITA hotu dala ruma sente isin fraku, moras, kole, no susar atu book an. Maibé hanoin toʼok, se ita sente hanesan neʼe ba tempu kleur, ita hakarak ema seluk atu hatudu hahalok saida ba ita? Klaru katak ita hakarak sira atu hanoin ita hodi komprende ita-nia situasaun.

² Apóstolu Paulo mós dala ruma sente kole tanba nia hasoru susar oioin husi ema iha kongregasaun no ema iha liʼur. Situasaun sira hanesan neʼe akontese dala hira ona iha ninia moris hodi halo nia sente la bele tahan tan. (2 Korinto 1:8; 7:5) Ninia esperiénsia rasik ajuda nia komprende kona-ba ema neʼebé fraku nia situasaun. (2 Korinto 11:29) Paulo kompara ema iha kongregasaun hanesan ho ema nia isin hodi hatete: “Parte isin nian neʼebé haree nuʼudar la iha kbiit, sira mak importante.” (1 Korinto 12:22) Ninia liafuan neʼe dehan sá? Oinsá Jeová nia hanoin ba ema neʼebé haree hanesan fraku? Oinsá mak ita mós bele iha hanoin hanesan Jeová? No ida-neʼe sei lori rezultadu saida mai ita?

3. Saida mak bele book ita atu hanoin ladiʼak kona-ba ita-nia maluk sira?

³ Iha mundu, ema barak buka oin deʼit hodi la hanoin ema kiʼik sira. Sira hanoin katak atu hetan susesu, ita tenkesér joven no iha forsa. Maski ita la simu duni hahalok neʼe, maibé se ita la kuidadu, ita mós bele komesa lakon pasiénsia no iha hanoin ladiʼak ba ita-nia maluk neʼebé presiza ajuda beibeik. Oinsá mak ita bele hadiʼa ita-nia hanoin kona-ba ita-nia irmaun-irmán sira hodi tuir Jeová nia hanoin?

4, 5. (a) Paulo nia liafuan kona-ba ema nia isin-lolon hanorin saida kona-ba Jeová nia hanoin ba ita? (b) Bainhira ita fó tulun ba ita-nia maluk, oinsá mak ida-neʼe lori diʼak ba ita rasik?

⁴ Ita bele hatene Jeová nia hanoin kona-ba ema iha kongregasaun husi Paulo nia karta ba ema kristaun iha Korinto. Iha 1 Korinto kapítulu 12, Paulo hatete katak parte isin nian neʼebé kiʼik liu mós importante. (Lee 1 Korinto 12:12, 18, 21-23.) Maibé ema balu neʼebé fiar ba evolusaun hanoin oin-seluk. Sira hatete katak ita la presiza parte balu husi ita-nia isin. Maibé, ohin loron sientista sira neʼebé estuda kona-ba ema nia isin-lolon hatene katak parte balu neʼebé uluk sira hanoin la vale mós halo serbisu importante. Porezemplu, iha tempu uluk, balu hatete katak ita la presiza ain-fuan kiʼik, maibé agora sientista hatene katak ain-fuan kiʼik mak importante tebes hodi ita bele hamriik no la monu.

⁵ Paulo nia liafuan kona-ba ema nia isin-lolon hatudu katak ema hotu iha kongregasaun mak importante. Satanás hakarak ita atu la hafolin an, maibé tuir Jeová nia haree, ninia atan hotu mak folin-boot, inklui mós sira neʼebé haree hanesan fraku. (Jó [Ayub] 4:18, 19) Ida-neʼe halo ita sente kontente tanba ita hotu hola parte importante iha kongregasaun husi Maromak nia povu iha mundu tomak. Porezemplu, hanoin filafali ba tempu neʼebé ita fó tulun ba ita-nia maluk ida neʼebé idade ona. Nia hetan ita-nia tulun, maibé neʼe mós lori diʼak ba ita rasik. Oinsá? Bainhira ita ajuda irmaun ka irmán, ita sente kontente, no husi neʼe mak ita bele haburas pasiénsia, domin no hahalok diʼak seluk tan. (Éfeso 4:15, 16) Jeová hakarak ita atu hafolin ita-nia maluk kristaun hotu maski sira balu haree hanesan fraku. Kuandu ita halo nuneʼe, ita bele haburas pasiénsia no domin ba malu iha kongregasaun laran.

