1, 2. Mudansa saida mak Jeová halo iha loron Pentekostes tinan 33? Sé mak sai parte iha Jeová nia nasaun foun neʼe? (Haree dezeñu iha leten.)

 IHA loron Pentekostes tinan 33, Jeová halo mudansa boot ida iha ninia povu nia istória. Nia halo nasaun foun, naran “Izraél Maromak nian”, ka Izraél espirituál nian. (Galásia 6:16) Liuhusi espíritu santu, Jeová hili ema sai parte ba nasaun neʼe. Uluk, Abraão nia bei-oan sira presiza hetan sirkunsizaun, maibé agora apóstolu Paulo dehan katak nasaun foun neʼe la presiza sirkunsizaun ona, tanba sira-nia sirkunsizaun mak iha sira-nia laran liuhusi espíritu santu.—Roma 2:29.

² Ema primeiru neʼebé sai parte ba nasaun neʼe mak Jesus nia apóstolu sira no ninia dixípulu sira hamutuk 100 liu neʼebé halibur iha kuartu ida iha andár leten iha Jeruzalein. (Apóstolu 1:12-15) Maromak fó ninia espíritu santu ba sira hodi sai ninia oan sira. (Roma 8:15, 16; 2 Korinto 1:21) Ida-neʼe hatudu katak Jeová simu Kristu nia sakrifísiu no troka aliansa Ukun-Fuan nian ho aliansa foun ida. (Lucas 22:20; lee Ebreu 9:15.) Ema sira-neʼe sai parte ba Jeová nia nasaun foun, ka ninia povu. Ho Maromak nia espíritu santu, sira bele koʼalia língua oioin hodi hanorin kona-ba “buat furak oioin neʼebé Maromak halo”.—Apóstolu 2:1-11.

3-5. (a) Iha loron Pentekostes, saida mak Pedro dehan ba ema judeu sira? (b) Konta toʼok oinsá mak Izraél espirituál sai barak.

³ Maromak Jeová uza apóstolu Pedro hodi konvida ema judeu no ema neʼebé simu relijiaun judeu nian hodi sai parte iha Ninia nasaun foun, neʼe mak kongregasaun kristaun. Iha loron Pentekostes, Pedro ho aten-brani, dehan ba ema judeu sira katak sira mak oho Jesus no agora sira presiza simu Jesus nuʼudar sira-nia Naʼi no Kristu. Ema judeu sira-neʼe husu ba Pedro saida mak sira tenke halo. Pedro dehan ba sira: “Hakribi sala bá, no imi ida-idak hetan batizmu hodi Jesus Kristu nia naran atu imi-nia sala bele hetan perdua, no imi sei simu prezente neʼebé lalika selu, katak espíritu santu.” (Apóstolu 2:22, 23, 36-38) Iha loron neʼe, maizumenus ema naʼin-3.000 hetan batizmu hodi sai parte ba Izraél espirituál. (Apóstolu 2:41) Apóstolu sira haklaken ho laran-manas nafatin no ema barak tan simu lia-loos. (Apóstolu 6:7) Nasaun foun neʼe sai barak ba beibeik.

⁴ Liutiha neʼe, Jesus nia dixípulu sira komesa haklaken ba ema Samaria. Sira barak simu lia-loos hodi hetan batizmu, maibé iha tempu neʼe sira seidauk simu espíritu santu. Grupu administradór iha Jeruzalein haruka Pedro no João bá vizita ema kristaun foun sira-neʼe. Pedro no João tau liman ba sira, “no sira hahú simu espíritu santu”. (Apóstolu 8:5, 6, 14-17) Nuneʼe, ema Samaria sira-neʼe mós sai parte ba nasaun Izraél espirituál.

⁵ Iha tinan 36, Maromak uza Pedro hodi konvida grupu seluk sai parte ba nasaun Izraél foun. Pedro haklaken ba Cornélio, kapitaun ida ba tropa Roma nian, no ninia família ho kolega sira. (Apóstolu 10:22, 24, 34, 35) Bíblia dehan: “Nuʼudar Pedro koʼalia daudaun . . . , espíritu santu tun ba sira hotu neʼebé rona Maromak nia liafuan. No fiar-naʼin judeu sira neʼebé mai hamutuk ho Pedro, sira hakfodak tanba ema husi nasaun seluk mós simu Maromak nia prezente neʼebé lalika selu, katak espíritu santu.” (Apóstolu 10:44, 45) Husi tempu neʼebá, ema neʼebé laʼós judeu no la hetan sirkunsizaun mós bele sai parte husi Izraél espirituál.

