HAʼU-NIA aman moris iha tinan 1899, iha sidade Graz, rai-Áustria, no durante Funu Mundiál Primeiru, nia joven hela. Bainhira Funu Mundiál Segundu hahú iha tinan 1939, nia tama ba tropa Alemaña. Ikusmai iha tinan 1943, nia mate durante funu hasoru Rúsia. Iha tempu neʼebá, haʼu tinan rua deʼit, tan neʼe haʼu nunka hatene nia. Iha eskola, haʼu triste tebes kuandu haʼu haree haʼu-nia kolega sira seluk iha aman, maibé haʼu aman la iha. Ikusmai, kuandu haʼu joven, haʼu hetan kmaan hodi aprende kona-ba ita-nia Aman iha lalehan, neʼebé nunka mate.—Habacuque (Habakuk) 1:12.

Bainhira haʼu tinan hitu, haʼu tama iha organizasaun juventude ida, ka grupu eskutizmu. Organizasaun neʼe harii iha tinan 1908 husi ema-boot ida iha tropa Bretaña, naran Robert Baden-Powell. Iha tinan 1916, nia mós hahú grupu ida ba labarik-mane ho idade kiʼik liu, naran Wolf Cubs (Asu-Fuik Oan).

Haʼu gosta bá laʼo pasiar hamutuk ho maluk joven sira ba foho iha findesemana. Ami toba iha tenda, hatais farda, no marxa hamutuk hodi tuir tambór. Ami halimar game oioin iha ai-laran, no iha kalan tuur halimar no kanta hamutuk hodi haneruk ahi. Ami mós aprende buat barak kona-ba ai-horis no animál sira, no ida-neʼe hanorin haʼu atu hadomi Maromak nia kriasaun.

Husi organizasaun juventude neʼe, haʼu mós aprende atu hatudu hahalok diʼak loron-loron no kumprimentu ba maluk juventude ho liafuan “Matan-moris!” Haʼu gosta tebes ida-neʼe. Iha ami-nia grupu ho labarik-mane naʼin-100 liu, maizumenus porsentu 50 mak ema katóliku, porsentu 50 tan mak protestante, no iha labarik ida mak budista.

Husi tinan 1920, organizasaun neʼe komesa halaʼo reuniaun internasionál. Ida mak reuniaun neʼebé halaʼo iha Bad Ischl, Áustria, iha Agostu 1951. Ida seluk halaʼo besik Birmingham, rai-Inglaterra, iha Agostu 1957, neʼebé joven naʼin-33.000 husi rai hamutuk 85 mak tuir. Iha reuniaun boot neʼe, ema maizumenus naʼin-750.000 mak asiste, inklui mós rai-Inglaterra nia Liurai-Feto Elizabeth. Hodi sai parte husi organizasaun internasionál mak buat neʼebé halo haʼu kontente tebes. Iha tempu neʼebá, haʼu seidauk hatene katak lakleur haʼu sei hetan organizasaun ida neʼebé diʼak liután, husi ema neʼebé hadomi Maromak.

Iha fulan-Marsu 1958, haʼu besik ona atu ramata haʼu-nia treinu atu serbisu iha otél naran Grand Hotel Wiesler, iha Graz, Áustria. Haʼu-nia maluk serbisu, naran Rudolf Tschiggerl, neʼebé halo paun no dose, nia fó sasin mai haʼu. Neʼe mak primeiravés ba haʼu atu rona kona-ba lia-loos. Nia hatete katak doutrina Trindade laʼós mai husi Bíblia. Haʼu koko atu esplika husi Bíblia katak nia mak sala. Haʼu gosta Rudolf, tan neʼe haʼu hakarak nia atu fila fali ba igreja katólika.

Rudolf, neʼebé haʼu sempre bolu Rudi, hakarak fó Bíblia mai haʼu. Haʼu hatete fali ba nia katak haʼu simu só Bíblia katóliku nian deʼit. Bainhira haʼu loke Bíblia neʼebé Rudi lori, haʼu hetan tratu ida husi Associação Watchtower. Haʼu lakohi lee ida-neʼe, tanba tuir haʼu-nia hanoin, tratu hanesan neʼe bele haree loos, maibé bosok deʼit. Maski nuneʼe, haʼu kontente nafatin atu koʼalia ho Rudi kona-ba Bíblia. Rudi mós la koko tan atu fahe ninia livru sira. Ba fulan tolu, ami koʼalia deʼit kona-ba Bíblia, dala ruma toʼo kalan-boot.

