BAINHIRA Pedro nega tiha Jesus, nia tanis makaʼas. Ita bele fiar katak nia tenke hakaʼas an atu labele laran-tun demais, maski nuneʼe, Jesus hakarak uza nia atu ajuda ema seluk. Jesus hatete ba Pedro: “Kuandu ó fila, hametin ó-nia maluk sira-nia fiar.” (Lucas 22:32, 54-62) Ikusmai, Pedro sai hanesan ai-riin iha kongregasaun kristaun. (Galásia 2:9) Hanesan neʼe mós ho irmaun sira neʼebé uluk serbí nuʼudar katuas kristaun. Karik sira bele serbí fali nuʼudar katuas no haksolok hodi hametin maluk kristaun sira-nia fiar.

Kuandu irmaun sira lakon tiha sira-nia knaar nuʼudar katuas, ida-neʼe bele halo sira laran-tun tebes. Irmaun ida iha rai-Bolívia naran Julio, a neʼebé uluk serbí nuʼudar katuas ba tinan 20 liu, hatete: “Uluk haʼu-nia moris okupadu hodi prepara diskursu, vizita irmaun-irmán sira, no ajuda sira iha kongregasaun. Maibé derrepente deʼit, haʼu lakon haʼu-nia knaar no haʼu sente haʼu-nia moris mak mamuk. Neʼe mak tempu susar tebes.” Maibé liutiha tempu balu, Julio serbí fali nuʼudar katuas kristaun ida.

Dixípulu Tiago hakerek: “Haʼu-nia maun-alin sira, haksolok bá kuandu imi hasoru susar oioin.” (Tiago 1:2) Tiago koʼalia kona-ba susar oioin neʼebé mosu tanba ita sala-naʼin no tanba ema seluk fó terus ba ita. Nia koʼalia kona-ba hakarak isin nian, hahalok todan ba sorin, no buat seluk tan. (Tiago 1:14; 2:1; 4:1, 2, 11) Kuandu ita hetan dixiplina husi Jeová, ida-neʼe bele halo ita-nia laran triste. (Ebreu 12:11) Maibé, ita bele sente haksolok nafatin.

Maski Ita lakon ita-nia knaar iha kongregasaun, Ita sei iha oportunidade atu hatudu Ita-nia fiar no  domin ba Jeová. Ita bele hanoin filafali kona-ba tempu neʼebé Ita serbí nuʼudar katuas, no husu Ita-nia an: ‘Tansá mak haʼu gosta serbí nuʼudar katuas? Haʼu serbí hodi buka haʼu rasik nia diʼak? Ka, tanba haʼu hadomi Maromak no hakarak tau matan ba Ninia kongregasaun?’ (Apóstolu 20:28-30) Entaun, maski la serbí tan nuʼudar katuas, Ita bele kontinua serbí Jeová ho haksolok hodi hatudu ba ema hotu no mós ba Satanás katak Ita serbí Jeová tanba domin.

Bainhira Liurai David halo sala boot no hetan dixiplina, nia simu ida-neʼe no hetan perdua. David kanta: “Haksolok ba ema neʼebé hetan perdua ba ninia sala. Haksolok ba ema neʼebé Jeová la sura ninia sala, no iha nia laran la iha lia-bosok.” (Salmo [Mazmur] 32:1, 2) Liuhusi dixiplina, David aprende oinsá atu sai bibi-atan neʼebé diʼak liután hodi tau matan ba Maromak nia povu.

Irmaun barak neʼebé lakon knaar nuʼudar katuas maibé ikusmai hetan fali, sira sai bibi-atan neʼebé diʼak liután duké tempu uluk. Irmaun ida hatete: “Haʼu foin hatene oinsá mak haʼu bele ajuda maluk sira neʼebé halo sala.” Katuas ida seluk hatete: “Agora haʼu hafolin liután haʼu-nia knaar hodi serbí irmaun-irmán sira.”

