1. Saida mak ulun-naʼin husi igreja katólika no protestante halo durante tempu funu nian?

 TUIR ita-nia hanoin, Maromak hakarak ema kristaun loos bá funu no oho ema husi nasaun seluk ka lae? Durante tinan 100 liu ona, ema barak neʼebé dehan katak sira ema kristaun, sira oho malu iha funu. Ema katólika oho ema katólika, no ema protestante oho ema protestante. Ulun-naʼin husi igreja katólika no protestante fó bensaun ba tropa no kilat sira. Funu Mundiál Segundu mak ezemplu neʼebé hatudu oinsá ema neʼebé bolu an nuʼudar kristaun oho malu beibeik.

2, 3. Saida mak Testemuña ba Jeová halo durante Funu Mundiál Segundu no funu sira seluk? Tanbasá?

² Saida mak Testemuña ba Jeová halo durante Funu Mundiál Segundu? Sira nafatin neutrál. Sira la hola parte iha funu no la apoia nasaun ida. Tanbasá? Tanba sira hakarak atu halo tuir Jesus nia hanorin no banati-tuir dalan neʼebé nia hadomi ema seluk. Jesus dehan: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:35) Testemuña sira mós hanoin-hetan matadalan husi Paulo nia karta ba ema kristaun iha Korinto no halo tuir matadalan neʼe iha sira-nia situasaun.—Lee 2 Korinto 10:3, 4.

 ³ Ema kristaun loos treinu sira-nia laran hodi tuir Bíblia nia matadalan, no tan neʼe sira-nia laran la husik sira atu bá funu ka halo treinu ba funu. No tanba Testemuña sira hakaʼas an atu halaʼo moris nuʼudar ema kristaun loos, ema fó-terus ba sira. Joven no ferik-katuas, mane no feto, hetan terus iha komarka. Durante Funu Mundiál Segundu kuandu Nazi ukun iha rai-Alemaña, ema oho sira balu. Durante tempu neʼebé ema fó-terus ba Testemuña iha rai-Europa, sira nunka haluha sira-nia knaar atu haklaken liafuan diʼak kona-ba Maromak Jeová nia Ukun. Sira kontinua haklaken maski sira iha komarka ka kuandu ema lori sira atu dadur iha rai dook. a (Haree nota iha kraik.) No mós iha tinan 1994, Testemuña sira la hola parte iha oho malu neʼebé mosu iha rai-Ruanda. No sira kontinua neutrál iha funu neʼebé mosu iha rai sira neʼebé uluk parte ba rai-Jugoslávia.

4. Kuandu ema haree Testemuña sira nafatin neutrál, dala barak liu sira dehan saida?

⁴ Tanba Testemuña sira nafatin neutrál, ida-neʼe halo ema rihun ba rihun iha mundu tomak dehan katak Testemuña sira hadomi duni Maromak no sira-nia maluk no katak sira halaʼo relijiaun neʼebé loos. Maibé, saida tan mak halo ema barak fiar katak Testemuña ba Jeová mak ema kristaun loos?

5. Mudansa saida mak Jesus nia dixípulu sira presiza halo?

⁵ Jesus esplika ho klaru ba ema seluk katak haklaken liafuan diʼak kona-ba Maromak nia ukun mak serbisu neʼebé importante liu iha mundu. Lakleur depois Jesus hahú ninia serbisu haklaken, nia hili dixípulu naʼin-12 atu komesa halo serbisu neʼe no ikusmai ida-neʼe sei halaʼo iha mundu tomak. Tuirmai, Jesus treinu tan dixípulu naʼin-70. (Lucas 6:13; 10:1) Jesus hanorin ninia dixípulu sira kona-ba oinsá atu hanorin ema seluk. Foufoun nia haruka sira atu hanorin ema judeu seluk, maibé depois neʼe nia dehan ba sira atu lori liafuan diʼak ba ema husi nasaun seluk. Tuir loloos, ba dixípulu sira neʼebé nuʼudar ema judeu, haklaken ba ema husi nasaun seluk mak mudansa neʼebé boot!—Apóstolu 1:8.

