Ita simu daudauk “ai-han iha tempu loloos” ka lae?
ITA moris iha loron ikus sira neʼebé nakonu ho susar oioin. (2 Timóteo 3:1-5) Loron-loron, mundu neʼe koko ita-nia domin ba Jeová no ita-nia laran-metin ba ninia matadalan sira. Tanba Jesus hatene ona katak tempu susar hanesan neʼe sei mosu, nia promete ba ninia dixípulu sira katak nia sei ajuda sira hodi bele tahan toʼo rohan. (Mateus 24:3, 13; 28:20) Hodi kumpre ninia promesa neʼe, nia fó knaar ba atan laran-metin no matenek atu fó “ai-han iha tempu loloos”.—Mateus 24:45, 46.
Husi tinan 1919, atan laran-metin neʼe kontinua fó ai-han espirituál iha língua oioin ba Maromak nia povu. (Mateus 24:14; Apokalipse 22:17) Maibé, língua balu la iha livru barak husi ita-nia organizasaun. Liután neʼe, ita balu la iha komputadór hodi haree informasaun ka loke vídeo sira iha ita-nia sítiu jw.org. Entaun, ida-neʼe katak ema kristaun balu la bele simu ai-han espirituál neʼebé sira presiza ka lae? Hodi iha hanoin neʼebé loos kona-ba neʼe, mai ita buka-hatene pergunta haat tuirmai.
1. Saida mak “ai-han” importante liu neʼebé Jeová fó mai ita?
Bainhira Satanás koko Jesus atu halo fatuk sai paun, Jesus hatán: “Ema sei la moris deʼit ho paun, maibé ho liafuan hotu neʼebé sai husi Jeová nia ibun.” (Mateus 4:3, 4) Jeová nia liafuan hakerek iha Bíblia. (2 Pedro 1:20, 21) Tan neʼe, ita-nia ai-han espirituál neʼebé importante liu mak Bíblia.—2 Timóteo 3:16, 17.
Liuhusi Maromak nia organizasaun, ita bele hetan Bíblia Sagrada Tradusaun Mundu Foun. Ita-nia Bíblia neʼe tradús ona ba língua 120 liu no tinan-tinan númeru neʼe aumenta ba beibeik. Liután neʼe, iha mós Bíblia ho tradusaun ka versaun seluk iha língua rihun ba rihun. Ida-neʼe halo ita haksolok tanba Maromak nia hakarak mak “ema hotu hetan salvasaun no hatene didiʼak kona-ba lia-loos”. (1 Timóteo 2:3, 4) Tanba Jeová haree ema hotu nia laran, liuliu ema neʼebé “hatene katak sira presiza Maromak nia matadalan”, ita mós bele fiar katak nia sei dada sira atu tama iha ninia organizasaun no hetan ai-han espirituál.—Ebreu 4:13; Mateus 5:3, 6; João 6:44; 10:14.
2. Oinsá mak ita-nia livru sira sai nuʼudar ai-han espirituál neʼebé importante?
Atu hametin ita-nia fiar, lee Bíblia deʼit la toʼo. Ita mós presiza komprende no halo tuir. (Tiago 1:22-25) Ida-neʼe mak buat neʼebé ema-boot Etiópia iha apóstolu sira-nia tempu presiza halo. Bainhira nia lee hela Maromak nia Liafuan, Filipe husu ba nia: “Ita hatene buat neʼebé Ita lee ka lae?” Ema-boot hatán: “Oinsá mak haʼu bele hatene se la iha ema ida esplika mai haʼu?” (Apóstolu 8:26-31) Filipe ajuda nia atu komprende ho loloos Maromak nia Liafuan, no buat neʼebé nia aprende book nia atu hetan batizmu. (Apóstolu 8:32-38) Hanesan neʼe mós, ita-nia livru sira ajuda ita atu komprende lia-loos husi Bíblia. Buat neʼebé ita lee bele kona loos ita-nia laran no book ita atu halo tuir Maromak nia Liafuan.—Koloso 1:9, 10.
Liuhusi ita-nia livru sira, Jeová nia atan hetan buat barak atu “han” no “hemu”. (Isaías [Yesaya] 65:13) Porezemplu, ita bele hetan Livru Haklaken iha língua hamutuk 210 liu. Livru neʼe esplika kona-ba Bíblia nia profesia, ajuda ita atu komprende lia-loos, no fó laran-manas mai ita atu moris tuir Maromak nia matadalan sira. Ita mós bele hetan livru Matan-moris bá! iha língua maizumenus 100, no ida-neʼe ajuda ita atu hatene kona-ba Jeová nia kriasaun oioin no oinsá ita bele halo tuir Bíblia nia konsellu sira iha ita rasik nia moris. (Provérbios 3:21-23; Roma 1:20) Laʼós neʼe deʼit, atan laran-metin prepara livru sira husi Bíblia iha língua 680! Ita fahe tempu atu lee Bíblia ka lae? Ita badinas lee revista no livru foun sira neʼebé ita simu iha ita-nia língua ka lae?
