KATARINA mak irmán ida iha rai-Estadus Unidus neʼebé hetan batizmu bainhira idade 16. Maski nia hakaʼas an hodi haklaken, maibé iha ninia área, ema uitoan deʼit mak simu. Nia hatete: “Haʼu lee esperiénsia barak kona-ba ema neʼebé halo orasaun ba Maromak hodi Nia haruka ema ida atu hanorin sira. Haʼu mós hakarak hasoru ema hanesan neʼe, maibé nunka hetan.”

Liutiha tinan barak, irmán Katarina hakarak muda ba fatin seluk neʼebé ema barak rona ba lia-loos. Maibé nia la hatene se nia bele hela dook husi ninia família ka lae. Uluk bainhira nia koko neʼe ba semana rua, loroloron nia hanoin tebes sira. Maski nuneʼe, nia laran-manas atu ajuda ema seluk hodi koñese Jeová. Tan neʼe, nia hanoin didiʼak kona-ba fatin balu neʼebé nia bele muda bá, no hakerek karta ba sukursál iha Guame atu husu informasaun balu. Iha tinan 2007, Katarina ho idade 26 muda ba Saipan, illa neʼebé dook kilómetru 10.000 husi ninia uma. Saida mak akontese ba nia?

Toʼo tiha kongregasaun foun, lakleur Katarina hasoru mana ida naran Doris, neʼebé maizumenus tinan 45. Kuandu sira estuda tiha kapítulu tolu husi livru Bíblia Hanorin, Katarina komesa hanoin barak. Nia hatete: “Tanba Doris mak estudante neʼebé diʼak no ida-neʼe mak dala primeiru neʼebé haʼu estuda ho ema, haʼu sente haʼu-nia matenek la toʼo. Tan neʼe, haʼu hanoin Doris presiza estuda ho irmán ho idade neʼebé hanesan no esperiénsia liu haʼu.” Katarina halo orasaun ba Jeová hodi hetan irmán ida neʼebé bele estuda ho Doris, no ikusmai deside atu fó-hatene nia kona-ba neʼe.

Katarina dehan: “Antes haʼu fó sai haʼu-nia hanoin, Doris hatete katak nia hakarak koʼalia kona-ba problema ida. Rona tiha ba nia, haʼu esplika oinsá Jeová ajuda haʼu atu hasoru problema hanesan ninian. Depois, Doris hatete ba haʼu: ‘Obrigada barak. Jeová uza ó hodi ajuda haʼu. Loron neʼebé ó foin haklaken mai haʼu, haʼu lee daudauk Bíblia ba oras barak. Haʼu tanis hodi husu Maromak haruka ema ida ajuda haʼu komprende Ninia Liafuan. Iha tempu neʼe mak ó  dere haʼu-nia odamatan. Jeová hatán duni haʼu-nia orasaun!’” Bainhira Katarina konta istória neʼe, ninia matan nakonu ho matan-been. Nia hatete: “Doris nia liafuan mak resposta ba haʼu-nia orasaun. Jeová hatudu mai haʼu katak Nia hakarak haʼu atu estuda nafatin ho Doris.”

Doris hetan batizmu iha tinan 2010, no ohin loron nia rasik mós halaʼo estuda Bíblia ho ema seluk. Katarina hatete: “Haʼu agradese tebes tanba mehi neʼebé uluk haʼu iha sai realidade, neʼe mak atu ajuda ema neʼebé hakarak lia-loos hodi sai Jeová nia atan!” Ohin loron, Katarina serbí nuʼudar pioneiru tempu-tomak iha illa Kosrae.

Horiuluk toʼo ohin loron, irmaun-irmán naʼin-100 liu ho idade 19 toʼo 79 mak muda ba Mikronézia hodi ajuda serbisu haklaken. Sira sente oinsá? Irmán Erika neʼebé muda ba Guame iha tinan 2006 ho idade 19, hatete: “Haʼu agradese tebes ba Jeová tanba nia ajuda haʼu atu serbí nuʼudar pioneiru iha fatin neʼebé ema barak hamrook ba lia-loos. Neʼe mak dalan moris nian neʼebé diʼak liu hotu!” Agora, Erika serbí nuʼudar pioneiru tempu-tomak iha illa Ebeye iha área Marxál. Maibé, klaru katak serbí iha rai seluk laʼós buat neʼebé fasil. Mai ita koʼalia kona-ba susar tolu neʼebé sira hetan iha Mikronézia no oinsá sira hasoru susar sira-neʼe.

Toman moris nian. Bainhira irmaun Simon ho idade 22 toʼo iha rai-Palau iha tinan 2007, nia haree katak saláriu husi serbisu iha illa neʼe mak uitoan deʼit se kompara ho rai-Inglaterra. Nia hatete: “Haʼu presiza aprende atu la hola sasán arbiru deʼit. Kuandu haʼu bá kompras, haʼu hili didiʼak no hola buat neʼebé baratu. Bainhira haʼu-nia sasán sai aat, haʼu buka sasán uzadu nian no husu ema atu ajuda haʼu hadiʼa fali.” Nia aprende saida husi moris simples neʼe? Simon hatete: “Agora haʼu hatene katak haʼu bele halaʼo moris ho sasán uitoan deʼit. Dala hira ona haʼu haree Jeová nia ajuda. Durante tinan hitu, haʼu sempre iha hahán no fatin atu toba.” Loos duni, Jeová tau matan ba sira neʼebé moris simples hodi buka uluk Ninia Ukun.—Mateus 6:32, 33.

