1, 2. Ohin loron, iha dalan saida deʼit mak Jeová fó matadalan ba ninia atan sira?

 IHA Bíblia nia tempu, Jeová fó matadalan ba ninia povu liuhusi dalan oioin. Dala ruma nia hatoʼo ninia mensajen liuhusi anju ida, vizaun ka mehi. Liuhusi dalan sira-neʼe, Jeová fó sai kona-ba futuru no fó knaar ba ninia atan sira. (Números [Bilangan] 7:89; Ezequiel [Yehezkiel] 1:1; Daniel 2:19) Dala ruma mós Jeová hili ema balu atu reprezenta nia hodi hatoʼo ninia mensajen. Maski iha tempu neʼebá Maromak nia povu simu matadalan husi nia iha dalan neʼebé la hanesan, maibé bainhira sira halo tuir matadalan neʼe, Jeová sempre fó bensaun ba sira.

² Ohin loron, Maromak Jeová uza buat tolu atu dirije ita, neʼe mak Bíblia, ninia espíritu santu no kongregasaun kristaun. (Apóstolu 9:31; 15:28; 2 Timóteo 3:16, 17) Ninia matadalan klaru tebes. Buat ida karik, neʼe hanesan ita rona Maromak hatete mai ita: “Dalan mak neʼe. Laʼo tuir bá.” (Isaías [Yesaya] 30:21) Maromak Jeová mós uza Jesus hodi hatoʼo Ninia mensajen mai ita. Maromak foti Jesus hodi dirije kongregasaun liuhusi “atan laran-metin no matenek”. (Mateus 24:45) Importante tebes atu halo tuir matadalan neʼebé ita simu tanba hodi nuneʼe, ita bele hetan moris rohan-laek.—Ebreu 5:9.

3. Saida deʼit mak bele hanetik ita atu halo tuir Jeová nia matadalan? (Haree dezeñu iha pájina 21.)

 ³ Iha buat balu neʼebé bele hanetik ita hodi la halo tuir Jeová nia matadalan. Satanás koko lohi ita tanba nia hatene katak ita bele hetan moris rohan-laek se ita rona ba Jeová nia lian. No tanba ita ema sala-naʼin, ita-nia laran rasik bele halo ita sai dook husi Jeová. (Jeremias [Yeremia] 17:9) Iha lisaun neʼe, ita sei koʼalia kona-ba oinsá mak ita bele tahan hasoru buat sira-neʼe neʼebé hanetik ita atu halo tuir Jeová nia matadalan. Ita mós sei aprende oinsá ita bele besik nafatin ba Maromak Jeová hodi rona ba ninia lian no halo orasaun ba nia.

4. Oinsá mak Satanás koko atu book ema nia hanoin?

⁴ Satanás koko atu book ema nia hanoin hodi habelar lia-bosok. (Lee 1 João 5:19.) Jornál no livru sira, programa iha rádiu no televizaun, no mós internét, buat sira-neʼe bele habelar informasaun ba mundu tomak. Dala ruma informasaun neʼebé ita hetan husi buat sira-neʼe mak diʼak, maibé tuir loloos barak liu mak habelar hahalok sira neʼebé Maromak Jeová la gosta. (Jeremias [Yeremia] 2:13) Porezemplu, programa no livru sira hatudu katak la sala se mane kaben ho mane, ka feto ho feto. Ida-neʼe halo ema barak hanoin katak buat neʼebé Bíblia hatete kona-ba neʼe mak makaʼas liu.—1 Korinto 6:9, 10.

5. Oinsá mak ita bele proteje an hodi Satanás nia lia-bosok la kona ita-nia hanoin?

⁵ Ba ita neʼebé hakarak halo tuir Jeová nia matadalan, oinsá mak ita bele proteje ita-nia an hodi Satanás nia lia-bosok la kona ita-nia hanoin? No oinsá mak ita bele hatene saida mak diʼak no ladiʼak? Bíblia fó resposta hodi hatete: “Nafatin matan-moris atu tuir [Maromak nia] liafuan.” (Salmo [Mazmur] 119:9) Tan neʼe, hodi lee Maromak nia Liafuan mak ita bele hatene saida mak lia-loos no saida mak lia-bosok. (Provérbios [Amsal] 23:23) Jesus hatete katak ita presiza “liafuan hotu neʼebé sai husi Jeová nia ibun”. (Mateus 4:4) Iha Bíblia laran, Maromak Jeová fó ba ita matadalan neʼebé ita presiza halo tuir. Porezemplu, maski seidauk iha lei kona-ba la bele halo sala-foʼer, maibé José hatene ona katak se nia halo sala-foʼer ho Potifar nia feen, neʼe sala hasoru Maromak. Nia nunka hanoin atu kontra hasoru Maromak. (Lee Gênesis [Kejadian] 39:7-9. a) Maski Potifar nia feen tenta José beibeik, maibé José la rona ba ninia lian. Nia rona ba Maromak Jeová nia lian. Ohin loron, ita mós presiza rona ba Jeová nia lian, laʼós ba lia-bosok sira husi Satanás.

