Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Iha loron 14 Nisan, iha tempu saida mak ema Izraél sira oho bibi atu hasaʼe sakrifísiu?

Tuir tradusaun Bíblia balu, Êxodo (Keluaran) 12:6 hatete katak sira tenke oho bibi “iha rai-nakaras, no antes nakukun”. Ida-neʼe katak depois loro-matan monu, maibé kuandu sei naroman uitoan hela.—15/12, pájina 18-19.

Oinsá mak Ita bele ajuda Ita-nia oan joven atu haburas ninia “kbiit atu hanoin” duké haksesuk malu? (Provérbios [Amsal] 1:4)

Bainhira nia fó sai ninia hanoin, dala ruma nia mós ladún metin kona-ba ninia desizaun sira. Antes atu hadiʼa ninia hanoin, ulukliu gaba nia. Depois, ajuda nia atu troka ninia hanoin. Karik Ita sei hakfodak kona-ba oinsá nia troka lalais ninia desizaun.—1/1, pájina 9.

Bíblia nia matadalan saida deʼit mak bele ajuda joven sira atu halo desizaun diʼak?

(1) Buka uluknanain Maromak nia Ukun no ninia hakarak. (Mateus 6:19-34) (2) Hetan haksolok hodi serbí ema seluk. (Apóstolu 20:35) (3) Serbí Jeová ho laran-haksolok. (Eclesiastes [Pengkhotbah] 12:1)—15/1, pájina 19-20.

Bainhira loos mak sei halaʼo “Bibi-Oan nia kazamentu”? (Apokalipse 19:7)

Depois Babilónia Boot lakon mohu tiha no Kristu manán inimigu hotu iha funu Armajedón, tuirmai mak Bibi-Oan sei kaben ho ninia noiva.—15/2, pájina 10.

Ema judeu sira iha tempu uluk iha razaun saida atu “hein namanas” ba Mesias? (Lucas 3:15)

Ita la hatene ho loloos se ema judeu sira iha Jesus nia tempu komprende Daniel nia profesia kona-ba Mesias. (Daniel 9:24-27) Maibé karik sira barak hatene kona-ba anju sira neʼebé mosu ba bibi-atan bainhira Jesus moris, no mós kona-ba liafuan husi profeta Ana hodi haree bebé Jesus iha templu. Siʼikdór sira neʼebé haree fitun mós buka “liurai judeu sira-nian”. (Mateus 2:1, 2) Liutiha tempu balu, João Batista hatete katak lakleur Kristu sei mai.—15/2, pájina 26-27.

Hodi labele ‘dehan uluk Sin no tuirmai Lae’, ita presiza halo saida? (2 Korinto 1:18)

Maski dala ruma ita presiza troka ita-nia arranju tanba situasaun ruma mosu, maibé se ita promete atu halo buat ruma, ita tenke hakaʼas an atu kumpre ida-neʼe.—15/3, pájina 32.

Durante loron haat neʼebé Lázaro mate, nia iha neʼebé?

Lázaro la konta katak durante loron haat neʼe nia moris iha fatin seluk. Lázaro la iha klamar ida neʼebé bá lalehan. Tuir loloos, nia hanesan toba deʼit iha rate.—1/4, pájina 14.

Se ema kristaun ida husik ninia kaben no oan sira hodi bá serbisu iha rai seluk, ida-neʼe bele lori problema saida deʼit?

Kuandu inan-aman ho oan sira la hela hamutuk, ida-neʼe sei kona oan sira-nia sentimentu no morál. Karik sira sai laran-hirus ba inan-aman. No bainhira feen-laʼen dook malu, ida-neʼe bele lori perigu ba sira hodi halo sala-foʼer.—15/4, pájina 19-20.

Kuandu haklaken, pergunta haat saida mak ita tenke hanoin-hetan?

Ema neʼebé haʼu koʼalia neʼe sé? Iha neʼebé mak haʼu koʼalia? Bainhira mak tempu diʼak atu koʼalia ba ema? Haʼu koʼalia iha dalan oinsá?—15/5, pájina 12-15.