IRMAUN ida naran Fernando a sente laran tuku-tuku tanba katuas naʼin-rua husu nia se sira bele koʼalia ho nia mesamesak. Tuir loloos durante tempu neʼebé katuas área nian vizita uluk, katuas sira esplika ba Fernando saida mak nia tenke halo atu bele kumpre kritériu hodi hetan knaar iha kongregasaun. Nuʼudar tempu liu daudaun, Fernando komesa hanoin se loron ida nia sei simu knaar nuʼudar katuas iha kongregasaun ka lae. No foin lalais katuas área nian vizita fali kongregasaun neʼe. Agora saida mak katuas sira sei dehan tan ba nia?

Fernando rona didiʼak nuʼudar katuas ida koʼalia ba nia. Irmaun sira-neʼe temi fali 1 Timóteo 3:1 no dehan katak katuas kongregasaun nian foin simu surat ida neʼebé fó sai katak agora Fernando bele serbí nuʼudar katuas ida. Entaun, Fernando hakfodak no husu: “Imi dehan saida?” Irmaun neʼe repete fali buat neʼebé nia foin dehan, no Fernando oin-midar. Tuirmai kuandu irmaun sira fó sai avizu iha kongregasaun kona-ba neʼe, ema hotu kontente.

Sala iha hanoin atu hetan serbisu diʼak iha kongregasaun ka lae? Lae. Tanba eskritura iha 1 Timóteo 3:1 dehan: “Se mane ida hakarak atu sai nuʼudar katuas, nia hakarak serbisu neʼebé diʼak.” Mane kristaun barak halo tuir matadalan neʼe no hakaʼas an hodi laʼo ba oin no kumpre kritériu atu hetan knaar iha kongregasaun. Tan neʼe, Maromak nia atan sira kontente atu iha mane rihun ba rihun neʼebé serbí nuʼudar katuas no atan ba kongregasaun. Maibé tanba kongregasaun sira aumenta ba beibeik, klaru katak ita presiza liután irmaun sira neʼebé hakaʼas an atu kumpre kritériu. Entaun, oinsá mak dalan diʼak atu halo ida-neʼe? No sira neʼebé hakarak atu hetan knaar nuʼudar katuas presiza ka lae atu hanoin barak kona-ba ida-neʼe, hanesan irmaun Fernando mós halo?

Liafuan gregu neʼebé tradús nuʼudar “hakarak” bele iha arti katak hakaʼas an makaʼas atu kaer buat ruma. Liafuan neʼe halo ita hanoin kona-ba ema neʼebé hakaʼas an lolo liman hodi kuʼu ai-fuan husi ai-hun  ida. Maibé, neʼe la dehan katak ita ho kaan-teen buka atu kaer pozisaun nuʼudar “katuas”. Tanbasá? Tanba ema neʼebé hakarak duni atu serbí nuʼudar katuas, sira buka atu halo “serbisu neʼebé diʼak”, laʼós atu hetan pozisaun aas.

Kritériu oioin atu serbí nuʼudar katuas hakerek ona iha 1 Timóteo 3:2-7 no Tito 1:5-9. Kona-ba kritériu importante sira-neʼe, irmaun Raymond neʼebé serbí nuʼudar katuas ba tempu kleur ona dehan: “Ba haʼu, buat neʼebé importante liu mak hahalok neʼebé ita hatudu. Maski ita tenke hanorin no hatoʼo diskursu sira, maibé importante liu atu ita moris ho diʼak, kontrola ita-nia hahalok, iha hanoin neʼebé loos, moris iha dalan neʼebé loos, laran-loos, no la ulun-toos.”

Irmaun neʼebé laʼo ba oin tenke hakaʼas an atu hatudu katak nia moris ho diʼak hodi hasees an husi hahalok laran-makerek no hahalok neʼebé la moos. Nia kontrola ninia hahalok, iha hanoin neʼebé loos, moris iha dalan loos, no la ulun-toos. Tan neʼe ninia maluk fiar-naʼin sira tau fiar ba nia atu dirije sira no ajuda sira kuandu hasoru problema. No tanba nia hatudu laran-diʼak, nia fó laran-manas ba joven sira no ba ema neʼebé foun iha lia-loos. Nia fó kmaan no ajuda sira neʼebé moras no ema neʼebé idade ona tanba nia hadomi buat neʼebé diʼak. Nia haburas hahalok sira-neʼe neʼebé lori buat diʼak ba ema seluk, laʼós deʼit tanba nia hakarak atu hetan knaar iha kongregasaun. b

