1, 2. Adão ho Eva nia moris foufoun hanesan saida? Pergunta saida deʼit mak mosu ohin loron?

 BAINHIRA Maromak kria Adão no Eva iha jardín Eden, sira inimigu la iha. Sira moris ho perfeitu, ka sala ida mós la iha. Sira-nia relasaun ho Kriadór mak hanesan Aman no oan nia relasaun. (Gênesis [Kejadian] 2:7-9; Lucas 3:38) Maromak fó moris rohan-laek ba sira hodi halo knaar importante ida. (Lee Gênesis [Kejadian] 1:28. a) Atu “halo nakonu mundu” ho sira-nia oan, karik sira presiza tempu uitoan, maibé sira la presiza iha moris rohan-laek mak bele kumpre knaar neʼe. Atu tau matan ba “kriatura hotu neʼebé book an iha mundu” mak sira presiza duni moris rohan-laek. Tuir loloos, ba sira naʼin-rua, sira bele halo knaar ida-neʼe tinan ba tinan tanba sira bele moris ba nafatin.

 ² Tanbasá mak moris ohin loron la hanesan ona ho moris neʼebé foufoun Maromak hakarak ba Adão no Eva? Tansá mak ema la kontente tan ka tenke hasoru inimigu moris oioin, inklui mate? Oinsá mak Maromak atu halakon inimigu sira-neʼe? Resposta ba pergunta sira-neʼe hotu bele hetan iha Bíblia laran. Ita sei koʼalia hamutuk kona-ba neʼe agora.

3, 4. (a) Ukun-fuan saida mak Maromak fó ba Adão ho Eva? (b) Tanbasá mak importante hodi halo tuir ukun-fuan neʼe?

³ Maski Adão ho Eva bele moris ba nafatin, maibé sira la hanesan ho Maromak neʼebé nunka bele mate. Adão ho Eva presiza han, hemu, toba, no dada iis hodi bele moris. Sira mós presiza buat importante ida tan hodi moris ba nafatin, neʼe mak sira-nia relasaun ho Jeová, sira-nia moris nia hun. (Deuteronômio [Ulangan] 8:3) Só halo tuir Jeová nia matadalan deʼit mak bele fó sira moris kontente no moris hodi la mate. Tan neʼe mak antes nia kria Eva, Jeová hatete momoos ba Adão: “Ai-fuan husi ai-hun hotu iha jardín neʼe ó bele han toʼo bosu. Maibé kona-ba ai-fuan husi ai-hun koñesimentu nian kona-ba diʼak no aat, ó labele han, tanba iha loron neʼebé ó han ai-fuan neʼe, ó sei mate.”—Gênesis (Kejadian) 2:16, 17.

⁴ “Ai-hun koñesimentu nian kona-ba diʼak no aat” reprezenta katak só Maromak deʼit mak iha direitu atu bele determina buat saida mak diʼak no buat saida mak aat. Neʼe la dehan katak Adão la komprende saida mak diʼak ka aat, tanba Maromak kria nia tuir ninia ilas no kria nia ho konxiénsia. Tan neʼe, ai-hun neʼe hanesan atu fó-hanoin ba Adão no Eva katak sira loro-loron tenkesér halo tuir Maromak nia matadalan. Se sira mak han husi ai-hun neʼe karik, neʼe hanesan sira hatete ba Maromak: “Ami lakohi ona Ita atu ukun ami.” Se sira halo duni hanesan neʼe, sira sei simu kastigu todan, laʼós ba sira deʼit maibé mós ba sira-nia oan hotu. Kastigu neʼe mak mate, hanesan Maromak fó avizu nanis ona ba sira.