Bainhira haʼu-nia treinu iha Grand Hotel Wiesler ramata, haʼu-nia inan haruka haʼu bá eskola ida tan iha aldeia Bad Hofgastein iha foho Alps hodi hetan treinu nuʼudar xefe iha otél. Tanba eskola neʼe iha relasaun ho Grand Hotel Bad Hofgastein, haʼu mós dala ruma serbisu iha neʼebá.

Rudi fó-hatene ba sukursál kona-ba haʼu-nia hela-fatin foun, no sukursál husu fali ba irmán misionária naʼin-rua naran Ilse Unterdörfer no Elfriede Löhr atu vizita haʼu. Loron ida, serbisu-naʼin iha otél dehan katak señora naʼin-rua iha karreta laran iha otél nia oin hodi hakarak hasoru haʼu. Haʼu bá buka-hatene sé. Ikusmai, haʼu hatene katak iha tempu Nazi, sira serbisu subasubar hodi lori Testemuña nia livru no karta sira ba sidade oioin. Antes Funu Mundiál Segundu komesa, polísia kaer sira no hatama sira iha prizaun Lichtenburg. Tuirmai, durante funu, sira muda ba prizaun Ravensbrück, neʼebé besik sidade Berlín.

Tanba irmán sira-neʼe idade hanesan haʼu-nia inan, haʼu respeitu sira. Haʼu lakohi halo sira soe tempu atu koʼalia ho haʼu no ikusmai haʼu hatete katak haʼu la interese ida. Tan neʼe, haʼu husu ba sira atu hakerek eskritura balu neʼebé esplika doutrina katólika nian katak apóstolu Pedro mak igreja nia hun no amu-papa sira mak hatutan tan. Haʼu hakarak lori ida-neʼe ba igreja atu koʼalia hamutuk ho padre. Haʼu hanoin katak neʼe mak dalan ba haʼu atu hatene lia-loos.

Igreja katólika hanorin katak apóstolu Pedro mak amu-papa sira-nia hun hodi uza Mateus 16:18, 19. Igreja mós hatete katak amu-papa sei nunka koʼalia sala kona-ba doutrina, no ema katólika tau fiar metin ba nia. Nuneʼe, haʼu fiar metin ba doutrina Trindade tanba amu-papa mak  hatete katak neʼe mak loos. Maibé, haʼu mós komesa hanoin: ‘Se amu-papa mós sala-naʼin, neʼe dehan katak doutrina Trindade mós karik la loos.’

Haʼu bá koʼalia ho padre, maibé nia la bele fó resposta ba haʼu-nia pergunta sira. Nia fó-empresta mai haʼu livru ida kona-ba oinsá apóstolu Pedro nia kbiit tutan ba amu-papa sira. Haʼu lori livru neʼe ba uma no lee didiʼak, depois fila fali ba padre ho pergunta barak liután. Padre neʼe la konsege hatán, no ikusmai hatete mai haʼu: “Haʼu la bele troka ó-nia hanoin, no ó mós la bele troka haʼu-nian. . . . Mak neʼe deʼit ona!” Nia lakohi tan atu koʼalia ho haʼu.

Depois neʼe, haʼu sente prontu atu estuda Bíblia ho irmán Ilse no Elfriede. Sira hanorin haʼu buat barak kona-ba Aman Maromak Jeová iha lalehan. (João 17:11) Iha tempu neʼebá, la iha kongregasaun ida iha ami-nia área, tan neʼe irmán Ilse no Elfriede mak halaʼo reuniaun kiʼik iha estudante ida nia uma, no ema uitoan deʼit mak tuir. Baibain, sira naʼin-rua koʼalia ba malu kona-ba ita-nia livru sira hanesan drama kiʼik, tanba la iha irmaun ida neʼebé dirije reuniaun. Dala ruma, irmaun husi kongregasaun seluk mak vizita ami, no nia hatoʼo diskursu públiku iha fatin neʼebé ami aluga.