6, 7. Saida mak ita presiza halo atu la rona ba Satanás nia konsellu neʼebé ladiʼak?

 ⁶ Iha mundu neʼe, ema sente katak susar tebes atu hetan relijiaun neʼebé loos tanba iha hanorin oioin neʼebé kontra malu. Maibé se ita prontu atu rona ba Jeová, nia fó matadalan mai ita hodi ita bele hetan lia-loos. Ita la bele rona ba lian rua, tan neʼe, ita presiza hili sé mak ita atu rona. Ita tenkesér hatene Jesus nia lian hodi rona ba nia tanba Jesus mak ida-neʼebé Jeová foti hodi tau matan ba Ninia bibi sira.—Lee João 10:3-5.

⁷ Jesus hatete: “Halo tuir didiʼak buat neʼebé imi foin rona.” (Marcos 4:24) Matadalan neʼebé Jeová fó mak loos, maibé ita presiza rona ba matadalan neʼe hodi ita bele simu buat neʼebé Maromak hatete. Se ita la kuidadu, karik ita sei rona ba Satanás nia konsellu neʼebé sala duké rona ba Maromak nia konsellu neʼebé nia fó ho domin. Ita la bele husik buat ida atu kontrola ita-nia moris, hanesan kolega sira, mestra ho mestre sira, múzika no programa sira neʼebé haleno mundu nia hahalok aat.—Koloso 2:8.

8. (a) Oinsá mak Satanás koko atu aproveita ita-nia fraku sira? (b) Saida mak bele akontese se ita la rona ba sinál sira neʼebé fó avizu?

⁸ Satanás hatene katak ita mak ema sala-naʼin neʼebé iha fraku oioin. Nia aproveita ita-nia fraku hodi halo ita monu ba sala. Ida-neʼe bele koko ita-nia laran-metin ba Jeová. (João 8:44-47) Porezemplu, karik ita la halo ona orasaun ba Jeová, ladún haklaken ona ka komesa falta ona reuniaun sira. Neʼe hanesan sinál sira neʼebé fó avizu kona-ba saida mak akontese daudaun ba ita-nia laran. Perigu tebes se ita la rona ba avizu sira-neʼe! Se ita la matan-moris nafatin, neineik-neineik, ita sei la rona tan Maromak Jeová nia lian. Ikusmai, karik ita monu ba sala hodi halo buat ruma neʼebé uluk ita hanoin nunka atu halo. (Roma 7:15) Maibé se ita matan-moris nafatin, ita sei haree sinál sira neʼebé hatudu ita atu laʼo sala dalan, no ita bele sees husi dalan sala neʼe. Se ita rona didiʼak ba Jeová nia lian, ita mós sei nunka rona ba ema sira neʼebé kontra lia-loos.—Provérbios (Amsal) 11:9.

9. Tanbasá mak importante tebes atu hadiʼa kedas ita-nia fraku sira?

⁹ Hanoin toʼok, se ema ida moras todan, diʼak atu la demora buka-hatene ninia moras hodi bele kura lalais. Hanesan neʼe mós, se ita haree katak ita iha fraku ruma, ita tenke hadiʼa kedas, selae, ‘diabu sei kaer moris ita hodi halo ninia hakarak’. (2 Timóteo 2:26) Saida mak ita tenke halo se ita haree katak ita-nia hanoin no hakarak iha  laran sai dook husi buat neʼebé Jeová hakarak husi ita? Ita tenkesér fila fali ba nia hodi buka ninia matadalan no halo tuir ida-neʼe. (Isaías [Yesaya] 44:22) Maski ita fila fali ona ba Jeová, maibé karik ita sei sente laran-kanek nafatin tanba sala neʼebé uluk ita halo. Nuneʼe, diʼak liu nunka hanoin atu hasees an husi Jeová!