Grupu katuas nian kontente atu fó konsellu no fó laran-manas ba ita, maibé atu kumpre kritériu husi Bíblia atu hetan knaar iha kongregasaun, ida-neʼe mak ema ida-idak nia responsabilidade. Irmaun Henry neʼebé serbí nuʼudar katuas kleur ona dehan: “Se ita hakarak atu hetan knaar, ita tenke hakaʼas an atu hatudu katak ita kumpre Bíblia nia kritériu.” Nia temi eskritura Eclesiastes (Pengkhotbah) 9:10 neʼebé dehan: “Buat hotu neʼebé ó-nia liman bele halo, halo ida-neʼe ho ó-nia kbiit tomak.” Tuirmai nia esplika: “Knaar naran deʼit neʼebé katuas sira fó ba ita, hakaʼas an atu kumpre ida-neʼe. Hafolin serbisu hotu neʼebé ita simu iha kongregasaun, maski neʼe inklui dasa rai. Nuʼudar tempu liu daudaun, ema sei hatene ita-nia serbisu no hakaʼas-an.” Se loron ida ita hakarak atu serbí nuʼudar katuas, diʼak atu sai badinas no halo ema fiar ita iha buat hotu neʼebé ita halo iha Naʼi nia  serbisu. Iha ita-nia moris, ita tenke hatudu hahalok haraik-an laʼós foti-an.—Mateus 23:8-12.

Irmaun balu neʼebé hakarak atu hetan knaar iha kongregasaun dala ruma koko hatudu sai sira-nia hakarak neʼe hodi obriga grupu katuas nian atu hili sira. Irmaun seluk la kontente kuandu katuas fó konsellu ba sira. Ema sira hanesan neʼe tenke husu ba sira-nia an: ‘Haʼu buka oin deʼit, ka haʼu ho haraik an hakarak atu tau matan ba Jeová nia bibi sira?’

Ema sira neʼebé hakarak atu hetan knaar iha kongregasaun tenke hanoin-hetan kritériu ida tan ba katuas sira, neʼe mak “sai nuʼudar ezemplu ba bibi-lubun”. (1 Pedro 5:1-3) Ema neʼebé sai nuʼudar ezemplu ba kongregasaun tenke hasees an husi hanoin no hahalok neʼebé sala. Ho haraik an, nia hein ho pasiénsia maski nia sai katuas ona ka lae. Sai nuʼudar katuas kongregasaun la halo ita sai ema sala-laek. (Números [Bilangan] 12:3; Salmo [Mazmur] 106:32, 33) No mós, karik irmaun ida hanoin katak ‘nia laran moos kona-ba buat hotu’, maibé ema seluk bele haree buat ruma neʼebé la diʼak kona-ba nia. (1 Korinto 4:4) Tan neʼe, se katuas sira fó konsellu husi Bíblia ba ita, rona ba ida-neʼe no la sai hirus. No tuirmai hakaʼas an atu halo tuir sira-nia liafuan.

Ba irmaun balu, sira sente katak sira presiza hein ba tempu kleur antes sira hetan knaar iha kongregasaun. Entaun, se ita hakaʼas an ba tinan balu ona atu “sai katuas” ida, neʼe halo ita sente estrese ka lae? Se nuneʼe, haree toʼok Bíblia nia liafuan tuirmai neʼe: “Kuandu buat neʼebé ema hein la mosu tuir nia tempu, neʼe hamosu laran-moras, maibé buat neʼebé ema hakarak mak ai-hun moris nian bainhira ida-neʼe mosu duni.”—Provérbios (Amsal) 13:12.

Kuandu ema sente katak sira la bele kumpre sira-nia planu neʼebé sira gosta tebes, dala ruma sira sai laran-moras. Abraão mós sente hanesan. Jeová promete atu fó nia oan-mane ida, maibé tinan barak liu ona no nia ho Sara la iha oan. (Gênesis [Kejadian] 12:1-3, 7) Ho idade neʼebé boot ona, Abraão ho laran-triste husu: “Naʼi Jeová ukun-naʼin boot, saida mak ita sei fó ba haʼu, tanba haʼu nafatin la iha oan . . . Ita la fó oan ida mai haʼu.” Jeová fó kmaan ba nia katak Ninia promesa kona-ba oan-mane sei sai loos. Maibé maizumenus tinan 14 liu mak Maromak kumpre ninia liafuan.—Gênesis (Kejadian) 15:2-4; 16:16; 21:5.