5. Tanbasá mak Adão no Eva la halo tuir Jeová?

⁵ Bainhira Maromak kria tiha Eva ba Adão, Adão mós fó-hatene Maromak nia mandamentu neʼe ba nia. Tan neʼe mak Eva bele dekór liafuan hotu neʼebé Maromak fó ba Adão. (Gênesis [Kejadian] 3:1-3) Porezemplu, bainhira Satanás uza samea ida hodi koʼalia ba nia, Eva repete fali liafuan sira-neʼe hotu ba samea neʼe. Satanás mak anju ida neʼebé matan naklosu hodi kaan tebes ba kbiit atu ukun, no hakarak sai husi Maromak nia ukun. (Kompara ho Tiago 1:14, 15.) Nia bosok Eva hodi dehan katak Maromak nunka koʼalia buat neʼebé loos. No se Eva la rona ba Maromak, nia laʼós la mate deʼit, maibé mós sei sai hanesan Maromak. (Gênesis [Kejadian] 3:4, 5) Eva fiar bosok-teen neʼe hodi halo tuir ninia hakarak hodi han ai-fuan no depois dada Adão mós halo tuir nia. (Gênesis [Kejadian] 3:6, 17) Eva monu duni ba Satanás nia lohi neʼe. (Lee 1 Timóteo 2:14.) Tuir loloos, Adão hatene ona katak han ai-fuan neʼe mak sala boot, maibé nia rona deʼit ninia feen nia liafuan. Inimigu neʼebé uza samea, animál maus neʼe, hodi koʼalia ba Eva mak laran-metan tebes, tanba nia hatene katak buat neʼebé Adão ho Eva halo sei lori rezultadu aat tebes ba sira-nia moris.

6, 7. Jeová hatudu justisa saida ba Adão ho Eva?

⁶ Maupagadór! Neʼe mak Adão no Eva, tanba Jeová fó tiha moris no buat hotu, maibé sira fila kotuk kontra hasoru fali  nia. Tuir loloos, Jeová haree hela buat hotu neʼebé akontese daudaun iha tempu neʼebá. (1 Crônicas [Tawarikh] 28:9; lee Provérbios [Amsal] 15:3. b) Nia husik deʼit Adão, Eva, no Satanás tanba nia hakarak hatene loloos sira sente oinsá kona-ba nia. Nuʼudar Aman ida ba sira, karik Jeová nia laran sente moras tebes kona-ba buat neʼebé sira naʼin-tolu halo ba nia. (Kompara ho Gênesis [Kejadian] 6:6.) Maibé, Jeová tenke halo tuir nia rasik nia liafuan hodi fó kastigu ba pekadu naʼin-tolu neʼe.

⁷ Maromak hatete ona ba Adão: “Iha loron neʼebé ó han ai-fuan neʼe, ó sei mate.” Karik Adão hanoin Maromak nia liafuan hatete katak antes loron monu nia sei mate iha loron neʼe kedas. Maibé iha loron neʼe, Jeová sei koʼalia ba sira naʼin-rua. (Gênesis [Kejadian] 3:8) Tanba nia mak Juíz ida neʼebé diʼak, Jeová la fó kastigu kedas ba sira, maibé rona uluk lai sira. (Gênesis [Kejadian] 3:9-13) Depois mak nia foin fó kastigu-mate ba Adão no Eva. (Gênesis [Kejadian] 3:14-19) Maski Jeová la oho kedas Adão no Eva tanba nia hanoin kona-ba ninia planu ba mundu neʼe, maibé rezultadu ba sala nian komesa laʼo kedas iha tempu neʼebá. (Isaías [Yesaya] 55:11) Jeová husik sira moris hodi bele iha oan no hodi sira-nia oan bele iha futuru neʼebé diʼak liu Adão ho Eva nian. Ba Maromak, iha loron neʼebé Adão ho Eva halo sala, sira mate tiha ona. No tanba tinan 1.000 ba ema hanesan loron ida ba Jeová, buat ida karik, hanesan sira mate iha loron ida.—2 Pedro 3:8.

8, 9. Oinsá mak ita hatene katak Adão nia oan no bei-oan hotu simu ninia sala? (Haree dezeñu iha pájina 23.)

⁸ Entaun, Adão no Eva nia oan sira mós simu sala husi sira-nia inan-aman ka lae? Eskritura iha Roma 5:12 hatete: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” Tuir fali mai apóstolu Paulo dehan: “Liuhusi mane ida deʼit neʼebé lakohi halo tuir, ema hotu sai sala-naʼin.” (Roma 5:19) Ema primeiru neʼebé mate mak ema diʼak Abel. (Gênesis [Kejadian] 4:8) Tuirmai, Adão nia oan ho bei-oan sira seluk mós sai ferik-katuas no ikusmai mate. Tanba sala no mate, ema hotu la bele halai sai husi inimigu rua neʼe. Tuir loloos, ita la hatene oinsá mak Adão bele hadaʼet sala no mate ba ema hotu, maibé ita hotu bele haree rezultadu neʼe.

