1. Tanbasá mak Maromak nia atan sira hasoru susar barak?

 ITA la hakfodak katak ita sei hasoru “susar barak” antes ita bele simu moris rohan-laek. Maski ita serbí Jeová ba tempu kleur ona ka foin hahú, ita hotu hasoru susar oioin. Tanbasá? Razaun ida mak ita moris iha Satanás nia mundu aat neʼe.—Apokalipse 12:12.

2. (a) Ema hotu hasoru susar oioin, maibé Maromak nia atan sira hasoru susar saida tan? (Haree foto iha leten.) (b) Sé mak book ema atu kontra makaʼas ita? Oinsá mak nia halo ida-neʼe?

² Ema hotu sala-naʼin no hasoru susar oioin iha sira-nia moris. Maibé, nuʼudar ema kristaun, ita hasoru susar seluk tan. (1 Korinto 10:13) Susar ida neʼebé ita hasoru mak ema kontra makaʼas ita tanba ita deside atu nafatin laran-metin ba Maromak. Jesus dehan ba ninia dixípulu sira: “Atan ida la boot liu fali nia naʼi. Se sira fó-terus ona ba haʼu, sira mós sei fó-terus ba imi.” (João 15:20) Sé mak book ema atu kontra makaʼas ita? Neʼe mak Satanás. Bíblia dehan katak nia hanesan “leaun ida neʼebé hasai lian makaʼas no buka atu han” Maromak nia povu. (1 Pedro 5:8) Satanás sei uza buat naran deʼit atu halakon ita-nia laran-metin ba Jeová. Mai ita haree buat neʼebé akontese ba apóstolu Paulo.

3-5. (a) Susar saida mak Paulo hasoru iha Listra? (b) Iha dalan saida mak ninia mensajen kona-ba susar sira hametin ema seluk?

³ Dala barak ema fó-terus ba Paulo tanba ninia laran-metin ba Maromak. (2 Korinto 11:23-27) Loron ida iha sidade Listra, Paulo kura mane ida neʼebé la bele laʼo. Tan neʼe, ema hanoin katak Paulo no Barnabé mak maromak sira. Sira naʼin-rua presiza husu makaʼas ba ema-lubun neʼe atu labele adora sira! Maibé lakleur depois neʼe, ulun-naʼin relijiaun judeu nian toʼo mai no hahú koʼalia aat kona-ba Paulo no Barnabé. No ema-lubun fiar lia-bosok neʼe. No tuirmai, sira komesa tuda Paulo toʼo sira hanoin katak nia mate ona.—Apóstolu 14:8-19.

⁴ Depois sira vizita tiha sidade Derbe, Paulo no Barnabé “fila fali ba Listra, Ikónio, no Antiokia. No iha neʼebá, sira hametin dixípulu sira no fó laran-manas ba sira atu laran-metin nafatin iha fiar hodi dehan: ‘Ita tenke tama ba Maromak nia Ukun liuhusi susar barak.’” (Apóstolu 14:21, 22) Foufoun, liafuan sira-neʼe bele halo ema sente taʼuk. Entaun, oinsá mak Paulo no Barnabé “hametin dixípulu sira” hodi fó sai katak sira tenke hasoru terus barak?

⁵ Ita bele hetan resposta iha Paulo nia liafuan sira. Paulo la dehan deʼit katak “Ita tenke tahan susar barak”. Maibé nia dehan: “Ita tenke tama ba Maromak nia Ukun liuhusi susar barak.” Entaun, Paulo hatudu sai kona-ba bensaun neʼebé ema bele hetan kuandu sira laran-metin ba Maromak. Bensaun neʼe laʼós mehi deʼit. Jesus dehan: “Ema neʼebé tahan toʼo rohan mak ida neʼebé sei hetan salvasaun.”—Mateus 10:22.

6. Ema neʼebé tahan terus sei simu bensaun saida?

⁶ Se ita tahan susar sira, ita sei simu bensaun. Ba ema kristaun kose-mina sira, bensaun neʼe mak moris neʼebé la bele mate tan iha lalehan no nuʼudar liurai hamutuk ho Jesus. Ba “bibi seluk”, bensaun neʼe mak moris ba nafatin iha rai neʼebé nakonu ho dame. (João 10:16; 2 Pedro 3:13) Maibé antes tempu neʼe, ita sei hasoru susar barak. Mai ita haree susar rua neʼebé ita bele hasoru.