6. Oinsá mak Pedro hatene katak Maromak la hili ema?

⁶ Ema primeiru husi nasaun seluk neʼebé sai ema kristaun mak Cornélio. Maski Cornélio mak laʼós ema judeu neʼebé hetan sirkunsizaun, maibé Maromak Jeová haruka apóstolu Pedro atu haklaken ba Cornélio iha ninia uma. Neʼe ajuda Pedro atu hatene Maromak la hili ema. Jeová hakarak ema husi nasaun oioin atu rona no simu lia-loos. Entaun Pedro haruka Cornélio no ninia família hetan batizmu. (Apóstolu 10:9-48) Hahú husi loron ida-neʼe, Pedro no Jesus nia dixípulu sira kontinua haklaken ba ema husi nasaun seluk.

7, 8. Saida mak Testemuña ba Jeová sira halo atu ajuda ema rona liafuan diʼak? (Haree foto iha pájina 7.)

⁷ Ohin loron, irmaun sira neʼebé tau matan ba Jeová nia organizasaun hatudu laran-manas hodi apoia no organiza serbisu atu haklaken no hanorin liafuan diʼak iha mundu tomak. Agora Testemuña ba Jeová iha mundu tomak hamutuk maizumenus naʼin-8.000.000. Sira ho laran-manas haklaken iha língua hamutuk 600 liu, no ida-neʼe kontinua aumenta. Sira haklaken husi uma ba uma no haklaken iha dalan. Kuandu sira haklaken, dala ruma sira uza meza no karrosa atu hatudu ita-nia livru sira iha língua barak. Ema bele hatene Testemuña ba Jeová tanba sira deʼit mak haklaken iha dalan hanesan neʼe.

 ⁸ Jeová nia organizasaun fó ona treinu ba irmaun no irmán hamutuk naʼin-2.900 liu hodi tradús Bíblia no ita-nia livru sira. Dala ruma sira mós tradús livru sira-neʼe ba língua neʼebé ema uitoan deʼit mak koʼalia. Porezemplu, agora Testemuña ba Jeová iha rai-España tradús livru sira kona-ba Bíblia iha lia-katalaun. Ema barak liután hahú uza lia-katalaun iha sidade Valencia no Alikante, iha illa Balearic, no mós iha rai-Andorra. Ohin loron, ema rihun ba rihun koʼalia lia-katalaun. Tanba serbisu tradusaun neʼebé Testemuña sira halo, ema neʼebé koʼalia lia-katalaun bele hetan livru no mós rona diskursu iha língua neʼebé kona sira-nia laran.

9, 10. Ezemplu saida deʼit mak hatudu katak Jeová nia organizasaun hakarak atu ema hotu aprende lia-loos?

⁹ Serbisu atu tradús livru sira no mós hanorin ema iha sira-nia língua rasik halo ona iha mundu tomak. Porezemplu, iha rai-Méxiku, ema barak liu koʼalia lia-españól, maibé iha mós ema barak tan sai boot hodi koʼalia língua seluk iha uma. Língua sira-neʼe ida mak língua maia. Grupu tradusaun nian neʼebé tradús ba língua maia hetan knaar hodi hela iha fatin neʼebé ema barak koʼalia língua neʼe. Nuneʼe, loroloron sira rona no koʼalia língua maia, no ida-neʼe ajuda sira atu tradús livru sira iha dalan neʼebé fasil liu atu ema maia komprende. Ezemplu seluk mak iha rai-Nepál. Iha rai neʼe maizumenus iha língua hamutuk 120. Ema iha rai-Nepál hamutuk naʼin-29.000.000 liu. No maizumenus ema naʼin-10.000.000 koʼalia língua Nepál nuʼudar sira-nia língua primeiru, no ema barak seluk koʼalia língua Nepál nuʼudar língua segundu. Ita-nia irmaun-irmán sira tradús ona livru sira kona-ba Bíblia iha língua Nepál.

¹⁰ Serbisu tradusaun neʼebé halo ona iha língua barak hatudu katak Jeová nia organizasaun haree sira-nia knaar atu haklaken liafuan diʼak iha mundu tomak nuʼudar buat neʼebé importante tebes. Testemuña ba Jeová fahe ona tratu no livru rihun ba rihun, no sira la faʼan livru sira-neʼe. Testemuña sira hetan apoia husi osan kontribuisaun neʼebé ema fó ho laran. Sira halo tuir Jesus nia mandamentu neʼebé dehan: “Imi simu la selu, fó mós hodi la hein atu ema selu imi.”—Mateus 10:8.

11, 12. Saida mak ema barak dehan tanba ita haklaken no hanorin iha mundu tomak?