Nuʼudar Abraão hein, nia lakon ninia ksolok atu serbí Jeová ka lae? Lae. Nia nunka iha duvida kona-ba Maromak nia promesa. Nia kontinua hein atu liafuan sira-neʼe sai loos. Apóstolu Paulo hakerek: “Depois Abraão hatudu tiha pasiénsia, nia simu duni promesa neʼe.” (Ebreu 6:15) Ikusmai, Maromak neʼebé Aas Liu Hotu haraik bensaun barak ba mane laran-metin neʼe iha dalan neʼebé boot liu fali buat neʼebé nia hein. Entaun, saida mak ita aprende husi Abraão nia ezemplu neʼe?

Se ita hakarak atu serbí nuʼudar katuas ida maibé neʼe seidauk akontese maski tinan barak liu ona, diʼak atu kontinua tau fiar ba Jeová. Keta lakon ita-nia ksolok atu halo Maromak nia serbisu. Irmaun Warren neʼebé ajuda ona ema barak atu laʼo ba oin iha lia-loos, dehan: “Presiza tempu atu hatudu sai ho klaru  se irmaun ida kumpre ona kritériu atu hetan knaar. Nuʼudar tempu liu daudaun, irmaun sira sei hatudu matenek no ninia kbiit liuhusi ninia hahalok no dalan neʼebé nia halaʼo ninia knaar sira. Ema balu dehan katak sira hetan susesu se sira simu knaar oioin iha kongregasaun. Maibé hanoin hanesan neʼe mak sala no bele domina sira. Se ita serbí Jeová ho laran-metin iha situasaun no pozisaun naran deʼit, neʼe katak ita hetan duni susesu.”

Irmaun ida tenke hein ba tinan sanulu liu antes nia hetan knaar nuʼudar katuas ida. Nia temi fali istória iha livru Ezequiel kapítulu 1, no fó sai kona-ba saida mak nia aprende husi ida-neʼe hodi dehan: “Jeová mak kontrola ninia kuda-karreta, katak ninia organizasaun, hodi laʼo lalais tuir ninia hakarak. Buat neʼebé importante mak laʼós ita-nia tempu maibé Jeová nia tempu. Hodi serbí nuʼudar katuas ida, neʼe laʼós kona-ba buat neʼebé haʼu hakarak ka kona-ba knaar neʼebé haʼu tenke hetan. Tuir loloos, buat neʼebé haʼu hakarak karik la hanesan ho buat neʼebé Jeová hatene katak haʼu presiza.”

Se ita hein atu halo serbisu diʼak nuʼudar katuas kristaun ida, hakaʼas an atu hola parte hodi aumenta ksolok iha kongregasaun. Se ita sente katak tempu laʼo neineik liu, hakaʼas an atu la sai laran-tun demais no lakon pasiénsia. Irmaun Raymond neʼebé temi uluk dehan: “Se ita kaan atu hetan pozisaun, ita la sente kontente. Ema neʼebé hanoin barak, sira halakon tiha ksolok neʼebé sira bele hetan hodi serbí Jeová.” Hakaʼas an atu haburas hahalok husi Maromak nia espíritu santu, liuliu hahalok pasiénsia. Kontinua atu hametin ita-nia relasaun ho Maromak liuhusi estuda Bíblia. Aumenta ita-nia serbisu haklaken no estuda Bíblia ho ema. Halaʼo atividade espirituál nian ho ita-nia família no halaʼo adorasaun família nian. Buka oportunidade atu hamutuk ho ita-nia irmaun no irmán sira. Nuʼudar ita laʼo ba oin hodi kumpre ita-nia planu, ita sei sente haksolok atu serbí Jeová.

Hakaʼas an atu kumpre kritériu hodi hetan knaar mak hanesan bensaun husi Jeová. Nia no ninia organizasaun lakohi atu ema sai laran-tun no la kontente iha sira-nia serbisu nuʼudar sira hakaʼas an atu hetan knaar. Maromak ajuda no fó bensaun ba ema hotu neʼebé serbí nia ho laran-moos. No nia mós “la aumenta buat neʼebé halo laran-susar”.—Provérbios (Amsal) 10:22.

Maski ita hakaʼas an ona ba tempu kleur atu hetan knaar iha kongregasaun, maibé sempre iha dalan ba ita atu kontinua hametin ita-nia relasaun ho Jeová. Maromak Jeová sei nunka haluha ita-nia hakaʼas-an nuʼudar ita haburas hahalok diʼak neʼebé ita presiza atu kumpre kritériu atu badinas hodi serbí kongregasaun, maibé keta haluha ita-nia responsabilidade ba ita rasik nia família. Sin, ami hein katak ita sempre sente haksolok hodi halo serbisu ba Jeová no kumpre knaar naran deʼit neʼebé ita simu.