7. Oinsá mak ema fó-terus ba ita?

⁷ Jesus fó-hatene nanis hodi dehan: “Ema sei lori imi ba tribunál, no sira sei baku imi iha sinagoga sira no sira sei lori imi hodi hamriik iha governadór no liurai sira-nia oin.” (Marcos 13:9) Entaun, Jesus dehan katak ema kristaun balu sei hetan terus husi ema seluk. Dala ruma, terus sira-neʼe mosu tanba ulun-naʼin relijiaun sira ka ukun-naʼin sira. (Apóstolu 5:27, 28) Dala ida tan, hanoin fali kona-ba Paulo nia ezemplu. Nia sai taʼuk hodi hanoin kona-ba terus hanesan neʼe ka lae? Lae duni.—Lee Apóstolu 20:22, 23.

8, 9. Oinsá mak Paulo hatudu katak nia kontinua atu tahan terus? Oinsá mak ita-nia irmaun-irmán sira balu hetan terus ohin loron?

⁸ Paulo ho aten-brani tahan terus neʼebé Satanás fó ba nia hodi dehan: “Haʼu la haree haʼu-nia moris nuʼudar buat neʼebé iha folin; haʼu hanoin deʼit atubele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos kona-ba liafuan diʼak husi Maromak nia laran-diʼak neʼebé boot.” (Apóstolu 20:24) Paulo la sai taʼuk tanba deʼit ema fó-terus ba nia. Sin, maski nia hetan terus, nia ho laran-metin tahan ida-neʼe tanba buat neʼebé importante liu ba nia mak atu “fó sasin ho loloos”.

⁹ Ohin loron, irmaun-irmán barak mós hatudu laran-metin iha tempu susar hanesan apóstolu Paulo. Porezemplu, iha rai ida, tanba Testemuña sira lakohi hola parte iha buat polítiku nian, tan neʼe governu sulan sira ba maizumenus tinan 20 iha  komarka laran. Toʼo agora mós sira seidauk hetan justisa husi tribunál. Governu mós bandu sira-nia família hodi vizita sira, no balu iha komarka laran ema baku no fó-terus sira.

10. Tanbasá mak ita lalika sai taʼuk ho susar neʼebé mosu derrepente deʼit?

¹⁰ Iha rai seluk, ita-nia maluk kristaun sira tahan hasoru terus neʼebé mosu derrepente deʼit. Se ida-neʼe akontese ba ita, keta sai taʼuk. Hanoin-hetan José nia ezemplu. Derrepente deʼit, nia maun sira faʼan nia hodi sai nuʼudar atan. Maibé Maromak Jeová “salva nia husi nia terus hotu”. (Apóstolu 7:9, 10) Jeová mós bele halo hanesan neʼe ba ita. Hanoin-hetan nafatin katak ‘Jeová hatene oinsá atu salva ita husi susar laran’ se ita laran-metin ba nia. (2 Pedro 2:9) Ita iha razaun barak atu tau fiar tomak ba Jeová no tahan terus sira ho aten-brani. Fiar katak Jeová bele salva ita husi mundu aat neʼe no fó ita moris rohan-laek.—1 Pedro 5:8, 9.

11. Saida mak la hanesan entre susar husi ema seluk no kuandu Satanás aproveita ita-nia sentimentu?

¹¹ Karik ita mós presiza tahan hasoru ita-nia sentimentu rasik. Oinsá mak susar neʼe la hanesan ho terus neʼebé ita hetan tanba ema seluk? Kuandu Satanás uza ema atu kontra makaʼas ita, ida-neʼe hanesan anin-boot neʼebé mosu derrepente deʼit no estraga kedas ita-nia uma. Maibé, kuandu Satanás aproveita ita-nia sentimentu, ida-neʼe hanesan ho nehek mirain neʼebé neineik-neineik han ita-nia uma. Bainhira ita hatene kona-ba neʼe, karik ida-neʼe tarde ona tanba uma neʼe rahun tiha ona.

12. (a) Dalan ida neʼebé mak Satanás gosta atu uza? No tanbasá mak nia hetan susesu hodi uza ida-neʼe? (b) Tanbasá mak Paulo mós sente laran-tun?

¹² Satanás hakarak estraga ita-nia relasaun ho Maromak nuʼudar belun. Karik nia uza ema atu fó-terus makaʼas ba ita. Maibé nia mós uza dalan seluk tan. Dalan neʼe mak hodi halo ita sai laran-tun, no dala barak nia hetan susesu hodi uza neʼe. Tanbasá? Tanba ida-neʼe neineik-neineik halo ita-nia relasaun ho Jeová sai fraku. Dala ruma, apóstolu Paulo mós sente laran-tun. Dala ida, nia bolu ninia an nuʼudar ema neʼebé “kasian loos duni!” (Lee Roma 7:21-24.) Tanbasá mak ema hanesan Paulo bele sente laran-tun? Tuir loloos, nia iha relasaun diʼak ho Maromak Jeová, no karik nia mós serbí nuʼudar grupu administradór. Maski nuneʼe, Paulo sente laran-tun tanba nia ema sala-naʼin. Nia hakarak halo buat neʼebé loos, maibé ida-neʼe la fasil. Se ita mós sente hanesan neʼe, ita bele hetan kmaan hodi hatene katak Paulo mós tenke luta hasoru sentimentu neʼe.

