1. Apóstolu Paulo sente oinsá kona-ba ema neʼebé serbisu makaʼas hodi haklaken?

 APÓSTOLU Paulo hafolin tebes ninia maluk kristaun sira neʼebé hakaʼas an hodi haklaken liafuan diʼak. Nia hatete: “Iha ita-nia Aman Maromak nia oin ami nunka haluha serbisu neʼebé imi halo ho fiar no domin, no oinsá imi tahan susar tanba imi-nia esperansa iha Naʼi Jesus Kristu.” (1 Tesalónika 1:3) Ohin loron, atu ita hola parte boot ka kiʼik iha Maromak nia serbisu, Maromak Jeová hafolin tebes ida-neʼe, no nia la haluha buat hotu neʼebé ita halo ba nia.—Ebreu 6:10.

2. Iha lisaun neʼe, ita sei koʼalia kona-ba saida?

² Iha tempu uluk no agora, ema kristaun sira husik buat barak hodi bele serbí Jeová tempu-tomak. Iha lisaun neʼe, ita sei koʼalia kona-ba saida mak ema iha tempu uluk halo hodi serbí Maromak. Ita mós sei aprende kona-ba buat neʼebé ema kristaun sira halo ohin loron hodi serbí Jeová tempu-tomak, no saida mak ita bele halo hodi ajuda sira.

3, 4. (a) Konta toʼok iha dalan saida mak ema kristaun sira iha tempu uluk serbí Jeová. (b) Oinsá mak ema kristaun sira iha tempu uluk bele hetan apoia ba buat neʼebé sira presiza loro-loron?

³ Depois Jesus hetan batizmu, nia komesa haklaken kona-ba  Maromak nia Ukun. Nia mós hanorin ema seluk atu halo hanesan. (Lucas 3:21-23; 4:14, 15, 43) Depois Jesus nia mate, ninia apóstolu sira mak kontinua dirije hodi serbisu haklaken bele habelar ba fatin oioin. (Apóstolu 5:42; 6:7) Iha tempu neʼebá, ema kristaun balu muda ba fatin seluk hodi serbí nuʼudar misionáriu. Porezemplu, Filipe haklaken iha fatin oioin iha rai-Palestina. (Apóstolu 8:5, 40; 21:8) Paulo mós hanesan misionáriu ida no nia haklaken liafuan diʼak toʼo rai oioin. (Apóstolu 13:2-4; 14:26; 2 Korinto 1:19) Ema balu hakerek livru sira iha Bíblia hanesan Marcos no Lucas, ka sai hanesan sekretáriu ba ema neʼebé hakerek Bíblia mak hanesan Silvano. (1 Pedro 5:12) Feto kristaun barak mós serbisu hamutuk ho mane sira-neʼe. (Apóstolu 18:26; Roma 16:1, 2) Bainhira ita lee kona-ba istória kapás husi ema kristaun sira iha Eskritura Lia-Gregu ita hatene katak Maromak Jeová hafolin tebes ninia atan sira-nia serbisu no nia tau matan ba sira.

⁴ Oinsá mak ema kristaun sira iha tempu uluk bele hetan apoia ba buat neʼebé sira presiza loro-loron? Dala ruma sira simu ajuda husi maluk sira, maibé sira la obriga ema atu halo nuneʼe. (1 Korinto 9:11-15) Ema kristaun balu konvida sira han hamutuk, ka fó fatin ba sira atu hela ka fó ajuda seluk. (Lee Apóstolu 16:14, 15; Filipe 4:15-18.) Paulo no ninia maluk sira mós halo serbisu uitoan hodi tau matan ba sira-nia an.

5. Saida mak feen ho laʼen ida hatete kona-ba sira-nia moris hodi serbí Maromak tempu-tomak?

⁵ Ohin loron mós, ema barak hakaʼas an atu serbí Jeová tempu-tomak iha dalan oioin. (Haree kaixa “Serbisu tempu-tomak oioin”.) Sira kontente ka lae, tanba sira hili moris hanesan neʼe? Se ita husu ba sira pergunta neʼe, karik sira-nia resposta bele fó laran-manas ba ita. Irmaun ida neʼebé uluk iha oportunidade serbí ona nuʼudar pioneiru regulár, pioneiru tempu-tomak, misionáriu no mós serbí iha Betel iha rai seluk, hatete: “Haʼu sente katak hodi serbí Maromak tempu-tomak mak desizaun neʼebé diʼak liu iha haʼu-nia moris. Bainhira haʼu tinan 18, haʼu laran namlele kona-ba desizaun atu bá universidade, serbisu tempu-tomak ka foti pioneiru. Husi haʼu-nia esperiénsia rasik haʼu hatene katak Jeová la haluha ita-nia serbisu makaʼas hodi serbí nia tempu-tomak. Se haʼu halo serbisu tempu-tomak iha mundu, haʼu la bele uza haʼu-nia matenek hanesan agora hodi serbí Maromak.” Ninia feen hatete: “Knaar hotu neʼebé ami simu ajuda haʼu hodi hetan esperiénsia barak. Se ami la koko knaar oioin iha Maromak nia serbisu ami sei nunka haree oinsá Jeová bele proteje no dirije ami. Loro-loron haʼu fó agradese ba Jeová tanba ami bele serbí nia tempu-tomak.” Imi mós hakarak sente hanesan neʼe iha imi-nia moris ka lae?