¹¹ Testemuña ba Jeová fiar metin katak sira hetan ona lia-loos, tan neʼe sira husik  buat barak atu bele haklaken ba ema husi nasaun no rasa oioin. Sira barak halaʼo moris neʼebé simples, aprende língua seluk, no aprende toman oioin hodi bele hola parte iha serbisu importante neʼe. No tanba sira haklaken no hanorin iha mundu tomak, ida-neʼe halo ema barak dehan katak Testemuña ba Jeová mak Jesus Kristu nia dixípulu neʼebé loos.

¹² Testemuña sira halo buat hotu neʼe tanba sira fiar metin katak sira hetan ona lia-loos. Maibé, saida tan mak halo ita-nia irmaun no irmán sira fiar duni katak sira hetan ona lia-loos?—Lee Roma 14:17, 18.

13. Oinsá mak Testemuña sira halo sira-nia organizasaun moos nafatin?

¹³ Irmaun no irmán barak temi razaun oioin kona-ba tansá mak sira fiar duni katak sira hetan ona lia-loos. Irmaun ida neʼebé serbí Jeová ba tempu kleur ona dehan: “Jeová nia organizasaun halo ona buat barak atu organizasaun neʼe moos nafatin iha dalan morál, neʼe inklui fó konsellu no dixiplina ba ema hotu neʼebé halo sala.” Oinsá mak Jeová nia povu nafatin halo tuir matadalan sira neʼebé aas? Sira ida-idak hakaʼas an atu halo tuir buat neʼebé Maromak dehan iha Bíblia no banati-tuir Jesus no ninia dixípulu sira. Dala ruma, ema balu lakohi halo tuir Maromak nia matadalan kona-ba buat neʼebé loos no sala, no tan neʼe presiza hasai sira husi kongregasaun. Maibé barak liu halaʼo moris iha dalan neʼebé moos iha Jeová nia matan. Ema barak neʼebé uluk halo buat neʼebé Maromak la gosta, sira troka ona sira-nia hahalok no agora halo tuir Maromak nia matadalan.—Lee 1 Korinto 6:9-11.

14. Ema barak halo saida kuandu kongregasaun hasai tiha sira? No ida-neʼe lori rezultadu saida?

¹⁴ Bíblia haruka kongregasaun atu hasai ema neʼebé lakohi atu halo tuir Maromak nia matadalan. Maibé, ikusmai sira barak sente laran-triste kona-ba sira-nia hahalok no fila fali ba Jeová nia organizasaun. (Lee 2 Korinto 2:6-8.) Tanba Testemuña sira-nia hahalok tuir Bíblia nia matadalan, kongregasaun kontinua moos nafatin. Ida-neʼe halo sira fiar duni katak sira-nia organizasaun mak ida neʼebé Maromak simu. Maski relijiaun barak husik sira-nia ema atu halo buat naran deʼit, Testemuña sira moris tuir Jeová nia matadalan sira. Ida-neʼe halo ema barak fiar duni katak Testemuña ba Jeová halaʼo relijiaun neʼebé loos.

15. Saida mak book irmaun ida atu fiar katak nia hetan ona lia-loos?

¹⁵ Tanbasá mak Testemuña seluk fiar katak sira hetan ona lia-loos? Irmaun ida neʼebé idade 54 ona no serbí Jeová husi tempu joven, dehan katak ninia fiar bazeia ba buat importante tolu: (1) katak Maromak iha duni, (2) katak Bíblia husi Maromak, no (3) katak Testemuña ba Jeová mak ema sira neʼebé halo Maromak nia hakarak iha mundu ohin loron. Nia dehan: “Haʼu estuda ba  tempu barak ona, no haʼu sempre hanoin didiʼak kona-ba buat tolu neʼe no haʼu husu ba haʼu-nia an se buat tolu neʼe mak loos duni ka lae. No buat neʼebé haʼu estuda no haree tinan ba tinan kontinua hametin haʼu-nia fiar katak ita iha duni lia-loos.”