6. Paulo uza liafuan “fraku” ka “metin” hodi esplika kona-ba saida?

⁶ Iha Paulo nia karta ba ema kristaun iha Korinto, nia uza liafuan “kbiit-laek” ka “fraku” atu koʼalia kona-ba mundu nia haree ba ema kristaun sira no oinsá nia rasik sente kona-ba ninia an. (1 Korinto 1:26, 27; 2:3) Kuandu nia uza liafuan “metin” atu koʼalia kona-ba ema kristaun balu, nia la dehan katak sira mak diʼak liu fali ema seluk. (Roma 15:1) Paulo dehan deʼit katak ema kristaun neʼebé iha esperiénsia barak tenke hatudu pasiénsia ba sira neʼebé seidauk metin iha lia-loos.

7. Saida mak bele hanetik ita atu la fó tulun ba maluk sira?

⁷ Kuandu ita ajuda “ema kbiit-laek” sira, ita banati-tuir Jeová no halo nia kontente. (Salmo [Mazmur] 41:1; Éfeso 5:1) Maibé, dala ruma ita haree ita-nia maluk ladún diʼak tanba hanoin katak sira mak presiza hadiʼa sira-nia problema rasik, no ida-neʼe bele hanetik ita atu la fó tulun ba sira. Ka, karik ita la hatene koʼalia saida ba sira neʼebé iha susar laran. Porezemplu, irmán ida  naran Sinta, a neʼebé ninia laʼen husik tiha nia, hatete: “Se irmaun-irmán sira dada an, ka la ajuda ita nuʼudar belun diʼak, ida-neʼe halo ita triste. Kuandu ita hasoru susar, ita presiza ita-nia maluk iha ita-nia sorin.” Liurai David mós sente triste bainhira ema seluk sees husi nia.—Salmo (Mazmur) 31:12.

8. Saida mak ajuda ita atu komprende ita-nia maluk neʼebé presiza ita-nia tulun?

⁸ Atu hadiʼa ita-nia hanoin ba maluk neʼebé presiza ita-nia tulun, hanoin kona-ba susar no terus neʼebé sira hasoru. Porezemplu, sira balu tahan moras ruma ka depresaun, balu tan hela hamutuk ho família neʼebé fiar la hanesan. Se loron ida ita mós hasoru susar hanesan sira, ita hakarak ema seluk atu komprende ita. Antes Jeová lori povu Izraél ba rai neʼebé nia promete, nia fó avizu ba sira atu la haluha susar neʼebé sira hasoru iha rai-Ejitu, no labele ‘halo toos sira-nia laran’ ba ema neʼebé kiak no kbiit-laek.—Deuteronômio (Ulangan) 15:7, 11; Levítico (Imamat) 25:35-38.

9. Kuandu ita-nia maluk ida sai fraku, ita presiza halo saida? Esplika toʼok.

⁹ Ita labele duun ka tesi lia lalais ba ita-nia maluk neʼebé hasoru problema. Duké sai hanesan neʼe, ita tenkesér ajuda lalais sira neʼebé iha susar laran. (Jó [Ayub] 33:6, 7; Mateus 7:1) Porezemplu, kuandu ema ida neʼebé lori motór hetan asidente no foin toʼo iha emerjénsia iha ospitál, doutór no enfermeira sira sei soe tempu hodi haksesuk malu kona-ba sé mak halo asidente neʼe ka lae? Lae, sira fó kedas tratamentu ba ema neʼe. Hanesan neʼe mós, kuandu ita-nia maluk ida mak sai fraku tanba problema ruma, ita hakarak ajuda kedas nia hodi nia bele sai metin fali iha lia-loos.—Lee 1 Tesalónika 5:14.