13, 14. (a) Tanbasá mak Maromak nia atan balu sai laran-tun? (b) Sé mak hakarak atu estraga ita-nia fiar? No tanbasá?

¹³ Dala ruma, irmaun no irmán barak sente laran-tun, estrese no karik sente katak sira la iha folin. Porezemplu, irmán ida neʼebé ho laran-manas serbí nuʼudar pioneiru dehan: “Dala barak, haʼu hanoin beibeik fali sala neʼebé haʼu halo ona, no sente la diʼak kona-ba neʼe. Kuandu haʼu hanoin kona-ba haʼu-nia sala neʼebé haʼu halo ona, ida-neʼe bele halo haʼu sente katak ema seluk la bele hadomi haʼu, neʼe inklui mós Jeová.”

¹⁴ Entaun, tanbasá mak Jeová nia atan neʼebé laran-manas hanesan irmán neʼe, bele sente estrese boot? Sira iha razaun barak. Maibé, karik razaun ida mak tanba sira hanoin la diʼak kona-ba sira-nia an rasik ka kona-ba sira-nia moris. (Provérbios [Amsal] 15:15) Ema balu karik sente la diʼak tanba sira iha problema saúde nian neʼebé kona sira-nia sentimentu. Maibé, diʼak atu hanoin-hetan kona-ba sé  mak hakarak uza sentimentu sira-neʼe atu estraga ita-nia relasaun ho Maromak. Sé mak hakarak ita atu sai laran-tun hodi husik ita-nia serbisu ba Jeová? Klaru katak neʼe mak Satanás. Nia hetan ona tesi-lia atu simu kastigu-mate no nia hakarak Ita atu sente katak ita mós la iha esperansa. (Apokalipse 20:10) Satanás hakarak halo ita laran-tun hodi hamenus ita-nia laran-manas. Maski nia uza ema atu kontra ita ka aproveita ita-nia sentimentu rasik, Satanás nia hakarak mak atu hapara ita serbí Maromak. Keta haluha, Maromak nia povu sira halo funu daudaun, sira luta makaʼas atu defende sira-nia laran-metin ba Jeová.

15. Tuir 2 Korinto 4:16, 17, ita hakaʼas an atu kontinua halo saida?

¹⁵ Hakaʼas an atu la rende an. Hanoin nafatin kona-ba bensaun neʼebé ita sei simu. Paulo hakerek ba ema kristaun iha Korinto dehan: “Ami la rende an. Maski ami-nia isin sai fraku iha liʼur, maibé iha laran ami simu kbiit foun loroloron. Tanba maski terus sira mak ba tempu uitoan deʼit no kmaan, maibé ida-neʼe lori glória ba ami, no glória neʼe boot liután no ba nafatin.”—2 Korinto 4:16, 17.

16. Tanbasá mak importante atu prepara agora atu hasoru terus?

¹⁶ Satanás uza lasu oioin, ka planu aat oioin, hodi kontra hasoru ita. (Éfeso 6:11) Tan neʼe mak ita tenke halo tuir matadalan husi 1 Pedro 5:9 neʼebé dehan: “Hamriik metin hodi kontra nia no sai metin iha fiar.” Atu hamriik metin, ita tenke prepara ita-nia hanoin no laran agora hodi nuneʼe ita bele sai prontu atu halo buat neʼebé loos. Hanoin toʼok ai-knanoik tuirmai neʼe: Kleur antes soldadu ida bá funu, nia simu treinu didiʼak hodi prepara ba funu neʼe. Nuneʼe mós ho ita. Ita la hatene funu oinsá mak sei mosu iha futuru. Entaun ita  tenke hakaʼas an atu treinu kuandu tempu hakmatek hela. Apóstolu Paulo fó laran-manas ba ema kristaun dehan: “Kontinua koko imi-nia an atu hatene se imi hela iha fiar ka lae, kontinua haree didiʼak imi ema oinsá.”—2 Korinto 13:5.

