1, 2. (a) Ema Izraél nia bibi-atan sira iha responsabilidade saida deʼit? (b) Oinsá mak inan-aman hanesan ho bibi-atan ida?

 ATU moris nuʼudar bibi-atan ida iha tempu Izraél antigu nian laʼós buat neʼebé fasil. Tanba atu rai manas ka malirin, sira loron tomak tenke hein bibi sira iha rai-luan. Sira mós tenke proteje bibi sira husi animál fuik ka naʼok-teen sira. Sira presiza ravista beibeik bibi ida-idak no se sira haree iha bibi balu mak moras ka kanek ruma, bibi-atan presiza kurtivu bibi sira-neʼe. Sira tau atensaun liuliu ba bibi nia oan sira, tanba bibi-oan fraku tebes, la hanesan ho bibi boot sira.—Gênesis (Kejadian) 33:13.

² Inan-aman kristaun sira mós tenke hatudu hahalok hanesan ho bibi-atan ida. Inan-aman iha responsabilidade atu haboot sira-nia oan “hodi fó dixiplina no matadalan neʼebé tuir Jeová nia hakarak”. (Éfeso 6:4) Neʼe la fasil, tanba Satanás sempre buka dalan hodi ataka oan sira. Laʼós neʼe deʼit, tanba nuʼudar ema sala-naʼin, oan sira mós iha hakarak neʼebé ladún loos. (2 Timóteo 2:22; 1 João 2:16) Entaun, oinsá mak imi bele ajuda imi-nia oan sira? Mai ita koʼalia kona-ba buat tolu oinsá atu tau matan didiʼak ba imi-nia oan sira. Neʼe  mak: (1) Hatene didiʼak sira, (2) Hanorin didiʼak sira, no (3) Fó matadalan ba sira.

3. Oinsá mak inan-aman sira bele hatene didiʼak sira-nia oan?

³ Bibi-atan ida neʼebé diʼak sempre ravista didiʼak bibi ida-idak tanba nia lakohi ninia bibi atu hetan moras ruma. Bíblia dehan: “Ó tenke hatene didiʼak ó-nia bibi sira-nia kondisaun.” (Provérbios [Amsal] 27:23) Nuʼudar inan-aman ida, imi mós presiza hatene didiʼak imi-nia “bibi sira”, ka oan sira. Atu bele halo nuneʼe, imi tenke hatene oan sira-nia hahalok, hanoin no sentimentu. Entaun, oinsá mak imi bele halo ida-neʼe? Imi tenke koʼalia beibeik ho oan sira.

4, 5. (a) Oinsá mak inan-aman bele ajuda oan sira atu koʼalia sai sira-nia hanoin ka sentimentu? (Haree dezeñu iha pájina 17.) (b) Imi halo ona saida hodi imi-nia oan sira bele koʼalia nakloke ho imi?

⁴ Inan-aman balu sente susar tebes atu koʼalia ho sira-nia oan, liuliu oan sira toʼo ona tinan 13 ba leten. Baibain iha idade hanesan neʼe, sira lakohi fó-hatene sira-nia hanoin ba ema seluk ka koʼalia kona-ba sira-nia sentimentu ba ema. Se imi mak hasoru hela situasaun neʼe daudaun, imi bele halo saida? Imi la presiza obriga sira tuur hodi koʼalia loron tomak ida ho sira. Koko buka fali tempu seluk hanesan bá pasiar hamutuk, halimar hamutuk ho sira, ka halo serbisu ruma iha uma hamutuk ho sira. (Deuteronômio [Ulangan] 6:6, 7) Iha situasaun hanesan neʼe, karik sira sei la sente moe ka sente ladún diʼak atu koʼalia nakloke kona-ba sira-nia sentimentu ka hanoin sira.

⁵ Maibé oinsá se imi-nia oan lakohi nafatin atu fó sai sira-nia hanoin ba imi? Koko tan dalan seluk. Porezemplu, duké husu ba oan: “Ohin ó halo saida?”, karik diʼak liu ba inan-aman atu konta uluk kona-ba saida mak imi halo ohin. Se hanesan neʼe, nia sei sente nia mós bele konta kona-ba ninia loron iha eskola ohin. Oinsá se imi hakarak hatene ninia hanoin kona-ba buat ida, hanesan fuma ka naʼok? Husu kona-ba oinsá ninia kolega sira sente kona-ba buat neʼe, depois, imi bele husu matadalan saida mak nia bele fó atu ajuda ninia kolega sira. Hodi nuneʼe, imi-nia oan sei la sente moe atu fó sai ninia hanoin.