16. Tanbasá mak irmán ida fiar katak nia hetan ona lia-loos?

¹⁶ Irmán ida neʼebé kaben ona no serbí iha sede-jerál iha Novaiorke esplika kona-ba saida mak halo nia fiar katak nia hetan ona lia-loos. Nia dehan katak Jeová nia organizasaun mesak deʼit mak fó-hatene ema Maromak nia naran, neʼebé hakerek iha Bíblia maizumenus dala 7.000. Nia mós hetan laran-manas husi eskritura iha 2 Crônicas (Tawarikh) 16:9 neʼebé dehan: “Jeová nia matan hateke bá-mai iha rai hotu atu hatudu ninia forsa hodi ajuda sira neʼebé fó sira-nia laran tomak ba nia.” Nia dehan: “Lia-loos ajuda haʼu hatene oinsá atu fó laran tomak ba Jeová, hodi nuneʼe nia bele hatudu ninia forsa mai haʼu. Haʼu-nia relasaun ho Jeová mak importante liu ba haʼu. Haʼu hafolin tebes Jesus nia knaar hodi ajuda ita atu hatene didiʼak kona-ba Maromak no neʼe fó kbiit duni ba haʼu atu tahan.”

17. Tanbasá mak irmaun ida neʼebé uluk la fiar Maromak fiar katak nia hetan ona lia-loos?

¹⁷ Irmaun ida neʼebé uluk la fiar ba Maromak dehan: “Kriasaun sira halo haʼu fiar katak Maromak hakarak atu ema goza moris no tan neʼe nia sei la husik terus atu kontinua ba nafatin. No mós, nuʼudar mundu neʼe sai aat ba beibeik, Jeová nia povu aumenta liután sira-nia fiar, laran-manas no domin. Só Jeová nia espíritu deʼit mak hamosu milagre furak neʼe.”—Lee 1 Pedro 4:1-4.

18. Tanbasá mak irmaun naʼin-rua fiar katak sira hetan ona lia-loos? Oinsá mak ita sente kona-ba neʼe?

¹⁸ Irmaun seluk neʼebé iha lia-loos kleur ona fó razaun tansá nia fiar katak nia hetan ona lia-loos. Nia dehan: “Haʼu estuda ba tinan barak ona no neʼe halo haʼu fiar katak Testemuña sira hakaʼas an atu halo tuir ezemplu husi ema kristaun iha apóstolu sira-nia tempu. Haʼu haree rasik Testemuña ba Jeová nia unidade iha mundu tomak nuʼudar haʼu vizita rai oioin. Lia-loos husi Bíblia halo haʼu kontente duni.” Irmaun ida tan neʼebé idade 60 liu dehan katak Testemuña ba Jeová tau fiar duni ba Jesus. Nia dehan: “Ami estuda didiʼak kona-ba Jesus nia moris no ninia serbisu haklaken no ami hafolin tebes ninia ezemplu. Ami halo mudansa iha ami-nia moris atu bele hakbesik ba Maromak liuhusi Kristu Jesus. Ami hatene katak Kristu nia sakrifísiu deʼit mak lori ami ba salvasaun. No ami hatene katak nia hetan ona moris hiʼas husi mate. Iha duni ema sira neʼebé haree ho matan no sai sasin kona-ba neʼe.”—Lee 1 Korinto 15:3-8.

19, 20. (a) Knaar saida mak Paulo temi iha ninia karta ba kongregasaun iha Roma? (b) Saida mak Maromak nia atan hotu tenke halo?

¹⁹ Ema kristaun loos hadomi duni ema seluk. Tan neʼe mak sira fó-hatene ba ema lia-loos neʼebé sira aprende. Paulo dehan ba kongregasaun iha Roma katak Jesus nia dixípulu loos iha knaar atu haklaken. Nia dehan: “Se iha ema nia oin ó fó sai ‘liafuan neʼe iha ó-nia ibun’, katak Jesus mak Naʼi, no ó hatudu fiar iha ó-nia laran katak Maromak halo nia moris fali husi mate, ó sei hetan salvasaun. Tanba ho laran mak ema hatudu fiar hodi sai ema loos, maibé ho ibun mak ema fó sai iha ema barak nia oin hodi hetan salvasaun.”—Roma 10:9, 10.

²⁰ Testemuña ba Jeová fiar duni katak sira hetan ona lia-loos no hatene katak sira iha knaar furak atu hanorin ema seluk liafuan diʼak kona-ba Maromak nia Ukun. Entaun, mai ita hakaʼas an atu hanorin ema seluk kona-ba Bíblia no mós hatudu ba sira liuhusi ita-nia moris rasik katak ita fiar duni ita hetan ona lia-loos.