1. Oinsá mak Jeová sente kona-ba serbisu? Ida-neʼe book nia atu halo saida?

 MAROMAK JEOVÁ sente kontente ho ninia serbisu. (Salmo [Mazmur] 135:6; João 5:17) Nia hakarak anju no ema mós haksolok ho sira-nia serbisu, tan neʼe nia fó serbisu neʼebé halo sira kontente no haksolok. Porezemplu, nia fó knaar ba nia Oan-Mane atu kria buat oioin hamutuk ho nia. (Lee Koloso 1:15, 16.) Bíblia fó sai katak antes Jesus mai iha rai, nia mak nuʼudar Maromak nia “badain” iha lalehan.—Provérbios (Amsal) 8:30.

2. Oinsá mak ita bele hatene katak anju sira sempre iha knaar importante neʼebé halo sira kontente?

² Husi livru Gênesis toʼo Apokalipse fó sai katak Jeová sempre fó knaar ba anju sira. Kuandu Adão no Eva halo sala no tenke sai husi jardín Eden, Maromak fó knaar ba anju sira. Iha Gênesis, ita bele lee katak Maromak “tau kerubín sira iha jardín nia parte leste no tau mós surik ida neʼebé lakan ho ahi no nakdulas hela atu hein netik dalan atu bá ai-hun moris nian”. (Gênesis [Kejadian] 3:24) No iha livru Apokalipse, ita haree katak Jeová “haruka ninia anju atu hatudu ba ninia atan sira  kona-ba buat sira neʼebé tenke mosu lakleur tan”.—Apokalipse 22:6.

3. Bainhira Jesus iha rai, oinsá mak nia banati-tuir ninia Aman?

³ Bainhira Jesus iha rai, nia kontente atu halo serbisu neʼebé Jeová fó ba nia. No nia banati-tuir ninia Aman hodi fó knaar importante ba ninia dixípulu sira. Nia halo sira sente laran-manas kona-ba sira-nia knaar hodi fó sai ba sira: “Tebes haʼu hatete loloos ba imi: Ema neʼebé hatudu fiar mai haʼu, ema neʼe sei halo serbisu neʼebé haʼu halo; no nia sei halo serbisu neʼebé boot liu fali sira-neʼe, tanba haʼu atu laʼo ba Aman.” (João 14:12) Jesus ajuda ninia dixípulu sira atu haree katak sira-nia serbisu mak urjente hodi dehan: “Ita tenke halo serbisu husi ida neʼebé haruka haʼu mai; basá kalan sei toʼo mai bainhira ema ida la bele halo tan serbisu.”—João 9:4.

4-6. (a) Tanbasá mak ita bele sente agradese kona-ba knaar neʼebé Noé no Moisés kumpre? (b) Knaar neʼebé Maromak fó ba ema lori buat rua saida?

⁴ Kleur antes Jesus mai iha rai, Jeová fó knaar ba ema atu halo sira kontente. Maski Adão no Eva la kumpre sira-nia knaar, maibé ema barak kumpre duni buat neʼebé Maromak haruka sira atu halo. (Gênesis [Kejadian] 1:28) Jeová fó mandamentu ba Noé atu harii arka neʼebé sei salva nia no ninia família husi Rai-Nabeen. Noé halo tuir duni buat hotu neʼebé Jeová dehan. Ita moris ohin loron tanba Noé halo tuir didiʼak Jeová nia mandamentu sira.—Gênesis (Kejadian) 6:14-16, 22; 2 Pedro 2:5.

⁵ Jeová fó mandamentu neʼebé klaru ba Moisés kona-ba oinsá atu harii tenda santu no oinsá atu organiza amlulik sira. Moisés halo tuir duni buat hotu neʼebé Jeová haruka nia atu halo. (Êxodo [Keluaran] 39:32; 40:12-16) Tanba Moisés nia serbisu makaʼas no ninia laran-metin, ida-neʼe lori buat diʼak saida mai ita? Hanesan apóstolu Paulo esplika, tenda santu no arranju amlulik nian mak ilas ba “buat diʼak neʼebé atu mai”.—Ebreu 9:1-5, 9; 10:1.