6. Oinsá mak oan bele koʼalia livre ba inan-aman?

⁶ Inan-aman presiza halo sira-nia oan sente katak sira bele koʼalia ho inan-aman iha tempu naran deʼit. Se imi sempre la iha tempu atu koʼalia ho sira bainhira sira presiza imi, sira mós sei la fó sai sira-nia problema ba imi. Oinsá mak oan sira bele sente katak sira bele koʼalia ho inan-aman iha tempu naran deʼit? Hatete deʼit: “Imi bele koʼalia ho haʼu”, neʼe la toʼo. Imi tenke kuidadu atu la halo oan sira sente katak imi sei siʼak ka la komprende ba sira-nia problema sira. Porezemplu, Kayla, tinan 19, hatete: “Haʼu bele koʼalia ba apá kona-ba buat naran deʼit. Nia nunka korta haʼu-nia liafuan sira, ka dehan haʼu mak sala. Nia rona didiʼak deʼit. Depois, nia sempre fó sujestaun neʼebé diʼak mai haʼu.”

7. (a) Inan-aman tenke kuidadu saida bainhira koʼalia ho oan kona-ba tópiku ida hanesan namora? (b) Oinsá mak inan-aman bele halo oan sai hirus ho sira?

⁷ Dala ruma, susar atu loke ibun koʼalia kona-ba buat hanesan namora. Diʼak hodi fó avizu kona-ba perigu ruma bainhira namora ho ema, maibé kuidadu hodi la koʼalia kona-ba perigu deʼit. Diʼak mós hanorin oan sira kona-ba namora iha dalan neʼebé loos. Porezemplu, se ita ba restaurante ida atu han, sira faʼan hahán moruk deʼit, hahán seluk la iha, ita sei sente oinsá? Karik ita sei bá buka fali restaurante seluk. Hanesan neʼe mós ho imi-nia oan sira. Se imi sempre koʼalia ba sira mak kona-ba avizu deʼit maibé la iha buat seluk, sira bele sai hirus no nunka husu imi atu fó sujestaun tan. (Lee Koloso 3:21.) Maski inan-aman la bele husik deʼit sira-nia oan, maibé importante mós la bele istika demais sira. Irmán joven ida naran Emily hatete: “Bainhira haʼu-nia amá-apá koʼalia ho haʼu kona-ba namora, sira la koʼalia katak namora mak buat aat ida. Maibé sira koʼalia kona-ba tempu namora  mak tempu neʼebé diʼak atu koñese didiʼak ema neʼebé ita atu kaben. Ida-neʼe halo haʼu la sente moe atu koʼalia ho sira kona-ba tópiku neʼe. Neʼe halo haʼu hanoin se aban-bainrua haʼu namora, haʼu sei fó-hatene sira, duké subar ba sira.”

8, 9. (a) Hatudu pasiénsia hodi rona didiʼak sei lori rezultadu saida deʼit? (b) Konta toʼok imi rasik nia esperiénsia tansá mak diʼak atu rona didiʼak se oan ida koʼalia ho imi?

⁸ Atu oan sira la sente susar koʼalia ho imi, imi presiza hatudu pasiénsia boot no rona didiʼak ba sira. (Lee Tiago 1:19.) Inan ida naran Katia hatete: “Uluk, haʼu la iha pasiénsia liu ba haʼu-nia oan feto. Haʼu sempre korta ninia liafuan sira. Dala ruma haʼu sente isin-baruk no lakohi nia mai buka beibeik haʼu hodi koʼalia. Maibé agora haʼu troka ona haʼu-nia hahalok neʼe, no nia mós troka ninia hahalok sira. Agora nia rona haʼu ona, la hanesan uluk.”

⁹ Aman ida naran Ronaldo mós hasoru situasaun hanesan neʼe ho ninia oan feto joven ida. Nia hatete: “Bainhira nia hatete mai haʼu katak nia namora ho mane-oan ida iha eskola, foufoun haʼu hirus tebes. Maibé, ikusmai haʼu hanoin diʼak liu halo tuir Jeová nia pasiénsia hodi fó oportunidade ba nia esplika ninia sentimentu uluk, depois mak haʼu koko atu korrije nia. Haʼu kontente tanba haʼu halo desizaun ida-neʼe, tanba ikusmai haʼu bele komprende duni ninia sentimentu sira. Kuandu nia koʼalia tiha mai haʼu kona-ba ninia sentimentu sira, haʼu mós hatene oinsá atu koʼalia fali ba nia. Haʼu mós hakfodak tanba nia hakarak simu haʼu-nia konsellu sira. Nia hakarak tebes atu bele troka ninia hahalok sira-neʼe.” Koʼalia beibeik ho imi-nia oan sira bele ajuda imi hatene sira-nia hanoin ka sentimentu. Hodi nuneʼe, imi mós bele ajuda sira hodi halo desizaun ba sira rasik nia moris. a—Haree nota iha kraik.