Hanoin família. Irmán Erika hatete: “Tanba haʼu besik ho haʼu-nia família, foufoun haʼu taʼuk katak haʼu sei hanoin demais ba sira no ida-neʼe sei hanetik haʼu.” Entaun, nia halo saida hodi prepara ninia an? Nia hatete: “Antes haʼu muda, haʼu buka informasaun iha Livru Haklaken kona-ba oinsá atu tahan hasoru susar neʼe. Haʼu lee kona-ba inan ida neʼebé ajuda nia oan-feto atu fiar katak Maromak sei tau matan ba nia, neʼebé hatete: ‘Jeová hatene tau matan ba ó diʼak liu fali haʼu.’ Liafuan neʼe hametin duni haʼu.” Irmán Hanna ho ninia laʼen Patric serbí iha illa Majuro. Maski Hanna hanoin ninia família,  maibé hodi tahan ninia sentimentu neʼe, nia hakbesik ba irmaun-irmán sira iha kongregasaun. Nia hatete: “Haʼu sempre fó-agradese ba Jeová tanba ami iha irmaun-irmán sira neʼebé hanesan família rasik. Se haʼu la hetan sira-nia domin karik, haʼu la bele tahan hodi serbí iha fatin neʼebé presiza haklaken-naʼin.”

Buka kolega. Irmaun Simon hatete: “Bainhira foin toʼo fatin foun, ita haree buat hotu oin-seluk. Dala ruma haʼu sai triste tanba haʼu la bele koʼalia halimar ka komprende buat neʼebé ema hatete tanba haʼu seidauk hatene sira-nia língua.” Irmán Erika mós hatete: “Iha tempu neʼebé haʼu sente mesamesak, haʼu hanoin fali tansá mak haʼu muda mai iha neʼe. Haʼu mai laʼós hodi buka ksolok ba haʼu-nia an maibé atu aumenta serbisu ba Jeová. Lakleur, haʼu hetan kolega diʼak barak, no haʼu hafolin tebes sira.” Simon hakaʼas an atu aprende lia-palau, no ida-neʼe ajuda nia atu hakbesik ba irmaun-irmán rai-naʼin sira tanba sira kontente tebes hodi haree ninia hakaʼas-an. (2 Korinto 6:13) Sin, bainhira irmaun sira husi rai seluk ho irmaun rai-naʼin sira serbisu hamutuk, ida-neʼe lori bensaun ba sira hotu hodi sai belun neʼebé diʼak. Entaun, bensaun saida tan mak irmaun-irmán sira hetan hodi serbí iha fatin neʼebé presiza haklaken-naʼin?

Apóstolu Paulo hatete: “Ema neʼebé kari barak sei koʼa mós barak.” (2 Korinto 9:6) Liafuan ida-neʼe kona mós ba irmaun-irmán sira neʼebé aumenta serbisu haklaken. Entaun, sira neʼebé serbí iha Mikronézia koʼa rezultadu diʼak saida deʼit?

Iha Mikronézia, irmaun-irmán sira iha oportunidade barak atu hetan estudu Bíblia no haree oinsá mak lia-loos bele book ema atu halo mudansa oioin iha sira-nia moris. Patric ho Hanna serbí iha illa kiʼik naran Angaur, neʼebé iha ema naʼin-320 deʼit. Haklaken tiha ba fulan rua, sira hasoru mana ida neʼebé mesak haboot oan. Nia komesa estuda Bíblia, simu lia-loos, no halo mudansa oioin iha ninia moris. Hanna hatete: “Semana-semana kuandu ami estuda hotu no saʼe bisikleta, ami hateke ba malu no hatete: ‘Obrigadu, Jeová!’ Haʼu hatene katak se ami la hetan mana neʼe, Jeová sei uza dalan seluk hodi dada nia. Maibé tanba ami fó ami-nia an hodi serbí iha neʼe, ami mak bele ajuda nia atu koñese didiʼak Jeová. Iha ami-nia moris tomak, neʼe mak esperiénsia neʼebé diʼak liu hotu!” Erika mós hatete: “Kuandu ita ajuda ema ida atu hatene Jeová, ita hetan haksolok boot!”

Iha rai barak sei presiza tan haklaken-naʼin. Ita mós bele muda ba fatin hanesan neʼe ka lae? Halo orasaun ba Jeová atu haburas ita-nia hakarak atu aumenta serbisu haklaken. Koʼalia ho katuas sira iha kongregasaun, katuas área nian, ka maluk sira neʼebé iha ona esperiénsia hodi halo nuneʼe. Kuandu ita komesa halo planu atu muda ba rai ida, hakerek ba sukursál neʼebé tau matan ba rai neʼe hodi buka informasaun. a Karik Ita mós “koʼa” fali haksolok boot husi serbisu haklaken hanesan ho irmaun-irmán rihun ba rihun neʼebé fó sira-nia an hodi serbí iha rai seluk.