Haʼu komesa estuda Bíblia ho Ilse no Elfriede iha fulan-Outubru 1958, no liutiha fulan tolu, katak iha fulan-Janeiru 1959, haʼu hetan batizmu. Antes batizmu, haʼu husu atu tuir haklaken husi uma ba uma tanba haʼu hakarak haree. (Apóstolu 20:20) Bainhira haʼu tuir haklaken ba dala primeiru, haʼu husu haʼu rasik nia haklaken-fatin. Sira fó aldeia ida, tan neʼe haʼu bá haklaken mesak, depois haʼu mós halo vizita fali ba ema neʼebé hatudu interese ba lia-loos. Haʼu haklaken mesak deʼit ba tempu kleur, maibé ikusmai, haʼu hetan oportunidade atu haklaken hamutuk ho katuas área nian neʼebé vizita ami.

Iha tinan 1960, kuandu haʼu ramata tiha haʼu-nia eskola kona-ba serbisu iha otél, haʼu fila fali ba haʼu-nia família hodi koko atu ajuda sira aprende kona-ba lia-loos husi Bíblia. Maibé toʼo agora, sira ida seidauk tama lia-loos maski balu hatudu interese uitoan.

Iha tinan 1961, kongregasaun sira hetan karta husi sukursál hodi fó laran-manas ba irmaun-irmán sira atu foti pioneiru. Haʼu sei klosan ho isin-diʼak, tan neʼe haʼu la iha razaun atu la bele foti pioneiru. Haʼu hakbesik ba katuas área nian, naran Kurt Kuhn, hodi husu ninia hanoin kona-ba haʼu-nia planu. Neʼe mak atu kontinua serbisu manán osan ba fulan balu tan atu hola karreta tanba karreta bele ajuda haʼu atu pioneiru. Nia dehan: “Jesus no apóstolu sira presiza karreta atu haklaken tempu-tomak ka lae?” Liafuan neʼe book makaʼas haʼu-nia laran! Haʼu planu fali atu komesa pioneiru hodi la demora. Maibé tanba haʼu serbisu iha restaurante iha otél semana ida oras 72, haʼu presiza halo mudansa.

Haʼu husu ba haʼu-nia patraun se haʼu bele serbisu ba oras 60 duké oras 72. Nia hatán, no nia mós la hamenus haʼu-nia saláriu. Liutiha tempu balu, haʼu husu fali se haʼu bele serbisu ba oras 48. Nia simu ida-neʼe no nafatin la hamenus haʼu-nia saláriu. Tuirmai, haʼu husu lisensa atu serbisu ba oras 36 deʼit. Patraun hatán, no dala  ida tan, la koʼa haʼu-nia osan! Haʼu-nia patraun karik lakohi haʼu para serbisu. Mudansa neʼe ajuda duni haʼu atu komesa serbí nuʼudar pioneiru regulár. Iha tempu neʼebá, pioneiru regulár presiza haklaken oras 100 iha fulan ida.

Liutiha fulan haat, haʼu simu knaar nuʼudar pioneiru tempu-tomak no nuʼudar atan kongregasaun nian iha kongregasaun kiʼik ida iha aldeia Spittal an der Drau. Iha tempu neʼebá, pioneiru tempu-tomak presiza uza oras 150 ba serbisu haklaken iha fulan ida nia laran. Haʼu la iha maluk pioneiru maibé haʼu hetan apoiu husi irmán Gertrude Lobner, neʼebé serbí nuʼudar ajudante ba atan kongregasaun nian. a

Iha tinan 1963, haʼu hetan knaar nuʼudar katuas área nian. Haʼu muda husi kongregasaun ida ba kongregasaun seluk hodi saʼe komboiu ho haʼu-nia pasta neʼebé todan. Tanba iha tempu neʼebá irmaun-irmán sira la iha karreta, sira la mai hasoru haʼu iha estasaun. Maibé tanba haʼu lakohi halo sira sente an hodi haree haʼu tun husi taksi, haʼu laʼo ain deʼit ba irmaun-irmán sira-nia uma.