6. Jeová sente oinsá kona-ba serbisu neʼebé ita halo ba nia?

⁶ Ema balu nia situasaun la permite sira atu halo serbisu tempu-tomak ba Jeová. Maski nuneʼe, Jeová hafolin nafatin sira-nia hakaʼas-an hodi serbí nia. Porezemplu, bainhira Paulo haruka ninia kumprimentus ba ninia maluk kristaun sira iha kongregasaun iha Koloso, nia mós temi sira-nia naran balu. Paulo hafolin sira-nia serbisu, hanesan mós ho Jeová. (Lee Filemon 1-3.) Ohin loron, Maromak Jeová mós hafolin buat hotu neʼebé ninia atan sira halo iha ninia serbisu. Maibé oinsá mak ita bele ajuda sira neʼebé halo serbisu tempu-tomak ba Jeová?

7, 8. Serbisu pioneiru envolve saida? Oinsá mak ema seluk iha kongregasaun bele ajuda sira?

⁷ Pioneiru sira ohin loron fó laran-manas ba irmaun-irmán sira iha kongregasaun, hanesan mós ho ema kristaun sira neʼebé haklaken iha tempu uluk. Sira barak uza  maizumenus oras 70 hodi haklaken fulan-fulan. Oinsá mak ita bele fó ajuda ba sira?

⁸ Irmán pioneiru ida naran Shari hatete: “Ita haree pioneiru sira makaʼas loos tanba sira haklaken loro-loron, maibé tuir loloos sira mós presiza ema seluk fó laran-manas ba sira.” (Roma 1:11, 12) Irmán ida neʼebé halo serbisu pioneiru ba tinan barak konta kona-ba pioneiru sira iha ninia kongregasaun. Nia hatete: “Sira serbisu makaʼas no la para. Bainhira ita tula sira bá haklaken, konvida sira han hamutuk, ka fó osan mina uitoan ba sira, sira sente agradese tebes. Ida-neʼe mós dalan neʼebé ita hatudu ita hafolin sira-nia serbisu.”

9, 10. Ema balu halo ona saida hodi ajuda pioneiru sira iha sira-nia kongregasaun?

⁹ Hodi haklaken hamutuk ho pioneiru sira mak dalan ida tan neʼebé ita bele ajuda sira. Irmán pioneiru naʼin-rua hatete katak sira presiza irmaun-irmán sira atu bele haklaken hamutuk iha loron baileet no mós iha loraik. Irmán ida neʼebé agora serbí iha Betel iha sidade Brooklyn konta kona-ba oinsá ema seluk fó ajuda ba nia bainhira nia pioneiru. Nia hatete: “Irmán ida neʼebé iha ninia karreta rasik hatete mai haʼu dehan: ‘Se loron ida ó la iha pár atu haklaken hamutuk, bolu haʼu deʼit no ita bele bá hamutuk.’ Ho ajuda hanesan neʼe mak haʼu bele pioneiru toʼo ohin loron.” Shari hatete: “Bainhira haklaken hotu, baibain pioneiru klosan sira mesak deʼit iha sira-nia uma. Karik ita bele konvida sira atu tuir ita-nia adorasaun família nian. Ita mós bele anima sira hodi bolu sira mai halimar hamutuk ho ita.”

¹⁰ Irmán ida neʼebé serbí tempu-tomak maizumenus ba tinan 50 ona konta kona-ba oinsá ema seluk ajuda nia no mós irmán pioneiru klosan sira seluk. Nia hatete: “Liutiha fulan rua ka tolu, katuas sira iha ami-nia kongregasaun sempre vizita pioneiru sira. Sira hakarak tebes hatene ami-nia saúde diʼak ka lae, ka oinsá ho serbisu, no ami iha problema ruma ka lae. Sira mós mai toʼo uma hodi haree se ami iha duni presiza ruma atu ajuda ka lae.” Katuas sira-neʼe halo tuir Onesíforo nia ezemplu. Bíblia hatete nia iha família rasik atu tau matan, maibé nia mós fó ajuda ba Paulo.—2 Timóteo 1:18.