Livru Salmo hatete: ‘Jeová la kontinua buka sala ba nafatin.’ (Salmo [Mazmur] 103:9) Tan neʼe, ita lalika hanoin katak Maromak sei la tau fiar tan ba ema neʼebé halo ona sala boot. Irmaun Ricardo, neʼebé tinan barak serbí nuʼudar katuas maibé lakon knaar neʼe, hatete: “Haʼu sai laran-tun tebes kona-ba haʼu rasik nia sala. Ba tempu kleur, haʼu la fiar an no ida-neʼe hanetik haʼu atu serbí fali nuʼudar katuas. Maibé tanba haʼu gosta ajuda ema seluk, haʼu halaʼo estudu Bíblia, fó laran-manas ba irmaun-irmán sira iha kongregasaun, no haklaken hamutuk ho sira. Buat sira-neʼe ajuda haʼu atu sente kmaan, no agora haʼu serbí fali nuʼudar katuas ida.”

Kuandu ita rai hirus, ida-neʼe bele hanetik ita atu simu knaar hodi serbí nuʼudar katuas. Tan  neʼe, diʼak liu atu banati-tuir David nia ezemplu. Maski nia presiza halai-sees husi Liurai Saul no nia iha oportunidade atu selu fali, nia lakohi halo ida-neʼe. (1 Samuel 24:4-7; 26:8-12) Ikusmai, bainhira Saul mate iha funu, David sai triste tebes, hodi koʼalia kona-ba nia ho ninia oan Jónatas nuʼudar ema neʼebé “haʼu hadomi”. (2 Samuel 1:21-23) Sin, David la rai hirus iha ninia laran.

Se Ita hanoin katak Ita lakon knaar tanba ita-nia maluk irmaun sira mak hanoin sala kona-ba ita, Ita la bele husik ida-neʼe atu domina ita-nia hanoin. Porezemplu, hanoin kona-ba irmaun ida iha rai-Bretaña naran William, neʼebé uluk serbí nuʼudar katuas ba tinan 30. Bainhira nia lakon ninia knaar, nia sai hirus ba katuas balu. Saida mak ajuda William atu iha hanoin neʼebé loos? Nia hatete: “Hodi lee livru Job fó laran-manas mai haʼu. Se Jeová ajuda Job atu hadame malu fali ho ninia kolega naʼin-tolu, sá tan ho haʼu neʼebé presiza halo dame ho katuas kristaun sira!”—Jó (Ayub) 42:7-9.

Se Ita mak deside rasik atu la serbí tan nuʼudar katuas, diʼak atu hanoin kona-ba tanbasá mak Ita halo desizaun hanesan neʼe. Neʼe tanba Ita hasoru problema barak iha ita-nia moris? Tanba buat seluk mak sai importante liu ba Ita? Ka, Ita sai kole hodi ajuda beibeik ema seluk? Maski Ita iha razaun oioin atu husik ita-nia knaar, diʼak atu hanoin-hetan katak uluk Ita-nia knaar nuʼudar katuas fó Ita oportunidade barak atu ajuda ema seluk. Ita-nia diskursu hametin sira, ita-nia ezemplu fó laran-manas ba sira, no ita-nia vizita nuʼudar katuas ajuda sira tahan hasoru susar. Ita-nia serbisu neʼe halo Jeová nia laran kontente, no Ita mós sai kontente.—Provérbios (Amsal) 27:11.

Jeová ajuda ona irmaun barak atu hetan fali ksolok no haburas sira-nia hakarak atu tau matan ba kongregasaun. Maski Ita lakon ita-nia knaar tanba katuas sira seluk nia desizaun ka Ita rasik nia desizaun, Ita bele hakaʼas an fali hodi “hakarak atu sai nuʼudar katuas”. (1 Timóteo 3:1) Paulo “la para atu halo orasaun” hodi ninia maluk iha Koloso bele hatene didiʼak Maromak nia hakarak hodi “laʼo ho loloos iha Jeová nia oin toʼo halo kontente nia iha dalan neʼebé kompletu”. (Koloso 1:9, 10) Se Ita serbí fali nuʼudar katuas ida, sadere ba Jeová atubele hetan kbiit, pasiénsia, no ksolok. Iha loron ikus sira-neʼe, Maromak nia povu presiza ajuda husi bibi-atan sira neʼebé diʼak. Ita prontu atu hametin ita-nia maluk sira ka lae?