⁶ Nuʼudar Maromak kumpre ninia hakarak, ninia atan sira simu knaar oioin. Maski sira-nia knaar bele troka, knaar sira-neʼe sempre fó glória ba Jeová no ajuda ema. Jesus halo buat rua neʼe iha ninia serbisu antes nia mai iha rai no kuandu nia iha rai. (João 4:34; 17:4) Ohin loron, kuandu ita halaʼo knaar neʼebé Jeová fó ba ita, ida-neʼe mós sei fó glória ba nia. (Mateus 5:16; Lee 1 Korinto 15:58.) Oinsá mak ida-neʼe loos?

7, 8. (a) Konta toʼok kona-ba serbisu folin-boot neʼebé ema kristaun ohin loron halo. (b) Oinsá mak ita-nia hanoin kona-ba Jeová nia matadalan?

⁷ Ita agradese tebes tanba Jeová konvida ita ema sala-naʼin atu serbisu hamutuk nia nuʼudar ninia maluk serbisu-naʼin. (1 Korinto 3:9) Ema kristaun balu simu knaar atu harii buat ruma, hanesan Noé no Moisés. Balu karik ajuda atu harii fatin ba reuniaun boot sira, Reuniaun-Fatin, no sukursál. Maski ita-nia knaar mak atu hadiʼa Reuniaun-Fatin ka harii sede-jerál iha Warwick, Novaiorke, diʼak atu hafolin knaar espesiál neʼe! (Haree foto iha pájina 23.) Neʼe mak serbisu santu. No maski ema uitoan deʼit mak bele halo serbisu atu harii uma sira, maibé ema kristaun hotu hola parte iha serbisu atu harii iha dalan espirituál. Neʼe mak serbisu haklaken neʼebé fó glória ba Jeová no ajuda ema. (Apóstolu 13:47-49) Maromak nia organizasaun mak tau matan ba serbisu haklaken. Dala ruma neʼe katak ita sei simu knaar foun.

 ⁸ Jeová nia atan sira neʼebé laran-metin sempre prontu atu halo tuir ninia matadalan. (Lee Ebreu 13:7, 17.) Karik ita la komprende razaun hotu tansá ita simu knaar foun ida, maibé diʼak atu apoia ida-neʼe tanba ita hatene katak mudansa neʼe mai husi Jeová no sei lori buat diʼak ba ita.

9. Katuas sira iha kongregasaun hatudu ezemplu diʼak saida?

⁹ Katuas sira hatudu katak sira hakarak duni atu halo Jeová nia serbisu liuhusi dalan neʼebé sira dirije kongregasaun. (2 Korinto 1:24; 1 Tesalónika 5:12, 13) Katuas sira hakarak serbisu makaʼas no halo tuir matadalan, no sira lalais atu halo tuir dalan foun atu haklaken. Sira haree rezultadu diʼak kuandu sira organiza haklaken liuhusi telefone, iha ponte-kais, ka iha fatin públiku, maski ema balu duvida se dalan foun sira-neʼe diʼak ka lae. Porezemplu, pioneiru naʼin-haat iha rai-Alemaña deside atu haklaken iha fatin públiku neʼebé la haklaken ba tempu kleur ona. Sira ida mak katuas ba kongregasaun ida naran Michael, nia dehan katak sira taʼuk loos tanba sira seidauk koko dalan neʼe ba tinan barak ona. Nia dehan: “Karik Jeová haree duni ami-nia taʼuk, tanba nia fó ba ami dadeer neʼebé diʼak tebes no halo ami kontente. Ami haksolok tebes tanba ami halo tuir matadalan iha Ita-nia Serbisu Kristaun no sadere ba Jeová nia ajuda!” Ita mós hakarak koko dalan foun hodi haklaken iha ita-nia área ka lae?