10. Oinsá ema kristaun balu neʼebé haree hanesan “fraku” mós loloos “riku iha fiar”?

¹⁰ Se ita hanoin didiʼak kona-ba irmaun-irmán nia situasaun, ida-neʼe bele ajuda ita atu troka ita-nia hanoin kona-ba sira hodi haree katak sira la “fraku” ida. Porezemplu, hanoin toʼok kona-ba irmán sira neʼebé tahan hasoru susar husi família ba tempu kleur. Sira balu haree hanesan kbiit-laek, maibé loloos hatudu fiar metin. Oinsá ho irmán sira neʼebé mesak haboot oan, maibé la falta reuniaun? Ka, joven sira neʼebé loroloron hetan susar iha eskola tanba sira kaer metin ba lia-loos? Sira hotu hadomi Jeová no hakarak atu laran-metin nafatin ba nia. Kuandu ita hanoin didiʼak kona-ba ita-nia maluk sira-nia hakaʼas-an hodi serbí Jeová, ida-neʼe sei ajuda ita atu hatene katak sira loloos “riku iha fiar”.—Tiago 2:5.

11, 12. (a) Saida mak ajuda ita atu hadiʼa ita-nia hanoin ba maluk sira-nia fraku? (b) Tanbasá mak Jeová fó perdua ba Aarão? Ita bele aprende saida?

¹¹ Hodi hadiʼa ita-nia hanoin ba ita-nia maluk sira-nia fraku, mai ita buka-hatene dalan neʼebé Jeová haree ba ninia atan balu iha tempu uluk. (Lee Salmo [Mazmur] 130:3. b) Porezemplu, hanoin toʼok se ita mós hamutuk ho Moisés kuandu Aarão halo estátua karau-oan osan-mean. Ita sei hanoin saida kona-ba Aarão nuʼudar nia fó razaun ladiʼak oioin hodi taka ninia sala? (Êxodo [Keluaran] 32:21-24) Ka, ita sente oinsá kuandu Aarão rona ba Miriam no kritika Moisés tanba ninia kaben mak feto husi rai seluk? (Números [Bilangan] 12:1, 2) Oinsá ho tempu neʼebé Aarão no Moisés la fó hahiʼi ba Jeová kuandu hasai bee husi fatuk-boot?—Números (Bilangan) 20:10-13.

 ¹² Bainhira Aarão halo sala, Jeová bele fó kastigu kedas ba nia. Maibé Jeová haree Aarão nia laran no hatene katak nia laʼós ema neʼebé laran-aat. Ita bele dehan katak Aarão halo sala tanba durante situasaun susar, nia rona tuir deʼit ema seluk. Maibé Aarão prontu atu rekoñese ninia sala hodi simu Jeová nia konsellu. (Êxodo [Keluaran] 32:26; Números [Bilangan] 12:11; 20:23-27) Tan neʼe Jeová hili atu haree Aarão nia fiar no fó perdua ba nia. Liutiha tinan barak, Maromak nia Liafuan temi Aarão ho ninia família nuʼudar Jeová nia atan neʼebé diʼak.—Salmo (Mazmur) 115:10-12; 135:19, 20.

13. Ita bele halo saida hodi troka dalan neʼebé ita haree maluk sira?

¹³ Ita-nia maluk mós bele halo sala hanesan Aarão. Kuandu ida-neʼe akontese, ita haree nia oinsá? Ita tenke hadiʼa ita-nia hanoin ka lae? (1 Samuel 16:7) Porezemplu, se ita haree ita-nia maluk joven ida neʼebé iha hahalok no atividade halimar nian neʼebé ladún diʼak, ita hanoin saida? Duké tesi lia kedas ba nia, diʼak liu atu hanoin uluk oinsá ita bele ajuda nia atu halo desizaun neʼebé matenek. Karik ita bele fahe ita-nia tempu hodi ajuda nia. Tanba hodi halo nuneʼe, ita mós sei haburas ita-nia domin no pasiénsia.

14, 15. (a) Bainhira Elias sai taʼuk no laran-tun, Jeová halo saida? (b) Elias nia esperiénsia hanorin saida mai ita?

¹⁴ Ita mós bele hadiʼa ita-nia hanoin ba ema neʼebé laran-tun hodi haree oinsá Jeová ajuda ninia profeta ida naran Elias. Elias foin hamriik hasoru maromak Baal nia profeta naʼin-450, maibé tuirmai nia rona katak liurai-feto Jezabel mak buka atu oho nia. Elias sai taʼuk no laran-tun tebes, tan neʼe nia halai ba kilómetru 150 toʼo Beer-Seba, hodi laʼo tama iha rai-fuik laran. Elias sai kole no laran-kraik toʼo nia hakarak mate deʼit.—1 Reis (Raja-Raja) 18:19; 19:1-4.