10, 11. Oinsá mak imi bele ajuda imi-nia oan sira hodi la husik lia-loos?

¹⁰ Bibi-atan neʼebé diʼak hatene katak bibi balun bele laʼo lakon. Hanesan bibi ida han duʼut, neineik-neineik bele han toʼo fatin neʼebé dook husi ninia maluk sira. Ida-neʼe mós bele akontese ba oan sira. Karik ransu ho ema aat ka halo atividade halimar nian neʼebé aat bele dada sira toʼo neineik-neineik bele sai husi lia-loos. (Provérbios [Amsal] 13:20) Imi bele halo saida hodi oan sira la husik lia-loos?

¹¹ Bainhira imi haree oan sira komesa hatudu  fraku ruma, labele demora hodi fó kedas ajuda ba sira. Hanorin sira mós atu haburas liután sira-nia hahalok diʼak sira. (2 Pedro 1:5-8) Adorasaun família nian mak oportunidade neʼebé diʼak atu hanorin oan iha dalan hanesan neʼe. Ita-nia Serbisu Kristaun nian ba Outubru 2008 hatete: “Diʼak ba família nia ulun atu hakaʼas an atu halo sira-nia knaar iha Maromak Jeová nia oin hodi halaʼo programa estudu Bíblia família nian semana-semana. No mós atu halaʼo estudu neʼe iha dalan neʼebé diʼak ba família tomak.” Imi uza didiʼak oportunidade neʼe hodi hanorin imi-nia oan sira ka lae? Tuir loloos imi-nia oan sira hafolin tebes imi ajuda sira iha dalan hanesan neʼe.—Mateus 5:3; Filipe 1:10.

12. (a) Oinsá mak programa adorasaun família nian bele ajuda joven sira? (Haree mós kaixa “Sira hafolin programa neʼe”.) (b) Oinsá mak adorasaun família nian ajuda imi rasik?

¹² Rona toʼok saida mak Carissa, tinan 19, hatete kona-ba ninia família nia programa Adorasaun Família nian. Nia hatete: “Haʼu gosta tanba ami bele tuur hamutuk hodi koʼalia. Ami-nia relasaun mós sai diʼak liután. Apá nunka falta hodi halaʼo adorasaun família nian. Diʼak hodi haree apá kaer ninia knaar ho laran, neʼe halo haʼu mós hakarak tuir programa neʼe ho laran. Ida-neʼe mós halo haʼu respeitu liután ba apá nuʼudar aman no família nia ulun neʼebé diʼak.” Irmán joven ida naran Brittney hatete: “Adorasaun família nian halo haʼu besik liután ba haʼu-nia amá-apá. Liuhusi dalan hanesan neʼe sira hatudu mai haʼu katak sira iha interese mai haʼu no hakarak hatene duni kona-ba problema neʼebé haʼu hasoru daudaun. Programa neʼe ajuda ami hakbesik ba malu no halo ami iha unidade.” Knaar importante ida ba inan-aman mak atu hanorin oan sira hodi hadomi Jeová. Programa adorasaun família nia mak dalan diʼak tebes atu kumpre knaar neʼe. b—Haree nota iha kraik.

13. Oinsá mak oan ida bele iha vontade atu serbí Jeová?

¹³ Bibi-atan diʼak uza rota ida hodi dirije ka proteje ninia bibi sira. Ninia hakarak mak lori bibi sira-neʼe bá “duʼut neʼebé buras”. (Ezequiel [Yehezkiel] 34:13, 14) Nuʼudar inan-aman, imi mós hakarak dirije ka fó matadalan hodi oan sira bele serbí Jeová. Imi hakarak imi-nia oan sira atu iha sentimentu hanesan ema neʼebé hakerek Salmo ida, nia dehan: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.” (Salmo [Mazmur] 40:8) Se oan sira mak iha duni sentimentu hanesan neʼe, sira mós sei dedika sira-nia moris hodi serbí Jeová no hetan batizmu. Maibé sira tenke komprende uluk kona-ba desizaun importante ida-neʼe, no desizaun atu serbí Jeová tenke mai husi sira rasik nia laran.

14, 15. (a) Inan-aman iha responsabilidade saida deʼit ba oan sira? (b) Buat saida mak bele halo joven balu duvida kona-ba lia-loos?

¹⁴ Oinsá se imi-nia oan sira la laʼo ba oin hodi serbí Jeová? Karik sira duvida hela katak Testemuña ba Jeová mak laʼós relijiaun neʼebé loos. Imi bele halo saida? Hakaʼas an hodi hanorin sira oinsá mak sira bele hadomi Jeová husi sira-nia laran. Ajuda sira hodi hafolin buat hotu neʼebé Maromak fó ba sira. (Apokalipse 4:11) Ikusmai, se sira rasik prontu ona, sira bele foti desizaun rasik atu serbí ka la serbí Jeová.