10, 11. (a) Ema neʼebé foti-an baibain halo saida? (b) Saida mak ita aprende husi Coré, Datan no Abiram?

¹⁰ Ita tenke hatene katak ita-nia laran rasik bele halo ita sai dook husi Jeová. Porezemplu, ita bele sai foti-an ka iha matan kaan-teen nian, no neʼe bele book ita atu halo sala boot. Ema neʼebé foti-an sente katak nia mak ema neʼebé boot no nia bele halo buat naran deʼit neʼebé nia hakarak. Nia la gosta ema seluk manda nia, inklui mós ninia maluk kristaun sira, katuas kristaun sira no Maromak nia organizasaun. Ikusmai, tanba nia dook ona husi Jeová, entaun Jeová nia lian mós komesa dook ona ba nia.

¹¹ Maromak Jeová foti Moisés no Aarão atu dirije povu Izraél bainhira sira laʼo iha rai-fuik maran. Maibé Coré, Datan no Abiram kontra hasoru sira tanba sira foti-an no hakarak adora Maromak Jeová tuir sira-nia hakarak deʼit. Saida mak Jeová halo? Nia oho kontradór sira-neʼe. (Números [Bilangan] 26:8-10) Husi istória neʼe, ita aprende lisaun importante tebes. Neʼe mak, perigu tebes atu kontra hasoru Jeová. Bíblia hatete: “Foti-an sei halo ema monu.”—Provérbios (Amsal) 16:18; Isaías (Yesaya) 13:11.

12, 13. (a) Fó toʼok ezemplu neʼebé hatudu tanbasá matan kaan-teen mak perigu tebes. (b) Esplika toʼok oinsá matan kaan-teen bele domina ita.

¹² Matan kaan-teen mós perigu tebes. Ema neʼebé matan kaan-teen baibain sente katak nia la presiza halo tuir Jeová nia matadalan. No nia hanoin nia bele foti buat ruma neʼebé laʼós ninian. Naaman mak xefe ba tropa Síria nian no nia kona moras-lepra. Maromak nia profeta Eliseu fó isin-diʼak ba nia. Naaman agradese tebes no nia hakarak fó Eliseu prezente hanesan osan no roupa. Eliseu la simu, maibé Eliseu nia atan ida naran Geazi kaan prezente sira-neʼe. Hodi la hatete buat ida ba Eliseu, Geazi halai tuir Naaman no koʼalia bosok ba nia hodi Naaman fó prezente sira-neʼe. Saida mak akontese ba Geazi? Jeová halo moras-lepra kona fali nia!—2 Reis (Raja-Raja) 5:20-27.

¹³ Matan kaan-teen bele hahú hanesan buat kiʼik deʼit iha ita-nia laran, maibé se ita la kuidadu, neʼe bele sai boot lalais toʼo domina ita. Ezemplu husi Bíblia kona-ba Acan hatudu ida-neʼe. Nia dehan katak bainhira nia haree roupa kapás ema-boot nian husi Sinear, no osan-mutin ho osan-mean, nia kaan buat sira-neʼe, no depois nia foti tiha. Loloos, Acan tenkesér kontra hasoru ninia hakarak neʼebé aat, maibé nia la halo ida-neʼe. Nia naʼok sasán sira no subar iha ninia tenda laran. Jeová hatudu sai Acan nia sala ba povu hotu no iha loron neʼe kedas Acan no ninia família hetan kastigu-mate. (Josué [Yosua] 7:11, 21, 24, 25) Fasil ba ita atu sai kaan-teen hanesan Acan. Tan neʼe, ita presiza ‘kuidadu an atu labele kaan buat naran de’it’. (Lucas 12:15) Sala-foʼer mós hanesan hahalok kaan-teen ida. Maski dala ruma ita hanoin kona-ba buat neʼebé foʼer, maibé ita tenkesér kontrola ita-nia neon hodi hakarak neʼebé aat iha ita-nia laran la sai buras toʼo ita monu ba sala.—Lee Tiago 1:14, 15.