11. Serbisu nuʼudar pioneiru tempu-tomak envolve saida?

¹¹ Kongregasaun balu iha irmaun-irmán sira neʼebé serbí nuʼudar pioneiru tempu-tomak.  Sira uza oras 130 hodi haklaken fulan-fulan. Tanba sira uza tempu barak atu haklaken no ajuda kongregasaun iha dalan oioin, sira ladún iha tempu atu serbisu. Tan neʼe, sukursál fó osan uitoan hodi taka sira-nia presiza loro-loron nian atu sira bele uza sira-nia tempu ba serbisu haklaken.

12. Iha dalan saida deʼit mak katuas sira no ema seluk bele ajuda pioneiru tempu-tomak?

¹² Iha dalan saida deʼit mak ita bele ajuda pioneiru tempu-tomak sira? Katuas ida neʼebé serbí iha sukursál koʼalia beibeik ho pioneiru tempu-tomak sira, hatete: “Katuas sira presiza koʼalia ho pioneiru tempu-tomak hodi hatene oinsá bele fó ajuda. Ema balu hanoin katak pioneiru tempu-tomak sira la presiza ajuda tan tanba sukursál tau matan ona ba sira-nia presiza loro-loron nian, maibé tuir loloos, irmaun-irmán sira iha kongregasaun sei bele ajuda iha dalan seluk.” Pioneiru tempu-tomak sira mós kontente bainhira ema seluk bele haklaken hamutuk ho sira. Oinsá ho imi? Imi bele akompaña sira iha serbisu haklaken ka lae?

13, 14. (a) Saida mak ita la bele haluha kona-ba katuas área sira ho sira-nia feen? (b) Saida mak ita bele halo hodi ajuda sira neʼebé iha knaar atu vizita kongregasaun?

¹³ Katuas área nian no sira-nia feen mak ema neʼebé iha esperiénsia barak no fiar neʼebé metin. Sira sempre fó laran-manas ba ita. Maibé ita la bele haluha katak sira mós presiza simu laran-manas. Sira agradese bainhira ema haklaken hamutuk ho sira ka irmaun-irmán seluk bolu sira halimar hamutuk. Se katuas área nian ka sira-nia feen moras ka baixa iha ospitál, ita bele bá vizita no ajuda fó buat neʼebé sira presiza. Lucas, neʼebé hakerek livru Apóstolu, mak ida neʼebé “ema barak hadomi”. Nia tau matan ba Paulo no ema kristaun seluk neʼebé laʼo-rai hodi vizita kongregasaun sira.—Koloso 4:14; Apóstolu 20:5–21:18.

¹⁴ Katuas área nian ho sira-nia feen presiza duni belun sira atu fó laran-manas ba sira. Katuas área nian ida hatete: “Haʼu-nia belun sira hatene bainhira haʼu presiza ema atu anima haʼu. Haʼu sente haʼu bele koʼalia kona-ba haʼu-nia problema sira tanba sira husu pergunta sira mai haʼu. Tuir loloos, bainhira sira rona didiʼak ba haʼu-nia problema sira, neʼe haʼu sente ajuda ona haʼu.” Katuas área sira agradese tebes bainhira irmaun-irmán sira hatudu interese no sai sira-nia belun diʼak.

15, 16. Tanbasá mak serbisu neʼebé ema halo iha Betel mak importante, no oinsá mak ita bele ajuda sira?

¹⁵ Irmaun no irmán sira neʼebé serbí iha Betel halo serbisu importante neʼebé ajuda hodi habelar liafuan diʼak. Se imi-nia kongregasaun iha ema neʼebé serbí iha Betel, saida mak imi bele halo hodi apoia sira?

¹⁶ Bainhira ema foin tama Betel, karik sira sei sente mesamesak no hanoin sira-nia família no kolega sira. Irmaun-irmán sira-neʼe kontente kuandu sira-nia maluk iha Betel no iha sira-nia kongregasaun hakbesik sira no sai sira-nia belun. (Marcos 10:29, 30) Ema neʼebé serbí iha Betel iha tempu atu tuir reuniaun semana-semana no bá haklaken, maibé dala ruma sira mós presiza halo knaar seluk iha Betel. Diʼak se irmaun-irmán sira iha sira-nia kongregasaun komprende ida-neʼe no hatudu katak sira hafolin ema Betel iha sira-nia kongregasaun.—Lee 1 Tesalónika 2:9.