¹⁵ Se imi-nia oan sira mak sente laran rua-rua hela kona-ba lia-loos, hatudu pasiénsia ba sira no koko hatudu dalan ba sira. Ajuda hodi sira bele hatene katak serbí Jeová mak dalan moris nian neʼebé diʼak liu hotu no sei lori bensaun rohan-laek ba sira. No mós buka-hatene toʼok tansá mak sira iha duvida hodi serbí Jeová. Porezemplu, imi-nia oan iha duvida tanba nia la fiar duni buat neʼebé Bíblia hanorin ka tanba nia taʼuk deʼit atu haklaken ba ninia kolega sira? Imi-nia oan duvida duni katak Maromak nia ukun-fuan sira mak la diʼak, ka tuir loloos nia  sente mesa-mesak tanba ema seluk lakohi halimar ho nia?

16, 17. Iha dalan saida deʼit mak inan-aman sira bele ajuda oan hodi haburas sira rasik nia relasaun ho Jeová?

¹⁶ Oinsá mak imi bele ajuda imi-nia oan se sira duvida kona-ba lia-loos? Inan-aman balun uza pergunta sira hodi buka-hatene uluk problema nia hun mak saida. Sira husu hanesan neʼe: “Ó sente atu sai ema kristaun ida, neʼe fasil ka susar? Tuir ó-nia hanoin, tansá diʼak atu sai ema kristaun ida? Atu serbí Jeová presiza husik buat saida deʼit? Ó sente oinsá kona-ba bensaun neʼebé ita simu daudauk no bensaun sira seluk iha futuru? Bensaun sira-neʼe folin boot liu buat sira neʼebé ita husik ona ka lae?” Kuandu husu pergunta sira-neʼe ba sira, husu iha dalan hanesan imi koʼalia baibain ho sira. Uza liafuan sira neʼebé mamar, hodi sira la sente katak imi litik sira. Karik diʼak mós bele koʼalia kona-ba Marcos 10:29, 30 ho sira. Joven balu hakerek lista rua. Lista primeiru kona-ba bensaun ba ema kristaun nian, no ida seluk kona-ba saida deʼit mak sira presiza husik atu sai ema kristaun ida. Halo lista hanesan neʼe diʼak tanba bele ajuda imi no imi-nia oan atu hatene problema nia hun mak saida no oinsá mak imi bele rezolve problema neʼe hamutuk. Se ita sente estuda livru Bíblia Hanorin no “Maromak nia Domin” mak bele ajuda ema foun sira, satán ho imi-nia oan sira! Imi halo hanesan neʼe duni ka lae?

¹⁷ Toʼo tempu ida, imi-nia oan sira tenke halo desizaun rasik se sira hakarak ka lakohi atu serbí Jeová. Keta hanoin tanba imi mak deside atu serbí Jeová, ikusmai oan sira mós sei halo tuir imi. Sira rasik mak tenke haburas sira-nia relasaun ho Jeová. (Provérbios [Amsal] 3:1, 2) Maibé oinsá se sira sente susar tebes atu hametin sira-nia relasaun ho Jeová? Anima sira hodi buka-hatene razaun rasik tanbasá sira sente hanesan neʼe, hodi husu ba sira-nia an rasik: ‘Oinsá mak haʼu bele fiar katak Maromak iha duni? Oinsá mak haʼu fiar katak Jeová iha interese mai haʼu? Oinsá mak haʼu bele fiar katak halo tuir Jeová nia ukun-fuan sei lori bensaun ba haʼu-nia moris?’ Entaun, inan-aman sira, sai bibi-atan diʼak ida hodi dirije oan sira. Ajuda sira hodi haree katak serbí Jeová mak dalan moris nian diʼak liu hotu. c (Haree nota iha kraik.)—Roma 12:2.

18. Oinsá mak inan-aman sira bele banati-tuir Jeová, Bibi-Atan neʼebé Boot liu hotu?

¹⁸ Ema kristaun hotu tenke banati-tuir Bibi-Atan neʼebé Boot liu hotu, neʼe mak Jeová. (Éfeso 5:1; 1 Pedro 2:25) Liuliu inan-aman sira tenke hatene didiʼak sira-nia bibi, ka oan sira-nia kondisaun, hodi fó matadalan ba sira no dirije sira. Entaun, inan-aman sira, hakaʼas an bá hodi tau matan didiʼak no haboot imi-nia oan iha dalan neʼebé sira bele hadomi Jeová. Atu nuneʼe, sira bele simu bensaun rohan-laek neʼebé Maromak sei fó ba sira!