10. Foin lalais neʼe ita-nia organizasaun halo mudansa saida?

¹⁰ Dala ruma iha mudansa iha Betel. Porezemplu, foin lalais neʼe, sukursál kiʼik balu taka no sira-nia serbisu muda fali ba sukursál neʼebé boot. No ida-neʼe kona ema sira neʼebé serbisu iha sukursál sira-neʼe. Maski sira presiza halo mudansa, maibé ikusmai sira haree katak ida-neʼe diʼak. (Eclesiastes [Pengkhotbah] 7:8) Serbisu-naʼin sira-neʼe kontente atu hola parte iha Jeová nia povu nia istória ohin loron.

11-13. Irmaun-irmán sira presiza halo mudansa saida tanba ita-nia organizasaun troka buat balu?

¹¹ Ita bele aprende buat folin-boot husi maluk sira neʼebé uluk serbí iha sukursál kiʼik neʼebé taka ona hodi muda fali ba sukursál boot. Irmaun-irmán barak serbí iha sukursál sira-neʼe ba tinan barak ona. Kaben-naʼin ida neʼebé serbí iha sukursál kiʼik simu knaar atu muda ba Méxiku, neʼebé iha ema Betel barak liu fali. Rogelio dehan: “Atu husik família no belun sira mak buat neʼebé susar.” Irmaun Juan, neʼebé mós simu knaar atu muda ba Méxiku sente katak nia tenke hahú moris foun fali. Nia dehan: “Haʼu presiza buka belun foun. Ida-neʼe presiza mudansa hodi tuir ema seluk nia toman no dalan atu hanoin.”

¹² Kuandu sukursál balu iha rai-Europa taka no tau hamutuk fali ho sukursál seluk, ema Betel barak simu knaar atu muda ba sukursál iha rai-Alemaña. Sira mós hasoru susar tanba la fasil atu husik maluk sira neʼebé iha sira-nia rai. Ema balu neʼebé muda husi rai-Suisa, sira sente lakon tanba la haree tan foho Alps neʼebé furak, no mós sira balu neʼebé muda husi rai-Áustria sira sente la toman ho família neʼebé boot liu.

¹³ Irmaun-irmán sira neʼebé muda ba sukursál iha rai seluk tenke halo mudansa barak. Sira presiza sai toman ho uma foun, maluk serbisu foun, no karik mós knaar foun. Sira mós presiza sai toman ho kongregasaun foun, haklaken-fatin no mós karik língua foun. Halo mudansa sira-neʼe mak laʼós fasil, maibé ema Betel barak prontu atu halo ida-neʼe. Tanbasá? Mai ita haree saida mak sira balu dehan.

14, 15. (a) Ema balun hatudu katak sira hafolin knaar atu serbisu hamutuk ho Jeová hodi halo saida? (b) Oinsá mak sira-nia ezemplu diʼak tebes ba ita?

 ¹⁴ Grethel dehan: “Haʼu simu konvite neʼe tanba neʼe mak dalan atu hatudu ba Jeová katak haʼu hadomi nia hodi la hanoin liu kona-ba rai, uma, ka knaar ruma.” Dayska dehan: “Kuandu haʼu hanoin katak konvite neʼe husi Jeová, haʼu simu ho laran-kontente.” André no Gabriela mós dehan: “Ho ida-neʼe ami haree oportunidade seluk tan atu serbí Jeová hodi husik ba kotuk ami-nia hakarak rasik.” Sira fiar katak kuandu Jeová nia organizasaun halo mudansa, diʼak liu atu simu ida-neʼe ho laran-kontente duké kontra fali.