14. Se ita nota ita komesa hatudu hahalok foti-an no kaan-teen, ita tenke halo saida?

¹⁴ Husi ezemplu sira neʼebé ita foin haree, se ita sai foti-an ka kaan-teen, neʼe perigu tebes. Maibé se ita hanoin uluk kona-ba  rezultadu neʼebé sala lori mai, ita sei rona nafatin Jeová nia lian. (Deuteronômio [Ulangan] 32:29) Iha Bíblia, Jeová laʼós deʼit fó-hatene ita rezultadu bainhira ita halo buat neʼebé loos, maibé nia mós esplika saida mak bele akontese se ita halo buat neʼebé sala. Se ita hetan tentasaun atu halo sala tanba hahalok foti-an no kaan-teen mak book ita, matenek duni atu hanoin uluk saida mak rezultadu husi sala neʼe. Hanoin kona-ba oinsá ita-nia sala sei kona ita rasik no ema neʼebé besik ita, no mós oinsá ida-neʼe sei kona ita-nia relasaun ho Jeová.

15. Saida mak ita bele aprende husi Jesus nia ezemplu?

¹⁵ Jeová hakarak ita atu iha moris neʼebé kontente liu. (Salmo [Mazmur] 1:1-3) Nia fó mai ita matadalan iha tempu neʼebé loos. (Lee Ebreu 4:16.) Maski Jesus mak ema neʼebé la iha sala, nia mós presiza koʼalia beibeik ho Jeová iha orasaun. Ida-neʼe mak nia halo duni, no Jeová apoia Jesus no dirije nia iha dalan oioin. Porezemplu, Jeová haruka anju sira hodi ajuda nia, nia fó ninia espíritu santu, no ajuda nia atu hili ninia apóstolu naʼin-12. Jeová mós koʼalia husi lalehan hodi hatudu katak nia apoia Jesus no simu nia. (Mateus 3:17; 17:5; Marcos 1:12, 13; Lucas 6:12, 13; João 12:28) Hanesan Jesus, ita mós presiza halo orasaun beibeik husi ita-nia laran. (Salmo [Mazmur] 62:7, 8; Ebreu 5:7) Hodi halo orasaun mak ita bele besik nafatin ba Jeová no moris iha dalan neʼebé fó hahiʼi ba nia.

16. Oinsá mak Jeová ajuda ita atu rona ba ninia matadalan?

¹⁶ Jeová kontente atu fó ninia matadalan mai ita, maibé nia la obriga ita atu simu. Ita presiza husu ninia espíritu santu no nia sei fó ba ita. (Lee Lucas 11:10-13.) Maibé importante katak ita ‘haree didiʼak oinsá ita rona’. (Lucas 8:18) Porezemplu, se ita husu Jeová atu ajuda ita sees husi sala-foʼer, maibé ita nafatin haree pornografia ka filme aat, ita hatudu katak ita hakarak duni Maromak nia ajuda ka lae? Hodi bele hetan ninia ajuda, ita presiza tuir reuniaun kristaun no halibur hamutuk ho maluk kristaun sira, tanba husi neʼe mak Jeová fó ninia espíritu santu atu ajuda ema. Ema barak konsege ona sees husi perigu tanba sira rona ba Jeová nia matadalan iha reuniaun. Bainhira sira hatene katak sira haburas hakarak neʼebé la diʼak, sira hadiʼa kedas ida-neʼe.—Salmo (Mazmur) 73:12-17; 143:10.

17. Tansá perigu atu fiar ba ita rasik nia matenek?

¹⁷ Hanoin kona-ba David, liurai husi Izraél. Nia halo buat furak barak tanba nia sadere ba Jeová. Bainhira David sei joven, nia oho jigante Golias. Nia sai soldadu ida, no ikusmai sai liurai. Nia proteje ninia povu no halo desizaun sira neʼebé lori diʼak ba sira. Maibé bainhira nia fiar ba nia rasik nia matenek, ninia laran rasik lohi nia. Nia halo sala-foʼer ho Batseba depois oho Batseba nia laʼen. Maski nuneʼe, bainhira Jeová korrije David, nia hatudu haraik-an hodi rona ba Jeová. Nia fó sai ninia sala no sai fali Jeová nia belun.—Salmo (Mazmur) 51:4, 6, 10, 11.

18. Saida mak bele ajuda ita hodi rona nafatin ba Jeová nia lian?

¹⁸ Konsellu iha 1 Korinto 10:12 hatudu katak ita la bele fiar ba ita rasik nia matenek. Bíblia hatete katak ita la bele hili ita rasik nia hakat. (Jeremias [Yeremia] 10:23) Se nuneʼe, ita sei rona ba sé-nia lian? Jeová nian ka Satanás nian? Mai ita halo orasaun beibeik no halo tuir matadalan neʼebé Jeová fó mai ita liuhusi espíritu santu. Hodi nuneʼe mak ita bele rona nafatin ba Jeová nia lian.