⁹ Tan neʼe mak ita komprende bainhira Bíblia kompara sala no mate hanesan ho “hena soru hamutuk neʼebé falun metin ema iha mundu tomak”. (Isaías [Yesaya] 25:7) Bíblia hatete katak: “Iha Adão ema hotu mate.” Nuneʼe mak la iha ema ida mak bele sees husi sala no mate. (1 Korinto 15:22) Eskritura iha Roma 7:24 apóstolu Paulo husu pergunta diʼak ida: “Sé mak sei salva haʼu husi isin neʼebé lori haʼu ba mate neʼe?” Loos duni, sé loos mak bele? c—Haree nota iha kraik.

10. (a) Eskritura saida deʼit mak hatudu Jeová sei harahun mate? (b) Saida mak ita bele aprende husi eskritura sira-neʼe kona-ba Jeová no Jesus?

¹⁰ Bíblia hatete: “Nia sei tolan mate ba nafatin, no Jeová, Ukun-Naʼin Boot Liu, sei hamaran matabeen husi ema hotu nia matan.” (Isaías [Yesaya] 25:8) Loos duni, só Maromak mesak deʼit mak bele salva  Paulo husi mate. Ho ksolok, Jeová sei harahun no halakon mate hanesan aman ida neʼebé halakon ninia oan nia terus, para oan neʼe la bele tanis tan. Jesus mós sei hamutuk ho Jeová atu harahun mate, neʼe hanesan 1 Korinto 15:22 dehan: “Iha Kristu ema hotu sei hetan moris.” Bainhira apóstolu Paulo husu tiha: “Sé mak sei salva haʼu?”, nia rasik hatán: “Obrigadu ba Maromak liuhusi Jesus Kristu ita Naʼi!” (Roma 7:25) Husi neʼe ita bele haree ho momoos katak bainhira Adão ho Eva halo sala kontra hasoru Jeová, neʼe la dehan katak Maromak la hadomi tan ema. Jesus neʼebé Jeová uza hodi kria Adão no Eva mós sei iha domin nafatin ba ema. (Provérbios [Amsal] 8:30, 31) Maibé sé mak bele hasai ita ema husi sala no mate nia liman?

11. Saida mak Jeová halo hodi ajuda ita ema?

¹¹ Bainhira Adão halo sala, Jeová julga nia ba mate. Tanba ita ema hotu mak Adão nia raan, ita hotu mós simu ninia sala no mate. (Roma 5:12, 16) Eskritura iha Roma 5:18 esplika nuneʼe: “Liuhusi sala ida deʼit mak ema oioin hetan kastigu.” Entaun, saida mak Jeová bele halo hodi ajuda ita ema maibé la kontra fali nia rasik nia julgamentu neʼe? Jesus hatán pergunta neʼe hodi dehan nia mai “atu fó nia moris hodi sosa fali ema barak”. (Mateus 20:28) Jesus mak ema sala-laek, tan neʼe nia bele fó nia moris nuʼudar sakrifísiu hodi sosa fali ema hotu. Oinsá mak Jesus nia sakrifísiu hatudu Jeová nia justisa?—1 Timóteo 2:5, 6.

12. Oinsá mak Jesus nia sakrifísiu hatudu Jeová nia justisa?

¹² Tuir loloos, Jesus bele moris ba nafatin iha rai, hanesan moris neʼebé Jeová fó ba Adão. Maibé, tanba Jesus iha domin ba Jeová no ema, nia fó ninia an ba mate hodi kasu ema nia sala. Depois Jeová halo nia moris fali husi mate no nia saʼe fali ba lalehan. (1 Pedro 3:18) Hodi tuir Jeová nia justisa, Jesus tenke lori ninia mate nia folin ba Jeová hodi troka fali moris perfeitu neʼebé Adão halo lakon ona. Hodi nuneʼe, ema hotu neʼebé mai husi Adão mós bele hetan fali moris rohan-laek. Tan neʼe mak Paulo bolu Jesus hanesan ‘Adão ikus nian’, tanba nia fó fali moris rohan-laek ba ema.—1 Korinto 15:45.

13. ‘Adão ikus nian’ sei fó saida ba ema neʼebé uluk mate tiha ona?

¹³ Lakleur tan ‘Adão ikus nian’ sei fó moris rohan-laek neʼe ba ita ema. Ema neʼebé uluk mate tiha ona mós sei moris-hiʼas fali iha rai hodi simu moris rohan-laek iha mundu neʼe.—João 5:28, 29.