 ¹⁵ Entaun, bainhira Jeová haree ninia atan neʼebé sai taʼuk no laran-tun tebes, Nia halo saida? Jeová sai hirus hodi husik ona Elias ka lae? Lae. Jeová haruka anju ida atu ajuda nia. Ba dala rua, anju neʼe fó han ba Elias hodi nia bele hetan fali forsa atu bele kontinua ninia viajen. (Lee 1 Reis [Raja-Raja] 19:5-8. c) Sin, duké haruka kedas Elias atu halo buat ruma, Jeová rona didiʼak ba nia no tau matan ba ninia presiza.

16, 17. Oinsá mak ita bele ajuda ita-nia maluk hodi banati-tuir Jeová nia ezemplu?

¹⁶ Oinsá mak ita bele banati-tuir Jeová nia ezemplu? Keta sai ema neʼebé lalais atu fó konsellu ba ita-nia maluk hodi hatete buat neʼebé sira tenke halo. (Provérbios [Amsal] 18:13) Atu ajuda ema neʼebé laran-tun ka sente la iha folin, ulukliu ita presiza komprende ninia situasaun no hatudu katak ita hanoin hela nia. (1 Korinto 12:23) Hodi halo nuneʼe mak ita sei hatene ho loloos oinsá ita bele ajuda nia.

¹⁷ Porezemplu, hanoin fali kona-ba irmán Sinta, neʼebé ninia laʼen husik tiha nia ho oan-feto naʼin-rua. Oinsá mak maluk iha kongregasaun ajuda? Sinta hatete: “Ami telefone sira hodi fó-hatene kona-ba buat neʼebé akontese, no la toʼo oras ida, sira mai vizita ami. Sira mós tanis. Durante loron rua ka tolu, sira la husik ami mesak. Tanba ami hanoin barak no ladún han, sira konvida ami atu hela ho sira.” Sin, Sinta nia maluk halo tuir buat neʼebé livru Tiago hatete: “Se maluk fiar-naʼin ida kuran roupa no ninia ai-han la toʼo ba loron neʼe, no imi ida dehan ba nia: ‘Bá ho dame, halo manas ó-nia an bá no sai bosu bá’, maibé imi la fó buat neʼebé nia presiza ba ninia isin, ida-neʼe folin saida? Nuneʼe mós, se fiar la hamutuk ho hahalok, fiar neʼe mate.” (Tiago 2:15-17) Hodi hetan irmaun-irmán sira-nia ajuda, liutiha fulan neen, Sinta ho ninia oan sira iha ona kbiit hodi foti pioneiru estra.—2 Korinto 12:10.

18, 19. (a) Hodi halo saida deʼit mak ita bele ajuda ita-nia maluk neʼebé “fraku”? (b) Kuandu ita ajuda ema seluk, ida-neʼe bele lori rezultadu saida?

¹⁸ Kuandu ita sai moras, dala ruma ita presiza hein ba tempu kleur atu sai isin-diʼak fali. Hanesan neʼe mós, kuandu ema kristaun ida halo sala ruma ka hasoru situasaun susar, karik nia presiza tempu kleur atu sai diʼak fali. Klaru katak nia presiza estuda Maromak nia Liafuan, halo orasaun ba Jeová no tuir reuniaun beibeik hodi hametin liután ninia fiar. Maibé nia mós presiza ita-nia ajuda. Durante ninia tempu susar neʼe, ita presiza hatudu pasiénsia, no hatudu katak ita hadomi nia no hafolin nia iha kongregasaun.—2 Korinto 8:8.

¹⁹ Kuandu ita ajuda ita-nia maluk, ida-neʼe mós halo ita kontente. Ita aprende oinsá atu hatudu domin no pasiénsia ba ema seluk. Liután neʼe, ita-nia hahalok sei kona kongregasaun tomak hodi haburas domin ba malu. Laʼós neʼe deʼit, kuandu ita “tau matan ba sira neʼebé fraku”, ita banati-tuir Jeová, neʼebé haree ita ida-idak nuʼudar ninia atan neʼebé iha folin boot.—Apóstolu 20:35.