17-19. (a) Iha dalan saida deʼit mak ita bele koko ita-nia an? (b) Oinsá mak joven sira bele prepara an hodi defende sira-nia fiar iha eskola?

¹⁷ Dalan ida atu koko ita-nia an mak hodi husu pergunta sira hanesan tuirmai neʼe: ‘Haʼu halo orasaun beibeik ka lae? Kuandu ema ruma tenta haʼu atu halo sala, haʼu halo tuir Maromak nuʼudar haʼu-nia ukun-naʼin duké ema ka lae? Haʼu tuir reuniaun sira beibeik ka lae? Haʼu aten-brani atu koʼalia kona-ba haʼu-nia fiar ka lae? Haʼu lalais atu fó perdua ba haʼu-nia maluk kristaun neʼebé halo sala hasoru haʼu, hanesan haʼu mós hakarak sira perdua haʼu ka lae? Haʼu prontu atu rona ba katuas sira iha haʼu-nia kongregasaun no mós ba sira neʼebé tau matan ba kongregasaun iha mundu tomak ka lae?’

¹⁸ Ema barak neʼebé haleʼu ita koko atu troka ita-nia hanoin. Irmaun-irmán joven barak presiza koʼalia ho aten-brani kona-ba sira-nia fiar kuandu iha eskola. No sira la moe no la taʼuk atu halo ida-neʼe. Saida mak ajuda joven sira-neʼe atu koʼalia ho aten-brani? Sira halo tuir matadalan iha ita-nia livru sira. Porezemplu, livru Sedarlah! fulan-Jullu 2009, dehan katak se ita-nia kolega eskola ida husu ita: “Tanbasá mak ó la fiar ba evolusaun?” karik ita bele hatán ho simples hodi dehan: “Matenek-naʼin sira mak hanorin tiha evolusaun, maibé sira ho sira mós la apoia malu! Entaun oinsá mak haʼu hakarak fiar ba evolusaun?” Entaun inan-aman sira, hakaʼas an atu treinu hamutuk ho ita-nia oan hodi sira bele sai prontu atu defende sira-nia fiar iha eskola.

¹⁹ Klaru katak, dala ruma la fasil atu defende ita-nia fiar ka atu halo buat neʼebé Jeová hakarak ita atu halo. Porezemplu, depois serbisu tiha ba loron naruk, karik ita presiza hakaʼas an atu tuir reuniaun. Ka karik susar ba ita atu hadeer iha dadeer-saan hodi bá haklaken. Maibé hanoin-hetan ida-neʼe: Se ita hakaʼas an hodi sai toman atu halo buat sira-neʼe agora, ita sei sai prontu ona atu tahan susar boot neʼebé mosu iha futuru.

20, 21. (a) Tanbasá mak hanoin kona-ba Jesus nia sakrifísiu ajuda ita atu tahan kuandu sente laran-tun? (b) Ita sei hakaʼas an atu halo saida?

²⁰ Maibé oinsá se Satanás aproveita ita-nia sentimentu hodi estraga ita-nia relasaun ho Maromak? Porezemplu, oinsá mak ita bele tahan kuandu sente laran-tun? Dalan diʼak ida mak hodi hanoin-kleʼan kona-ba Jesus nia sakrifísiu. Neʼe mak buat neʼebé apóstolu Paulo mós halo. Dala ruma, nia sente kasian kona-ba ninia an. Maibé Paulo hatene katak Kristu mate, laʼós ba ema sala-laek, maibé ba ema sala-naʼin hanesan nia rasik. Nia dehan: “Agora haʼu moris nuʼudar ema ida liuhusi fiar iha Maromak nia Oan-Mane, ida neʼebé hadomi haʼu no fó nia moris ba haʼu.” (Galásia 2:20) Sin, Paulo simu Jesus nia sakrifísiu no fiar katak ida-neʼe ba nia an rasik.

²¹ Ita mós bele hetan buat diʼak se ita simu Jesus nia sakrifísiu neʼe nuʼudar prezente neʼebé Jeová fó ba ita rasik. Neʼe la dehan katak laran-tun sei lakon derrepente deʼit. Tuir loloos, ema balu karik sei luta hasoru laran-tun toʼo sira tama mundu foun. Maibé hanoin-hetan ida-neʼe: Ema neʼebé la rende an mak sei simu bensaun. Loroloron ita sai besik liután ba tempu neʼebé Maromak nia Ukun sei mai. Kuandu ida-neʼe akontese, sei iha dame iha mundu tomak no ema hotu sei sai perfeitu. Tan neʼe, hakaʼas an atu tama ba Maromak nia Ukun, maski ita presiza hasoru terus barak.