14. Saida mak Jeová halo atu lori ema ba moris perfeitu fali?

¹⁴ Oinsá mak sala bele lakon husi ema nia moris hodi ema bele sai perfeitu fali? Jeová harii ninia Ukun ida iha lalehan no hili Jesus ho ema husi rai hamutuk naʼin-144.000 mak atu kumpre knaar neʼe. (Lee Apokalipse 5:9, 10.) Nia hili ema naʼin-144.000 husi rai tanba uluk sira mós moris ona nuʼudar ema sala-naʼin, entaun sira bele komprende kona-ba ema sala-naʼin nia sentimentu hodi bele ukun didiʼak ema iha rai. Ba tinan 1.000 nia laran, sira sei hamutuk ho Liurai Jesus atu lori ema ba moris perfeitu fali.—Apokalipse 20:6.

15, 16. (a) Bainhira mak mate sei lakon? (b) Tuir 1 Korinto 15:28, saida mak Jesus atu halo?

¹⁵ Toʼo tiha tinan 1.000 nia rohan, ema neʼebé laran-metin mós sei sai fali perfeitu hodi la sala no la mate tan. Bíblia hatete: “Nuʼudar iha Adão ema hotu mate, nuneʼe mós iha Kristu ema hotu sei hetan moris. Maibé, ida-idak tuituir malu: Kristu mak hanesan ai-fuan primeiru, depois neʼe mak sira neʼebé Kristu nian durante tempu neʼebé nia toʼo ona mai. Ikusliu kuandu nia halakon tiha governu hotu no ukun-naʼin hotu no kbiit hotu, nia sei entrega ukun  neʼe ba ninia Maromak no Aman. Tanba nia tenke ukun nuʼudar liurai toʼo Maromak tau ona ninia inimigu hotu iha nia ain okos. No inimigu ikus neʼebé nia sei harahun tiha mak mate.” (1 Korinto 15:22-26) Ikusmai, mate neʼebé mai husi Adão sei la iha tan. Hena ida neʼebé “falun hela” ema hotu sei lakon ba nafatin.—Isaías (Yesaya) 25:7, 8.

¹⁶ Bíblia hatutan hodi dehan: “Bainhira buat hotu tau ona iha nia ain okos, tuirmai Oan-Mane rasik mós sei hakruʼuk an ba Ida neʼebé tau buat hotu iha nia ain okos, atu nuneʼe Maromak bele sai buat hotu ba ema hotu.” (1 Korinto 15:28) Tanba Jesus nia knaar nuʼudar liurai hotu ona, entaun, nia mós kontente hodi fó fali ninia ukun no entrega fali ema hotu neʼebé perfeitu ba Jeová.

17. Satanás nia futuru mak saida?

¹⁷ Entaun, saida mak sei akontese ba Satanás neʼebé kria problema sira hotu neʼe? Apokalipse 20:7-15 fó resposta ba pergunta neʼe mai ita. Iha tinan 1.000 nia rohan, Satanás sei iha oportunidade ikus atu koko ema perfeitu sira. Depois, nia ho ema sira seluk neʼebé tuir nia iha tempu neʼebá sei mate ba nafatin, neʼe mak bolu “mate segundu nian”. (Apokalipse 21:8) Maromak sei la harahun ka halakon mate segundu neʼe, tanba sira neʼebé monu ba mate segundu neʼe sei la hetan moris-hiʼas tan. Se ita kaer metin ba Jeová, ita sei la monu ba mate segundu neʼe.

18. Oinsá mak knaar neʼebé Maromak fó ba Adão ikusmai sei sai realidade?

¹⁸ Neʼe hotu tiha, ema sei sai perfeitu fali. Jeová sei fó sira atu moris ba nafatin. Inimigu hotu neʼebé hanetik daudaun ema atu moris ho kontente sei lakon hotu. Adão neʼebé mak Jeová fó knaar atu tau matan ba mundu tomak sei la haree buat hotu neʼe. Ita nuʼudar ninia oan no bei-oan sira mak sei tau matan ba mundu no animál hotu iha rai neʼe. Ksolok ida-neʼe boot tebetebes ba ita hotu hodi hatene katak lakleur tan Jeová sei harahun mate, neʼe mak inimigu ikus!