Liután neʼe, Jeová nia organizasaun mós prepara informasaun oioin neʼebé hatoʼo iha reuniaun no reuniaun boot sira. Ita haksolok ho diskursu, drama no entrevista sira ka lae? Sin, Jeová fó mai ita ai-han espirituál barak tebes!—Isaías (Yesaya) 25:6.
3. Se ita la bele hetan livru balu tanba seidauk tradús ba ita-nia língua rasik, neʼe katak ita sei kuran ai-han espirituál ka lae?
Resposta mak “lae”! Ita labele laran-tun se ema kristaun balu hetan ai-han espirituál barak liu fali sira seluk. Tanbasá? Hanoin fali kona-ba apóstolu sira. Sira iha oportunidade barak liu atu rona Jesus nia hanorin se kompara ho ninia dixípulu sira seluk. (Marcos 4:10; 9:35-37) Maski nuneʼe, dixípulu sira seluk mós hetan duni ai-han espirituál neʼebé natoon ba sira.—Éfeso 4:20-24; 1 Pedro 1:8.
Diʼak mós atu hanoin-hetan katak ita loloos hatene buat balu deʼit kona-ba Jesus nia liafuan no buat neʼebé nia halo iha rai. Apóstolu João hakerek: “Tuir loloos, Jesus halo buat barak tan, maibé se hakerek hotu buat sira-neʼe, haʼu hanoin katak mundu neʼe rasik mós sei la iha fatin atu rai livru sira-neʼe.” (João 21:25) Ema kristaun iha apóstolu sira-nia tempu hatene buat barak liu kona-ba Jesus duké ita ohin loron. Maibé ita la kuran buat ida. Tanbasá? Tanba Jeová mak tau matan didiʼak ba ita hodi fó informasaun neʼebé toʼo atu ita bele laʼo tuir Jesus nia ain-fatin.—1 Pedro 2:21.
Hanoin mós kona-ba surat sira neʼebé apóstolu sira mak haruka ba kongregasaun. Husi apóstolu Paulo nia surat sira, ida ka rua la rai iha Bíblia laran. (Koloso 4:16) Hodi la iha surat sira-neʼe dehan katak ita sai hamlaha ba ai-han espirituál ka lae? Lae duni. Jeová hatene ita-nia presiza no fó ita buat neʼebé natoon hodi hametin ita-nia fiar.—Mateus 6:8.
Jeová hatene ita-nia presiza no fó ita buat neʼebé natoon hodi hametin ita-nia fiar
Ohin loron, Jeová nia atan balu bele hetan ai-han espirituál barak liu fali sira seluk. Karik ita-nia situasaun mak iha ita-nia língua rasik iha livru uitoan deʼit. Se nuneʼe, fiar metin bá katak Jeová sei hanoin ita. Estuda didiʼak livru sira neʼebé ita bele hetan, no tuir reuniaun sira neʼebé uza língua neʼebé ita komprende. Hodi halo nuneʼe, Jeová sei ajuda ita atu nafatin hakbesik ba nia.—Salmo (Mazmur) 1:2; Ebreu 10:24, 25.
4. Se ita la bele hetan informasaun husi jw.org, ita-nia fiar sei sai menus no fraku ka lae?
Liuhusi jw.org, ita bele lee ita-nia revista no livru sira. Ita mós bele hetan informasaun neʼebé ajuda kaben-naʼin, inan-aman, joven no labarik sira. Ita bele uza informasaun hanesan neʼe ba ita-nia adorasaun família nian. Ita mós bele hetan relatóriu oioin kona-ba graduasaun ba eskola Gilead, reuniaun boot tinan nian iha sede-jerál, dezastre no kazu neʼebé kona Jeová nia povu. (1 Pedro 5:8, 9) Sítiu ida-neʼe mós hola parte importante iha ita-nia serbisu haklaken hodi fó sai lia-loos ba rai neʼebé estadu hanetik ka bandu ita-nia atividade.
Ita-nia fiar-metin la depende ba informasaun neʼebé ita hetan liuhusi ita-nia sítiu iha internét. Atan laran-metin hakaʼas an ona hodi halo livru no revista sira atu nuneʼe ita hotu labele hamlaha ba ai-han espirituál. Tan neʼe, ita la presiza sente katak ita tenkesér hola komputadór ka sasán eletróniku ruma tan deʼit atu loke jw.org. Ita-nia irmaun-irmán balu mós hili rasik atu print informasaun uitoan husi ita-nia sítiu hodi fó ba sira-nia maluk neʼebé la iha internét, maibé ida-neʼe laʼós arranju neʼebé kongregasaun mak halo.
Ita fó-agradese ba Jesus tanba nia kumpre ninia promesa atu tau matan ba ita hodi bele hakbesik nafatin ba Jeová. Sin, ita bele fiar metin katak Jeová sei kontinua fó mai ita “ai-han iha tempu loloos” toʼo mundu aat neʼe nia rohan.