6, 7. Nuʼudar povu ida ba Jeová nia naran, nasaun foun neʼe halo saida?

⁶ Iha tinan 49, bainhira ema kristaun sira-nia grupu administradór halibur hamutuk, dixípulu Tiago hatete: “Simeaun [Pedro] konta ona buat hotu kona-ba oinsá ba dala primeiru Maromak fila oin ba ema husi nasaun seluk atu foti povu ida ba nia naran.” (Apóstolu 15:14) Povu foun neʼebé lori Jeová nia naran inklui ema judeu sira no mós ema neʼebé laʼós judeu. (Roma 11:25, 26a) Pedro hakerek: “Uluk imi laʼós nuʼudar povu, maibé agora imi mak Maromak nia povu.” Hodi esplika objetivu ba nasaun foun, Pedro hatete: “Imi mak ‘suku neʼebé Maromak hili ona, no imi mak amlulik sira neʼebé serbí nuʼudar liurai, nasaun  santu ida, no povu neʼebé nia hili ba nia an rasik, atu nuneʼe imi tenke fó sai kona-ba kmanek’ husi ida neʼebé bolu imi atu sai husi nakukun hodi tama fali ba naroman neʼebé furak.” (1 Pedro 2:9, 10) Nasaun foun neʼe sei sai Jeová nia testemuña sira hodi hahiʼi nia ho aten-brani nuʼudar Ukun-Naʼin Boot Liu Hotu.

⁷ Jeová bolu nasaun foun neʼe ‘povu neʼebé haʼu halibur ba haʼu-nia an hodi sira bele hanaʼi haʼu-nia glória’. (Isaías [Yesaya] 43:21) Sira la taʼuk hodi haklaken ba ema hotu katak Jeová mak Maromak loos mesak deʼit no katak maromak sira seluk mak falsu. (1 Tesalónika 1:9) Sira fó sasin kona-ba Jeová no Jesus “iha Jeruzalein, iha Judeia tomak no iha Samaria, no toʼo rai nia rohan”.—Apóstolu 1:8; Koloso 1:23.

8. Avizu saida mak apóstolu Paulo fó sai ba Maromak nia povu?

⁸ Apóstolu Paulo haklaken kona-ba Jeová ho aten-brani. Nia defende Jeová nuʼudar Maromak loos mesak deʼit bainhira nia koʼalia ho ema neʼebé hanorin filozofia. Nia hatete katak ‘Maromak mak halo mundu no buat hotu neʼebé iha nia’ no nia mak “Naʼi ba lalehan no rai”. (Apóstolu 17:18, 23-25) Paulo mós fó sai avizu neʼe ba kongregasaun: “Haʼu hatene katak depois haʼu bá tiha, asu-fuik sira sei tama iha imi-nia leet no sei halo aat ba bibi-lubun neʼe, no husi imi-nia leet rasik sei mosu mane sira neʼebé sei koʼalia lia-bobar oioin hodi dada sees dixípulu sira atu tuir sira.” (Apóstolu 20:29, 30) Antes apóstolu sira hotu mate, ema barak mós komesa ona kontra lia-loos.—1 João 2:18, 19.

9. Liutiha apóstolu sira-nia tempu, saida mak akontese ba Maromak nia povu?

⁹ Apóstolu Paulo nia liafuan sira sai loos duni. Liutiha sira-nia tempu, ema soe-fiar neʼebé kontra lia-loos habelar lia-bosok iha kongregasaun oioin. Ikusmai sira harii relijiaun kristaun sira. Ema kristaun falsu sira-neʼe laʼós povu ida ba Maromak nia naran. Tuir loloos sira mós hasai Maromak nia naran husi sira-nia tradusaun Bíblia sira. Sira halo hahalok aat neʼebé la hahiʼi Maromak. Porezemplu, buat neʼebé sira hanorin la tuir Bíblia no sira halo tuir selebrasaun oioin husi ema jentiu sira-nian. Sira hatete katak Maromak mak haruka sira halo funu kruzada. Sira mós halo hahalok la morál oioin. Durante tinan atus ba atus nia laran husi tempu apóstolu sira hotu mate tiha, iha ema uitoan deʼit neʼebé adora Jeová iha dalan neʼebé loos, entaun la iha povu ida iha rai neʼebé organiza nuʼudar “povu ida ba nia naran”.