17, 18. Irmaun-irmán sira neʼebé hetan knaar atu muda ba rai seluk halo serbisu saida deʼit?

¹⁷ Irmaun-irmán balu neʼebé serbí tempu-tomak dala ruma simu knaar atu muda ba rai seluk. Karik sira presiza sai toman atu han hahán neʼebé foun, aprende língua  foun, no aprende rai seluk nia kostume sira. Irmaun-irmán sira-neʼe hetan knaar saida deʼit?

¹⁸ Sira balu mak misionáriu sira no uza tempu barak liu atu haklaken. Sira iha esperiénsia barak atu haklaken no hanorin Bíblia, no sira gosta fahe sira-nia esperiénsia ho ema seluk iha kongregasaun. Sukursál fó ba sira fatin neʼebé simples atu hela no ajuda sira ho sira-nia presiza loro-loron nian. Irmaun-irmán seluk karik hetan knaar atu muda ba rai seluk hodi serbí iha Betel ka atu ajuda harii sukursál sira, eskritóriu tradusaun nian no Reuniaun-Fatin. Sukursál ka kongregasaun ajuda hodi fó hela-fatin ba sira no hahán loro-loron nian. Hanesan ho família Betel, irmaun-irmán sira-neʼe mós tuir reuniaun semana-semana no bá haklaken. Sira-nia ezemplu diʼak anima tebes kongregasaun sira.

19. Oinsá mak ita bele ajuda ema neʼebé hetan knaar atu muda ba ita-nia rai?

¹⁹ Oinsá mak imi bele ajuda sira neʼebé hetan knaar atu serbí iha ita-nia rai? Bainhira sira foin toʼo, karik sira la toman han hahán balu. Se imi konvida sira han hamutuk, bele husu se sira hakarak koko buat foun, ka husu se iha buat ruma sira la gosta atu han. Karik sira mós neineik-neineik atu aprende imi-nia língua no toman sira. Se nuneʼe, hatudu pasiénsia no ajuda sira, tanba sira hakarak tebes aprende.

20. Oinsá mak ita bele ajuda irmaun-irmán neʼebé serbí tempu-tomak no sira-nia inan-aman?

²⁰ Irmaun-irmán sira neʼebé serbí tempu-tomak, karik sira presiza foti desizaun kona-ba oinsá atu tau matan ba sira-nia inan-aman neʼebé idade ona. Se sira-nia inan-aman mak Testemuña, baibain sira hakarak tebes sira-nia oan atu kontinua halaʼo sira-nia knaar. (3 João 4) Maski sira sei halo buat neʼebé sira bele hodi ajuda sira-nia inan-aman no vizita beibeik sira, maibé tuir loloos, irmaun-irmán sira seluk neʼebé hela besik mós bele ajuda sira neʼebé serbí tempu-tomak. Ita la bele haluha katak irmaun-irmán sira-neʼe mak apoia serbisu neʼebé importante liu ohin loron. (Mateus 28:19, 20) Imi ka imi-nia kongregasaun bele ajuda sira-nia inan-aman ka lae, se sira presiza ajuda ruma?

21. Sira neʼebé serbí tempu-tomak sente oinsá bainhira ema seluk ajuda no fó laran-manas ba sira?

²¹ Ema barak iha mundu buka riku deʼit, maibé ema neʼebé serbí Jeová tempu-tomak la hanoin hanesan neʼe. Sira hakarak fó sira-nia tempu atu adora Jeová no ajuda ema seluk. Sira agradese tebes bainhira sira-nia maluk kristaun apoia sira. Irmán ida neʼebé serbí tempu-tomak no muda ba rai seluk hatete: “Karta neʼebé ema hakerek ho liafuan uitoan atu fó obrigadu mós hatudu katak ema hanoin ita no hafolin ita-nia serbisu.”

22. Imi sente oinsá kona-ba serbí Jeová tempu-tomak?

²² Hodi serbí Jeová tempu-tomak mak halo ita kontente tebes no neʼe mak dalan moris nian neʼebé diʼak liu hotu. Ema neʼebé serbí tempu-tomak bele aprende hahalok no lisaun sira neʼebé bele ajuda sira agora, no mós iha mundu foun. Lakleur tan, Jeová nia atan sira hotu sei halo serbisu neʼebé lori ksolok ba sira loro-loron. Mai ita hotu nunka haluha sira neʼebé serbí tempu-tomak, tanba sira ‘serbisu ho fiar no domin’.—1 Tesalónika 1:3.