Iha tinan 1965, haʼu hetan konvite atu tuir Eskola Gilead klase 41. Husi haʼu-nia maluk eskola neʼe, barak mak ema klosan. Iha graduasaun, haʼu hakfodak hodi hetan knaar atu fila fali ba rai-Áustria no kontinua serbí nuʼudar katuas área nian. Maibé antes atu husik rai-Estadus Unidus, irmaun sira haruka haʼu atu laʼo hamutuk ho katuas área nian ida ba semana haat. Haʼu kontente serbí hamutuk ho irmaun Anthony Conte, neʼebé laran-manas no matenek kona-ba serbisu haklaken. Haʼu hafolin tebes tempu neʼe, neʼebé laʼo hamutuk ho nia iha área Cornwall iha Novaiorke.

Bainhira haʼu fila fali ba rai-Áustria, haʼu hetan knaar nuʼudar katuas área nian, no iha área neʼe, haʼu hasoru irmán klosan bonita ida naran Tove Merete, neʼebé ninia inan-aman tama lia-loos bainhira nia tinan lima. Kuandu ema ruma husu oinsá mak ami hasoru malu, ami hatán hodi koʼalia halimar: “Sukursál mak arranja ba ami.” Ami kaben iha fulan-Abríl 1967, no kontinua serbí nuʼudar katuas área nian.

Iha tinan 1968, Jeová hatudu laran-luak mai haʼu hodi simu haʼu nuʼudar ninia oan-hakiak. Nuneʼe, haʼu komesa iha relasaun espesiál ho haʼu-nia Aman iha lalehan, hanesan ho ema kristaun kose-mina sira seluk neʼebé bolu Jeová “Abba, Aman!” hodi tuir Roma 8:15.

Haʼu ho Merete kontinua halaʼo ami-nia knaar hodi vizita kongregasaun sira toʼo tinan 1976. Dala ruma, ami tenke toba iha kuartu neʼebé malirin tebetebes. Kalan ida, ami hadeer ho hakfodak tanba manta neʼebé ami-nia iis kona sai hanesan jelu! Ikusmai, ami hola mákina kiʼik neʼebé halo manas kuartu hodi bele tahan malirin iha kalan. Iha fatin balu, ami tenke bá hariis-fatin iha uma liʼur hodi sama jelu-rahun. Ami mós la iha ami rasik nia hela-fatin, tan neʼe, baibain  ami toba iha irmaun sira-nia uma toʼo loron-segunda kalan, no iha loron-tersa dadeer mak muda ba kongregasaun seluk.

Haʼu kontente tanba haʼu-nia feen doben sempre apoia haʼu. Nia gosta serbisu haklaken, tan neʼe haʼu nunka presiza fó laran-manas ba nia atu bá haklaken. Nia hadomi ninia maluk no gosta tau matan ba sira, no ida-neʼe ajuda duni haʼu.

Iha tinan 1976, ami komesa serbí iha sukursál Áustria iha sidade Viena, no haʼu hetan knaar nuʼudar membru ida iha Grupu Koordenadór ba Sukursál. Iha tempu neʼebá, sukursál Áustria mak organiza serbisu haklaken iha rai balu iha parte leste iha Europa no haruka ita-nia livru sira ho subasubar. Irmaun Jürgen Rundel mak nuʼudar koordenadór no haʼu serbisu hamutuk ho nia. Lakleur, haʼu komesa tau matan ba departamentu tradusaun ba língua sanulu neʼebé uza iha Europa Leste. Toʼo ohin loron, irmaun Jürgen ho ninia feen Gertrude serbí Jeová ho laran-metin nuʼudar pioneiru tempu-tomak iha rai-Alemaña. Husi tinan 1978, sukursál Áustria mós komesa print ita-nia revista sira ho língua neen hodi uza mákina kiʼik no haruka revista sira-neʼe ba rai seluk. Kona-ba ida-neʼe, irmaun Otto Kuglitsch mak tau matan. Agora daudauk, nia serbí iha sukursál Alemaña hamutuk ho ninia feen Ingrid.