¹⁵ Kuandu sukursál balu taka, ema Betel barak simu fali knaar nuʼudar pioneiru. Ida-neʼe akontese ba ema Betel barak iha rai-Dinamarka, Noruega, no Suésia kuandu sukursál sira-neʼe sai ida deʼit hodi sai nuʼudar sukursál Eskandinávia. Kaben-naʼin ida naran Florian no Anja dehan: “Ami haree ami-nia knaar foun nuʼudar buat neʼebé diʼak. Ami sente kontente loos atu Jeová uza ami maski iha fatin naran deʼit. Ami sente duni katak ami hetan bensaun barak liu!” Maski ita barak la hasoru situasaun neʼe, ita bele banati-tuir irmaun-irmán sira-neʼe nia hahalok hodi prontu atu halo mudansa no tau uluk Maromak nia Ukun iha ita-nia moris. (Isaías [Yesaya] 6:8) Ita bele fiar katak Jeová sei sempre haraik bensaun ba sira neʼebé hafolin knaar atu serbisu ho nia iha situasaun naran deʼit.

16. (a) Galásia 6:4 haruka ita atu halo saida? (b) Ita iha knaar espesiál saida?

¹⁶ Nuʼudar ema sala-naʼin, dala barak ita koko atu kompara ita-nia an ho ema seluk. Maibé, Maromak nia Liafuan haruka ita atu hanoin deʼit kona-ba saida mak ita rasik bele halo. (Lee Galásia 6:4.) Laʼós ita hotu bele sai katuas kongregasaun, pioneiru, misionáriu, ka serbí iha Betel. Maski buat sira-neʼe mak knaar espesiál,  maibé ida neʼebé espesiál liu mak knaar neʼebé ita hotu simu. Neʼe mak atu haklaken liafuan diʼak, sai Jeová nia maluk serbisu-naʼin. Mai ita hafolin knaar neʼe!

17. Iha mundu aat neʼe, ita hasoru problema saida deʼit? Maibé tanbasá mak ida-neʼe la halo ita sai laran-tun?

¹⁷ Iha mundu aat neʼe, karik ita la bele serbí Jeová iha dalan neʼebé ita hakarak. Karik mosu situasaun neʼebé ita rasik la bele kontrola, hanesan ita iha responsabilidade família nian ka moras ruma. Maibé keta sai laran-tun. Maski ita hasoru problema oioin, ita nafatin bele haklaken kona-ba Jeová nia naran no ninia Ukun. Buat neʼebé importante liu mak ita presiza halo buat neʼebé ita bele halo ba Jeová, no mós halo orasaun atu husu ajuda ba sira neʼebé bele halo buat barak tan. Hanoin-hetan katak ema ida-idak neʼebé hahiʼi Jeová nia naran mak folin-boot ba Nia.

18. Ita hein namanas ba saida? Maibé agora ita iha knaar espesiál saida?

¹⁸ Jeová hili ita atu sai nuʼudar ninia maluk serbisu-naʼin maski ita mak ema sala-naʼin. Neʼe mak knaar neʼebé espesiál tebes hodi bele serbisu hamutuk ho ita-nia Maromak iha loron ikus sira-neʼe! Ita hein namanas ba futuru, ba “moris neʼebé loloos”. No iha neʼebá ita sei haksolok ho moris neʼebé ita la bele hetan agora. Lakleur tan, iha mundu foun, Maromak Jeová sei haraik bensaun ba ita hodi moris ba nafatin ho kontente no dame.—1 Timóteo 6:18, 19.

19. Esperansa furak saida mak Jeová promete ona ba ita?

¹⁹ Ita besik ona atu tama ba mundu foun. Ida-neʼe fó-hanoin ita kona-ba saida mak Moisés hatete ba ema Izraél antes sira tama ba rai neʼebé Maromak Promete. Nia dehan: “Jeová imi-nia Maromak sei haraik bensaun barak ba serbisu neʼebé imi halo ho imi-nia liman.” (Deuteronômio [Ulangan] 30:9) Depois Armajedón, Jeová sei fó mundu neʼe ba sira neʼebé serbisu hamutuk ona ho nia hodi tuir nia promete. Iha tempu neʼebá, ita-nia knaar foun mak atu halo mundu tomak sai jardín furak!