10, 11. (a) Saida mak Jesus hatete kona-ba “trigu” no “duʼut aat”? (b) Iha dalan saida mak Jesus nia ai-knanoik sai loos depois tinan 1914?

¹⁰ Jesus koʼalia ai-knanoik ida kona-ba trigu ho duʼut aat hodi esplika katak ema neʼebé kontra lia-loos sei halo susar ba ema seluk atu rekoñese relijiaun neʼebé loos. Nia dehan katak “kuandu ema hotu toba”, Diabu sei kari duʼut aat iha toʼos neʼebé Oan-Mane kari ona fini trigu nian. Trigu no duʼut aat neʼe moris hamutuk toʼo “mundu nia loron ikus sira”. Jesus esplika katak “fini diʼak” reprezenta “Ukun lalehan nia oan sira”, no “duʼut aat mak aat-naʼin nia oan sira”. Iha loron ikus sira, Oan-Mane sei haruka anju sira hodi haketak duʼut aat husi trigu. Depois neʼe mak anju sira sei halibur Ukun lalehan nia oan sira. (Mateus 13:24-30, 36-43) Oinsá mak ida-neʼe akontese? No ida-neʼe iha ligasaun ho Jeová halibur povu ba ninia an ka lae?

¹¹ “Mundu nia loron ikus sira” komesa iha tinan 1914 no iha tempu neʼebá, Ukun lalehan nia oan sira, ka ema kose-mina sira mak uitoan deʼit. Durante Funu Mundiál  Primeiru neʼebé komesa iha tinan neʼe, irmaun-irmán sira-neʼe hanesan atan ba Babilónia Boot, tanba sira la bele halaʼo sira-nia serbisu haklaken. Maibé iha tinan 1919 Jeová husik sira sai livre. Nia halibur Ukun lalehan nia oan sira-neʼe hodi organiza sira sai ninia povu. Neʼe tuir Isaías nia profesia neʼebé dehan: “Bele ka lae, rai ida mosu iha loron ida deʼit, ka nasaun ida harii iha tempu ida deʼit? Maibé kuandu Siaun foin knotak moras deʼit, nia hahoris oan-mane barak kedas.” (Isaías [Yesaya] 66:8) Iha eskritura neʼe, Siaun mak Jeová nia organizasaun parte lalehan nian. Siaun hahoris ninia oan-mane sira bainhira Maromak Jeová halo ema kose-mina sai hanesan nasaun ida iha mundu. Iha tempu neʼebá, ema bele haree ho klaru sé mak ema kristaun loos no sé mak ema kristaun falsu sira.

12. Oinsá mak ema kose-mina hatudu katak sira mak povu ida ba Jeová nia naran?

¹² Hanesan ema kristaun sira husi tempu uluk, “Ukun lalehan nia oan sira” mós sai Jeová nia testemuña sira. (Lee Isaías [Yesaya] 43:1, 10, 11. a) Sira la hanesan ho relijiaun sira seluk tanba sira hatudu hahalok diʼak no fó “sasin ba nasaun hotu”. (Mateus 24:14; Filipe 2:15) Sira ajuda ona ema rihun ba rihun hakbesik ba Jeová.—Lee Daniel 12:3. b

13, 14. Ema neʼebé laʼós parte husi Izraél espirituál presiza halo saida hodi Jeová simu sira-nia adorasaun? Profeta sira hatete saida kona-ba neʼe?

¹³ Iha lisaun uluk dehan katak bainhira ema neʼebé laʼós ema Izraél adora Jeová hamutuk  ho ninia povu, Jeová kontente simu sira-nia adorasaun. (1 Reis [Raja-Raja] 8:41-43) Nuneʼe mós, ohin loron ema kristaun sira neʼebé laʼós parte husi nasaun Izraél espirituál mós presiza adora Jeová hamutuk ho “Ukun lalehan nia oan sira”, katak ema kose-mina sira.