Irmaun sira iha Europa Leste mós print ita-nia livru sira iha sira-nia rai rasik hodi uza mákina fotokópia ka print deʼit husi filme. Maibé sira presiza hetan ajuda husi irmaun sira iha rai seluk. Jeová proteje sira-nia atividade. Ami iha sukursál iha tempu neʼebá hatene irmaun-irmán sira neʼebé serbí Jeová ho laran-metin maski iha susar laran, no ami hadomi tebes sira.

Iha tinan 1989, haʼu hetan knaar atu bá vizita rai-Roménia hamutuk ho irmaun Theodore Jaracz husi Grupu Administradór. Ami-nia objetivu mak atu halibur irmaun sira neʼebé namkari iha rai neʼe hodi fila fali ba ita-nia organizasaun. Hahú husi tinan 1949, tanba razaun oioin, irmaun barak sai dook husi organizasaun no forma sira rasik nia kongregasaun. Maibé sira mós kontinua haklaken, fó batizmu, no tama ba komarka tanba lakohi foti kilat hanesan deʼit ho  irmaun sira neʼebé hola parte iha ita-nia organizasaun. Tanba governu sei bandu Testemuña, ami presiza hasoru sira ho subasubar deʼit. Ami halo enkontru iha irmaun Pamfil Albu nia uma, no iha neʼebá iha sira-nia katuas naʼin-haat no mós irmaun katuas sira neʼebé hetan knaar husi Grupu Administradór atu tau matan ba rai-Roménia. Ami mós lori irmaun Rolf Kellner husi rai-Áustria atu tradús sira-nia língua.

Iha kalan neʼebé ami halibur malu ba dala segundu, irmaun Albu fó laran-manas makaʼas ba maluk katuas naʼin-haat atu hamutuk fali ho ita-nia organizasaun. Nia hatete: “Se ita la hamutuk filafali agora, aban-bainrua sei la iha tan oportunidade.” Depois enkontru neʼe, maizumenus irmaun-irmán naʼin-5.000 mak tama fali ba ita-nia organizasaun. Sin, Jeová mak manán, no Satanás lakon!

Iha tinan 1989 nia rohan, bainhira governu komunista besik ona atu lakon kbiit, Grupu Administradór konvida haʼu ho haʼu-nia feen atu muda ba sede-jerál iha Novaiorke. Ida-neʼe halo ami hakfodak. Ami komesa serbí iha Betel Brooklyn iha fulan-Jullu 1990. Iha tinan 1992, haʼu sai ajudante ba komisaun serbisu nian husi Grupu Administradór, no iha fulan-Jullu 1994, haʼu hetan knaar espesiál nuʼudar membru ida husi Grupu Administradór.

Husi tempu neʼebé haʼu serbisu hodi lori hahán iha restaurante, tinan barak liu ona. Agora, haʼu haksolok hodi hola parte iha serbisu atu fahe ai-han espirituál ba irmaun-irmán sira iha mundu tomak. (Mateus 24:45-47) Kuandu haʼu hanoin kona-ba tinan 50 neʼebé haʼu serbí tempu-tomak ba Jeová, haʼu-nia laran nakonu ho agradese. Haʼu kontente tebes hodi haree oinsá mak Jeová haraik bensaun ba maluk sira iha mundu tomak. Haʼu gosta tuir ita-nia reuniaun boot internasionál, tanba ita bele aprende liután kona-ba ita-nia Aman Jeová iha lalehan no lia-loos husi Bíblia.

Haʼu halo orasaun hodi husu ba Jeová katak ema rihun ba rihun sei estuda Bíblia, aprende lia-loos no serbí Jeová hamutuk ho laran ida deʼit. (1 Pedro 2:17) Haʼu mós hein ba tempu neʼebé haʼu bá lalehan, haree ema mate moris hiʼas fali, no ikusmai haree-hetan haʼu-nia aman neʼebé mate iha funu. Sin, haʼu hein katak haʼu-nia aman, inan no haʼu-nia família sira hotu sei hakarak adora Jeová iha mundu foun.