¹⁴ Profeta rua fó-hatene nanis katak iha loron ikus sira, ema barak sei adora Jeová hamutuk ho ninia povu. Isaías hatete: “Povu barak sei bá duni no dehan: ‘Mai, imi hotu, no mai ita saʼe ba Jeová nia foho, ba Jacob nia Maromak nia uma, no nia sei hanorin ita kona-ba nia dalan sira, no ita sei laʼo iha ninia dalan sira.’ Basá Siaun sei fó sai ukun-fuan, no Jeruzalein sei fó sai Jeová nia liafuan.” (Isaías [Yesaya] 2:2, 3) Profeta Zacarias hatete: “Ema barak no nasaun forte sira sei mai iha Jeruzalein hodi buka Jeová, ukun-naʼin ba tropa lalehan nian, hodi buka Jeová nia laran-diʼak.” Grupu neʼe sei mai husi “lian hotu husi nasaun sira”. Sira sei adora Maromak hamutuk ho Izraél espirituál hodi hatete: “Ami hakarak bá hamutuk ho imi, tanba ami rona ona katak Maromak hamutuk ho imi.”—Zacarias (Zakharia) 8:20-23.

15. Bibi seluk bá hamutuk ho Izraél espirituál neʼe katak sá?

¹⁵ Ema neʼebé parte husi grupu bibi seluk “bá hamutuk” ho Izraél espirituál hodi haklaken liafuan diʼak kona-ba Maromak nia Ukun. (Marcos 13:10) Sira mós sai parte iha Maromak nia povu. Sira, hamutuk ho ema kose-mina sira mak “luhan ida deʼit” neʼebé “bibi-atan diʼak” mak dirije.—Lee João 10:14-16.

16. Oinsá mak Armajedón sei hahú?

¹⁶ Bainhira Babilónia Boot lakon ona, ema sei ataka Maromak nia povu. Iha tempu neʼebá, ita hotu presiza protesaun husi Maromak Jeová. Iha tempu neʼebé Maromak hili tiha ona, Jeová sei dirije situasaun iha mundu hodi ikusmai ema sei ataka ninia povu. Ida-neʼe sei hahú parte ikus husi “terus boot”, neʼe mak Armajedón. (Mateus 24:21; Ezequiel [Yehezkiel] 38:2-4) Gog, ka Satanás, sei ataka Maromak nia povu. (Ezequiel [Yehezkiel] 38:10-12) Maibé bainhira ida-neʼe akontese, Jeová sei salva ninia povu no halo funu hasoru Gog. Iha tempu neʼebá, Jeová sei hatudu katak nia deʼit mak iha direitu atu ukun no nia sei halo santu ninia naran. Jeová hatete: “Haʼu sei hahiʼi haʼu an no halo haʼu an sai santu no fó-hatene kona-ba haʼu-nia an iha nasaun barak nia oin; no sira sei hatene katak haʼu mak Jeová.”—Ezequiel (Yehezkiel) 38:18-23.

17, 18. (a) Bainhira Gog ataka Maromak nia povu, matadalan saida mak Jeová sei fó ba ita? (b) Saida mak ita presiza halo hodi Jeová bele proteje ita?

¹⁷ Bainhira Gog ataka Maromak nia povu, Jeová sei dehan ba ninia povu: “Bá, haʼu-nia povu, tama ba ó-nia kuartu laran, no taka tiha odamatan. Subar an ba tempu uitoan toʼo Maromak nia hirus liu tiha.” (Isaías [Yesaya] 26:20) Durante tempu neʼe, Jeová sei fó matadalan ba ita hodi ita bele hetan salvasaun. Iha eskritura neʼe, karik kuartu neʼe mak refere ba ita-nia kongregasaun sira.

¹⁸ Se ita hakarak hetan protesaun durante tempu terus boot, ita tenke rekoñese katak Jeová iha povu neʼebé reprezenta nia iha mundu neʼe no organiza sira sai kongregasaun ida-idak. Ita presiza apoia Maromak nia povu no halibur hamutuk ho irmaun-irmán sira iha ita-nia kongregasaun. Ho laran tomak, mai ita hatete liafuan hanesan ema neʼebé hakerek Salmo dehan: “Salvasaun mai husi Jeová. Ita-nia bensaun hela ho Ita-nia povu.”—Salmo (Mazmur) 3:8.